Ko e Founga Totonu ke Lotu Ai ki he ʻOtuá

 1. Ko hai ʻoku totonu ke ne tala mai ʻa e founga totonu ke lotu ai ki he ʻOtuá?

ʻOKU taukaveʻi ʻe he ngaahi lotu lahi ʻoku nau akoʻi ʻa e moʻoni fekauʻaki mo e ʻOtuá. Ka ʻoku ʻikai moʻoni ia, koeʻuhí ʻoku akoʻi ʻe he ngaahi lotú ʻa e meʻa kehe ʻaupito fekauʻaki mo e ʻOtuá pe ko hai ia mo e founga ke tau lotu ai kiate iá. ʻE lava fēfē ke tau ʻiloʻi ʻa e founga totonu ke lotu ai ki he ʻOtuá? Ko Sihova pē ʻa e tokotaha ʻoku lava ke ne tala mai ʻa e founga ke tau lotu ai kiate iá.

 2. ʻE lava fēfē ke ke ako ʻa e founga totonu ke lotu ai ki he ʻOtuá?

² Kuo ʻomai ʻe Sihova ʻa e Tohi Tapú ke tau lava ai ʻo ako ʻa e founga totonu ke lotu ai kiate iá. Ko ia, ako ʻa e Tohi Tapú, pea ʻe tokoniʻi koe ʻe Sihova ke ke maʻu ʻaonga mei heʻene akonakí koeʻuhí ʻokú ne tokanga lahi mai kiate koe.​—ʻAisea 48:17.

 3. Ko e hā ʻoku fiemaʻu ʻe he ʻOtuá ke tau faí?

³ ʻOku pehē ʻe he niʻihi ʻoku tali ʻe he ʻOtuá ʻa e lotu kotoa pē, ka ʻoku ʻikai ko e meʻa ia naʻe akoʻi mai ʻe Sīsuú. Naʻá ne pehē: “ʻOku ʻikai ko ia kotoa pē ʻoku pehē mai, ‘ʻEiki, ʻEiki,’ te ne hū ki he Puleʻanga ʻo hēvaní, ka ko ia pē ʻokú ne fai ʻa e finangalo ʻo ʻeku Tamai.” Ko ia ʻoku fiemaʻu ke tau ako pe ko e hā ʻa e finangalo ʻo e ʻOtuá pea fai leva ia. Ko ha meʻa mafatukituki eni he naʻe fakahoa ʻe Sīsū ʻa e kakai ʻoku ʻikai te nau talangofua ki he ʻOtuá ki he kau faihia, ko e “kau maumau-lao.”​—Mātiu 7:21-23.

 4. Ko e hā naʻe leaʻaki ʻe Sīsū ʻo fekauʻaki mo hono fai ʻa e finangalo ʻo e ʻOtuá?

⁴ Naʻe fakatokanga mai ʻa Sīsū ko e taimi ʻoku tau loto ai ke fai ʻa e finangalo ʻo e ʻOtuá, te tau fehangahangai mo e ngaahi pole. Naʻá ne pehē: “Hū ʻi he matapā fāsiʻí, koeʻuhí ʻoku fālahi ʻa e matapā mo ʻatā ʻa e hala ʻoku taki atu ki he ʻauhá, pea ʻoku hū atu ai ʻa e tokolahi; ka ʻoku fāsiʻi ʻa e matapā pea ʻefiʻefi ʻa e hala ʻoku taki atu ki he moʻuí, pea ko e tokosiʻi pē ʻoku nau ʻiloʻi iá.” (Mātiu 7:13, 14) Ko e hala ʻefiʻefí, pe ko e founga totonu ʻo e lotu ki he ʻOtuá, ʻoku taki atu ia ki he moʻui taʻengatá. Ko e hala ʻoku ʻataá, pe ko e founga hala ʻo e lotu ki he ʻOtuá, ʻoku taki atu ia ki he mate. Ka ʻoku ʻikai fiemaʻu ʻe Sihova ke mate ha taha. ʻOkú ne ʻomai ki he tokotaha kotoa ʻa e faingamālie ke ako ʻo fekauʻaki mo ia.​—2 Pita 3:9.

 5. ʻE lava fēfē ke ke ʻiloʻi ʻa e faʻahinga ʻoku lotu ki he ʻOtuá ʻi he founga totonú?

