Ko e Hā ʻa e Taumuʻa ʻa e ʻOtuá ki he Māmaní?

 1. Ko e hā ʻa e taumuʻa ʻa e ʻOtuá ki he māmaní?

KO E taumuʻa ʻa e ʻOtuá ki he māmaní ʻoku fakaofo moʻoni. ʻOku fiemaʻu ʻe Sihova ke fakafonuʻaki ʻa e māmaní ʻa e kakai fiefia mo moʻui lelei. ʻOku pehē ʻe he Tohi Tapú “naʻe tō ʻe Sihova Elohimi ha ngouetapu ʻi Iteni” pea naʻá ne “fakatupu . . . ʻa e ʻakau kehekehe naʻe ha fakaʻofoʻofa, pea lelei ki he kai.” Hili hono fakatupu ʻe he ʻOtuá ʻa e ʻuluaki tangatá mo e fefiné, ʻa ʻĀtama mo ʻIvi, naʻá Ne tuku kinaua ki he ʻapi fakalata ko iá peá ne tala ange kiate kinaua: “Mo fakatupu, mo fakatokolahi, mo fakafonu ʻa mamani, pea ikuna ia.” (Senesi 1:28; 2:​8, 9, 15) Ko ia ko e taumuʻa ia ʻa e ʻOtuá ke maʻu ʻe he tangatá ʻa e fānau, fakalahi atu ʻa e ngaahi ngataʻanga ʻo e ʻapi ngoue ko iá ki he kotoa ʻo e māmaní, pea tokangaʻi ʻa e fanga manú.

 2. (a) ʻOku anga-fēfē ʻetau ʻiloʻi ʻe fakahoko ʻa e taumuʻa ʻa e ʻOtuá ki he māmaní? (e) Ko e hā e lau ʻa e Tohi Tapú fekauʻaki mo e moʻui taʻengata ʻa e faʻahinga ʻo e tangatá?

² ʻOkú ke fakakaukau ʻe faifai ange pea fakahoko ʻa e taumuʻa ʻa Sihova ko e ʻOtuá ki he kakaí ke nau moʻui ʻi ha palataisi fakamāmaní? “Kuou fakaha ia,” ko e fanongonongo ia ʻa e ʻOtuá, “bea teu fai ia.” (Aisea 46:​9-11, PM; 55:11) ʻIo, ko e meʻa ʻoku taumuʻa ki ai ʻa e ʻOtuá te ne fai moʻoni! ʻOkú ne folofola “naʻe ʻikai te ne fakatupu ia [ʻa e māmaní] ke maomaonganoa,” ka “naʻa ne faʻu ia ke nofoʻanga.” (Aisea 45:18) Ko e faʻahinga kakai fēfē naʻe fiemaʻu ʻe he ʻOtuá ke nau nofo ʻi he māmaní? Pea ko e hā hono lōloa ʻene fiemaʻu ke nau nofo ʻi hení? ʻOku tali ʻe he Tohi Tapú: “Ko haʻa fai totonu te nau maʻu ʻa e fonua, pea te nau nofo ai ʻo tuputupuʻa.”—Fakaʻītali ʻamautolu; Sāme 37:29; Fakahā 21:​3, 4.

 3. Ko e hā ʻa e ngaahi tuʻunga fakamamahi ʻoku lolotonga hoko ʻi he māmaní, pea ko e hā ʻa e ongo fehuʻi ʻoku langaʻi hake hení?

³ ʻOku hā mahino, kuo teʻeki ai ke hoko eni. ʻOku hoko ʻa e kakaí ʻo puke mo mate he taimí ni; ʻoku aʻu ʻo nau tau mo fetāmateʻaki. Naʻe ʻi ai ʻa e meʻa naʻe fehālaaki. Kae kehe, ko e moʻoni, naʻe ʻikai fakataumuʻa ʻe he ʻOtuá ke hoko ʻa e māmaní ki he meʻa ʻoku tau sio ki ai he ʻaho ní! Ko e hā naʻe hokó? Ko e hā kuo ʻikai ke fakahoko ai ʻa e taumuʻa ʻa e ʻOtuá? ʻOku ʻikai ha tohi hisitōlia kuo hiki ʻe he tangatá ʻe lava ke ne tala mai kiate kitautolu koeʻuhí he ko e faingataʻá naʻe kamata ia ʻi hēvani.

