ʻOku ʻi Fē ʻa e Kau Maté?

1-3. Ko e hā ʻa e ngaahi fehuʻi ʻoku ʻeke ʻe he kakaí fekauʻaki mo e maté, pea ko e hā ʻa e tali ʻoku ʻomai ʻe he ngaahi lotu kehekehé?

KO E ngaahi fehuʻi eni kuo fakakaukau ʻa e kakaí fekauʻaki mo ia ʻi he laui afeʻi taʻu. Ko e ngaahi fehuʻi mahuʻinga ia. Tatau ai pē pe ko hai kitautolu, pe ko fē ʻoku tau nofo aí, ko e talí ʻoku kaunga ia kiate kitautolu taki taha.

² ʻI he vahe ki muʻá, naʻa tau lāulea ai ki he founga hono fakaava ʻe he feilaulau huhuʻi ʻa Sīsū Kalaisí ʻa e hala ki he moʻui taʻengatá. Naʻa tau toe ako ai ʻoku tomuʻa tala ʻe he Tohi Tapú ha taimi ʻa ia “ʻe ʻikai toe ai ha mate.” (Fakahā 21:4) Lolotonga iá, ʻoku tau mate kotoa pē. “Ko e kau moʻui ʻoku nau ʻilo ai pe te nau pekia,” ko e lau ia ʻa e poto ko Tuʻi Solomoné. (Koheleti 9:5) ʻOku tau feinga ke moʻui ʻi he lōloa taha ʻe ala lavá. Neongo ia, ʻoku tau fifili pe ko e hā ʻe hoko kiate kitautolu ʻi he taimi ʻoku tau mate aí.

³ ʻI he taimi ʻoku mate ai ʻa e faʻahinga ʻoku tau ʻofa aí, ʻoku tau mamahi. Pea ʻoku tau ʻeke nai: ‘Ko e hā kuo hoko kiate kinautolú? ʻOku nau faingataʻaʻia? ʻOku nau leʻohi kitautolu? ʻE lava ke tau tokoni kiate kinautolu? ʻE faifai ange pea tau toe sio kiate kinautolu?’ ʻOku ʻomi ʻe he ngaahi lotu ʻi he māmaní ʻa e tali kehekehe ki he ngaahi fehuʻí ni. ʻOku akoʻi ʻe he ngaahi lotu ʻe niʻihi kapau te ke moʻuiʻaki ha moʻui ʻoku lelei, te ke ʻalu ki hēvani, ka ʻo kapau te ke moʻuiʻaki ha moʻui kovi, te ke vela ʻi ha feituʻu ʻo e fakamamahi. ʻOku akoʻi ʻe he ngaahi lotu kehé ʻo pehē, ʻi he maté, ʻoku hoko atu ai ʻa e kakaí ki he nofoʻanga laumālié ke fakataha ai mo ʻenau fanga kuí. Lolotonga iá ʻoku akoʻi ʻe he ngaahi lotu ʻe niʻihi ʻoku ʻalu ʻa e kau maté ki ha pulotu ke fakamāuʻi pea toki fanauʻi sino foʻou kinautolu, pe toe fanauʻi ʻi ha sino ʻe taha.

 4. Ko e hā ʻa e fakakaukau tefito ʻoku maʻu ʻe he ngaahi lotu lahi ʻo fekauʻaki mo e maté?

⁴ Ko e ngaahi akonaki fakalotu peheé ʻoku nau maʻu kotoa ʻa e foʻi fakakaukau tefito ʻe taha—ko e pehē ʻoku hao atu nai hotau konga ʻi he mate ʻa e sino fakamatelié. Fakatatau ki he meimei lotu kotoa pē, ʻi he kuohilí mo e lolotonga ní, ʻoku tau moʻui hokohoko ʻi ha tuʻunga ʻo taʻengata fakataha mo e malava ke sio, fanongo mo fakakaukau. Neongo ia, ʻe lava fēfē ke hoko iá? Ko hotau ngaahi ongoʻangá, fakataha mo ʻetau ngaahi fakakaukaú, ʻoku fakafehokotaki kotoa ia ki he ngaahi ngāue ʻa hotau ʻutó. ʻI he maté, ʻoku tuʻu ai ʻa e ngāue ʻa e ʻutó. Ko ʻetau ngaahi manatú, ngaahi ongoʻí mo e ngaahi ongoʻangá ʻoku ʻikai te nau hokohoko atu ʻo ʻikai fakafalala ki ha meʻa ʻa ʻenau ngāué ʻi ha faʻahinga founga fakamisiteli. ʻOku ʻikai te nau hao ʻi he maumau ʻa hotau foʻi ʻutó.