⁵ Naʻe pehē ʻe Sīsū ʻe lava ke tau ʻiloʻi ʻa e faʻahinga ʻoku lotu ki he ʻOtuá ʻi he founga totonú. ʻOku tau ʻiloʻi eni ʻi hono sivisiviʻi ʻa e meʻa ʻoku nau tui ki aí mo e meʻa ʻoku nau faí. Naʻá ne pehē: “ʻI honau ngaahi fuá te mou ʻiloʻi ai kinautolu.” Pea naʻá ne toe pehē: “Ko e ʻakau lelei kotoa pē ʻoku fua lelei.” (Mātiu 7:16, 17) ʻOku ʻikai ʻuhinga eni iá ʻoku haohaoa ʻa e faʻahinga ʻoku lotu ki he ʻOtuá. Ka ʻoku feinga maʻu pē ʻa e kau sevāniti ʻa e ʻOtuá ke fai ʻa e meʻa ʻoku totonú. Te tau sio leva ki he meʻa te ne tokoniʻi kitautolu ke ʻiloʻi ʻa e faʻahinga ʻoku nau lotu ki he ʻOtuá ʻi he founga totonú.

6, 7. Ko e hā ʻoku makatuʻunga ai ʻa e lotu moʻoní ʻi he Tohi Tapú? Ko e hā ʻoku akoʻi mai ʻe he faʻifaʻitakiʻanga ʻa Sīsuú?

⁶ ʻOku totonu ke makatuʻunga ʻetau lotú ʻi he Tohi Tapú. ʻOku pehē ʻe he Tohi Tapú: “Ko e potu Folofola kotoa pē kuo fakamānavaʻi ia ʻe he ʻOtuá pea ʻoku ʻaonga ki he akonaki, ki he valoki, ki he fakatonutonu, ki he akonekina ʻi he māʻoniʻoni, koeʻuhi ke hoko ai ʻa e tangata ʻa e ʻOtuá ʻo maʻu ʻa e malava kakato, kuo teuʻi kakato ki he ngāue lelei kotoa pē.” (2 Tīmote 3:16, 17) Naʻe tohi ʻa e ʻapositolo ko Paulá ki he kau Kalisitiané: “ʻI he taimi naʻa mou maʻu ai ʻa e folofola ʻa e ʻOtuá, ʻa ia naʻa mou fanongo ai meiate kimautolú, naʻa mou tali ia ʻo ʻikai ko ha lea ʻa ha tangata, kae hangē tofu pē ko ia ko hono tuʻunga moʻoní, ko e folofola ia ʻa e ʻOtuá.” (1 Tesalonaika 2:13) Ko e lotu moʻoní ʻoku makatuʻunga pē ia ʻi he Folofola ʻa e ʻOtuá, ʻa e Tohi Tapú. ʻOku ʻikai makatuʻunga ia ʻi ha fakakaukau fakaetangata, talatukufakaholo, pe ko ha toe meʻa kehe.

⁷ Ko e meʻa kotoa pē naʻe akoʻi ʻe Sīsuú naʻe makatuʻunga ʻi he Folofola ʻa e ʻOtuá. (Lau ʻa e Sione 17:17.) Naʻá ne faʻa toʻo lea mei he Folofolá. (Mātiu 4:4, 7, 10) Ko e kau sevāniti moʻoni ʻa e ʻOtuá ʻoku nau muimui ʻi he faʻifaʻitakiʻanga ʻa Sīsuú pea ʻoku makatuʻunga ʻa e meʻa kotoa ʻoku nau akoʻí ʻi he Tohi Tapú.

 8. Ko e hā naʻe akoʻi mai ʻe Sīsū fekauʻaki mo e lotu kia Sihová?

⁸ ʻOku totonu ke tau lotu pē kia Sihova. ʻOku pehē ʻe he Saame 83:18, “Ko koe, ʻa ia ko ho huafá ko Sihova, ko koe pē toko taha ʻa e Fungani Māʻolunga ʻi he māmaní kotoa.” Naʻe fiemaʻu ʻe Sīsū ke ʻiloʻi ʻe he kakaí ʻa e ʻOtua moʻoní, pea naʻá ne akoʻi ki he kakaí ʻa e huafa ʻo e ʻOtuá. (Lau ʻa e Sione 17:6.) Naʻe pehē ʻe Sīsū: “Ko Sihova ko ho ʻOtuá kuo pau ke ke lotu ki aí, pea ko ia toko taha pē kuo pau ke ke fai ki ai ʻa e ngāue toputapú.” (Mātiu 4:10) Ko ia, ʻi heʻetau hoko ko e kau sevāniti ʻa e ʻOtuá, ʻoku tau muimui ʻi he faʻifaʻitakiʻanga ʻa Sīsuú. ʻOku tau lotu pē kia Sihova, ʻoku tau ngāueʻaki hono huafá, pea ʻoku tau akoʻi ki he niʻihi kehé ʻa e huafa ʻo e ʻOtuá mo e meʻa te ne fai maʻatautolú.

