Ko e Hā ʻOku Lahi Fau Ai ʻa e Faingataʻá?

1, 2. Ko e hā ʻoku ʻeke ʻe he kakai tokolahi?

ʻOKU fakaʻauha ʻe ha peau kula ha kiʻi kolo. Ko ha tangata mo haʻane meʻafana ʻokú ne fana holo ʻi ha fale lotu, ʻo fakalaveaʻi mo tāmateʻi ha kakai tokolahi. ʻOku toʻo atu ʻe he kanisaá ʻa e moʻui ʻa ha faʻē, kae tuku mai ʻa e fānau ʻe toko nima.

² ʻI he taimi ʻoku hoko ai ʻa e ngaahi fakatamaki pe ngaahi meʻa fakamamahi hangē ko iá, ʻoku ʻeke ʻe he kakai tokolahi, “Ko e hā hono ʻuhingá?” ʻOku ʻeke ʻe he tokolahi pe ko e hā ʻoku fonu pehē ai ʻa e māmaní ʻi he tāufehiʻá mo e faingataʻá. Kuo faifai ange peá ke fifili pehē mo koe?

3, 4. (a) Ko e hā ʻa e ngaahi fehuʻi naʻe ʻeke ʻe Hapakuké? (e) Naʻe anga-fēfē ʻa e tali ʻa Sihova kiate iá?

³ ʻI he Tohi Tapú, ʻoku tau ako ai ko e kau tangata naʻa nau maʻu ha tui mālohi ki he ʻOtuá naʻa nau ʻeke foki ha ngaahi fehuʻi pehē. Ko e fakatātaá, naʻe ʻeke ʻe he palōfita ko Hapakuké kia Sihova: “Ko e hā ʻokú ke ʻai ai au ke u sio tonu ʻi he faihalá? Pea ko e hā ʻokú ke kātakiʻi ai ʻa e fakaaoaó? Ko e hā ʻoku ʻi hoku ʻaó ai ʻa e fakaʻauhá mo e fakamālohí? Pea ko e hā ʻoku lahi fau ai ʻa e fekeʻikeʻí mo e fepakí?”​—Hapakuke 1:3.

⁴ ʻI he Hapakuke 2:2, 3, ʻoku tau lau ai ʻa e tali ʻa e ʻOtuá ki he ngaahi fehuʻi ʻa Hapakuké mo ʻEne talaʻofa te ne fakatonutonu ʻa e tuʻunga ko iá. ʻOku ʻofa lahi ʻa Sihova ʻi he kakaí. ʻOku pehē ʻe he Tohi Tapú: “ʻOkú ne tokanga mai kiate kimoutolu.” (1 Pita 5:7) Ko hono moʻoní, ʻoku fehiʻa ʻa e ʻOtuá ʻi he sio ki he faingataʻá ʻo lahi ʻaupito ange ia ʻiate kitautolu. (ʻAisea 55:8, 9) Ko ia ai, tau lāulea angé ki he fehuʻi, Ko e hā ʻoku lahi fau ai ʻa e faingataʻá ʻi he māmaní?

 5. Ko e hā ʻoku leaʻaki ʻe he kau faiako fakalotu tokolahi ʻo fekauʻaki mo e faingataʻá? Ko e hā ʻoku akoʻi mai ʻe he Tohi Tapú?

⁵ Ko e kau faifekaú, kau pātelé, mo e kau faiako fakalotú ʻoku nau faʻa pehē ko e finangalo pē ia ʻo e ʻOtuá ke faingataʻaʻia ʻa e kakaí. ʻOku pehē nai ʻe he niʻihi ko e meʻa kotoa ʻoku hoko ki ha taha, kau ai ʻa e ngaahi meʻa fakamamahí, ne ʻosi fakapapauʻi pē ia ʻe he ʻOtuá pea heʻikai ʻaupito lava ke tau mahinoʻi ʻa hono ʻuhingá. ʻOku aʻu ʻo pehē nai ʻe he niʻihi ko e kakaí, ʻo kau ai ʻa e fānau īkí, ʻoku nau mate koeʻuhí kae lava ke nau nofo mo e ʻOtuá ʻi hēvani. Ka ʻoku ʻikai ke moʻoni ia. ʻOku ʻikai ʻaupito ke fakatupunga ʻe Sihova ke hoko ha ngaahi meʻa ʻoku kovi. ʻOku pehē ʻe he Tohi Tapú: “Mole ke mamaʻo ha fai ʻe he ʻOtua moʻoní ha tōʻonga fulikivanu, pe ko ha faihala ʻa e Māfimafi-Aoniú!”​—Siope 34:10.

