ʻUhinga Naʻe Hola Ai ʻa Mōsesé

SIO kia Mōsese ʻokú ne hola mei ʻIsipite. ʻOkú ke sio ki he ongo tangata ʻokú na tuli iá? ʻOkú ke ʻilo hono ʻuhinga ʻokú na fiemaʻu ai ke tāmateʻi ʻa Mōsesé? Tau feinga ke ʻilo ʻa hono ʻuhingá.

Naʻe tupu hake ʻa Mōsese ʻi he fale ʻo Felo, ko e pule ia ʻo ʻIsipité. Naʻá ne hoko ko e tangata lahi mo poto ʻaupito. Naʻe ʻilo ʻe Mōsese ʻoku ʻikai ko ha ʻIsipite ia, ka ko ʻene ongo mātuʻa moʻoní ko e ongo pōpula ʻIsileli.

ʻI he ʻaho ʻe taha, ʻi hono taʻu 40, naʻe fakakaukau ʻa Mōsese ke ʻalu ʻo sio pe ʻoku fēfē ʻa e anga ʻo e nofo ʻa hono kakaí. Naʻe fuʻu fakamamahi ʻa e meʻa naʻe hoko kiate kinautolú. Naʻá ne sio ki ha tangata ʻIsipite naʻá ne tā ha pōpula ʻIsileli. Naʻe sio holo ʻa Mōsese, pea ʻi he ʻikai ha taha ʻoku sio maí, naʻá ne taaʻi ʻa e tokotaha ʻIsipité, pea naʻe mate ia. Pea naʻe tanu leva ʻe Mōsese ʻa e ʻangaʻangá ni ʻi he ʻoneʻoné.

ʻI he ʻaho hono hokó naʻe toe ʻalu ʻa Mōsese ʻo sio ki hono kakaí. Naʻá ne fakakaukau te ne lava ʻo tokoniʻi kinautolu ke ʻoua te nau toe hoko ko e kau pōpula. Ka naʻá ne sio ki ha ongo tangata ʻIsileli ʻokú na fuhu, ko ia naʻe lea ʻa Mōsese ki he tangata naʻe halaiá: ‘Ko e hā ʻokú ke taaʻi ai ho tokouá?’

Naʻe pehē ʻe he tangata: ‘Ko hai naʻá ne ʻai koe ko homau pule mo fakamaau? Te ke tāmateʻi au ʻo hangē ko hoʻo tāmateʻi ʻa e tangata ʻIsipité?’

Naʻe kamata leva ke ilifia ʻa Mōsese. Naʻá ne ʻilo kuo ʻiloʻi ʻe he kakaí ʻa ʻene meʻa naʻe fai ki he tangata ʻIsipité. Naʻe aʻu foki ʻo fanongo ai ʻa Felo, peá ne fekau ʻa e kau tangata ke nau tāmateʻi ʻa Mōsese. Ko hono ʻuhinga ia naʻe pau ke hola ai ʻa Mōsese mei ʻIsipité.

ʻI he mavahe ʻa Mōsese mei ʻIsipité, naʻá ne ʻalu ki he fonua mamaʻo ko Mitiane. ʻI he fonua ko ʻení naʻá ne feʻiloaki ai mo e fāmili ʻo Setelō, pea naʻe mali ai ia mo e taha ʻo hono ngaahi ʻofefiné naʻe hingoa ko Sīpola. Naʻe hoko ʻa Mōsese ko e tauhi-sipi pea naʻá ne tauhi mo tokangaʻi ʻa e fanga sipi ʻa Seteloó. Naʻá ne nofo ʻi he fonua ko Mitiané ʻi he taʻu ʻe 40. Kuo aʻu ʻeni ki hono taʻu 80. Pea ʻi he ʻaho ʻe taha, lolotonga ʻa e nofo ʻa Mōsese ʻo tokangaʻi ʻa e fanga sipi ʻa Seteloó, naʻe hoko ha meʻa fakaofo naʻá ne liliu lahi ʻa e moʻui ʻa Mōsesé. Hukeʻi ʻa e peesí, pea te tau sio ai pe ko e hā ʻa e meʻa fakaofo ko ʻení.