Fakaleleiʻi ʻa e Fekīhiaki ʻi he Meʻa Fakapisinisí

Hangē ko ia ʻoku hiki ʻi he 1 Kolinito 6:1-8, naʻe lāulea ai ʻa e ʻapositolo ko Paulá ki he ngaahi hopo ʻi he vahaʻa ʻo e ngaahi kaungātuí. Naʻá ne fakahāhā ʻene loto-mamahi ʻi he kau Kalisitiane ʻe niʻihi ʻi Kolinitō naʻa nau ‘fiematamuʻa, ke ʻave ʻenau meʻa mo ha taha ʻo fakamāu ki he faʻahinga taʻefaitotonú.’ (1Ko 6:1 Veesi 1) Naʻe ʻomai ʻe Paula ʻa e ngaahi ʻuhinga mālohi ʻoku ʻikai totonu ai ki he kau Kalisitiané ke nau tauʻaki fakaʻilo ʻi he ngaahi fakamaauʻanga fakamāmaní ka ʻi hono kehé ke nau fakaleleiʻi ʻa e ngaahi fekīhiakí ʻi he fokotuʻutuʻu ʻa e fakatahaʻangá. Tau vakai angé ki he niʻihi ʻo e ngaahi ʻuhinga naʻe fai ai ʻa e ngaahi akonaki fakamānavaʻi ko ení pea lāulea leva ki ha ngaahi tuʻunga ʻe niʻihi ʻoku ʻikai fiemaʻu ke ngāueʻaki ki ai ʻa e fakahinohino ko ení.

Kapau ʻoku tau fekīhiaki mo ha kaungātui ʻi ha meʻa fakapisinisi, te tau ʻuluaki feinga ke fakaleleiʻi ʻa e ngaahi meʻá ʻi he founga ʻa Sihová, ʻo ʻikai ʻi haʻatautolú. (Palovepi 14:12) Hangē ko ia naʻe fakahaaʻi ʻe Sīsuú, ʻoku lelei tahá ke fakaleleiʻi vave ha loto kehekehe ki muʻa ke fakalalahi ki ha ʻīsiu mafatukitukí. (Mātiu 5:23-26) Kae kehe, ko e meʻa fakamamahí, ʻoku fakakikihi tōtuʻa ʻa e kau Kalisitiane ʻe niʻihi, pea aʻu ʻo ʻave ʻa e ngaahi fekīhiakí ki he ngaahi fakamaauʻanga fakamāmaní. Naʻe pehē ʻe Paula: “Ko e ʻi ai ha momoʻi lau fakamāu ʻiate kimoutolu, ko e matuʻaki holomui ʻataʻatā ia.” Ko e hā hono ʻuhingá? Ko ha ʻuhinga tefito he ko e ngaahi founga ko iá ʻe lava ke hā kovi ai ʻa e hingoa lelei ʻo e fakatahaʻangá pea mo e ʻOtua ʻoku tau lotu ki aí. Ko ia ʻoku tau tokanga ai ki he fehuʻi ʻa Paulá: “Ko e ha ʻoku ʻikai ai te mou fie kataki muʻa ʻa e ngaue taʻetotonu kuo fai mai?”—1Ko 6:7 Veesi 7.

Naʻe toe fakaʻuhinga ʻa Paula kuo foaki ʻe he ʻOtuá ki he fakatahaʻangá ha fokotuʻutuʻu lelei ki hono fakaleleiʻi ʻa e ngaahi fekīhiaki lahi. Ko e kau mātuʻá ko e kau tangata Kalisitiane ia kuo fakapotoʻi ʻi heʻenau ʻilo ʻo e ngaahi moʻoni Fakatohitapú, pea ʻoku pehē ʻe Paula ʻoku nau ‘fakamāu ʻa e meʻa ʻa e fanga tokouá’ ʻi he fekauʻaki mo e “meʻa fakamaama.” (1Ko 6:3-5 Veesi 3-5) Naʻe fakahaaʻi ʻe Sīsū ko e ngaahi fekīhiaki ʻoku kau ki ai ʻa e ngaahi hala mafatukituki, hangē ko e lauʻikovi loi mo e kākaá, ʻoku totonu ke fakaleleiʻi ia ʻo fakatatau ki ha founga ʻoku ʻi ai ʻa e sitepu ʻe tolu: ʻuluakí, ko e feinga ke fakaleleiʻi fakaekinautolu ʻa e meʻá ʻi he vahaʻa ʻo e faʻahinga ʻoku kau ki aí; uá, kapau ʻoku ʻikai lavameʻa ʻa e ʻuluaki sitepú, ʻave ha fakamoʻoni ʻe toko taha pe toko ua; pea ko e tolú, kapau ʻoku ʻikai lavameʻa ʻa e sitepu ko iá, pea ʻave ʻa e meʻá ki he fakatahaʻangá ʻa ia ʻoku fakafofongaʻi ʻe he kau mātuʻá.—Mātiu 18:15-17.