 6. Ko e hā ʻoku tukuakiʻi ai ʻe he kakai tokolahi ʻa e ʻOtuá ki he faingataʻa kotoa ʻi he māmaní?

⁶ ʻOku tukuakiʻi ʻe he kakai tokolahi ʻa e ʻOtuá ki he faingataʻa kotoa ʻi he māmaní koeʻuhí ʻoku nau fakakaukau ko e ʻOtuá ʻokú ne puleʻi ʻa e māmaní. Kae hangē ko ia naʻa tau ako ki ai ʻi he Vahe 3, ko e pule moʻoni ʻo e māmaní ko Sētane ko e Tēvoló.

7, 8. Ko e hā ʻoku lahi fau ai ʻa e faingataʻá ʻi he māmaní?

⁷ ʻOku tala mai ʻe he Tohi Tapú kiate kitautolu “ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko e pule ʻo e māmani ko ení, ʻa Sētane, ʻoku anga-kovi ʻaupito mo anga-fakamamahi. ʻOkú ne “takihalaʻi ʻa e kotoa ʻo e māmani kuo nofoʻí.” (Fakahā 12:9) ʻOku faʻifaʻitaki ʻa e kakai tokolahi kiate ia. Pea ko e ʻuhinga pē ia ʻe taha ʻoku mātuʻaki fonu ai ʻa e māmaní ʻi he loí, tāufehiʻá, mo e anga-fakamamahí.

⁸ ʻOku toe ʻi ai ʻa e ngaahi ʻuhinga kehe ʻoku lahi fau ai ʻa e faingataʻá ʻi he māmaní. ʻI he hili ʻa e angatuʻu ʻa ʻĀtama mo ʻIví, naʻá na tuku atu ai ʻa e angahalá ki heʻena fānaú. Pea koeʻuhi ko e angahalá, ʻoku fakatupunga ai ʻe he faʻahinga ʻo e tangatá ke faingataʻaʻia ʻa e faʻahinga kehe ʻo e tangatá. ʻOku nau loto maʻu pē ke nau hoko ʻo mahuʻinga ange ʻi he niʻihi kehé. ʻOku nau tau, ʻoku nau ʻalu ʻi he taú, pea ʻoku nau houtamaki ki he niʻihi kehé. (Tangata Malanga 4:1; 8:9) ʻI he taimi ʻe niʻihi ʻoku faingataʻaʻia ʻa e kakaí koeʻuhi ko e “ngaahi taimi faingataʻa mo e ngaahi meʻa ʻoku hoko taʻeʻamanekina.” (Tangata Malanga 9:11) ʻI heʻenau ʻi ha feituʻu hala ʻi he taimi halá, ʻoku malava ke hoko ai kiate kinautolu ʻa e fakatuʻutāmaki mo e ngaahi meʻa kehe ʻoku kovi.

 9. Ko e hā ʻoku malava ai ke tau fakapapauʻi ʻoku ʻi ai ʻa e ʻuhinga lelei ʻaupito ʻa Sihova ki hono fakaʻatā ke kei hokohoko atu ʻa e faingataʻá?

⁹ ʻOku ʻikai ʻaupito ke fakatupunga ʻe Sihova ʻa e faingataʻá. Heʻikai ke tukuakiʻi ia ki he taú, faihiá, mo e ngaohikoviá. ʻOku ʻikai ke fakatupunga ʻe he ʻOtuá ʻa e ngaahi fakatamaki hangē ko e ngaahi mofuiké, ngaahi afaá, mo e ngaahi tāfeá. Ka te ke fifili nai, ‘Kapau ko Sihova ʻa e tokotaha mālohi taha ʻi he ʻunivēsí, ko e hā ʻoku ʻikai te ne taʻofi ai ʻa e ngaahi meʻa fakalilifu ko iá mei heʻene hokó?’ ʻOku tau ʻilo ʻoku mātuʻaki tokanga mai ʻa e ʻOtuá kiate kitautolu, ko ia kuo pau pē ʻoku ʻi ai ʻene ʻuhinga lelei ʻaupito ki hono fakaʻatā ke kei hokohoko atu ʻa e faingataʻá.​—1 Sione 4:8.