5, 6. Ko e hā ʻoku akoʻi ʻe he Tohi Tapú ʻo fekauʻaki mo e tuʻunga ʻo e kau maté?

⁵ Ko e meʻa ʻoku hoko ʻi he maté ʻoku ʻikai misiteli ia kia Sihova, ʻa e Tokotaha-Fakatupu ʻo e foʻi ʻutó. ʻOkú ne ʻafioʻi ʻa e moʻoní, pea ʻi heʻene Folofolá, ʻa e Tohi Tapú, ʻokú ne fakamatalaʻi ai ʻa e tuʻunga ʻo e kau maté. Ko ʻene akonaki mahinó eni: ʻI he taimi ʻoku mate ai ha tahá, ʻoku ngata ʻa ʻene ʻi aí. Ko e maté ko e fehangahangai ia ʻo e moʻuí. ʻOku ʻikai ke sio pe fanongo pe fakakaukau ʻa e kau maté. ʻOku ʻikai hao moʻui atu naʻa mo hatau konga ʻe taha ʻi he mate ʻa e sinó. ʻOku ʻikai ke tau maʻu ha laumālie taʻefaʻamate.a

⁶ Hili hono fakahaaʻi ʻe Solomone ʻoku ʻiloʻi ʻe he kau moʻuí te nau maté, naʻá ne tohi: “Ka ko e kau pekia ʻoku ʻikai te nau ʻilo ha momoʻi meʻa.” Naʻá ne fakalahi leva ʻi he foʻi moʻoni tefito ko iá ʻaki ʻene pehē ko e kau maté ʻoku ʻikai lava ke nau ʻofa pe fehiʻa pea “ʻoku ʻikai ha ngaue, pe ha fakakaukau, pe ha ʻilo, pe ha poto ʻi [he faʻitoká].” (Fakaʻītali ʻamautolu; Koheleti 9:​5, 6, 10) ʻI he founga meimei tatau, ʻoku pehē ʻe he Sāme 146:4 ʻi he taimi ʻoku mate ai ha tangatá, “ko ʻene ngaahi fakakaukau ʻoku mate.” ʻOku tau matengofua pea ʻoku ʻikai ke tau hao moʻui atu ʻi he mate ʻa hotau sinó. Ko e moʻui ʻoku tau maʻú ʻoku hangē ia ko ha ulo ʻa ha foʻi teʻelangó. ʻI he taimi ʻoku tāmateʻi ai ʻa e uló, ʻoku ʻikai ke ʻalu ia ki ha toe feituʻu. ʻOku mole atu pē ia.