9, 10. ʻOku anga-fēfē ʻetau fakahāhā ʻa e feʻofaʻakí?

⁹ ʻOku fiemaʻu ke tau ʻofa moʻoni ki he kakaí. Naʻe akoʻi ʻe Sīsū ʻene kau ākongá ke nau feʻofaʻaki. (Lau ʻa e Sione 13:35.) ʻOku ʻikai mahuʻinga ia pe ko ʻetau haʻú mei fē, ko e hā hotau anga-fakafonuá, pe ʻoku tau koloaʻia pe masiva. Ko ʻetau feʻofaʻakí ʻoku totonu ke ne fakafāʻūtahaʻi kitautolu ko e fanga tokoua mo e fanga tuofāfine. (Kolose 3:14) Ko ia ʻoku ʻikai ke tau kau he taú ʻo tāmateʻi ʻa e kakaí. ʻOku pehē ʻe he Tohi Tapú: “Ko e fānau ʻa e ʻOtuá pea mo e fānau ʻa e Tēvoló ʻoku hā mahino ia ʻi he moʻoniʻi meʻa ko ʻení: ʻIlonga ha taha ʻoku ʻikai te ne tōʻongaʻaki ʻa e māʻoniʻoní ʻoku ʻikai ko ʻene tupu mai ʻaʻana mei he ʻOtuá, kaeʻumaʻā ʻa e tokotaha ʻoku ʻikai te ne ʻofa ki hono tokouá.” Pea ʻoku toe pehē ai: “ʻOku totonu ke tau feʻofaʻakí; ʻo ʻikai hangē ko Keiní, ʻa ia naʻe tupu mei he tokotaha fulikivanú peá ne tāmateʻi hono tokouá.”​—1 Sione 3:10-12; 4:20, 21.

¹⁰ ʻOku tau ngāueʻaki hotau taimí, iví, mo e meʻa fakamatelié ke fetokoniʻaki ai mo fefakalototoʻaʻaki. (Hepelū 10:24, 25) ʻOku tau “fai ha ngāue ʻoku leleí ki he tokotaha kotoa.”​—Kalētia 6:10.

11. Ko e hā ʻoku tau tali ai ko Sīsū ʻa e hala ki he ʻOtuá?

¹¹ ʻOku fiemaʻu ke tau talangofua kia Sīsū he ko ia ʻa e hala ki he ʻOtuá. ʻOku pehē ʻe he Tohi Tapú: “ʻOku ʻikai ha fakamoʻui ʻi ha toe taha kehe, he ʻoku ʻikai mo ha toe hingoa ʻi he lalo langí kuo tuku mai ki he haʻohaʻonga ʻo e tangatá ʻa ia kuo pau ke tau maʻu ai ʻa e moʻuí.” (Ngāue 4:12) ʻI he Vahe 5 ʻo e tohí ni, naʻa tau ako ai naʻe fekauʻi mai ʻe Sihova ʻa Sīsū ke ne foaki ʻene moʻuí ko ha huhuʻi maʻá e faʻahinga talangofua ʻo e tangatá. (Mātiu 20:28) Kuo fili ʻe Sihova ʻa Sīsū ke ne pule ko e Tuʻi ki he māmaní. Ko e ʻuhinga ia ʻoku tala mai ai ʻe he Tohi Tapú kuo pau ke tau talangofua kia Sīsū kapau ʻoku tau fie moʻui taʻengata.​—Lau ʻa e Sione 3:36.

