Ko e Moʻoni Fekauʻaki mo e Kau ʻĀngeló

 1. Ko e hā ke ako ai fekauʻaki mo e kau ʻāngeló?

ʻOKU fiemaʻu ʻe Sihova ke tau ʻilo fekauʻaki mo hono fāmilí. Ko e kau ʻāngeló ko e konga kinautolu ʻo e fāmili ʻo e ʻOtuá. ʻOku ui kinautolu ʻi he Tohi Tapú ko e ‘ngaahi foha ʻo e ʻOtuá.’ (Siope 38:7) Ko e hā ʻoku fai ʻe he kau ʻāngeló? Kuo anga-fēfē ʻenau tokoniʻi ʻa e kakaí ʻi he kuohilí? Pea ʻe lava ke nau tokoniʻi kitautolu he taimí ni?​—Sio ki he Fakamatala ʻi he Ngataʻangá 8.

 2. Naʻe haʻu mei fē ʻa e kau ʻāngeló? Ko e kau ʻāngelo ʻe toko fiha naʻe fakatupú?

² ʻOku fiemaʻu ke tau ʻilo pe naʻe haʻu mei fē ʻa e kau ʻāngeló. ʻOku tala mai ʻi he Kolose 1:16 ʻi he hili hono fakatupu ʻe Sihova ʻa Sīsuú, naʻe “fakatupu ʻa e ngaahi meʻa kehe kotoa pē ʻi he langí pea ʻi he māmaní.” ʻOku kau ai ʻa e kau ʻāngeló. Ko e toko fiha ʻo kinautolu naʻe fakatupú? ʻOku pehē ʻe he Tohi Tapú ʻoku laui teau miliona ʻa e kau ʻāngeló.​—Saame 103:20; Fakahā 5:11.

 3. Ko e hā ʻoku tala mai ʻe he Siope 38:4-7 fekauʻaki mo e kau ʻāngeló?

³ ʻOku toe akoʻi mai ʻe he Tohi Tapú naʻe fakatupu ʻe Sihova ʻa e kau ʻāngeló ki muʻa ke ne ngaohi ʻa e māmaní. Naʻe anga-fēfē ʻenau ongoʻí ʻi heʻenau sio ki he māmaní? Ko e tohi Siopé ʻoku tala mai ai naʻa nau fiefia. Naʻe vāofi ʻa honau fāmilí ʻo nau tauhi fakataha kia Sihova.​—Siope 38:4-7.

 4. ʻOku anga-fēfē ʻetau ʻilo ʻoku mahuʻingaʻia ʻa e kau ʻāngeló ʻi he faʻahinga ʻo e tangatá?

⁴ Kuo mahuʻingaʻia maʻu pē ʻa e kau ʻāngeló ʻi he faʻahinga ʻo e tangatá pea ʻi he taumuʻa ʻa Sihova ki he māmaní mo e faʻahinga ʻo e tangatá. (Palōveepi 8:30, 31; 1 Pita 1:11, 12) Kuo pau pē naʻe ʻai kinautolu ʻe he angatuʻu ʻa ʻĀtama mo ʻIví ke nau loto-mamahi ʻaupito. Kuo pau pē ʻoku nau toe loto-mamahi ange he taimí ni ʻi he sio mai kuo talangataʻa ʻa e tokolahi taha ʻo e faʻahinga ʻo e tangatá kia Sihová. Ka ʻi he taimi ʻoku fakatomala ai ha taha pea foki ki he ʻOtuá, ʻoku fiefia ʻa e kau ʻāngeló. (Luke 15:10) ʻOku nau mahuʻingaʻia ʻaupito ʻi he faʻahinga ʻoku nau tauhi ki he ʻOtuá. ʻOku ngāueʻaki ʻe Sihova ʻa e kau ʻāngeló ke nau tokoniʻi mo maluʻi ʻa ʻene kau sevāniti ʻi he māmaní. (Hepelū 1:7, 14) Tau sio angé ki he fakatātā ʻe niʻihi ʻo e meʻá ni.