4, 5. (a) Ko hai moʻoni naʻe lea kia ʻIvi fakafou ʻi ha ngatá? (e) ʻE anga-fēfē nai ʻa e lava ke hoko ko ha kaihaʻa ha tokotaha taau mo faitotonu ki muʻa?

⁴ Ko e ʻuluaki tohi ʻo e Tohi Tapú ʻoku fakamatala ai ki ha tokotaha-fakafepaki ki he ʻOtuá ʻa ia naʻe ʻasi hake ʻi he ngoue ko ʻĪtení. ʻOku fakamatalaʻi ia ko e “ngata,” ka naʻe ʻikai ko ha manu pē ia. Ko e tohi fakaʻosi ʻo e Tohi Tapú ʻoku fakahaaʻi ai ia ko e “toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa.” ʻOku toe ui ia ko e “Ngata ʻo ono ʻaho.” (Fakaʻītali ʻamautolu; Senesi 3:1; Fakahā 12:9) Ko e ʻāngelo mālohí ni, pe meʻamoʻui laumālie taʻehāmaí, naʻá ne ngāueʻaki ha ngata ke ne lea kia ʻIvi, ʻo hangē pē ko hono lava ʻe ha taha pōtoʻi ʻo ʻai ke hā ngali ko hono leʻó ē ʻoku haʻu mei ha tamapua ofi mai pe ko ha tokotaha lea fakapuli. Ko e tokotaha laumālie ko iá ʻoku ʻikai ha veiveiua naʻá ne ʻi ai ʻi he taimi naʻe teuʻi ai ʻe he ʻOtuá ʻa e māmaní maʻá e tangatá.—Siope 38:​4, 7.

⁵ Kae kehe, koeʻuhi ko e ngaahi fakatupu kotoa ʻa Sihová ʻoku haohaoa, ko hai naʻá ne ngaohi ʻa e “Tevolo” ko ení, ʻa e “Setane” ko ení? Ko hono ʻai mahinó, ko e taha ʻo e ngaahi foha laumālie mālohi ʻo e ʻOtuá naʻá ne liliu ʻo hoko tonu ko e Tēvoló. Naʻe malava fēfē ení? Sai, ʻi he ʻahó ni ʻe lava ha tokotaha ʻa ia naʻe ʻulungāanga taau mo faitotonu ki muʻa ke hoko ko ha kaihaʻa. ʻOku anga-fēfē ʻene hoko iá? ʻE lava ke fakaʻatā ʻe ha tokotaha ha holi fehālaaki ke tupu ʻi hono lotó. Kapau ʻokú ne hanganaki fakakaukau fekauʻaki mo ia, ʻe lava ke hoko ʻa e holi fehālaaki ko iá ʻo mālohi ʻaupito. Pea kapau ʻoku malanga tonu hake ʻa e faingamālié, te ne ngāue nai ki he holi kovi kuó ne fakakaukau fekauʻaki mo iá.—Semisi 1:​13-15.

 6. Naʻe anga-fēfē ʻa e hoko ʻa ha foha laumālie mālohi ʻo e ʻOtuá ko Sētane ko e Tēvoló?

⁶ Naʻe hoko eni ʻi he tuʻunga ʻo Sētane ko e Tēvoló. ʻOku ngalingali naʻá ne fanongo ki he ʻOtuá ʻi heʻene tala kia ʻĀtama mo ʻIvi ke na maʻu fānau pea ke fakafonu ʻa e māmaní ʻaki ʻena fānaú. (Senesi 1:​27, 28) ‘Ko ē, ko e faʻahinga kotoa ko eni ʻo e tangatá ʻe lava ke nau lotu mai kiate au kae ʻikai ko e ʻOtuá!’ ko e fakakaukau mahino ia ʻa Sētané. Ko ia naʻe langaʻi ai ha holi fehālaaki ʻi hono lotó. Naʻe faifai pē ʻo ne fai ha meʻa ke kākaaʻi ai ʻa ʻIvi ʻaki hono tala kiate ia ha ngaahi loi fekauʻaki mo e ʻOtuá. (Senesi 3:​1-5) Naʻá ne hoko ai ko ha “Tevolo,” ʻa ia ʻoku ʻuhingá ko e “Tokotaha Lauʻikovi Loi.” ʻI he taimi tatau, naʻá ne hoko ai ko “Setane,” ʻa ia ʻoku ʻuhingá ko e “Tokotaha-Fakafepaki.”

