Ko e ʻUhinga Naʻe Mole Ai Hona ʻApí

SIO ki he meʻa ʻoku hokó. ʻOku tuku atu ki tuʻa ʻa ʻĀtama mo ʻIvi mei he ngoue fakaʻofoʻofa ko ʻĪtení. ʻOkú ke ʻilo hono ʻuhingá?

Koeʻuhi he naʻá na fai ʻa e meʻa naʻe kovi ʻaupito. Ko ia ai, naʻe tautea ai kinaua ʻe Sihova. ʻOkú ke ʻilo ʻa e meʻa naʻe kovi naʻe fai ʻe ʻĀtama mo ʻIví?

Naʻá na fai ʻa e meʻa naʻe tala ʻe he ʻOtuá ke ʻoua te na fai. Naʻe fakahā ʻe he ʻOtuá kiate kinaua ʻe lava ke na kai mei he ngaahi ʻakau ʻo e ngoué. Ka naʻe pehē ʻe he ʻOtuá ke ʻoua te na kai mei he fuʻu ʻakau ʻe taha, naʻa na mate. Naʻe tuku ʻe he ʻOtuá ʻa e fuʻu ʻakau ko ʻení maʻana pē. Pea ʻoku tau ʻilo ʻoku kovi ke tau toʻo ha meʻa ʻa ha tokotaha kehe, ʻikai ko ia? Sai, ko e hā ʻa e meʻa naʻe hokó?

ʻI he nofo toko taha ʻa ʻIvi ʻi he ngoué ʻi ha ʻaho ʻe taha, naʻe lea ha ngata kiate ia. Fakakaukau ange ki ai! Naʻá ne tala ange kia ʻIvi ke ne kai ʻa e fua ʻo e ʻakau naʻe tala ʻe he ʻOtuá ke ʻoua te na kaí. Ka, ʻi he taimi naʻe ngaohi ai ʻe Sihova ʻa e fanga ngatá naʻe ʻikai te ne ʻai kinautolu ke nau lava ʻo lea. Ko ia ʻoku ʻuhinga ʻeni naʻe ʻi ai ha tokotaha kehe naʻá ne ʻai ʻa e ngatá ke lava ʻo lea. Ko hai nai ia?

Naʻe ʻikai ko ʻĀtama ia. Ko ia kuo pau pē ko e taha ʻo e faʻahinga naʻe ngaohi ʻe Sihova ki muʻa fuoloa peá ne toki ngaohi ʻa e māmaní. Ko e faʻahinga ko iá ko e kau ʻāngelo, pea ʻoku ʻikai lava ke tau mamata kiate kinautolu. Ko e ʻāngelo ko ʻení ʻe taha naʻe hoko ʻo loto-mahikihiki ʻaupito. Naʻe kamata ke ne fakakaukau ʻoku totonu ke ne hoko ko ha pule ʻo hangē ko e ʻOtuá. Peá ne fiemaʻu ʻa e kakaí ke talangofua ange ki ai kae ʻikai kia Sihova. Ko ia ʻa e ʻāngelo naʻá ne ʻai ʻa e ngatá ke leá.

Naʻe malava ʻa e ʻāngelo ko ʻení ʻo kākaaʻi ʻa ʻIvi. ʻI heʻene tala kia ʻIvi te ne hoko ʻo tatau mo e ʻOtuá ʻo kapau te ne kai ʻa e fuaʻiʻakaú, naʻe tui ki ai ʻa ʻIvi. Ko ia naʻá ne kai, pea pehē foki mo ʻĀtama. Naʻe talangataʻa ʻa ʻĀtama mo ʻIvi ki he ʻOtuá, pea ko e ʻuhinga ia naʻe mole ai hona ʻapi ko e ngoue fakaʻofoʻofá.

Ka ʻe ʻi ai ʻa e ʻaho ʻe ʻai ʻe he ʻOtuá ke hoko ʻa e māmaní kotoa ke fakaʻofoʻofa ʻo hangē ko e ngoue ko ʻĪtení. Te tau toki ako ʻamui ange ki he anga ʻo haʻo malava ke kau ki he ngāué ni. Ka ʻi he taimí ni, te tau vakai atu ki he meʻa naʻe hoko kia ʻĀtama mo ʻIví.