 5. Kuo anga-fēfē hono tokoniʻi ʻe he kau ʻāngeló ʻa e kau sevāniti ʻa e ʻOtuá ʻi he kuohilí?

⁵ Naʻe fekauʻi mai ʻe Sihova ʻa e ongo ʻāngelo ke na tokoniʻi ʻa Lote mo hono fāmilí ke nau hao ʻi he fakaʻauha ʻo e ongo kolo ko Sōtoma mo Komolá. (Sēnesi 19:15, 16) ʻI he taʻu ʻe laui teau ki mui ai, naʻe lī ʻa e palōfita ko Tanielá ki ha ʻana ʻo e fanga laioné, ka naʻe ʻikai hoko ha kovi kiate ia, koeʻuhí ‘naʻe fekauʻi mai ʻe he ʻOtuá ʻa ʻene ʻāngeló ʻo ne tāpuni ʻa e ngutu ʻo e fanga laioné.’ (Taniela 6:22) Ki mui ai, ʻi he taimi naʻe ʻi he pilīsoné ai ʻa e ʻapositolo ko Pitá, naʻe fekauʻi mai ʻe Sihova ha ʻāngelo ke ne tuku ange ia. (Ngāue 12:6-11) Naʻe tokoniʻi foki ʻe ha kau ʻāngelo ʻa Sīsū ʻi he taimi naʻá ne ʻi māmani aí. Ko e fakatātaá, hili ʻene papitaisó, “naʻe tokoniʻi ia ʻe he kau ʻāngeló.” (Maʻake 1:13) Ki muʻa pē ʻi hono tāmateʻi ʻo Sīsuú, naʻe “fakaivimālohiʻi ia” ʻe ha ʻāngelo.​—Luke 22:43.

 6. (a) ʻOku anga-fēfē ʻetau ʻiloʻi ʻoku tokoniʻi ʻe he kau ʻāngeló ʻa e kakai ʻa e ʻOtuá ʻi he ʻaho ní? (e) Ko e hā ʻa e ngaahi fehuʻi te tau tali he taimi ní?

⁶ ʻI he ʻahó ni, ʻoku ʻikai ke kei hā ai ʻa e kau ʻāngeló ki he faʻahinga ʻo e tangatá. Ka ʻoku kei ngāueʻaki pē ʻe he ʻOtuá ʻa e kau ʻāngeló ke nau tokoniʻi ʻa ʻene kau sevānití. ʻOku pehē ʻe he Tohi Tapú: “ʻOku ʻapitanga takatakai ʻa e ʻāngelo ʻa Sihová ki he faʻahinga ʻoku manavahē kiate Iá, pea ʻokú ne fakahaofi kinautolu.” (Saame 34:7) Ko e hā ʻoku tau fiemaʻu ai ha maluʻí? Koeʻuhi ʻoku ʻi ai hotau ngaahi fili mālohi ʻoku nau loto ke fai ha kovi kiate kitautolu. Ko hai kinautolu? Ko ʻenau haʻú mei fē? ʻOku anga-fēfē ʻenau feinga ke fai ha kovi kiate kitautolú? Ke tali ʻa e ngaahi fehuʻi ko iá, tau sio angé ki he meʻa naʻe hoko ʻi he taimi nounou pē mei hono fakatupu ʻo ʻĀtama mo ʻIví.

 7. Ko e hā kuo fai ʻe he kakaí koeʻuhi ko e ngaahi kākā ʻa Sētané?

⁷ Naʻa tau ako ʻi he Vahe 3 naʻe angatuʻu ha ʻāngelo ki he ʻOtuá peá ne loto ke puleʻi ʻa e niʻihi kehé. ʻOku ui ia ʻe he Tohi Tapú ko Sētane ko e Tēvoló. (Fakahā 12:9) ʻOku toe fiemaʻu ʻe Sētane ke angatuʻu ʻa e niʻihi kehé ki he ʻOtuá. Naʻá ne malava ke kākaaʻi ʻa ʻIvi, pea talu mei ai mo ʻene kākaaʻi ʻa e tokolahi taha ʻo e faʻahinga ʻo e tangatá. Kae kehe, ko e niʻihi hangē ko ʻĒpeli, ʻĪnoke, mo Noá naʻa nau faitōnunga ai pē kia Sihova.​—Hepelū 11:4, 5, 7.

 8. (a) Naʻe anga-fēfē ʻa e hoko ʻa e kau ʻāngelo ʻe niʻihi ko e fanga tēmenioó? (e) Ko e hā naʻe fai ʻe he fanga tēmenioó ke nau hao ai ʻi he Lōmakí?

