Naʻe Faiako ʻa Sīsū ʻi he Moʻungá

SIO kia Sīsū ʻoku tangutu heni. ʻOkú ne akoʻi ʻa e kakai kotoa ko ʻení ʻi ha moʻunga ʻi Kāleli. Ko kinautolu ʻoku nofo ofi kiate iá ko ʻene kau ākongá. Naʻá ne fili ʻa e toko 12 meiate kinautolu ko e kau ʻapositolo. Ko e kau ʻapositoló ko e kau ākonga makehe ia ʻa Sīsū. ʻOkú ke ʻilo honau ngaahi hingoá?

Naʻe ʻi ai ʻa Saimone Pita mo hono tokoua ko ʻAnitelū. Pea ʻi ai mo Sēmisi mo Sione, ko e ongo tokoua mo ia foki. Ko e ʻapositolo ʻe taha naʻe hingoa foki ko Sēmisi, pea mo e toe tokotaha naʻe ui foki ko Saimone. Ko e ongo ʻapositolo ʻe toko ua naʻe hingoa ko Siutasi. Ko e tokotaha ko Siutasi ʻIsikaliote, pea ko e Siutasi ʻe tokotaha naʻe toe ui foki ia ko Tatiusi. Pea naʻe ʻi ai ʻa Filipe mo Nātaniela (naʻe toe ui ko Pātolomiu), pea mo Mātiu mo Tōmasi.

ʻI he foki mai ʻa Sīsū mei Samēliá, naʻe toki fuofua kamata heni ʻa e malanga ʻa Sīsū: ‘ʻOku ofi ʻa e puleʻanga ʻo hēvaní.’ ʻOkú ke ʻilo pe ko e hā ʻa e puleʻanga ko iá? Ko ha founga-pule moʻoni ʻa e ʻOtuá. Ko Sīsū ʻa hono tuʻí. Te ne pule mei hēvani mo fakahoko mai ʻa e melinó ki he māmaní. ʻE hoko ʻa e māmaní hono kotoa ko ha palataisi fakaʻofoʻofa ʻo fakafou mai ʻi he puleʻanga ʻo e ʻOtuá.

ʻOku akoʻi heni ʻe Sīsū ʻa e kakaí ʻo fekauʻaki mo e puleʻangá. Naʻá ne fakamatala: ‘ʻOku totonu ke pehē ni ʻa hoʻomou lotú. Ko ʻemau Tamai ʻoku ʻi hēvani, ke fakalāngilangiʻi ho huafá. Ke hoko mai ho puleʻangá. Ke fai ho finangaló ʻi māmani ʻo hangē ko ia ʻi hēvaní.’ ʻOku ui ʻe he kakai tokolahi ʻa e lotu ko ení ‘Ko e Lotu ʻa e ʻEiki.’ ʻOku ui ia ʻe he niʻihi kehe ko ‘ʻEmau Tamai.’ ʻOku lava ke ke lau ʻa e lotú fakakātoa?

Naʻe toe akoʻi ʻe Sīsū ʻa e kakaí ki he anga ʻoku totonu ke nau fefaiʻakí. Naʻá ne pehē: ‘Fai ki he niʻihi kehé ʻa ia ʻokú ke loto ke nau fai mai kiate koé.’ ʻIkai ʻokú ke saiʻia ʻi he fai anga-ʻofa atu ʻa e niʻihi kehé kiate koé? Ko ia, naʻe pehē ʻe Sīsū, ʻoku totonu ke tau fai anga-ʻofa ki he niʻihi kehé. ʻIkai ʻe mālie ʻi he māmani ko e palataisí ʻi hano fai ʻe he tokotaha kotoa ʻa e meʻa ko ʻení?