 7. Naʻe anga-fēfē hono fakamatalaʻi ʻe Sīsū ʻa e meʻa ʻoku tatau mo e maté?

⁷ Naʻe lea ʻa Sīsū Kalaisi ʻo fekauʻaki mo e tuʻunga ʻo e kau maté. Naʻá ne fai ia ʻi he fekauʻaki mo Lāsalosí, ko ha tangata ʻa ia naʻá ne ʻiloʻi lelei pea naʻá ne mate. Naʻe tala ange ai ʻe Sīsū ki heʻene kau ākongá: “Ko siʻota[u] kaumeʻa ko Lasalosi kuo mohe.” Naʻe fakakaukau ʻa e kau ākongá naʻe ʻuhinga ʻa Sīsuú naʻe mālōlō ʻi he mohé ʻa Lāsalosi, ʻi haʻane fakaakeake mei ha puke. Naʻe hala ʻenau maʻú. Naʻe fakamatala ʻa Sīsū: “Kuo pekia ʻa Lasalosi.” (Sione 11:​11-14) Fakatokangaʻi naʻe fakahoa ʻe Sīsū ʻa e maté ki he mālōlō pea mo e mohe. Naʻe ʻikai ke ʻi hēvani ʻa Lāsalosi pe ʻi ha heli ʻoku vela. Naʻe ʻikai te ne fetaulaki mo e kau ʻāngeló pe ko ʻene fanga kuí. Naʻe ʻikai ke toe fanauʻi ʻa Lāsalosi ko ha toe tangata ʻe taha. Naʻá ne mālōlō ʻi he maté, ʻo hangē naʻá ne ʻi ha mohe maʻu ʻo ʻikai ha misí. ʻOku toe fakahoa ʻe he ngaahi konga Tohi Tapu kehé ʻa e maté ki he mohé. Ko e fakatātaá, ʻi he taimi naʻe tolomakaʻi ai ki he mate ʻa e ākonga ko Sitīvení, ʻoku pehē ʻe he Tohi Tapú naʻá ne “mohe.” (Ngāue 7:60) ʻI he tuʻunga meimei tatau, naʻe tohi ʻa e ʻapositolo ko Paulá fekauʻaki mo e niʻihi ʻi hono ʻahó ʻa ia naʻa nau “mohe” ʻi he maté.—1 Kolinito 15:6.

 8. ʻOku anga-fēfē ʻetau ʻiloʻi naʻe ʻikai ko e taumuʻa ia ʻa e ʻOtuá ki he kakaí ke nau mate?

⁸ Ko e muʻaki taumuʻa ia ʻa e ʻOtuá ki he kakaí ke nau mate? ʻIkai ʻaupito! Naʻe ngaohi ʻe Sihova ʻa e tangatá ke moʻui taʻengata ʻi he māmaní. Hangē ko ia naʻa tau ako ki muʻa ange ʻi he tohí ni, naʻe tuku ʻe he ʻOtuá ʻa e ʻuluaki ongo meʻa fakaetangatá ʻi ha palataisi fakaʻofoʻofa. Naʻá ne tāpuakiʻi kinaua ʻaki ʻa e moʻui lelei haohaoa. Naʻe fiemaʻu pē ʻe Sihova ʻa e lelei maʻanaua. ʻOku fiemaʻu ʻe ha mātuʻa ʻofa ʻa ʻene fānaú ke nau faingataʻaʻia ʻi he mamahi ʻo e taʻumotuʻá pea mo e maté? Ko hono moʻoní ʻoku ʻikai! Naʻe ʻofa ʻa Sihova ʻi heʻene fānaú pea loto ke nau maʻu ʻa e fiefia taʻehanongataʻanga ʻi he māmaní. ʻI he fekauʻaki mo e tangatá, ʻoku pehē ʻe he Tohi Tapú: “Kuo ne ʻai [ʻe Sihova] ʻa itaniti ki honau loto.” (Koheleti 3:11) Naʻe fakatupu kitautolu ʻe he ʻOtuá fakataha mo e holi ke moʻui taʻengata. Pea kuó ne fakaava ʻa e hala ki he holi ko iá ke fakahoko.

 9. Ko e hā ʻa e fakangatangata naʻe tuku ʻe Sihova kia ʻĀtamá, pea ko e hā naʻe ʻikai faingataʻa ai ke talangofua ki he fekau ko ení?