 7. (a) Ko e hā naʻe mate ai ʻa ʻĀtama mo ʻIví? (e) Ko e hā ʻoku tupu ai ʻo motuʻa pea mate ʻa e fānau kotoa ʻa ʻĀtamá?

⁷ ʻI hono ngāueʻaki ʻa e ngaahi loí mo e kākaá, naʻe fakatupunga ʻe Sētane ko e Tēvoló ʻa ʻĀtama mo ʻIvi ke na talangataʻa ki he ʻOtuá. (Senesi 2:17; 3:6) Ko hono olá, naʻe faifai atu pē ʻo na mate, ʻo hangē ko ia naʻe tala ʻe he ʻOtuá ʻe hoko kia kinaua kapau te na talangataʻá. (Senesi 3:​17-19) Koeʻuhi naʻe hoko ʻa ʻĀtama ʻo taʻehaohaoa ʻi heʻene faiangahalá, naʻe maʻu tukufakaholo ai ʻe he kotoa ʻo ʻene fānaú ʻa e angahalá meiate ia. (Loma 5:12) Ko e tuʻungá ni ʻe fakatātaaʻiʻaki nai ha kapa ʻoku ngāueʻaki ki he taʻo maá. Kapau ʻoku makoko ʻa e kapá, ko e hā ʻe hoko ki he foʻi mā taki taha ʻe taʻo ʻi he kapá? Ko e foʻi mā taki taha ʻe makoko, pe ʻi ai ha taʻehaohaoa ai. ʻI he tuʻunga meimei tatau, kuo maʻu tukufakaholo ʻe he tangata taki taha ha “makoko” ʻo e taʻehaohaoá meia ʻĀtama. Ko e ʻuhinga ia ʻoku tupu ai ʻo motuʻa pea mate ʻa e tangatá kotoa.—Loma 3:23.

8, 9. (a) Ko e hā ʻa e pole ʻoku hā mahino naʻe fai ʻe Sētané? (e) Ko e hā naʻe ʻikai fakaʻauha ai ʻe he ʻOtuá ʻa e kau angatuʻú ʻi he taimi pē ko iá?

⁸ ʻI hono taki ʻe Sētane ʻa ʻĀtama mo ʻIvi ke na faiangahala ki he ʻOtuá, naʻá ne taki moʻoni ai ha angatuʻu. Naʻá ne poleʻi ai ʻa e founga pule ʻa Sihová. Naʻe hangē naʻe pehē ʻe Sētane: ‘Ko e ʻOtuá ko ha pule kovi. ʻOkú ne tala ʻa e ngaahi loi peá ne taʻotaʻofi ʻa e ngaahi meʻa lelei mei he faʻahinga ʻokú ne pule ki aí. ʻOku ʻikai fiemaʻu ʻe he tangatá ke pule mai kiate kinautolu ʻa e ʻOtuá. ʻE lava ke nau fili maʻanautolu ʻa e meʻa ʻoku leleí mo e meʻa ʻoku koví. Pea te nau lelei ange kinautolu ʻi he malumalu ʻo ʻeku pulé.’ ʻE anga-fēfē hono fakaleleiʻi ʻe he ʻOtuá ha pole fiematamuʻa pehē? ʻOku fakakaukau ʻa e niʻihi naʻe totonu ke tāmateʻi ai pē ʻe he ʻOtuá ʻa e kau angatuʻú. Ka naʻe mei tali ʻe he meʻa ko iá ʻa e pole ʻa Sētané? Naʻe mei fakamoʻoniʻi ai ʻoku tonu ʻa e founga pule ʻa e ʻOtuá?

