Salute ki he Fuká, Fili Fakafofongá, mo e Ngāue Fakasiviliané

Salute ki he fuká. ʻOku tui ʻa e Kau Fakamoʻoni ʻa Sihová ko e punou pe salute ki ha fuká, ʻo faʻa fai fakataha mo ha fasi fakafonuá, ko ha tōʻonga fakalotu ia ʻa ia ʻoku ʻoange ai ʻa e fakamoʻuí, ʻo ʻikai ki he ʻOtuá, ka ki he Puleʻangá pe ko hono kau takí. (Aisea 43:11; 1 Kolinito 10:14; 1 Sione 5:21) Ko e taha ʻo ha taki pehē ko Tuʻi Nepukanesa ʻo Pāpilone ʻo e kuonga muʻá. Ke maongo ki he kakaí ʻa hono ngeiá mo ʻene faivelenga fakalotú, ko e tuʻi mālohi ko ení naʻá ne fokotuʻu ha fuʻu ʻīmisi pea fakamālohiʻi ʻa e kakai naʻá ne puleʻí ke nau punou ki ai lolotonga ia hono tā ʻa e fasi hangē ha fasi fakafonuá. Kae kehe, ko e toko tolu Hepelū ko Setaleki, Mēsake mo ʻApitenikoó—naʻa nau fakafisi ke punou ki he ʻīmisí, neongo ʻa e tautea maté.—Taniela, vahe 3.

ʻI hotau taimí, “ko e fakaʻilonga mamahiʻi-fonua tuʻu-ki-muʻa ʻo e tuí mo e meʻa tefito ke fai ki ai ʻa e lotú ko e fuká,” ko e tohi ia ʻa e faihisitōlia ko Carlton Hayes. “ʻOku toʻo ʻe he kau tangatá honau tataá ʻi he fakalaka hake ʻa e fuká; pea ʻi hono fakahīkihikiʻi ʻo e fuká ʻoku faʻu ai ʻe he kau faʻu-māú ʻa e ngaahi maau pea hivaʻi ʻe he fānaú ʻa e ngaahi himi.” Ko e mamahiʻi-fonuá, ko ʻene hoko atú ia, ʻoku toe ʻi ai hono “ngaahi ʻaho tapu,” hange ko e ʻaho Fā ʻo Siulaí ʻi ʻAmelika, pea pehē ki hono “kau sangato mo e kau helo” mo hono “ngaahi temipale,” pe ngaahi feituʻu toputapu. ʻI ha kātoanga fakapuleʻanga ʻi Pelēsila, naʻe fakahaaʻi ai ʻe he minisitā seniale ʻo e kau taú: “Ko e fuká ʻoku fakalāngilangiʻi pea fai ʻa e lotu ki ai . . . ʻo hangē pē ko e lotu ki he Fonua Tupuʻangá.” ʻIo, “ko e fuká, hangē ko e kolosí, ʻoku toputapu,” ko e fakamatala ia ki muʻa ʻa e Encyclopedia Americana.

Ko e ʻenisaikolopētia naʻe lave ki ai ki muʻá naʻe fakahaaʻi ai ki muí ni ko e ngaahi fasi fakafonuá “ko e fakahāhā ia ʻo e ongoʻi mamahiʻi-fonua pea ʻoku faʻa kau ai ha lotu ki he tataki mo e maluʻi fakaʻotua ʻo e kakaí pe ko honau kau takí.” Ko ia ai, ko e kau sevāniti ʻa Sihová ʻoku ʻikai te nau taʻefakapotopoto ʻi heʻenau fakakaukau ko e meʻa fakalotu ʻa e ngaahi kātoanga mamahiʻi-fonua ʻoku kau ki ai ʻa e salute ki he fuká mo e ngaahi fasi fakafonuá. Ko hono moʻoní, ʻi he fakamatala ki he fakafisi ʻa e fānau ʻa e Kau Fakamoʻoni ʻa Sihová ke fai ʻa e fakaʻapaʻapa ki he fuká pe leaʻaki ʻa e tukupā ʻo e mateaki ʻi he ngaahi ʻapiako ʻi ʻAmeliká, naʻe pehē ʻi he tohi The American Character: “Ko e pehē ko ia ko e meʻa fakalotu ʻa e ngaahi ouau ko ení kuo iku ʻo fakapapauʻi ia ʻe he Fakamaauʻanga Māʻolungá ʻi ha ngaahi hopo hokohoko.”