Ko e moʻoni, ko e kau mātuʻa Kalisitiané ʻoku ʻikai ʻaupito ko e kau loea pe kau tangata pisinisi kinautolu pea ʻoku ʻikai ke nau ngāue ʻo fai ha faleʻi ʻi he meʻa ko iá. ʻOku ʻikai te nau fokotuʻu ha ngaahi tuʻunga ki hono fakaleleiʻi ʻo e ngaahi fekīhiaki fakapisinisi ʻi he vahaʻa ʻo e fanga tokouá. ʻI hono kehé, ʻoku nau feinga ke tokoniʻi ʻa e faʻahinga kotoa ʻoku kau ki aí ke nau ngāueʻaki ʻa e Tohi Tapú pea felotoi ʻi ha fakaleleiʻanga melino. ʻI he ngaahi keisi fihí, te nau loto nai ai ke kumi faleʻi ki he ʻovasia sēketí pe ko e ʻōfisi vaʻa ʻo e Kau Fakamoʻoni ʻa Sihová. Kae kehe, ʻoku ʻi ai ʻa e ngaahi tuʻunga ʻoku ʻi tuʻa ia ʻi he meʻa naʻe ʻomai ʻi he akonaki ʻa Paulá. Ko e hā e niʻihi ʻo e ngaahi meʻá ni?

ʻI he ngaahi keisi ʻe niʻihi, ko e hopó ko ha tuʻunga fakaeouau nai pē ia pe ko ha fiemaʻu fakalao ʻi he feinga taʻesiokita mo melino ki ha ngaahi taumuʻa. Hangē ko ení, ko e hopó ko e fokotuʻutuʻu nai pē ia ʻe taha ʻoku ala maʻu ʻi hono ʻai ke fakalao ʻa e veté, ke tauhi fakalao ha kiʻi leka, fakapapauʻi ʻo e totongi ki he tangi tauhí, maʻu ha totongi maluʻi, kau he lisi ʻo e kau nō ʻi ha pisinisi ne mate mo hono fakamoʻoniʻi fakalao ʻa e tokotaha ʻokú ne maʻu ha tohi-tuku. ʻOku toe ʻi ai foki ʻa e ngaahi keisi ʻa ia ʻoku ongoʻi ai ʻe ha tokoua ʻoku fiemaʻu ke ne fai ha fakafepaki ke maluʻi ia ʻi ha hopo.a

Kapau ʻoku fai ʻa e ngaahi hopo peheé ʻo ʻikai ha laumālie ʻo e fakakikihí, heʻikai nai te nau maumauʻi ai ʻa e taumuʻa ʻo e akonaki fakamānavaʻi ʻa Paulá.b Neongo ia, ko e meʻa muʻomuʻa ki ha Kalisitiané ko hono fakamāʻoniʻoniʻi ʻa e huafa ʻo Sihová pea mo e melino mo e fāʻūtaha ʻa e fakatahaʻangá. Ko e kau muimui ʻo Kalaisí ʻoku fakaʻilongaʻi muʻomuʻa mo tefito kinautolu ʻi heʻenau ʻofá pea “ko ʻOfa . . . ʻoku ʻikai te ne kumi ʻene lelei aʻana.”—1 Kolinito 13:4, 5; Sione 13:34, 35.

[Fakamatala ʻi lalo]