“Ko Au Tonu Te U Kumi ki Heʻeku Fanga Sipí”

 1. ʻOku anga-fēfē hangē ʻa Sihova ko ha faʻē toutamá?

“ʻE MALAVA koā ke ngalo ʻi ha fefine ʻa ʻene tama kei huhú?” Ko ha fehuʻi ia naʻe ʻeke ʻe Sihova ʻi he taimi ʻo e palōfita ko ʻAiseá. “Neongo kapau ʻe ngalo ʻi he kau fefiné, ʻe ʻikai ʻaupito te ke ngalo ʻiate au,” ko e lea ia ʻa e ʻOtuá ki heʻene kakaí. (ʻAi. 49:15) ʻOku ʻikai ke ne faʻa fakahoa ia ki ha faʻē. Ka ʻi he taimi ko ení naʻá ne fai pehē. Naʻe ngāueʻaki ʻe Sihova ʻa e vahaʻangatae ʻi he vahaʻa ʻo ha faʻē mo haʻane tama ke fakahaaʻi ʻaki ʻa e lahi ʻo ʻene ʻofa ʻi heʻene kau sevānití. Ko e tokolahi taha ʻo e ngaahi faʻeé ʻoku nau maʻu ʻa e ongoʻi tatau mo e tuofefine ko Jasmin ʻa ia naʻá ne pehē, “ʻI hoʻo hoko ko ha faʻē toutama, ʻokú ke fakatupulekina ha vahaʻangatae makehe ʻaupito mo hoʻo tamá ʻa ia ʻe tuʻuloa.”

 2. ʻOku anga-fēfē ongoʻi ʻa Sihova ʻi he ʻauhia ha taha ʻene fānaú meiate ia?

² ʻOku aʻu ʻo fakatokangaʻi ʻe Sihova ʻa e taimi ʻoku ʻikai ke toe feohi ai ha taha ʻene fānaú mo e fakatahaʻangá pea kau ʻi he ngāue fakamalangá. Fakakaukau atu leva ki heʻene ongoʻi mamahi ʻi he vakai ki he laui afe ʻo ʻene kau sevānití ʻoku ʻikai ke nau longomoʻuib ʻi he taʻu taki taha.

 3. Ko e hā ʻa e finangalo ʻo Sihová?

³ Ko e tokolahi ʻo siʻotau fanga tokoua ko eni kuo ʻikai ke nau longomoʻuí ʻoku nau foki mai ki he fakatahaʻangá, ʻa ia ʻoku talitali lelei ai kinautolú! ʻOku finangalo ʻa Sihova ke nau foki mai, pea ʻoku pehē pē mo kitautolu. (1 Pita 2:25) ʻE lava fēfē ke tau tokoni kiate kinautolu? Ki muʻa ke tau tali ʻa e fehuʻi ko iá, ʻe lelei ke tau ʻiloʻi ʻa e ʻuhinga ʻoku ʻikai ke toe maʻu ai ʻe he niʻihi ʻa e fakatahá pea kau ʻi he ngāue fakafaifekaú.

 4. ʻOku lava fēfē ke uesia ʻe he ngāue fakamāmaní ʻa e niʻihi?

⁴ Ko e niʻihi kuo nau moʻumoʻua ʻaupito ʻi he ngāue fakamāmaní. “Naʻá ku mātuʻaki femoʻuekina ʻi heʻeku ngāué,” ko e lau ia ʻa Hung,c ko ha tokoua ʻoku nofo ʻi ʻĒsia Tonga-Hahake. “Naʻá ku maʻu ha fakakaukau fakavalevale ʻo pehē kapau te u tuʻumālie, ʻe toki faingofua ange ai ke u tauhi kia Sihova. Ko ia naʻá ku ngāue ʻi he ngaahi houa lahi. Naʻe kamata ke u toutou liʻaki ʻa e fakatahá pea faai atu pē ʻo ʻikai ke u toe feohi mo e fakatahaʻangá. ʻOku hā ngali ko e māmaní ʻoku faʻu ia ke ne tohoakiʻi māmālie ʻa e kakaí mei he ʻOtuá.”

