Ko e Tuʻi Poto ko Solomoné

NAʻE kei talavou ʻa Solomone ʻi he taimi naʻe hoko ai ko e tuʻí. Naʻá ne ʻofa kia Sihova, pea naʻá ne muimui ʻi he akonaki lelei naʻe fai ʻe heʻene tamai ko Tēvitá kiate iá. Naʻe leleiʻia ʻa Sihova ʻia Solomone, ko ia ʻi he pō ʻe taha naʻá ne pehē kiate ia ʻi ha misi: ‘Solomone, ko e hā ʻa e meʻa ʻokú ke fiemaʻu ke u foaki atu kiate koe?’

ʻI he meʻá ni naʻe tali ʻe Solomone: ‘ʻE Sihova ko hoku ʻOtua, ʻoku ou kei taʻu siʻi pea ʻoku ʻikai te u ʻilo ʻa e anga ʻo e pulé. Ko ia foaki kiate au ʻa e poto ke u taki ʻaki hoʻo kakaí ʻi he founga ʻoku totonú.’

Naʻe lelei kia Sihova ʻa e kole ʻa Solomoné. Ko ia naʻá Ne pehē: ‘Koeʻuhi ko hoʻo kole ʻa e potó kae ʻikai ko haʻo moʻui fuoloa pe ke ke koloaʻia, te u foaki kiate koe ha poto lahi ange ia ʻi he tokotaha kotoa pē kuo moʻui. Ka te u toe foaki atu mo ia naʻe ʻikai te ke kole ki aí, fakatouʻosi ʻa e koloaʻia mo e lāngilangi.’

Naʻe ʻosi ha taimi siʻi mei ai mo e haʻu ha ongo fefine kia Solomone mo ʻena palopalema faingataʻa. Naʻe fakamatala ʻe ha tokotaha ʻiate kinaua: ‘Ko e fefine ko ē mo au ʻokú ma nofo pē ʻi ha fale pē ʻe taha. Naʻá ku fāʻeleʻi ha tama tangata, pea ʻi he ʻosi ʻa e ʻaho ʻe ua pea naʻá ne fāʻeleʻi mo ia ha pēpē tangata. Pea ʻi he pō ʻe taha naʻe mate ʻene pēpeé. Ka ʻi he lolotonga ʻo ʻeku maʻu mohé, naʻá ne tuku leva ʻene pēpē kuo maté ki hoku tafaʻakí pea naʻá ne toʻo ʻe ia ʻeku pēpeé. ʻI heʻeku ʻā hake ʻo sio ki he tama kuo maté, naʻá ku sio ʻoku ʻikai ko ʻeku tamá ia.’

ʻI he meʻa ko ʻení naʻe pehē ʻe he fefine ʻe tahá: ‘ʻIkai! Ko e tama ʻoku kei moʻuí ko e tama ia ʻaʻaku, ka ko e tamasiʻi maté ko e tama ia ʻaʻana!’ Naʻe tali ange ʻe he ʻuluaki fefiné: ‘ʻIkai! Ko e tamasiʻi kuo maté ʻoku ʻaʻau ia, pea ko e tamasiʻi moʻuí ʻoku ʻaʻaku!’ Ko e anga ʻeni ʻa e fakakikihi ʻa e ongo fefiné. Ko e hā ʻa e meʻa naʻe fai ʻe Solomoné?

Naʻá ne fekau ke ʻomai ha heletā, pea ʻi hono ʻomai iá naʻá ne pehē: ‘Fahi ua ʻa e kiʻi pēpē moʻuí, pea ʻoange ki he ongo fefiné ke na taki taha.’

Naʻe tangi ʻa e faʻē moʻoni ʻa e kiʻi pēpeé ʻo pehē: ‘ʻIkai! Kātaki ʻoua ʻe tāmateʻi ʻa e pēpeé. Foaki ange ia maʻana!’ Ka naʻe pehē ʻe he fefine ia ʻe tahá: ‘ʻOua ʻe ʻomai ia ki ha taha ʻiate kimaua; fahi ua ia.’

Naʻe toki lea leva ʻa Solomone: ‘ʻOua ʻe tāmateʻi ʻa e tamá! Foaki ia ki he ʻuluaki fefiné. Ko e faʻē moʻoní ia.’ Naʻe ʻilo ʻeni ʻe Solomone koeʻuhi he ko e faʻē moʻoní ʻokú ne ʻofa ʻaupito ʻi heʻene pēpeé pea naʻá ne loto-lelei ke foaki ia ki he fefine ʻe tahá, kaeʻoua ʻe tāmateʻi ʻa e pēpē. ʻI he fanongo ʻa e kakaí ki he anga ʻo hono fakaleleiʻi ʻe Solomone ʻa e palopalemá, naʻa nau fiefia ko ʻenau maʻu ha tuʻi poto pehē.

ʻI he lolotonga ʻo e pule ʻa Solomoné, naʻe tāpuakiʻi ʻe he ʻOtuá ʻa e kakaí ʻaki ʻene ʻai ʻa e kelekelé ke tupu mei ai ʻa e uite mo e paʻale, kālepi mo e fiki mo e ngaahi meʻakai kehekehe. Naʻe teunga lelei ʻa e kakaí mo nofo ʻi he ngaahi fale lelei. Naʻe hulu ʻi he fiemaʻú ʻa e ngaahi meʻa lelei ki he tokotaha kotoa pē.