⁸ ʻI he taimi ʻo Noá, naʻe angatuʻu ai ʻa e kau ʻāngelo ʻe niʻihi pea nau liʻaki honau ʻapi ʻi hēvaní ka nau moʻui ko e tangata ʻi he māmaní. Ko e hā hono ʻuhingá? ʻOku tala mai ʻe he Tohi Tapú naʻa nau loto ke maʻu uaifi. (Lau ʻa e Sēnesi 6:2.) Ka naʻe hala ʻa e fai pehē ʻa e kau ʻāngeló. (Sute 6) ʻI he hangē ko e kau ʻāngelo fulikivanu ko iá, ko e tokolahi taha ʻo e faʻahinga ʻo e tangatá ʻi he taimi ko iá naʻa nau hoko ʻo kākā mo anga-fakamālohi. Naʻe fakapapauʻi leva ai ʻe Sihova ke ne fakaʻauha ʻa e faʻahinga fulikivanu ʻo e tangatá ʻaki hono ʻomai ha lōmaki ki he māmaní kotoa. Ka naʻá ne fakahaofi ʻene kau sevāniti faitōnungá. (Sēnesi 7:17, 23) Naʻe foki ʻa e kau ʻāngelo fulikivanú ki hēvani ke nau hao. ʻOku ui ʻe he Tohi Tapú ʻa e kau ʻāngelo fulikivanu ko iá ko e fanga tēmeniō. Naʻa nau fili ke kau ʻi he angatuʻu ʻa Sētané, pea naʻe hoko ai ʻa e Tēvoló ko honau pule.​—Mātiu 9:34.

 9. (a) Ko e hā naʻe hoko ki he fanga tēmenioó ʻi heʻenau foki ki hēvaní? (e) Ko e hā te tau ako hono hoko fekauʻaki mo iá?

⁹ Koeʻuhí ko e kau angatuʻu kinautolu, naʻe ʻikai ke tali ʻe Sihova ke foki ʻa e fanga tēmenioó ki hono fāmilí. (2 Pita 2:4) Naʻe ʻikai toe lava ke liliu ʻo hoko ko ha tangata ʻa e fanga tēmenioó, ka ʻoku nau kei hanga pē ʻo “takihalaʻi ʻa e kotoa ʻo e māmani kuo nofoʻí.” (Fakahā 12:9; 1 Sione 5:19) Tau ako angé ki he founga ʻoku nau lava ai ke kākaaʻi, pe takihalaʻi ha fuʻu tokolahi.​—Lau ʻa e 2 Kolinitō 2:11.

10. ʻOku anga-fēfē hono kākaaʻi ʻe he fanga tēmenioó ʻa e kakaí?

¹⁰ ʻOku kākaaʻi ʻe he fanga tēmenioó ʻa e kakaí ʻi he ngaahi founga lahi. ʻI he taimi ʻoku fetuʻutaki ai ʻa e kakaí ki he fanga tēmenioó ʻoku nau fai fakahangatonu ia pe fakafou ʻi ha taha kehe, hangē ko ha toketā taula faʻahikehe pe ko ha tokotaha vavalo. Ko e fetuʻutaki mo e fanga tēmenioó ʻoku ui ia ko e tōʻonga fakatēmeniō pe fakahaʻele faʻahikehe. Ka ʻoku fekauʻi mai ʻe he Tohi Tapú ke tau fakamamaʻo ʻaupito mei ha meʻa pē ʻoku ʻi ai hono kaunga ki he fanga tēmenioó. (Kalētia 5:19-21) Ko e hā hono ʻuhingá? Hangē pē ko hono ngāueʻaki ʻe ha tokotaha tulimanu ha tauhele ke pō ʻa e fanga manú, ʻoku ngāueʻaki ʻe he fanga tēmeniō ʻa e ngaahi kākā ke tauheleʻi ʻaki ʻa e kakaí mo puleʻi kinautolu.​—Sio ki he Fakamatala ʻi he Ngataʻangá 26.