 5. Naʻe anga-fēfē hono uesia ha tuofefine ʻe he ngaahi palopalemá?

⁵ Ko e fanga tokoua mo e fanga tuofāfine ʻe niʻihi ʻoku lōmekina kinautolu ʻe he ngaahi palopalemá. Ko Anne mei Pilitānia ʻoku ʻi ai ʻene fānau ʻe toko nima. “Ko e taha ʻeku fānaú naʻe fanauʻi ia mo e faingataʻaʻia lahi fakaesino,” ko e lau ia ʻa Anne. “Ki mui ai, naʻe tuʻusi ʻeku taʻahine pea naʻe puke fakaʻatamai ʻeku tamasiʻi ʻe taha. Naʻá ku loto-mafasia lahi pea ʻikai ke toe maʻu ʻa e fakatahá mo ʻalu ʻi he ngāue fakamalangá. Faai atu pē, naʻe ʻikai ke u toe longomoʻui.” ʻOku tau fakaʻofaʻia moʻoni ʻia Anne mo hono fāmilí pehē ki he niʻihi kehe ʻoku nau fekuki mo e ngaahi faingataʻa peheé!

 6. ʻE lava fēfē ke ʻauhia ha tokotaha mei he kakai ʻa Sihová ʻi he ʻikai ke ngāueʻaki ʻa e Kolose 3:13?

⁶ Lau ʻa e Kolose 3:13. Ko e niʻihi ʻo e kau sevāniti ʻa Sihová kuo fakalotomamahiʻi kinautolu ʻe ha kaungātui. Naʻe ʻiloʻi ʻe he ʻapositolo ko Paulá ʻi he taimi ʻe niʻihi te tau maʻu nai ha ʻuhinga lelei “ke lāunga ai” fekauʻaki mo ha tokoua pe tuofefine. ʻE aʻu nai ʻo fai mai ha fakafeangai taʻetotonu. Kapau heʻikai ke tau tokanga, te tau hoko ʻo ʻita. ʻE faai atu pē ʻo fakatupunga ʻe he ʻitá ha tokotaha ke ʻauhia mei he kakai ʻa Sihová. Fakakaukau ki he hokosia ʻa Pablo ko ha tokoua ʻi ʻAmelika Tonga. Naʻe tukuakiʻi loi ia ki ha faihala pea mole ai hono monū ʻi he fakatahaʻangá. Naʻe anga-fēfē ʻene fakafeangaí? “Naʻá ku ʻita,” ko e lau ia ʻa Pablo, “pea naʻá ku ʻauhia māmālie atu mei he fakatahaʻangá.”

 7. ʻOku lava fēfē ke uesia ʻe ha konisēnisi halaia ha tokotaha?

⁷ Pe ʻoku fakamamahiʻi nai ha tokotaha ʻe ha konisēnisi halaia koeʻuhi ko ʻene maumauʻi ʻa e lao ʻa e ʻOtuá ʻi he kuohilí, ʻo ʻai ia ke ne ongoʻi ʻoku ʻikai ke ne tuha mo e ʻofa ʻa e ʻOtuá. Neongo kapau naʻá ne fakatomala pea kuo fakahaaʻi ʻa e mēsí kiate ia, te ne ongoʻi nai ʻoku ʻikai ke ne kei taau ke hoko ko ha taha ʻo e kakai ʻa e ʻOtuá. Naʻe ongoʻi pehē ha tokoua ko Francisco. “Naʻe valokiʻi au koeʻuhi ko e fehokotaki fakasino taʻetaau,” ko ʻene leá ia. “ʻI he kamatá naʻá ku kei maʻu pē ʻa e fakatahá, ka naʻá ku loto-mafasia pea ongoʻi ʻikai taau ke ʻi he haʻohaʻonga ʻo e kakai ʻa Sihová. Naʻe kei fakahalaiaʻi au ʻe hoku konisēnisí, pea tuipau kuo teʻeki ke fakamolemoleʻi au ʻe Sihova. Faai atu pē naʻe ʻikai ke u toe feohi mo e fakatahaʻangá.” ʻOku anga-fēfē hoʻo ongoʻi fekauʻaki mo e fanga tokoua mo e fanga tuofāfine ʻoku nau fekuki mo e ngaahi tuʻunga hangē ko ia naʻa tau toki lāulea ki aí? ʻOkú ke kaungāongoʻi mo kinautolu? Ko e mahuʻinga angé, ʻoku anga-fēfē ongoʻi ʻa Sihova fekauʻaki mo kinautolú?