⁹ Ko e ongoʻi haohaoa ʻa Sihova ki he fakamaau totonú ʻe ʻikai te ne fakaʻatā ia ke ne tāmateʻi he taimi pē ko iá ʻa e kau angatuʻú. Naʻá ne fakapapauʻi naʻe fiemaʻu ʻa e taimi ke tali ai ʻa e pole ʻa Sētané ʻi ha founga fakafiemālie pea ke fakamoʻoniʻi ko e Tēvoló ko ha tokotaha-loi. Ko ia naʻe fakapapauʻi ʻe he ʻOtuá te ne fakaʻatā ʻa e tangatá ke nau pule pē kiate kinautolu ʻi ha taimi ʻi he malumalu ʻo e tākiekina ʻa Sētané. Ko e hā naʻe fai ai ia ʻe Sihová pea ko e hā kuó ne fakaʻatā ai ʻa e taimi lahi ʻaupito ke matolo atu ki muʻa ke ne fakaleleiʻi ʻa e ngaahi ʻīsiu ko eni ʻe lāulea ki ai ʻi he Vahe 11 ʻo e tohí ni. Kae kehe, ʻi he taimi ní, ʻoku lelei ke fakakaukau fekauʻaki mo eni: Naʻe tonu kia ʻĀtama mo ʻIvi ke na tui kia Sētane, ʻa ia naʻe ʻikai ʻaupito te ne fai ha meʻa lelei ʻe taha maʻanauá? Naʻe tonu ke na tui ko Sihova, ʻa ia kuó ne ʻoange kiate kinaua ʻa e meʻa kotoa naʻá na maʻú, ko ha tokotaha loi anga-fakamamahi? Ko e hā naʻá ke mei faí?

10. ʻE lava-fēfē ke ke poupouʻi ʻa e tafaʻaki ʻa Sihová ʻi he tali ki he pole ʻa Sētané?

¹⁰ ʻOku lelei ke fakakaukau fekauʻaki mo e ngaahi fehuʻí ni koeʻuhí ko kitautolu taki taha ʻoku tau fehangahangai mo e ngaahi ʻīsiu meimei tatau ʻi he ʻahó ni. ʻIo, ʻokú ke maʻu ʻa e faingamālie ke poupou ai ki he tafaʻaki ʻa Sihová ʻi he tali ki he pole ʻa Sētané. ʻE lava ke ke tali ʻa Sihova ko ho Pule pea tokoni ki hono fakahaaʻi ko ha tokotaha loi ʻa Sētane. (Sāme 73:28; Palovepi 27:11) Ko e meʻa fakamamahí, ko ha tokosiʻi pē ʻi he lotolotonga ʻo e kakai ʻe laui piliona ʻi he māmani ko ení ʻoku nau fai ha fili peheé. ʻOku langaʻi hake ʻe he meʻá ni ha fehuʻi mahuʻinga, ʻOku akoʻi moʻoni ʻe he Tohi Tapú ʻoku puleʻi ʻe Sētane ʻa e māmani ko ení?

11, 12. (a) ʻOku anga-fēfē hono fakahaaʻi ʻi he ʻahiʻahiʻi ʻo Sīsuú ko Sētane ʻa e pule ʻo e māmani ko ení? (e) Ko e hā ʻa e toe meʻa ʻoku fakamoʻoniʻi ai ko Sētane ʻa e pule ʻo e māmani ko ení?

¹¹ Naʻe ʻikai ʻaupito veiveiua ʻa Sīsū ko Sētane ʻa e pule ʻo e māmani ko ení. ʻI ha founga fakaemana, naʻe fakahaaʻi ai ʻe Sētane ʻi ha taimi kia Sīsū “ʻa e ngāhi puleʻanga kotoa pe ʻo mamani mo honau nāunau.” Naʻe palōmesi leva ai ʻa Sētane kia Sīsū: “Koe ngāhi meʻa ni kotoa pe te u ʻatu moʻou, ʻo kapau te ke fakatomapeʻe ʻo lotu kiate au.” (Mātiu 4:​8, 9; Luke 4:​5, 6) Fakakaukau fekauʻaki mo eni. Naʻe hoko ʻa e tuʻuakí ni ko ha ʻahiʻahi kia Sīsū kapau ko Sētané naʻe ʻikai ko e pule ia ʻo e ngaahi puleʻanga ko ení? Naʻe ʻikai ke fakaʻikaiʻi ʻe Sīsū ko e ngaahi puleʻanga fakamāmani kotoa ko ení ko e meʻa ʻa Sētane. Ko hono moʻoní, naʻe mei fai ia ʻe Sīsū kapau naʻe ʻikai ko Sētane ʻa e mālohi naʻe tekemui ʻiate kinautolú.