10. Naʻe anga-fēfē hono poleʻi ʻe Sētane ʻa Sihová?

¹⁰ ʻI he ngoue ʻo ʻĪtení, naʻe takihalaʻi ai ʻe he Tēvoló ʻa ʻĀtama mo ʻIvi. Naʻe tukuakiʻi ai ʻe Sētane ʻa e ʻOtuá ko ha Pule kovi. Naʻá ne taukaveʻi naʻe taʻofi ʻe he ʻOtuá ha meʻa lelei meia ʻĀtama mo ʻIvi. Naʻe loto ʻa Sētane ke na tui te ne hoko ko ha pule lelei ange ʻia Sihova pea naʻe ʻikai fiemaʻu kiate kinaua ia ʻa e ʻOtuá.​—Sēnesi 3:2-5; sio ki he Fakamatala ʻi he Ngataʻangá 27.

11. Ko e hā ʻa e fehuʻi ʻoku tau fiemaʻu ke talí?

¹¹ Naʻe talangataʻa ʻa ʻĀtama mo ʻIvi kia Sihova peá na angatuʻu kiate ia. Naʻá na fakakaukau naʻá na maʻu ʻa e totonu ke na fakapapauʻi pē ʻiate kinaua ʻa e meʻa naʻe tonú mo e meʻa naʻe halá. ʻE malava fēfē ke fakamoʻoniʻi ʻe Sihova naʻe hala ʻa e kau angatuʻú pea ʻokú ne ʻafioʻi ʻa e meʻa ʻoku lelei taha kiate kitautolú?

12, 13. (a) Ko e hā naʻe ʻikai ke fakaʻauha ai ʻe Sihova ʻa e kau angatuʻú ʻi he taimi pē ko iá? (e) Ko e hā kuo fakaʻatā ai ʻe Sihova ʻa Sētane ke ne hoko ko e pule ʻo e māmani ko ení pea mo e faʻahinga ʻo e tangatá ke nau pule pē kiate kinautolú?

¹² Naʻe ʻikai ke fakaʻauha ʻe Sihova ʻa ʻĀtama mo ʻIvi ʻi he taimi pē ko iá. ʻI hono kehé, naʻá ne fakaʻatā kinaua ke na maʻu fānau. Pea naʻe ʻai leva ʻe Sihova ke malava ʻa e fānau ʻa ʻĀtama mo ʻIví ʻo fili pe ko hai ʻoku nau loto ke hoko ko honau pulé. Ko e taumuʻa ʻa Sihová ke fakafonu ʻa e māmaní ʻaki ha kakai haohaoa, pea naʻe pau ke hoko ia ʻo tatau ai pē pe ko e hā naʻe feinga ʻa e Tēvoló ke faí.​—Sēnesi 1:28; ʻAisea 55:10, 11.

¹³ Naʻe poleʻi ʻe Sētane ʻa Sihova ʻi he ʻao ʻo e kau ʻāngelo ʻe laui miliona. (Siope 38:7; Taniela 7:10) Ko ia naʻe ʻoange ai ʻe Sihova ʻa e taimi ke fakamoʻoniʻi ʻe Sētane pe naʻe moʻoni ʻa e tukuakiʻi naʻá ne faí. Naʻá ne toe ʻoange ʻa e taimi ki he faʻahinga ʻo e tangatá ke fokotuʻu haʻanau ngaahi founga-pule pē ʻanautolu ʻi he malumalu ʻo e tataki ʻa Sētané ke fakahaaʻi ai pe te nau lavameʻa ʻo taʻekau ai ʻa e tokoni ʻa e ʻOtuá.