11. Ko e hā ʻa e tongafisi, pea ko e hā ʻoku totonu ai ke tau fakaʻehiʻehi mei aí?

¹¹ Ko e taha ʻo ʻenau ngaahi kākaá ʻoku ui ia ko e tongafisi. Ko hono ngāueʻaki ia ʻo e ngaahi mālohi mahulu hake ʻi natula ʻi he feinga ke ʻilo fekauʻaki mo e kahaʻú pe ko e taʻeʻiloá. ʻE feinga nai ha taha ke fai eni ʻaki ʻene sio ki he ngaahi fetuʻú, kumi ki ha ngaahi meʻa fakahā, lau ʻa e pele fakatātaá, ngāueʻaki ʻo ha pulu kilisitala, pe tala ʻa e kahaʻú ʻi hono lau ʻa e laine ʻi he ʻaofinima ʻo ha taha. ʻOku tui ʻa e kakai tokolahi ʻoku ʻikai hano maumau ʻa e ngaahi tōʻonga ko ení, ka ʻoku pehē. ʻOku fakatuʻutāmaki ʻaupito ia. Ko e fakatātaá, ʻoku fakahā ʻe he Tohi Tapú ʻoku ngāue fakataha ʻa e fanga tēmenioó mo e kau vavaló. ʻI he Ngāue 16:16-18, ʻoku tau lau ai ʻo fekauʻaki mo ha “tēmeniō vavalo” ʻa ia naʻá ne tokoniʻi ha taʻahine ke ne fai ʻa e “tala meʻa ki he kahaʻú.” Hili hono fekauʻi ʻe he ʻapositolo ko Paulá ke mavahe ʻa e tēmenioó, naʻe mole mei he taʻahiné ʻa ʻene malava ke tomuʻa tala ʻa e kahaʻú.

12. (a) Ko e hā ʻoku fakatuʻutāmaki ai ʻa e feinga ke fetuʻutaki mo e kau maté? (e) Ko e hā ʻoku ʻikai ʻaupito ai ke kau ʻa e kau sevāniti ʻa e ʻOtuá ʻi he ngaahi tōʻonga fakatēmenioó?

¹² ʻOku ngāueʻaki ʻe he fanga tēmenioó ha toe kākā ʻe taha ke tauheleʻi ʻaki ʻa e kakaí. ʻOku nau feinga ke ʻai kitautolu ke tau tui ʻoku malava ke talanoa mo e kau maté pea ko e faʻahinga kuo maté ko hono moʻoní ʻoku nau kei moʻui atu pē ʻi ha feituʻu pea ʻoku lava ke nau fetuʻutaki mo kitautolu pe fakamamahiʻi kitautolu. Ko e fakatātaá, ʻoku ʻalu nai ha taha kuo mate hano kaumeʻa pe kāinga ki ha tokotaha, hangē nai ko ha taula faʻahikehe, ʻa ia ʻokú ne pehē ʻoku lava ke ne talanoa mo e kau maté. ʻE tala nai ʻe he taulá ki he tokotahá ha meʻa fakamānako fekauʻaki mo hono kaumeʻa pe kāinga kuo maté pea aʻu ʻo ne faʻifaʻitakiʻi ʻa e leʻo ʻo e tokotaha kuo maté. (1 Sāmiuela 28:3-19) Ko e ngaahi tōʻonga lahi ʻoku fai ʻi he putú ʻoku toe fakatefito ia ʻi he tui ʻoku kei moʻui atu pē ʻa e kau maté ʻi ha feituʻu. ʻOku kau nai ki heni ʻa e ngaahi kātoanga fakafiefia hili e tanu ʻo e putú, fakamanatu ʻo e ʻaho maté, feilaulau ki he kau maté, ouau tengihia fakalotu maʻá e kau uitoú, pe ko ha ngaahi ouau ʻāpō. ʻI he fakafisi ʻa e kau Kalisitiané ke nau kau ʻi he ngaahi tōʻonga ko ení, ʻoku fakaangaʻi nai ai kinautolu ʻe honau ngaahi fāmilí pe ngaahi koló, ngāhiʻi kinautolu, pe fakafisi ke toe ʻi ai hanau kaunga kiate kinautolu. Ka ʻoku ʻiloʻi ʻe he kau Kalisitiané ʻoku ʻikai ke moʻui ʻa e kau maté ʻi ha toe feituʻu. ʻOku ʻikai malava ke fetuʻutaki mo kinautolu, pea heʻikai lava ke nau fai mai ha kovi kiate kitautolu. (Saame 115:17) Tokanga ʻaupito. ʻOua ʻaupito ʻe feinga ke fetuʻutaki mo e kau maté pe ko e fanga tēmenioó pea ʻoua ʻaupito ʻe kau ʻi he ngaahi tōʻonga fakatēmenioó.​—Lau ʻa e Teutalōnome 18:10, 11; ʻAisea 8:19.