¹² Ko e moʻoni, ko Sihova ʻa e ʻOtua māfimafi-aoniú, ko e Tokotaha-Fakatupu ʻo e ʻuniveesi fakaofó. (Fakahā 4:11) Neongo ia, ʻoku ʻikai ha konga Tohi Tapu ʻoku pehē ai ko Sihova ko e ʻOtuá pe ko Sīsū Kalaisi ʻa e pule ʻo e māmani ko ení. Ko hono moʻoní, naʻe lave papau ʻa Sīsū kia Sētane ko e “ʻeiki [pe pule] ʻo e maama ko eni.” (Sione 12:31; 14:30; 16:11) ʻOku aʻu ʻo lave ʻa e Tohi Tapú kia Sētane ko e Tēvoló ko e “ʻotua ʻo e tuʻu ko eni.” (2 Kolinito 4:​3, 4) ʻI he fekauʻaki mo e tokotaha-fakafepaki ko ení, pe ko Sētané, naʻe tohi ʻa e ʻapositolo Kalisitiane ko Sioné: “Ko hono kotoa ʻo mamani ʻoku ʻi he nima ʻo e Fili.”—1 Sione 5:19.

13. Ko e hā ʻoku ʻi ai ai ha fiemaʻu ki ha māmani foʻoú?

¹³ ʻI he ʻalu atu ʻa e taʻu taki taha, ʻoku hoko ai ʻa e māmaní ʻo fakatuʻutāmaki lahi ange. ʻOku fonu ia ʻi he ngaahi kau tau ʻoku nau fepaki, kau politiki taʻefaitotonu, kau taki lotu mālualoi mo e kau faihia loto-fefeka. Ko e māmaní fakalūkufua ʻoku faingataʻa ke toe fakaleleiʻi. ʻOku fakahaaʻi ʻe he Tohi Tapú ʻoku ofi ʻa e taimi ʻe fakangata ai ʻe he ʻOtuá ʻa e māmani fulikivanú he lolotonga ʻene tau ʻo ʻĀmaketoné. ʻE fakaʻatā ai ʻe he meʻá ni ke ʻi ai ha māmani foʻou māʻoniʻoni.—Fakahā 16:​14-16.

14. Ko hai kuo fili ʻe he ʻOtuá ke hoko ko e Pule ʻo Hono Puleʻangá, pea naʻe anga-fēfē hono tomuʻa tala ení?

¹⁴ Naʻe fili ʻe Sihova ko e ʻOtuá ʻa Sīsū Kalaisi ke hoko ko e Pule ʻo Hono Puleʻangá, pe founga-pule fakahēvaní. ʻI he kuohilí, naʻe tomuʻa tala ai ʻe he Tohi Tapú: “He kuo ʻaloʻi mai ha Tama, kuo tuku mai ha Foha: pea ʻe ʻi hono uma ʻa e puleʻanga. Pea ko e huafa ʻe uiʻaki . . . ko e ʻEiki ʻo e Melino. ʻE ʻikai fakangatangata ʻa e tupu o ʻene pule mo e melino.” (Aisea 9:​6, 7 [9:​5, 6, PM]) ʻI he fekauʻaki mo e founga-pulé ni, naʻe akoʻi ʻe Sīsū ʻa hono kau muimuí ke nau lotu: “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.” (Mātiu 6:​10, Ko e Kōsipeli ʻe Fā) Hangē ko ia te tau sio ki ai ʻamui ange ʻi he tohí ni, ko e Puleʻanga ʻo e ʻOtuá ʻe vavé ni ke ne toʻo ʻa e ngaahi founga-pule kotoa ʻo e māmani ko ení, pea ko ia tonu te ne fetongi kinautolú kotoa. (Taniela 2:44) ʻE toki fokotuʻu leva ʻe he Puleʻanga ʻo e ʻOtuá ha māmani palataisi.