14. Ko e hā kuo fakamoʻoniʻi ʻi he ʻalu ʻa e taimí?

¹⁴ ʻI he taʻu ʻe laui afe, kuo feinga ai ʻa e faʻahinga ʻo e tangatá ke nau pule pē kiate kinautolu, ka kuo ʻikai te nau lavameʻa. Kuo fakamoʻoniʻi ai ko ha tokotaha loi ʻa Sētane. ʻOku fiemaʻu moʻoni ki he faʻahinga ʻo e tangatá ʻa e tokoni ʻa e ʻOtuá. Naʻe tonu ʻa e palōfita ko Selemaiá ʻi heʻene pehē: “ʻOku ou ʻiloʻi lelei ʻe Sihova, ʻoku ʻikai ʻi he tangatá ʻa hono halá. ʻOku ʻikai ʻi he tangata ʻoku ʻaʻevá ke ne tataki ʻa ʻene laká.”​—Selemaia 10:23.

15, 16. (a) Ko e hā kuo fakaʻatā ai ʻe Sihova ke hokohoko atu ʻa e faingataʻá ʻo fuʻu fuoloá? (e) Ko e hā kuo ʻikai ai ke fakaleleiʻi ʻe Sihova ʻa e ngaahi palopalema kuo fakatupunga ʻe Sētané?

¹⁵ Ko e hā kuo fakaʻatā ai ʻe Sihova ʻa e faingataʻá ke hokohoko atu ʻo fuʻu fuoloá? Ko e hā ʻoku ʻikai te ne taʻofi ai ʻa e ngaahi meʻa ʻoku koví mei heʻene hokó? Naʻe fiemaʻu ʻa e taimi ke fakamoʻoniʻi ai kuo ʻikai lavameʻa ʻa e pule ʻa Sētané. Kuo ʻahiʻahiʻi ʻe he faʻahinga ʻo e tangatá ʻa e faʻahinga founga-pule kotoa pē, ʻo ʻikai lavameʻa. Neongo kuo nau fai ha fakalakalaka ʻi he saienisí mo e tekinolosiá, ʻoku lahi ange he taimí ni ʻa e fakamaau taʻetotonú, masivá, faihiá mo e taú ʻi ha toe taimi ki muʻa. Heʻikai malava ke tau pule lavameʻa kiate kitautolu pē ʻo taʻekau ai ʻa e ʻOtuá.

¹⁶ Kae kehe, ʻoku teʻeki ai ke fakaleleiʻi ʻe Sihova ʻa e ngaahi palopalema kuo fakatupunga ʻe Sētané. Kapau naʻá ne fai pehē, ʻe ʻuhinga iá ʻoku poupouʻi ʻe he ʻOtuá ʻa e tuʻunga-pule ʻa Sētané, pea heʻikai ʻaupito te Ne fai ia. Pehē foki, ʻe tui ai ʻa e faʻahinga ʻo e tangatá ʻoku malava ke nau pule lavameʻa kiate kinautolu pē. Ka ko ha loi ia, pea heʻikai ke poupouʻi foki ia ʻe Sihova. ʻOku ʻikai ʻaupito te ne loi.​—Hepelū 6:18.

17, 18. Ko e hā ʻe fai ʻe Sihova fekauʻaki mo e maumau kotoa kuo fakatupunga ʻe Sētané?

¹⁷ ʻE lava ʻe Sihova ke ne fakaleleiʻi ʻa e maumau kuo fakatupunga ʻi he angatuʻu ʻa Sētane mo e faʻahinga ʻo e tangatá? ʻIo. Ki he ʻOtuá, ʻoku malava ʻa e meʻa kotoa pē. ʻOku ʻafioʻi ʻe Sihova ʻa e taimi ʻe fai ai ha tali kakato ki he ngaahi pole kotoa ʻa Sētané. Pea te ne ngaohi ʻa e māmaní ke hoko ko ha palataisi, ʻo hangē ko ia naʻe fakataumuʻa ki aí. Ko e faʻahinga kotoa ʻi he “ngaahi fonualoto fakamanatú” te nau toetuʻu. (Sione 5:28, 29) Heʻikai ʻaupito ke toe puke pe mate ʻa e kakaí. ʻE toʻo atu ʻe Sīsū ʻa e maumau kotoa kuo fakatupunga ʻe Sētané. ʻE ngāueʻaki ʻe Sihova ʻa Sīsū “ke ne veteki ʻa e ngaahi ngāue ʻa e Tēvoló.” (1 Sione 3:8) ʻOku tau houngaʻia he ʻi he lolotonga iá kuo anga-kātaki ʻa Sihova kiate kitautolu koeʻuhi ke lava ʻo tau hoko ai ʻo ʻiloʻi ia pea lava ke tau fakapapauʻi ʻoku tau loto ke ne hoko ko hotau Pule. (Lau ʻa e 2 Pita 3:9, 10.) Naʻa mo e taimi ʻoku tau faingataʻaʻia aí, ʻokú ne tokoniʻi kitautolu ke tau kātaki.​—Sione 4:23; lau ʻa e 1 Kolinitō 10:13.

