Ko ha Palataisi Foʻou ʻi Māmani

SIO ki he ʻuluʻakau lalahi, ngaahi matalaʻiʻakau fakaʻofoʻofa mo e ngaahi moʻunga māʻolungá. ʻIkai ʻoku fakaʻofoʻofa heni? Sio ki he kai ʻa e tiá mei he nima ʻo ha kiʻi tamasiʻi. Pea sio atu ki he fanga laione mo e fanga hoosi ʻoku nau tuʻu mai ʻi he feituʻu musie leleí. ʻIkai te ke fie nofo ʻi ha fale ʻi ha feituʻu ʻo hangē ko ʻení?

ʻOku fiemaʻu ʻe he ʻOtuá ke ke moʻui taʻengata ʻi māmani ʻi ha palataisi. Pea ʻoku ʻikai te ne fiemaʻu koe ke ke maʻu ʻa e ngaahi langa mo e ngaahi mamahi ʻoku faingataʻaʻia ai ʻa e kakai ʻi he ʻaho ní. Ko e talaʻofa ʻeni ʻa e Tohitapú kiate kinautolu te nau moʻui ʻi he palataisi foʻoú: ‘ʻE ʻiate kinautolu ʻa e ʻOtuá. ʻE ʻikai ke toe ʻi ai ha mate pe tangi pe mamahi. Kuo mole atu ʻa e ngaahi meʻa motuʻá.’

Ko Sīsū te ne fakapapauʻi ʻe hoko ʻa e liliu fakaʻofoʻofa ko ʻení. ʻOkú ke ʻilo ʻe hoko ia ʻafē? ʻIo, ʻi he hili ʻene fakamaʻa mei he māmaní ʻa e kovi kotoa pē mo e kakai koví. Manatuʻi, ʻi he taimi naʻe ʻi māmani ai ʻa Sīsuú naʻá ne fakamoʻui ʻa e kakai mei he faʻahinga mahaki kotoa pē, pea aʻu ʻo ne fokotuʻu ʻa e kakai mei he maté. Naʻe fai ʻeni ʻe Sīsū ke fakahā ʻa e meʻa te ne fai ʻi he māmaní hono kotoa ʻi heʻene hoko ko e Tuʻi ʻo e puleʻanga ʻo e ʻOtuá.

Kiʻi fakakaukau ki he lelei ke moʻui ʻi he palataisi foʻou ʻi he māmaní! ʻE pule ʻi hēvani ʻa Sīsū, fakataha mo e niʻihi kuó ne filí. Ko e kau pule ko ʻení te nau tokangaʻi ʻa e tokotaha kotoa pē ʻi he māmaní pea fakapapauʻi ʻoku nau fiefia. Tau sio ange pe ko e hā ʻoku fiemaʻu ke tau fai ke fakapapauʻi ʻe ʻomai ʻe he ʻOtuá kiate kitautolu ʻa e moʻui taʻengata ʻi heʻene palataisi foʻoú.