⁹ Ko e hā leva ʻoku mate ai ʻa e tangatá? Ke maʻu ʻa e talí, kuo pau ke tau lāulea ki he meʻa naʻe hokó ʻi he taimi naʻe ʻi ai ai ʻa e tangata pē taha mo e fefine ʻe taha ʻi he māmaní. ʻOku fakamatala ʻa e Tohi Tapú: “Naʻe fakatupu ʻe Sihova Elohimi mei he kelekele ʻa e ʻakau kehekehe naʻe ha fakaʻofoʻofa, pea lelei ki he kai.” (Senesi 2:9) Kae kehe, naʻe ʻi ai ʻa e fakangatangata ʻe taha. Naʻe tala ʻe Sihova kia ʻĀtama: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Senesi 2:​16, 17) Ko e fekau ko ení naʻe ʻikai faingataʻa ke talangofua ki ai. Naʻe ʻi ai ʻa e ngaahi ʻuluʻakau lahi kehe ʻa ia naʻe lava ke kai mei ai ʻa ʻĀtama mo ʻIvi. Ka naʻá na maʻu ʻi he taimi ko ení ha faingamālie makehe ke fakahaaʻi ai ʻena houngaʻia ki he Tokotaha ʻa ia naʻá ne foaki ange kiate kinaua ʻa e meʻa kotoa pē, ʻo kau ai ʻa e moʻui haohaoá. Ko ʻena talangofuá ʻe toe fakahaaʻi ai naʻá na fakaʻapaʻapaʻi ʻa e tuʻunga mafai ʻo ʻena Tamai fakahēvaní pea naʻá na fiemaʻu ʻene tataki anga-ʻofá.

10, 11. (a) Naʻe anga-fēfē ʻa e hoko ʻa e ʻuluaki ongo meʻa fakaetangatá ʻo talangataʻa ki he ʻOtuá? (e) Ko e hā ko ha meʻa mafatukituki ai ʻa e talangataʻa ʻa ʻĀtama mo ʻIví?

¹⁰ Ko e meʻa fakamamahí, he naʻe fili ʻa e ʻuluaki ongo meʻa fakaetangatá ke na talangataʻa kia Sihova. ʻI he lea fakafou ʻi ha ngatá, naʻe ʻeke ai ʻe Sētane kia ʻIvi: “ʻOku moʻoni koā kuo folofola ʻe he ʻOtua ke ʻoua te mo kai mei he ʻakau kehekehe ʻo e ngouetapu?” Naʻe tali ange ʻe ʻIvi: “ʻOku ngofua pe ʻema kai ʻa e fua ʻo e ngaahi ʻakau ʻo e ngouetapu: ka ko e fua ʻo e ʻakau ʻoku ʻi he loto ngoue, kuo folofola ʻa e ʻOtua, ʻE ʻikai te mo kai mei ai, pea ʻe ʻikai te mo ala ki ai, naʻa mo mate.”—Senesi 3:​1-3.

¹¹ “ʻE ʻikai ʻaupito te mo mate,” ko Sētane ange ia. “ʻOku meaʻi ʻe he ʻOtua ko e ʻaho te mo kai ai ʻe ʻa ai homo mata, pea te mo hoko ke hange ko e ʻOtua, hoʻomo ʻilo ʻa e lelei mo e kovi.” (Senesi 3:​4, 5) Naʻe loto ʻa Sētané ke tui ʻa ʻIvi te ne maʻu ʻaonga ʻi heʻene kai ʻa e fuaʻiʻakau naʻe tapuí. Fakatatau kia Sētane, ʻe lava ke fili pē ʻe ʻIvi maʻana ʻa e meʻa naʻe tonú mo e meʻa naʻe halá; ʻe lava ke ne fai ʻa e meʻa naʻá ne loto ki aí. Naʻe toe tukuakiʻi ʻe Sētane ʻo pehē, naʻe loi ʻa Sihova fekauʻaki mo e ngaahi nunuʻa ʻo hono kai ʻo e fuaʻiʻakaú. Naʻe tui ʻa ʻIvi kia Sētane. Ko ia, naʻá ne toli ha fuaʻiʻakau ʻo ne kai. Naʻá ne toe ʻoange leva ha meʻa ki hono husepānití, pea naʻá ne kai mo ia foki mei ai. Naʻe ʻikai te na fai ia ʻi he taʻeʻilo. Naʻá na ʻiloʻi naʻá na fai ʻa e meʻa tofu pē naʻe tala ange ʻe he ʻOtuá ke ʻoua te na faí. ʻI hono kai ʻa e fuaʻiʻakaú, naʻá na talangataʻa fakahangatonu ai ki ha fekau faingofua mo fakaʻatuʻi. Naʻá na fakahaaʻi ai ʻa e taʻetokaʻi ʻo ʻena Tamai fakahēvaní mo hono tuʻunga mafaí. Ko e taʻefakaʻapaʻapa ko ia ki hona Tokotaha-Fakatupu ʻofá naʻe ʻikai ala fakamolemoleʻi!