 8. ʻOku ngalo ʻia Sihova ʻa e faʻahinga naʻa nau tauhi kiate iá? Fakamatalaʻi.

⁸ ʻOku ʻikai ke ngalo ʻia Sihova ʻa e faʻahinga naʻa nau tauhi kiate ia ka kuo ʻikai ke nau toe feohi mo ʻene kakaí; pea ʻoku ʻikai foki ke ngalo ʻiate ia ʻa e ngāue naʻa nau fai maʻaná. (Hep. 6:10) Naʻe hiki ʻe he palōfita ko ʻAiseá ha fakatātā fakaʻofoʻofa fekauʻaki mo e tokanga ʻa Sihova ki heʻene kakaí. “Te ne tokangaʻi ʻa ʻene tākangá ʻo hangē ha tauhi-sipí,” ko e tohi ia ʻa ʻAiseá. “Te ne tānaki fakataha ʻa e fanga lamí ʻaki hono nimá, pea te ne fua kinautolu ʻi hono fatafatá.” (ʻAi. 40:11) ʻOku anga-fēfē ongoʻi ʻa e Tauhi-Sipi Lahí ʻi he hē ha taha ʻo ʻene fanga sipí mei he tākangá? Naʻe fakahaaʻi ʻe Sīsū ʻa e ongoʻi ʻa Sihová ʻi heʻene ʻeke ki heʻene kau ākongá: “Ko e hā hoʻomou fakakaukaú? Kapau ʻoku maʻu ʻe ha tangata ha fanga sipi ʻe toko 100 pea hē ha taha ʻo kinautolu, ʻikai te ne tuku ʻa e toko 99 ʻi he moʻungá pea ʻalu ʻo kumi ki he taha kuo heé? Pea kapau te ne maʻu ia, ʻoku ou tala moʻoni atu kiate kimoutolu, ʻe lahi ange ʻene fiefia aí ʻi heʻene fiefia ʻi he toko 99 kuo ʻikai heé.”—Māt. 18:12, 13.

 9. Naʻe anga-fēfē hono tokangaʻi ʻe he kau tauhi-sipi lelei ʻi he taimi ʻo e Tohi Tapú ʻenau fanga sipí? (Sio ki he tā ʻi he takafí.)

⁹ Ko e hā ʻoku feʻungamālie ai ke fakahoa ʻa Sihova ki ha tauhi-sipí? Koeʻuhi ko ha tauhi-sipi lelei ʻi he taimi ʻo e Tohi Tapú naʻá ne tokanga lahi ki heʻene fanga sipí. Ko e fakatātaá, ko Tēvita naʻá ne taaʻi ha laione mo ha pea ke maluʻi ʻene tākangá. (1 Sām. 17:34, 35) Ko ha tauhi-sipi lelei kuo pau pē te ne fakatokangaʻi naʻa mo e mole haʻane sipi ʻe taha. (Sione 10:3, 14) Ko ha tauhi-sipi pehē te ne tuku ʻene fanga sipi ʻe toko 99 ʻi ha ʻā malu pe ke tokangaʻi ʻe ha kaungā tauhi-sipi kae ʻalu ʻo kumi ki he sipi molé. Naʻe ngāueʻaki ʻe Sīsū ʻa e talanoa fakatātā ko iá ke akoʻi mai ha moʻoni mahuʻinga: “ʻOku ʻikai ko e finangalo ia ʻo ʻeku Tamai ʻoku ʻi hēvaní ke ʻauha naʻa mo ha taha ʻo e faʻahinga siʻí ni.”—Māt. 18:14.