13. Ko e hā kuo malava ke fai ʻe he kakai tokolahi ʻa ia naʻa nau moʻui mo manavahē ki muʻa ʻi he fanga tēmenioó?

¹³ ʻOku ʻikai ngata pē ʻi hono kākaaʻi ʻe he fanga tēmenioó ʻa e kakaí ka ʻoku nau toe fakamanavaheeʻi kinautolu. ʻI he ʻahó ni, ʻoku ʻiloʻi ʻe Sētane mo ʻene fanga tēmenioó ‘ʻoku toe siʻi pē honau taimí’ ki muʻa ke toʻo atu kinautolu ʻe he ʻOtuá mei he māmaní, ko ia ʻoku nau anga-fakamālohi mo anga-fītaʻa ange ʻi ha toe taimi ki muʻa. (Fakahā 12:12, 17) Kae kehe, ko e laui afe ʻo e kakai naʻa nau moʻui mo manavahē ki muʻa ʻi he fanga tēmenioó ʻoku ʻikai te nau toe manavahē ʻiate kinautolu. Naʻe anga-fēfē ʻenau ʻatā mei he manavahē ʻi he fanga tēmenioó?

14. Hangē ko e kau Kalisitiane ʻi he ʻuluaki senitulí, ʻe lava fēfē ke tau ʻatā mei he fanga tēmenioó?

¹⁴ ʻOku tala mai ʻe he Tohi Tapú ʻa e founga ke talitekeʻi ai ʻa e fanga tēmenioó mo e founga ke ʻatā ai meiate kinautolú. Ko e fakatātaá, ko e niʻihi ʻi he kolo ko ʻEfesoó naʻa nau fetuʻutaki mo e fanga tēmenioó ki muʻa ke nau ako ʻa e moʻoní. Naʻe anga-fēfē ʻenau ʻatā mei aí? ʻOku pehē ʻe he Tohi Tapú: “Ko ha tokolahi ʻo e faʻahinga naʻa nau fai ʻa e ngaahi tōʻonga fakafaimaná naʻa nau ʻomai ʻenau ʻū tohí ʻo tutu kinautolu ʻi he ʻao ʻo e tokotaha kotoa.” (Ngāue 19:19) Koeʻuhi naʻa nau loto ke hoko ko e kau Kalisitiane, naʻa nau fakaʻauha ʻa e kotoa ʻo ʻenau ʻū tohi fakafaimaná. ʻOku fiemaʻu ʻa e ngāue meimei tatau ʻi he ʻahó ni. Ko e tokotaha kotoa pē ʻoku loto ke tauhi kia Sihová ʻoku fiemaʻu ke ne fakamamaʻo mei he ngaahi meʻa ʻoku ʻi ai honau kaunga ki he fanga tēmenioó. ʻOku kau ki heni ʻa e ʻū tohi, ngaahi makasini, vavalo fakaʻasitalolosia, ngaahi faiva, fasi, ngaahi keimi, pea naʻa mo e ngaahi fakatātā ʻokú ne ʻai ʻa e faimaná, fanga tēmenioó, pe ngaahi meʻa mahulu hake ʻi natulá ke hā ngali lelei pe fakafiefia. ʻOku toe kau ki ai ʻa e ngaahi meʻa ʻoku tui ʻe he kakaí ke maluʻi ʻaki kinautolu mei ha kovi.​—1 Kolinitō 10:21.

15. Ko e hā ha toe meʻa ʻoku fiemaʻu ke tau fai ke talitekeʻiʻaki ʻa Sētane mo e fanga tēmenioó?

¹⁵ ʻI ha ngaahi taʻu hili hono fakaʻauha ʻe he faʻahinga ʻi ʻEfesoó ʻenau ʻū tohi fakafaimaná, naʻe tohi ʻa e ʻapositolo ko Paulá ʻo pehē naʻe kei pau pē ke nau “fetakai” mo faitau mo e “ngaahi kongakau laumālie fulikivanu.” (ʻEfesō 6:12) ʻIo, neongo naʻa nau ʻosi tutu ʻenau ʻū tohí, naʻe kei feinga pē ʻa e fanga tēmenioó ke fai ha kovi kiate kinautolu. Ko ia ai, ko e hā ha toe meʻa naʻe fiemaʻu ke nau fai? Naʻe tala ange ʻe Paula kiate kinautolu: “Mou toʻo hake ʻa e pā lahi ko e tuí, ʻa ia ʻe malava ai ke mou tāmateʻiʻaki [pe taʻofiʻaki] ʻa e ngaahi ngahau vela kotoa ʻa e tokotaha fulikivanú.” (ʻEfesō 6:16) Hangē pē ko hono maluʻi ʻe ha pā ha sōtia ʻi he taú, ʻoku malava ke maluʻi kitautolu ʻe heʻetau tuí. Kapau ʻoku tau falala kakato ʻe lava ʻe Sihova ke ne maluʻi kitautolu, te tau malava ai ke talitekeʻi ʻa Sētane mo e fanga tēmenioó.​—Mātiu 17:20.