Lolotonga ʻoku ʻikai te nau kau ʻi he ngaahi kātoanga ʻoku nau vakai ki ai ʻoku taʻefakatohitapú, ko e kakai ʻa Sihová ʻoku nau fakaʻapaʻapaʻi moʻoni ʻa e totonu ʻa e niʻihi kehé ke fai peheé. ʻOku nau toe fakaʻapaʻapaʻi ʻa e ngaahi fuka fakafonua ʻoku hoko ko e ngaahi fakaʻilongá pea lāuʻilo ko e ngaahi puleʻanga maʻu mafai fakalaó ko e ‘ngaahi pule maʻolunga’ ia ʻoku nau ngāue ko e ‘kau sevaniti ʻa e ʻOtuá.’ (Loma 13:1-4) Ko ia ai, ko e Kau Fakamoʻoni ʻa Sihová ʻoku nau tokanga ki he ekinaki ke lotu “koeʻuhi ko e ngaahi tuʻi, mo kinautolu kotoa pe ʻoku maʻolunga.” Kae kehe, ko ʻetau taumuʻá “koeʻuhi pe ke malu ʻetau moʻui, mo fiemalie, ʻo tau matuʻaki fai fakalotu mo angamaopo.”—1 Timote 2:2.

Fili ʻi he meʻa fakapolitikalé. Ko e kau Kalisitiane moʻoní ʻoku nau fakaʻapaʻapaʻi ʻa e totonu ʻa e niʻihi kehé ke nau filí. ʻOku ʻikai te nau kemipeini ʻo fakafepakiʻi ʻa e ngaahi filí, pea ʻoku nau ngāue fāitaha mo e ngaahi tuʻunga mafai kuo filí. Kae kehe, ʻoku nau hanganaki tuʻu-ʻatā mālohi ʻi he fekauʻaki mo e ngaahi meʻa fakapolitikale ʻa e ngaahi puleʻangá. (Mātiu 22:21; 1 Pita 3:16) Ko e hā ʻoku totonu ke fai ʻe ha Kalisitiane ʻi he ngaahi fonua ʻa ia ʻoku pau ai ke kau ʻi he filí pe ʻi ha tuʻunga ʻa ia ʻoku lahi ai ʻa e fakafepaki ki he faʻahinga ʻoku ʻikai te nau ō ki he faiʻanga filí? ʻI hono manatuʻi naʻe ō ʻa Setaleki, Mēsake mo ʻApitenikō ki he tokalelei ʻo Tulá, ko ha Kalisitiane, ʻi he malumalu ʻo e ngaahi tuʻunga meimei tatau, te ne fili nai ke ʻalu ki he faiʻanga filí ʻo kapau ʻoku fakaʻatā ia ʻe hono konisēnisí. Kae kehe, te ne tokanga ke ʻoua ʻe maumauʻi ʻa ʻene tuʻu-ʻataá. Kuo pau ke ne fakakaukauʻi ʻa e ngaahi tefitoʻi moʻoni ʻe ono ko ení:

 1. Ko e kau muimui ʻo Sīsuú ʻoku “ʻikai ʻo māmani” ʻa kinautolu.—Sione 15:19.

 2. Ko e kau Kalisitiané ʻoku nau fakafofongaʻi ʻa Kalaisi mo hono Puleʻangá.—Sione 18:36; 2 Kolinito 5:20.

 3. Ko e fakatahaʻanga Kalisitiané ʻoku fāʻūtaha ʻi he tuí, pea ko hono kau mēmipá ʻoku haʻi fakataha kinautolu ʻe he ʻofa faka-Kalaisí.—1 Kolinito 1:10; Kolose 3:14.