15. Ko e hā ʻa e “fonua foʻou”?

¹⁵ ʻOku fakapapauʻi mai ʻe he Tohi Tapú kiate kitautolu: “ʻI he funga ʻo e talaʻofa [ʻa e ʻOtuá] ʻoku tau ʻamanaki ki ha ngaahi langi foʻou mo ha fonua foʻou, ʻa ia ʻoku nofoʻanga ai ʻa maʻoniʻoni.” (2 Pita 3:13; Aisea 65:17) ʻI he taimi ʻe niʻihi ʻi he lau ʻa e Tohi Tapú fekauʻaki mo e “fonua,” ʻoku ʻuhinga iá ki he kakai ʻoku nofo ʻi he māmaní. (Senesi 11:1) Ko ia ko e “fonua foʻou” māʻoniʻoní ko ha sōsaieti ʻo e kakai ʻoku nau maʻu ʻa e hōifua ʻa e ʻOtuá.

16. Ko e hā ha meʻaʻofa mahuʻinga mei he ʻOtuá ki he faʻahinga ʻokú Ne hōifua ki aí, pea ko e hā kuo pau ke tau fai ke maʻu ai iá?

¹⁶ Naʻe palōmesi ʻa Sīsū ʻo pehē ʻi he māmani foʻou ka hoko maí, ko e faʻahinga ko ē ʻoku hōifua ki ai ʻa e ʻOtuá te nau maʻu ʻa e meʻaʻofa ko e “moʻui taʻengata.” (Maake 10:30) Kātaki ʻo fakaava hoʻo Tohi Tapú ki he Sione 3:16 mo e 17:​3, pea lau ʻa e meʻa naʻe leaʻaki ʻe Sīsū kuo pau ke tau fai ke maʻu ai ʻa e moʻui taʻengatá. Sai, fakakaukau mei he Tohi Tapú ki he ngaahi tāpuaki ʻa ia ʻe maʻu ʻe he faʻahinga ʻoku nau taau ki he meʻaʻofa fakaofo ko ia mei he ʻOtuá ʻi he Palataisi fakamāmani ka hoko maí.

17, 18. ʻOku lava fēfē ke tau fakapapauʻi ʻe ʻi ai ʻa e melino mo e malu ʻi he feituʻu kotoa pē ʻi he māmaní?

¹⁷ Ko e fulikivanú, taú, faihiá mo e fakamālohí ʻe mole atu ia. ʻE “mole ʻa ia ʻoku faikovi . . . Ka ʻe maʻu ʻa e fonua ʻe he faʻa kataki.” (Sāme 37:​10, 11) ʻE ʻi ai ʻa e melino koeʻuhi ʻe ‘lolololo ʻa e ngaahi taú ʻe he ʻOtuá ʻo aʻu ki he ngataʻanga ʻo mamaní.’ (Sāme 46:9; Aisea 2:4) Pea ʻe “toʻulu ʻa e maʻoniʻoni ʻi hono kuonga; pea ke leta ʻa e melino, kae ʻoua ke ngata ʻa e mahina”—pea ʻoku ʻuhinga iá ko e melino ʻo taʻengata!—Sāme 72:7.

¹⁸ Ko e kau lotu ʻa Sihová te nau nofo malu. Lolotonga ʻa e talangofua ʻa e kau ʻIsileli ʻi he taimi ʻo e Tohi Tapú ki he ʻOtuá, naʻa nau nofo malu ai. (Livitiko 25:​18, 19) He fakaofo ē ko ia ke maʻu ha tuʻunga malu meimei tatau ʻi Palataisi!—Aisea 32:18; Maika 4:4.

19. Ko e hā ʻoku tau ʻiloʻi ai ʻe hulu fau ʻa e meʻakaí ʻi he māmani foʻou ʻa e ʻOtuá?

¹⁹ ʻE ʻikai ʻi ai ha nounou fakameʻatokoni. “E i ai ae falukuga oe uite i he fonua,” ko e hiva ia ʻa e tokotaha-tohi-sāmé. “ʻI he tumutumu oe gaahi mouga.” (Sāme 72:​16, PM) Ko Sihova ko e ʻOtuá te ne tāpuakiʻi ʻa ʻene faʻahinga māʻoniʻoní, pea ʻe “foaki ʻe he kelekele hono fua.”—Sāme 67:6.