10. Fakatatau ki he ʻIsikeli 34:11-16, ko e hā naʻe talaʻofa ʻe Sihova te ne fai ki heʻene fanga sipi molé?

¹⁰ ʻOku ʻofa ʻa Sihova ʻiate kitautolu taki taha, kau ai ʻa e “faʻahinga siʻí ni” ʻa ia kuo nau hē mei heʻene tākangá. Fakafou ʻi he palōfita ko ʻIsikelí, naʻe talaʻofa ʻe he ʻOtuá te ne kumi ki heʻene fanga sipi molé pea tokoniʻi kinautolu ke nau toe moʻui lelei fakalaumālie. Pea naʻá ne fakamatala ki he ngaahi meʻa pau te ne fai ke fakahaofi ai kinautolu, ʻa ia ko e ngaahi meʻa ʻe fai ʻe ha tauhi-sipi ʻIsileli kapau naʻe mole ha sipi. (Lau ʻa e ʻIsikeli 34:11-16.) ʻUluakí, ko e tauhi-sipí te ne kumi ki heʻene sipí, ʻa ia ʻe fiemaʻu ki ai ʻa e taimi mo e feinga lahi. Pea ʻi heʻene maʻu pē ʻa e sipí te ne fakafoki ia ki he tākangá. ʻIkai ko ia pē, kapau naʻe lavea pe fiekaia ʻa e sipí, ʻe tokangaʻi anga-ʻofa ʻe he tauhi-sipí ʻa e sipi vaivaí, haʻihaʻi hono laveá, fua ia pea fafanga. Ko e kau mātuʻá, ʻa e kau tauhi ʻo e “tākanga ʻa e ʻOtuá,” ʻoku fiemaʻu ke nau fai ʻa e ngaahi meʻa tatau ke tokoniʻi ha taha pē kuo hē mei he fakatahaʻangá. (1 Pita 5:2, 3) Ko e kau mātuʻá ʻoku nau kumi kiate kinautolu, tokoniʻi ke nau foki ki he tākangá, pea fakahaaʻi kiate kinautolu ʻa e ʻofa ʻaki hono tokonaki ʻa e poupou fakalaumālie ʻoku nau fiemaʻú.d

11. Ko e hā naʻe ʻiloʻi ʻe ha tauhi-sipi lelei?

¹¹ Ko ha tauhi-sipi lelei naʻá ne ʻiloʻi ʻe lava ke mole ʻa e fanga sipí. Pea ʻi he hē ha sipi mei he tākangá, naʻe ʻikai ke ngaohikoviʻi ia ʻe he tauhi-sipí. Fakakaukau ki he faʻifaʻitakiʻanga naʻe fokotuʻu mai ʻe he ʻOtuá ʻi heʻene tokoniʻi ʻa e niʻihi ʻo ʻene kau sevānití, ʻa ia naʻa nau kiʻi hē meia Sihova.

12. Naʻe anga-fēfē fakafeangai ʻa Sihova kia Sioná?

¹² Naʻe hola ʻa e palōfita ko Sioná mei hono vāhenga-ngāué. Neongo ia, naʻe ʻikai ke foʻi vave ʻa Sihova ʻia Siona. Hangē ko ha tauhi-sipi lelei, naʻe fakahaofi ia ʻe Sihova pea tokoniʻi ia ke ne maʻu ʻa e mālohi naʻe fiemaʻu ke fakahokoʻaki hono vāhenga-ngāué. (Siona 2:7; 3:1, 2) Ki mui ai, naʻe ngāueʻaki ʻe he ʻOtuá ha fuʻu ʻakau totolo ke tokoniʻi ʻa Siona ke ne mahinoʻi ʻa e mahuʻinga ʻa e moʻui ʻa e tangata taki taha. (Siona 4:10, 11) Ko e hā ʻa e lēsoní? Ko e kau mātuʻá kuo pau ke ʻoua te nau foʻi vave ʻi he faʻahinga ʻoku ʻikai longomoʻuí. ʻI hono kehé, ʻoku feinga ʻa e kau mātuʻá ke ʻiloʻi ʻa e tupuʻanga ʻo e hē ʻa ha sipi mei he tākangá. Pea ʻi he foki mai ʻa e sipí kia Sihová, ʻoku hokohoko atu hono fakahāhā ʻe he kau mātuʻá ʻa e tokanga anga-ʻofa kiate ia.