12. Ko e hā ʻoku ʻikai ke tau kau ai ʻi ha meʻa fakapolitikalé?

¹² ʻOku ʻikai totonu ke tau kau ʻi ha meʻa fakapolitikale. Naʻe ʻikai ke kau ʻa Sīsū ʻi ha meʻa fakapolitikale. ʻI hono fakamāuʻi iá, naʻá ne tala ange ki he pule Loma ko Pailató: “Ko hoku Puleʻangá ʻoku ʻikai ko ha konga ia ʻo e māmani ko ení.” (Lau ʻa e Sione 18:36.) ʻI he hangē ko Sīsuú, ʻoku tau mateaki ki he Puleʻanga fakahēvani ʻo e ʻOtuá, pea ko e ʻuhinga eni, tatau ai pē pe ko fē ʻoku tau nofo aí, ʻoku ʻikai ke tau kau ʻi ha meʻa fakapolitikale. Kae kehe, ʻoku fekauʻi mai ʻe he Tohi Tapú ke tau talangofua ki he “ngaahi mafai māʻolungá,” ʻa e ngaahi founga-pulé. (Loma 13:1) ʻOku tau talangofua ki he lao ʻa e fonua ʻoku tau nofo aí. Ko e moʻoni, ʻi he taimi ʻoku fepaki ai ha lao mo e ngaahi lao ʻa e ʻOtuá, ʻoku tau faʻifaʻitaki ki he kau ʻapositoló, ʻa ia naʻa nau pehē: “Kuo pau ke mau talangofua ki he ʻOtuá ko e pulé ia kae ʻikai ki he tangatá.”​—Ngāue 5:29; Maʻake 12:17.

13. Ko e hā ʻoku tau malangaʻi fekauʻaki mo e Puleʻanga ʻo e ʻOtuá?

¹³ ʻOku tau tui ko e Puleʻanga ʻo e ʻOtuá ʻa e fakaleleiʻanga pē taha ki he palopalema ʻa e māmaní. Naʻe pehē ʻe Sīsū ko e “ongoongo lelei ko ʻeni ʻo e Puleʻangá” ʻe malangaʻi ia ʻi māmani kotoa. (Lau ʻa e Mātiu 24:14.) ʻOku ʻikai ha founga-pule fakaetangata ʻe lava ke ne fai ʻa e meʻa ʻe fai ʻe he Puleʻanga ʻo e ʻOtuá maʻatautolú. (Saame 146:3) Naʻe akoʻi mai ʻe Sīsū ke tau lotu ʻo kole ʻa e Puleʻanga ʻo e ʻOtuá ʻi heʻene pehē: “Ke hoko mai ho Puleʻangá. Ke fai ho finangaló, ʻo hangē ko ia ʻi hēvaní, ke pehē foki ʻi māmani.” (Mātiu 6:10) ʻOku tala mai ʻe he Tohi Tapú ʻe fakaʻauha ʻe he Puleʻanga ʻo e ʻOtuá ʻa e founga-pule fakaetangata kotoa pē pea ʻe “tuʻu toko taha pē ia ʻo taʻengata.”​—Taniela 2:44.

14. Ko hai ʻokú ke tui ʻoku lotu ki he ʻOtuá ʻi he founga totonú?

¹⁴ Hili hono ako ʻa e ngaahi poini ko ení, ʻeke hifo kiate koe: ‘Ko hai ʻoku makatuʻunga ʻene akonakí ʻi he Tohi Tapú? Ko hai ʻoku talanoa ki he niʻihi kehé fekauʻaki mo e huafa ʻo e ʻOtuá? Ko hai ʻoku nau fakahāhā ʻa e feʻofaʻaki moʻoní pea tui naʻe fekauʻi mai ʻe he ʻOtuá ʻa Sīsū ke ne fakahaofi kitautolú? Ko hai ʻoku ʻikai ke kau ʻi he ngaahi meʻa fakapolitikalé? Ko hai ʻoku nau malangaʻi ko e Puleʻanga pē ʻo e ʻOtuá ʻe lava ke ne fakaleleiʻi ʻetau ngaahi palopalemá?’ Ko e Kau Fakamoʻoni ʻa Sihová pē.​—ʻAisea 43:10-12.

15. Ko e hā kuo pau ke tau faí kapau ʻoku tau loto ke tali ʻe he ʻOtuá ʻetau lotú?

¹⁵ ʻOku ʻikai feʻunga ke tui pē ʻoku ʻi ai ʻa e ʻOtua. Naʻa mo e fanga tēmenioó ʻoku nau tui ʻoku ʻi ai ʻa e ʻOtua, ka ʻoku ʻikai te nau talangofua kiate ia. (Sēmisi 2:19) Kapau ʻoku tau loto ke tali ʻe he ʻOtuá ʻetau lotú, kuo pau ke ʻoua te tau tui pē ʻokú ne ʻi ai ka tau fai foki ʻa e meʻa ʻokú ne folofolaʻakí.

16. Ko e hā ʻoku totonu ai ke tau siʻaki ʻa e lotu loí?

¹⁶ Ke tali ʻe he ʻOtuá ʻetau lotú, kuo pau ke tau siʻaki ʻa e lotu loí. Naʻe tohi ʻe he palōfita ko ʻAiseá: “Hū ki tuʻa mei hono lotolotongá, ʻai kimoutolu ke mou maʻa.” (ʻAisea 52:11; 2 Kolinitō 6:17) Ko e ʻuhinga ia ʻoku fiemaʻu ai ke tau siʻaki ha meʻa pē ʻoku kaunga ki he lotu loí.