20. Ko e hā ʻoku lava ai ke tau fakapapauʻi ko e foʻi māmaní kotoa ʻe hoko ko ha palataisí?

²⁰ Ko e māmaní kotoa ʻe hoko ko ha palataisi. ʻE langa ʻa e ngaahi ʻapi mo e ngaahi ngoue fakaʻofoʻofa ʻi he fonua ʻa ia naʻe maumauʻi ki muʻa ʻe he faʻahinga angahalaʻia ʻo e tangatá. (Aisea 65:​21-24; Fakahā 11:18) ʻI he faai mai ʻa e taimí, ko e ngaahi konga ʻo e māmaní kuo ʻosi ngoueʻí ʻe fakalahi atu ia kae ʻoua kuo hoko ʻa e foʻi kolopé kotoa ʻo fakaʻofoʻofa mo fua lahi ʻo hangē ko e ngoue ko ʻĪtení. Pea ʻe ʻikai ʻaupito taʻemalava ʻe he ʻOtuá ke ‘folahi hono nimá, pea ke fakamakona ʻa e holi ʻa e meʻa moʻui kotoa.’—Sāme 145:16.

21. Ko e hā ʻokú ne fakahaaʻi ʻe ʻi ai ʻa e melino ʻi he vahaʻa ʻo e tangatá mo e fanga manú?

²¹ ʻE ʻi ai ʻa e melino ʻi he vahaʻa ʻo e tangatá mo e fanga manú. ʻE kai fakataha ʻa e fanga manu hehengí mo e fanga manu lalatá. Naʻa mo ha kiʻi leka ʻe ʻikai ha meʻa ke ne manavahē ki ai mei he fanga manu ʻa ia ʻoku nau fakatuʻutāmaki he taimi ní.—Aisea 11:​6-9; 65:25.

22. Ko e hā ʻe hoko ki he mahamahakí?

²² ʻE mole atu ʻa e mahamahakí. ʻI he tuʻunga ko e Pule ʻo e Puleʻanga fakahēvani ʻo e ʻOtuá, ʻe fai ʻe Sīsū ʻa e fakamoʻui ʻi ha tuʻunga mahuʻinga lahi ange ia ʻi he taimi ko ia naʻá ne ʻi māmani aí. (Mātiu 9:35; Maake 1:​40-42; Sione 5:​5-9) Pea “ʻoku ʻikai ha nofo ai te ne pehe, ʻOku ou mahaki.”—Aisea 33:24; 35:​5, 6.

23. Ko e hā ʻe ʻomai ai ʻe he toetuʻú ʻa e fiefia ki hotau lotó?

²³ ʻE toe fakafoki mai ʻa e faʻahinga ʻofeina kuo maté ki he moʻuí fakataha mo e ʻamanaki ko e ʻikai ʻaupito ke toe mate. Ko e faʻahinga kotoa ʻoku mohe ʻi he maté ʻa ia ʻoku nau ʻi he manatu ʻa e ʻOtuá ʻe toe fakafoki mai ki he moʻuí. Ko hono moʻoní, “ʻe faifai pea hoko ha toetuʻu ʻa e angatonu mo e angahala fakatouʻosi.”—Ngāue 24:15; Sione 5:​28, 29.

24. ʻOku anga-fēfē hoʻo ongoʻi fekauʻaki mo e nofo Palataisi ʻi he māmaní?

²⁴ Ko ha kahaʻu fakaofo ē ʻoku fakatatali mai ki he faʻahinga ʻoku nau fili ke ako fekauʻaki mo hotau Tokotaha-Fakatupu Maʻongoʻongá, ʻa Sihova ko e ʻOtuá, pea ke tauhi kiate ia! Ko e Palataisi ka hoko mai ʻi he māmaní naʻe fakahaaʻi ʻe Sīsū ʻi he taimi naʻá ne palōmesi ai ki he tokotaha faihia naʻe mate ʻi hono tafaʻakí: “Te ke ʻi Palataisi mo au.” (Luke 23:43) ʻOku mātuʻaki mahuʻinga ke tau ako lahi ange fekauʻaki mo Sīsū Kalaisi, ʻa ia ʻe ʻai ke malava fakafou ʻiate ia ʻa e ngaahi tāpuaki kotoa ko ení.