12. Ko e hā ʻe lava ke ne tokoniʻi kitautolu ke mahinoʻi ʻa e anga ʻo e ongoʻi ʻa Sihová ʻi he taimi naʻe fou ai ʻa ʻĀtama mo ʻIvi ʻi ha ʻalunga ʻo e fakafepaki kiate iá?

¹² Ke fakatātaaʻi: ʻE fēfē hoʻo ongoʻí kapau naʻá ke tauhi hake mo tokangaʻi ha foha pe ko ha ʻofefine peá ne talangataʻa ki mui kiate koe ʻi ha founga naʻe fakahaaʻi ai naʻe ʻikai haʻane fakaʻapaʻapa pe ʻofa kiate koe? ʻE fakatupunga ʻe he meʻa ko iá ke ke loto-mamahi lahi. Fakaʻuta atu leva ki he mamahi kuo pau naʻe ongoʻi ʻe Sihova ʻi he taimi naʻe fou ai ʻa ʻĀtama mo ʻIvi fakatouʻosi ʻi ha ʻalunga ʻo e fakafepaki kiate iá.

13. Ko e hā naʻe folofolaʻaki ʻe Sihova ʻe hoko kia ʻĀtama ʻi he maté, pea ʻoku ʻuhinga ení ki he hā?

¹³ Naʻe ʻikai ha ʻuhinga kia Sihova ke ne fakatolonga ai ʻo taʻengata ʻa e ongo talangataʻa ko ʻĀtama mo ʻIví. Naʻá na mate, ʻo hangē tofu pē ko ia naʻá ne folofolaʻaki ʻe hoko kiate kinauá. Naʻe ngata ʻa e ʻi ai ʻa ʻĀtama mo ʻIví. Naʻe ʻikai te na hoko atu ki ha nofoʻanga laumālie. ʻOku tau ʻiloʻi ení koeʻuhi ko e meʻa naʻe folofolaʻaki ʻe Sihova kia ʻĀtama hili hono ui ia ke ne fakamatala ki heʻene talangataʻá. Naʻe folofola ʻa e ʻOtuá: “[Te] ke foki ki he kelekele ʻa ia naʻe toʻo koe mei ai: he ko e efu koe, pea ko e efu te ke foki ki ai.” (Senesi 3:19) Naʻe ngaohi ʻe he ʻOtuá ʻa ʻĀtama mei he efu ʻo e kelekelé. (Senesi 2:7) Ki muʻa ʻi he meʻa ko iá, naʻe ʻikai ke ʻi ai ha ʻĀtama. Ko ia ai, ʻi he taimi naʻe folofola ai ʻa Sihova ʻe foki ʻa ʻĀtama ki he efú, naʻá Ne ʻuhingá ʻe foki ʻa ʻĀtama ki ha tuʻunga ʻo e ʻikai ke toe ʻi ai. ʻE taʻemoʻui ʻa ʻĀtama ʻo hangē pē ko e efu ʻa ia naʻe ngaohi ia mei aí.