¹⁸ ʻOku ʻikai fakamālohiʻi kitautolu ʻe Sihova ke tau fili ia ke ne hoko ko hotau Pule. Naʻá ne foaki ki he faʻahinga ʻo e tangatá ʻa e meʻaʻofa ko e tauʻatāina ke filí. Tau sivisiviʻi angé pe ko e hā ʻa e ʻuhinga ʻo e meʻaʻofa mahuʻinga ko ení kiate kitautolú.

19. Ko e hā ʻa e meʻaʻofa fisifisimuʻa kuo foaki mai ʻe Sihova kiate kitautolú? Ko e hā ʻoku totonu ai ke tau houngaʻia ʻi he meʻaʻofa ko ení?

¹⁹ Ko e meʻaʻofa fisifisimuʻa ʻa Sihova ko e tauʻatāina ke filí ʻokú ne ʻai ke tau kehe ʻaupito mei he fanga manú. ʻOku nau ngāue tefitó pē koeʻuhi ko e poto fakanatula ʻoku nau maʻú, ka ʻoku lava ke tau fili ʻa e founga ʻoku tau loto ke tau moʻui aí pea fili pe te tau fakahōifuaʻi ʻa Sihova. (Palōveepi 30:24) Pehē foki, ʻoku ʻikai ke tau hangē ko e ngaahi mīsiní he ʻoku nau fai pē ʻa e meʻa naʻe ngaohi kinautolu ke nau faí. ʻOku tau maʻu ʻa e tauʻatāina ke fili pe ʻoku tau loto ke hoko ko e faʻahinga fēfē, ko hai ʻoku tau loto ke hoko ko hotau kaumeʻá, pea ko e hā ʻoku tau loto ke fai ʻaki ʻetau moʻuí. ʻOku fiemaʻu ʻe Sihova ke tau fiefia ʻi he moʻuí.

20, 21. Ko e hā ʻa e fili lelei taha ʻe lava ke ke fai he taimi ní?

²⁰ ʻOku fiemaʻu ʻe Sihova ke tau ʻofa kiate ia. (Mātiu 22:37, 38) ʻOkú ne hangē ko ha tamai ʻa ia ʻoku fiefia ke fanongo ki he pehē ʻe heʻene kiʻi tamá “ʻOku ou ʻofa ʻiate koe,” ʻo leaʻaki mei hono lotó ʻo ʻikai ko hano fakamālohiʻi ia ke ne fai pehē. Naʻe foaki mai ʻe Sihova ʻa e tauʻatāina ke tau fili pe te tau tauhi kiate ia pe ʻikai. Naʻe fili ʻa Sētane, ʻĀtama, pea mo ʻIvi ke talitekeʻi ʻa Sihova. Te ke ngāueʻaki fēfē ʻa e meʻaʻofa kuo ʻoatu kiate koe ko e tauʻatāina ke filí?

²¹ Ngāueʻaki hoʻo tauʻatāina ke filí ke tauhi kia Sihova. ʻOku laui miliona ʻa e niʻihi kuo nau fili ke fakahōifuaʻi ʻa e ʻOtuá pea talitekeʻi ʻa Sētane. (Palōveepi 27:11) Ko e hā ʻe lava ke ke fai he taimí ni ke ke ʻi he māmani foʻou ʻa e ʻOtuá ʻi he taimi te ne toʻo atu ai ʻa e faingataʻá kotoa? ʻE tali ʻe he vahe hono hokó ʻa e fehuʻi ko iá.