13. Ko e hā ʻoku lava ke tau ako mei he fakafeangai ʻa Sihova ki he tokotaha-tohi ʻo e Saame 73?

¹³ Ko e tokotaha-tohi ʻo e Saame 73 naʻá ne loto-siʻi ʻi heʻene vakai ki he hā ngali lakalakaimonū ʻa e fulikivanú. Naʻá ne fehuʻia pe naʻe mahuʻinga nai ʻa hono fai ʻa e finangalo ʻo e ʻOtuá. (Saame 73:12, 13, 16) Naʻe anga-fēfē fakafeangai ʻa Sihová? Naʻe ʻikai ke ne fakahalaiaʻi ʻa e tangatá. Ko hono moʻoní, naʻe ʻai ʻe he ʻOtuá ke hiki ʻene ngaahi leá ʻi he Tohi Tapú. Faai atu pē, naʻe ʻiloʻi ʻe he tokotaha-tohi-sāmé ko hono maʻu ha vahaʻangatae lelei mo Sihová ʻoku mahuʻinga ange ia ʻi ha toe meʻa, ʻokú ne ʻai ʻa e moʻuí ke mohu ʻuhinga. (Saame 73:23, 24, 26, 28) Ko e hā ʻa e lēsoní? Ko e kau mātuʻá ʻoku ʻikai totonu ke nau fakavave ke fakamāuʻi ʻa e faʻahinga ʻoku nau kamata ke fehuʻia pe ʻoku ʻaonga ʻa e tauhi kia Sihová. ʻI he ʻikai fakahalaiaʻi kinautolú, ko e kau mātuʻá kuo pau ke nau feinga ke ʻiloʻi ʻa e ʻuhinga ʻoku nau lea mo fai pehē aí. Ko e toki taimi ia ʻe lava ai ke maʻu ʻe he kau mātuʻá ʻa e konga Tohi Tapu pau ʻoku fiemaʻu ke faiʻaki ʻa e fakalototoʻá.

14. Ko e hā naʻe fiemaʻu ai ʻe ʻIlaisiā ha tokoní, pea naʻe anga-fēfē hono ʻoatu ia ʻe Sihová?

¹⁴ Naʻe hola ʻa e palōfita ko ʻIlaisiaá meia Kuini Sisipeli. (1 Tuʻi 19:1-3) Naʻá ne fakakaukau naʻe ʻikai ke toe ʻi ai ha palōfita ʻa Sihova, peá ne ongoʻi naʻe ʻikai hano mahuʻinga ʻene ngāué. Naʻe mātuʻaki loto-mafasia ʻa ʻIlaisiā ʻo ne loto ke mate. (1 Tuʻi 19:4, 10) ʻI he ʻikai fakahalaiaʻi ʻa ʻIlaisiaá, naʻe fakapapauʻi ange ʻe Sihova naʻe ʻikai ko ia toko taha pē naʻe toé, naʻe lava ke ne falala ki he mālohi ʻo e ʻOtuá, pea naʻe kei lahi mo e ngāue ke ne fai. Naʻe fanongo anga-ʻofa ʻa Sihova ki he ngaahi hohaʻa ʻa ʻIlaisiaá pea ʻoange kiate ia ha vāhenga-ngāue foʻou. (1 Tuʻi 19:11-16, 18) Ko e hā ʻa e lēsoní? Ko kitautolu kotoa, tautefito ki he kau mātuʻá, ʻoku totonu ke tau fakafeangai anga-ʻofa ki he fanga sipi ʻa Sihová. Tatau ai pē pe ʻoku fakahaaʻi ʻe ha taha ʻokú ne ʻita pe ongoʻi ʻoku ʻikai tuha mo e meesi ʻa Sihová, ko e kau mātuʻá te nau fanongo kiate ia ʻi heʻene huaʻi mai hono lotó. Te nau feinga leva ke fakapapauʻi ki he sipi molé ʻokú ne mahuʻinga kia Sihova.