16. ʻE lava fēfē ke tau ʻai ke toe mālohi ange ʻetau tui kia Sihová?

¹⁶ ʻE lava fēfē ke tau ʻai ke toe mālohi ange ʻetau tui kia Sihová? ʻOku fiemaʻu ke tau lau ʻa e Tohi Tapú ʻi he ʻaho kotoa pē pea ako ke falala kiate ia te ne maluʻi kitautolu. Kapau ʻoku tau tuipau mālohi kia Sihova, heʻikai malava ʻe Sētane mo e fanga tēmenioó ke fai ha kovi kiate kitautolu.​—1 Sione 5:5.

17. Ko e hā ha toe meʻa te ne maluʻi kitautolu mei he fanga tēmenioó?

¹⁷ Ko e hā ha toe meʻa naʻe fiemaʻu ke fai ʻe he kau Kalisitiane ʻi ʻEfesoó? Naʻa nau nofo ʻi he kolo naʻe fonu ʻi he tōʻonga fakatēmenioó. Ko ia naʻe tala ange ʻe Paula: “Hokohoko atu ʻa e lotu ʻi he taimi kotoa pē.” (ʻEfesō 6:18) Naʻe fiemaʻu ke nau kole ʻa e maluʻi ʻa Sihová ʻi he taimi kotoa pē. Fēfē kitautolu? ʻOku tau nofo foki ʻi ha māmani ʻoku fonu ʻi he tōʻonga fakatēmenioó. Ko ia ʻoku fiemaʻu foki ke tau kole ʻa e maluʻi ʻa Sihová, pea ʻoku fiemaʻu ke tau ngāueʻaki ʻa hono huafá ʻi heʻetau lotú. (Lau ʻa e Palōveepi 18:10.) Kapau ʻoku tau hanganaki kole kia Sihova ke ne fakahaofi kitautolu meia Sētane, ʻe tali ʻe Sihova ʻetau ngaahi lotú.​—Saame 145:19; Mātiu 6:13.

18, 19. (a) ʻE lava fēfē ke tau ikuna ʻi heʻetau faitau mo Sētane mo e fanga tēmenioó? (e) Ko e hā ʻa e fehuʻi ʻe tali ʻi he vahe hono hokó?

¹⁸ Kapau te tau toʻo ʻosi ʻa e meʻa kotoa pē ʻi heʻetau moʻuí ʻoku ʻi ai hono kaunga ki he tōʻonga fakatēmenioó pea falala kia Sihova ke ne maluʻi kitautolu, ʻe lava ke tau talitekeʻi ʻa Sētane mo ʻene fanga tēmenioó. ʻOku ʻikai fiemaʻu ke tau ilifia kiate kinautolu. (Lau ʻa e Sēmisi 4:7, 8.) ʻOku mālohi mamaʻo ange ʻa Sihova ʻi he fanga tēmenioó. Naʻá ne tauteaʻi kinautolu ʻi he ʻaho ʻo Noá, pea te ne fakaʻauha kinautolu ʻi he kahaʻú. (Sute 6) Manatuʻi, ʻoku ʻikai ko kitautolu pē ʻoku faitaú. ʻOku ngāueʻaki ʻe Sihova ʻene kau ʻāngeló ke nau maluʻi kitautolu. (2 Tuʻi 6:15-17) ʻOku lava ke tau tuipau ʻi he tokoni ʻa Sihová, ʻe lava ai ke tau ikuna ʻi heʻetau faitau mo Sētane mo e fanga tēmenioó.​—1 Pita 5:6, 7; 2 Pita 2:9.

¹⁹ Ka ʻo kapau ʻoku fakatupunga ʻe Sētane mo e fanga tēmenioó ha faingataʻa lahi, ko e hā kuo ʻikai ai ke fakaʻauha kinautolu ʻe he ʻOtuá? ʻE tali ʻa e fehuʻí ni ʻi he vahe hono hokó.