14. Ko e hā ʻoku tau mate aí?

¹⁴ Naʻe mei lava pē ke moʻui ʻa ʻĀtama mo ʻIvi ʻi he ʻahó ni, ka naʻá na mate koeʻuhí naʻá na fili ke talangataʻa ki he ʻOtuá pea ko ia ai naʻá na faiangahala. Ko e ʻuhinga ʻoku tau mate aí he ko e tuʻunga angahalaʻia ʻo ʻĀtamá pea pehē ki he maté naʻe fakahoko mai ia ki he kotoa ʻo hono hakó. (Loma 5:12) Ko e angahala ko iá ʻoku hangē ia ha mahaki fakalilifu kuo tukufakaholo mai ʻa ia heʻikai lava ke hao mei ai ha taha. Ko hono nunuʻá, ʻa e maté, ko ha mala. Ko e maté ko ha fili, ʻo ʻikai ko ha kaumeʻa. (1 Kolinito 15:26) He houngaʻia ē ko kitautolu ʻi hono tokonaki mai ʻe Sihova ʻa e huhuʻí ke fakahaofi ai kitautolu mei he fili kovi fakaʻulia ko ení!

15. Ko e hā ʻoku fakafiemālie ai ke ʻiloʻi ʻa e moʻoni fekauʻaki mo e maté?

¹⁵ Ko e meʻa ʻoku akoʻi ʻe he Tohi Tapú fekauʻaki mo e tuʻunga ʻo e kau maté ʻoku fakafiemālie. Hangē ko ia kuo tau ʻiloʻí, ʻoku ʻikai ke tofanga ʻa e kau maté ʻi ha langa pe loto-mamahi. ʻOku ʻikai ha ʻuhinga ke ilifia ai kiate kinautolu, koeʻuhí heʻikai ke nau lava ʻo fakatupu ha maumau kiate kitautolu. ʻOku ʻikai te nau fiemaʻu ʻetau tokoní, pea ʻe ʻikai lava ke nau tokoniʻi kitautolu. Heʻikai lava ke tau talanoa mo kinautolu, pea heʻikai lava ke nau talanoa mo kitautolu. ʻOku taukaveʻi loi ʻe he kau taki lotu tokolahi ʻe lava ke nau tokoniʻi ʻa e faʻahinga kuo maté, pea ko e kakai ʻoku nau tui ki he kau taki ko iá ʻoku nau ʻoange ʻa e paʻanga kiate kinautolu. Ka ko hono ʻiloʻi ʻa e moʻoní ʻoku maluʻi ai kitautolu mei hono kākaaʻi ʻe he faʻahinga ʻoku nau akoʻi ʻa e ngaahi loi peheé.

16. Ko hai kuó ne tākiekina ʻa e ngaahi akonaki ʻa e ngaahi lotu lahi, pea ʻi he founga fē?

¹⁶ ʻOku loto-tatau ʻa hoʻo lotú mo e meʻa ʻoku akoʻi ʻe he Tohi Tapú fekauʻaki mo e kau maté? Ko e lahi taha ʻo e ngaahi lotú ʻoku ʻikai. Ko e hā hono ʻuhingá? Koeʻuhí ko ʻenau ngaahi akonakí kuo tākiekina ia ʻe Sētane. ʻOkú ne ngāueʻaki ʻa e lotu loí ke ʻai ʻa e kakaí ke nau tui ʻo pehē ʻi he hili ʻa e mate ʻa honau sinó, te nau hokohoko atu ke moʻui ʻi ha nofoʻanga laumālie. Ko ha foʻi loi eni ʻoku fakatahaʻi ʻe Sētane mo e ngaahi loi kehe, ke fakatafokiʻi ʻaki ʻa e kakaí meia Sihova ko e ʻOtuá. ʻO anga-fēfē?