15. Fakatatau ki he Sione 6:39, naʻe anga-fēfē vakai ʻa Sīsū ki he fanga sipi ʻene Tamaí?

¹⁵ ʻOku loto ʻa Sihova ke fēfē ʻetau ongoʻi fekauʻaki mo ʻene fanga sipi molé? ʻOku ʻomai ʻe Sīsū ʻa e faʻifaʻitakiʻangá. Naʻá ne ʻiloʻi ko e fanga sipi kotoa ʻa Sihová ʻoku nau mahuʻinga ʻi heʻene vakaí, ko ia naʻe fai ʻe Sīsū ʻa e meʻa kotoa naʻá ne malavá ke tokoniʻi ʻa e “fanga sipi mole ʻo e fale ʻo ʻIsilelí” ke foki kia Sihova. (Māt. 15:24; Luke 19:9, 10) ʻI he tuʻunga ʻo Sīsū ko ha tauhi-sipi leleí, naʻá ne fai foki hono tūkuingatá ke fakaʻehiʻehi mei hono ʻai ke mole ha taha ʻo e fanga sipi ʻa Sihová.—Lau ʻa e Sione 6:39.

16-17. ʻOku totonu ke fēfē ongoʻi ʻa e kau mātuʻá fekauʻaki mo hono tokoniʻi ʻa e faʻahinga kuo nau heé? (Sio ki he puha “Anga ʻo e Ongoʻi ha Sipi Mole.”)

¹⁶ Naʻe ekinaki ʻa Paula ki he kau mātuʻa ʻi he fakatahaʻanga ʻi ʻEfesoó ke nau faʻifaʻitaki kia Sīsū. “Kuo pau . . . ke mou tokoniʻi ʻa e faʻahinga ʻoku vaivaí pea kuo pau ke mou manatuʻi ʻa e ngaahi lea ʻa e ʻEiki ko Sīsuú, ʻi heʻene pehē ʻe ia tonu: ‘ʻOku ʻi ai ʻa e fiefia lahi ange ʻi he foaki atú ʻi he maʻu maí.’” (Ngā. 20:17, 35) ʻOku hā mahino, ʻoku maʻu ʻe he kau mātuʻa ʻi he ʻaho ní ha fatongia makehe ʻi he fekauʻaki mo e meʻá ni. “ʻI heʻeku fakakaukau ki he lahi ʻo e tokanga ʻa Sihova ki heʻene fanga sipi molé, ʻoku ueʻi ai au ke fai hoku lelei tahá ke tokoniʻi kinautolu,” ko e fakamatala ia ʻa Salvador, ko ha mātuʻa ʻi Sipeini. “ʻI he tuʻunga ko ha tauhi-sipi fakalaumālie, ʻoku ou tuipau ʻoku loto ʻa Sihova ke u tokangaʻi kinautolu.”

¹⁷ Ko e faʻahinga kotoa naʻe lave ki ai ʻi he kupu ko ení naʻa nau ʻauhiá naʻe tokoniʻi kinautolu ke foki kia Sihova. ʻI he taimi ní, ko e tokolahi ʻo e faʻahinga kuo nau heé ʻoku nau loto ke fai ʻa e meʻa tatau. ʻE lāulea ʻa e kupu hono hokó ki he fakaikiiki ʻo e meʻa ʻe lava ke tau fai ke tokoniʻi kinautolu ke foki mai kia Sihova.