17, 18. Ko e hā ʻa “Pāpilone ko e Lahi,” pea ko e hā ʻoku fiemaʻu fakavavevave ai ke siʻaki iá?

¹⁷ Ko e hā ʻa e lotu loi? Ko ha lotu pē ʻokú ne akoʻi ke tau lotu ki he ʻOtuá ʻi ha founga ʻoku fepaki mo ʻene Folofolá. ʻOku ui ʻe he Tohi Tapú ʻa e lotu loi kotoa pē ko “Pāpilone ko e Lahi.” (Fakahā 17:5) Ko e hā hono ʻuhingá? Hili ʻa e Lōmaki ʻi he ʻaho ʻo Noá, naʻe kamata ai ʻa e ngaahi akonaki fakalotu loi lahi ʻi he kolo ko Pāpiloné. Ko e ngaahi akonaki loi ko iá naʻe mafola atu ia ki he māmaní kotoa. Ko e fakatātaá, ko e kakai naʻe nofo ʻi Pāpiloné naʻa nau lotu ki he ngaahi kulupu ʻo e ʻotua ʻe toko tolu. ʻI he ʻahó ni foki, ʻoku akoʻi ʻe he ngaahi lotu lahi ko e ʻOtuá ko ha Tolu-Tahaʻi-ʻOtua, ka ʻoku akoʻi mahino ʻe he Tohi Tapú ʻoku taha pē ʻa e ʻOtua moʻoní, ko Sihova, pea ko hono ʻAló ko Sīsū. (Sione 17:3) Naʻe tui foki ʻa e kakai ʻi Pāpiloné ʻoku hokohoko atu ʻa e moʻui ha konga ʻo ha taha ʻi he hili ʻa e mate ʻa e sinó pea ʻe lava ke faingataʻaʻia ʻa e konga ko iá ʻi heli. ʻOku ʻikai ke moʻoni ia.​—Sio ki he Fakamatala ʻi he Ngataʻangá 14, 17, mo e 18.

¹⁸ Naʻe tomuʻa tala ʻe he ʻOtuá kuo vavé ni ke fakaʻauha ʻa e lotu loi kotoa pē. (Fakahā 18:8) ʻOkú ke mahinoʻi ʻa e ʻuhinga ʻoku fiemaʻu fakavavevave ai ke mavahe mei he lotu loí? ʻOku fiemaʻu mai ʻe Sihova ko e ʻOtuá ke ke fai ia ki muʻa ke fuʻu tōmui.​—Fakahā 18:4.

19. ʻI hoʻo fili ke tauhi kia Sihová, ʻe anga-fēfē ʻene tokangaʻi koé?

¹⁹ ʻI hoʻo fili ke mavahe mei he lotu loí pea tauhi kia Sihová, heʻikai nai ke mahinoʻi ʻe he niʻihi ho ngaahi kaumeʻá pe fāmilí hoʻo filí pea aʻu nai ʻo nau ʻai ke faingataʻa ʻa e moʻuí kiate koe. Ka heʻikai liʻaki koe ʻe Sihova. Te ke hoko ko ha konga ʻo ha fāmili ʻi māmani lahi ʻo e kakai ʻe laui miliona ʻoku nau feʻofaʻaki moʻoni, pea maʻu ʻa e ʻamanaki ko e moʻui taʻengata ʻi he māmani foʻou ʻa e ʻOtuá. (Maʻake 10:28-30) ʻE fili nai ʻamui ʻa e niʻihi ʻo e ngaahi kaumeʻa mo e fāmili ʻoku nau fakafepakiʻi hoʻo fili ke tauhi kia Sihová ke ako ʻa e Tohi Tapú.

20. Ko e hā ʻoku mahuʻinga ai ke lotu ki he ʻOtuá ʻi he founga totonú?

²⁰ Kuo vavé ni ke fakaʻauha ʻe he ʻOtuá ʻa e fulikivanú kotoa pea ʻe pule mai hono Puleʻangá ki he māmaní. (2 Pita 3:9, 13) Ko ha taimi fisifisimuʻa ia! ʻE lotu ʻa e tokotaha kotoa kia Sihova ʻi he founga ʻokú ne fiemaʻu maí. Ko ia ʻoku mahuʻinga ke ke fai leva ha meʻa pea lotu ki he ʻOtuá ʻi he founga totonú.