 4. Ko e faʻahinga ʻoku nau fili ha ʻōfisa paú ʻoku nau fua ʻa e fatongia ki he meʻa ʻokú ne faí.—Fakatokangaʻi ange ʻa e tefitoʻi moʻoni ʻoku tuʻu mei mui ʻi he ngaahi lea naʻe lēkooti ʻi he 1 Samiuela 8:5, 10-18 mo e 1 Timote 5:22.

 5. Naʻe vakai ʻa Sihova ki he holi ʻa ʻIsileli ki ha pule hā maí ko ha fakaʻilonga ia naʻa nau talitekeʻi Ia.—1 Samiuela 8:7.

 6. Ko e kau Kalisitiané kuo pau ke nau maʻu ʻa e tauʻatāina ke lea ʻi heʻenau lea ki he kakai ʻo e tui fakapolitikale kotoa pē ʻo fekauʻaki mo e Puleʻanga ʻo e ʻOtuá.—Mātiu 24:14; 28:19, 20; Hepelu 10:35.

Ngāue fakasiviliane. ʻI he ngaahi fonua ʻe niʻihi, ʻoku fiemaʻu ai ʻe he Puleʻangá ke kau ʻa e faʻahinga ʻoku nau talitekeʻi ʻa e ngāue fakakautaú ʻi ha faʻahinga ngāue fakasiviliane ʻi ha vahaʻa taimi. ʻI he fehangahangai mo ha fili ke fai ʻi he meʻá ni, ʻoku totonu ke tau lotu fekauʻaki mo ia, lāulea nai ki ai mo ha kaungā Kalisitiane matuʻotuʻa, pea fai leva ʻetau filí ʻo makatuʻunga ʻi ha konisēnisi kuo akoʻi.—Palovepi 2:1-5; Filipai 4:5.

ʻOku tala mai ʻe he Folofola ʻa e ʻOtuá ke tau ‘talangofua ki he ngaahi pule maʻolungá, mo e ngaahi tuʻungá; ke nofo teu ki he ngaue lelei kotoa pe, ke . . . fakaʻatuʻi.’ (Taitusi 3:1, 2) ʻI hono manatuʻi iá, te tau ʻeke hifo nai kiate kitautolu ʻa e ngaahi fehuʻi hokó: ‘Ko hono tali ʻa e ngāue fakasiviliane kuo fokotuʻu maí ʻe fakangaloku ai ʻeku tuʻu-ʻatā faka-Kalisitiané pe fakatupunga ke u kau ai ki he lotu loí?’ (Maika 4:3, 5; 2 Kolinito 6:16, 17) ‘ʻE ʻai ʻe hono fai ʻo e ngāue ko ení ke faingataʻa kiate au ke fakahoko ʻa hoku ngaahi fatongia faka-Kalisitiané pe aʻu ʻo taʻofi ai ʻa ʻeku fakahoko iá?’ (Mātiu 28:19, 20; Efeso 6:4; Hepelu 10:24, 25) ‘ʻI he tafaʻaki ʻe tahá, ko e kau ʻi he ngāue peheé ʻe kau ki ai ha taimi-tēpile ʻe fakaʻatā ai ke fakalahi atu ʻeku ngaahi ngāue fakalaumālié, ʻo kau nai ai ki he ngāue fakafaifekau taimi-kakató?’—Hepelu 6:11, 12.

Kapau ʻe fakaʻosi fakamākukanga ʻaki ʻe ha Kalisitiane ʻe lava ke ne fakahoko ʻa e ngāue fakasiviliané kae ʻikai ke ʻalu ki pilīsone, ʻoku totonu ke fakaʻapaʻapaʻi ʻe he kaungā Kalisitiané ʻa ʻene filí. (Loma 14:10) Kae kehe, kapau ʻokú ne ongoʻi heʻikai lava ke ne fakahoko ha ngāue pehē, ʻoku totonu ke toe fakaʻapaʻapaʻi foki ʻe he niʻihi kehé ʻa e tuʻunga ko iá.—1 Kolinito 10:29; 2 Kolinito 2:2 (2Ko 1:24, PM).