17. Ko e hā ʻoku ʻikai fakalāngilangiʻi ai ʻa Sihova ʻi he akonaki ʻo e fakamamahiʻi taʻengatá?

¹⁷ Hangē ko ia kuo fakatokangaʻi ki muʻá, ʻoku akoʻi ʻe he ngaahi lotu ʻe niʻihi kapau naʻe moʻuiʻaki ʻe ha taha ha moʻui kovi, ʻi he hili ʻa e maté te ne ʻalu ki ha feituʻu ʻo e fakamamahi ʻi ha afi ke ne faingataʻaʻia taʻengata ai. Ko e akonaki ko ení ʻoku ʻikai fakalāngilangiʻi ai ʻa e ʻOtuá. Ko Sihová ko ha ʻOtua ʻo e ʻofa pea ʻe ʻikai ʻaupito te ne ʻai ʻa e kakaí ke nau faingataʻaʻia peheni. (1 Sione 4:8) ʻE fēfē haʻo ongoʻi fekauʻaki mo ha tangata ʻa ia naʻá ne tauteaʻi ha kiʻi tama talangataʻa ʻaki hono pukepuke ʻa hono ongo nimá ʻi ha afi? Te ke fakaʻapaʻapaʻi ha tangata pehē? Ko hono moʻoní, ʻe aʻu ʻo ke loto ke ke hoko ʻo ʻiloʻi ia? ʻIkai ʻaupito! Ngalingali te ke fakakaukau naʻá ne anga-fakamamahi ʻaupito. Neongo ia, ʻoku loto ʻa Sētane ke tau tui ʻoku fakamamahiʻi ʻe Sihova ʻa e kakaí ʻo taʻengata ʻi ha afi—ʻi ha ngaahi taʻu taʻefaʻalaua ʻe laui piliona!

18. Ko e lotu ki he kau maté ʻoku makatuʻunga ia ʻi he foʻi loi fakalotu ko e hā?

¹⁸ ʻOku toe ngāueʻaki ʻe Sētane ha ngaahi lotu ʻe niʻihi ke akoʻi ai ʻi he hili ʻa e maté ʻoku hoko ai ʻa e kakaí ko e ngaahi laumālie ʻa ia kuo pau ke fakaʻapaʻapaʻi mo fakalāngilangiʻi ʻe he kau moʻuí. Fakatatau ki he akonaki ko ení, ko e ngaahi laumālie ʻo e kau maté ʻe lava ke hoko ko e ngaahi kaumeʻa mālohi pe ko e ngaahi fili fakalilifu. ʻOku tui ʻa e kakai tokolahi ki he foʻi loí ni. ʻOku nau manavahē ki he kau maté pea fai kiate kinautolu ʻa e fakalāngilangi mo e lotu. ʻI hono kehé, ʻoku akoʻi ʻe he Tohi Tapú ko e kau maté ʻoku nau mohe pea ʻoku totonu ke tau lotu pē ki he ʻOtua moʻoní, ʻa Sihova, ʻa hotau Tokotaha-Fakatupú mo e Tokotaha-Tokonakí.—Fakahā 4:11.

19. Ko hono ʻiloʻi ʻa e moʻoni fekauʻaki mo e maté ʻoku tokoniʻi ai kitautolu ke mahinoʻi ʻa e akonaki Fakatohitapu kehe fē?

¹⁹ Ko hono ʻiloʻi ʻa e moʻoni fekauʻaki mo e kau maté ʻoku maluʻi ai koe mei hono takihalaʻi ʻe he ngaahi loi fakalotú. ʻOku toe tokoniʻi ai koe ke ke mahinoʻi ʻa e ngaahi akonaki Fakatohitapu kehé. Ko e fakatātaá, ʻi hoʻo ʻiloʻi ʻoku ʻikai ke hoko atu ʻa e kakaí ki he nofoʻanga laumālié ʻi he maté, ʻoku hoko ai ʻa e talaʻofa ʻo e moʻui taʻengata ʻi ha māmani palataisí ʻo ʻuhinga moʻoni kiate koe.

20. Ko e hā ʻa e fehuʻi te tau lāulea ki ai ʻi he vahe hokó?

²⁰ ʻI he taimi fuoloá, naʻe langaʻi hake ai ʻe he tangata māʻoniʻoni ko Siopé ʻa e fehuʻi ko ení: “Ka pekia ha tangata, te ne toe moʻui koa?” (Siope 14:14) ʻE lava ke toe fakafoki ki he moʻuí ha tokotaha taʻemoʻui ʻa ia ʻoku mohe ʻi he maté? Ko e meʻa ʻoku akoʻi ʻe he Tohi Tapú fekauʻaki mo ení ʻoku fakafiemālie lahi, ʻo hangē ko ia ʻe fakahaaʻi ʻi he vahe hokó.