Pati pajumpha nyengu yimanavi kutuliya po Ayisraele angutaskikiya mwakuziziswa ku ukapolu ku Egipiti, a Amaleke anguŵayukiya. Mwakulondo ulongozgi wo Mozesi wangupereka, Yoswa yo wenga wambula mantha wangulongozga Ayisraele kuchichita nkhondu ndi a Amaleke. Pa nyengu ya nkhondu, Mozesi wanguto Aroni ndi Huru ndipu wanguluta nawu paphiri lo lenga pafupi ndi po achitiyanga nkhondu. Yiwu awonanga nkhondu yo yichichitika. Mozesi wangugwirisiya ntchitu nthowa yo yinguchitisa kuti Ayisraele aphari nkhondu. Iyu wangukoleze nthonga yaku Chiuta wauneneska ndipu wangusoske manja muchanya. Asani Mozesi wachita viyo, Yehova wapasanga nthazi Ayisraele ndipu apharanga nkhondu. Kweni asani Mozesi wasiska manja ngaki chifukwa cha kuvuka, a Amaleke ndiwu apharanga. Mwaviyo, Aroni ndi Huru anguchitapu kanthu mwaliŵi. Yiwu ‘anguto mwa ndi kuwuŵika pasi ndipu [Mozesi] wangujapu. Pavuli paki, Aroni ndi Huru, anguko manja ngaki, munyaki lamaryi munyaki lamazge, kuti waleki kungasiska mpaka lumwi kusere.’ Janja lanthazi laku Chiuta linguwovya Ayisraele kuti aphari nkhondu.—Chitu. 17:8-13. w16.09 1:5-7

Paulo wagomezganga kuti wangalimbana ndi maŵanaŵanu ngaheni asani wangapemphera kwaku Yehova, kumugomezga kweniso kuja ndi chivwanu mu sembi yaku Yesu. Nanga isi? Asani tiyesesa kulimbana ndi vinthu viheni vo tikhumba kuchita chifukwa chakuti ndisi akubuda, tingafiska kuvileka. Kumbi tingachita wuli? Titenere kulondo vo Paulo wanguchita. Tithembengi Yehova ndi mtima wosi, tingathembanga nthazi zidu cha ndipuso tijengi ndi chivwanu mu sembi yaku Yesu. Nyengu zinyaki Chiuta wangakhumba kuti tilongo mo takwasikiya ndi chinthu chinyaki. Mwakuyeruzgiyapu, kumbi tingachita wuli asani isi pamwenga munthu wa mubanja lidu wasanirika ndi matenda ngakulu? Nanga tingachita wuli asani munthu munyaki watichitiya vinthu vambula urunji? Tingalongo kuti tithemba ukongwa Yehova asani tipemphera mwakumuchondele kuti watipasi nthazi kuti tilutirizi kuja akugomezgeka, timuteŵetiyengi mwakukondwa kweniso tije nayu pa ubwezi wakukho. (Afi. 4:13) Vo vinguchitikiya Akhristu mu nyengu yaku Paulo ndi vo vichitikiya Akhristu mazuŵa nganu, vilongo kuti pempheru lingatiwovya kuja so ndi nthazi kweniso kuja akugomezgeka kuti tilutirizi kukunthiyapu. w16.09 2:14, 15

Mpingu wachikhristu wati wayamba kukuwa, viwoneka kuti mumpingu mungwamba kuchitika sankhu. Ayuda wo alongoronga Chigiriki angwamba kudandawula kuti vyoko vawu, aviwovyanga cha. Kuti nkhani iyi yimali, akutumika angusankha anthurumi 7 kuti awonesesengi kuti atovya weyosi. Anthurumi ŵenaŵa ŵenga ndi mazina ngachigiriki. Panyaki akutumika anguchita viyo kuti amalisi mphindanu zo zengapu pakati pa Akhristu akwambiriya pa nkhani ya sankhu. (Machi. 6:2-6) Kwali tiziŵa pamwenga cha, tichita vinthu mwakutole midawuku yidu. (Aro. 12:2) Kanandi, tituvwa ŵanthu wo tija nawu pafupi, wo tigwira nawu ntchitu kweniso wo tisambira nawu sukulu achikamba vinthu viheni vakukwaskana ndi ŵanthu a mucharu chinyaki, fuku linyaki pamwenga wo apambana nawu kawonekeru ka khungu. Kumbi nasi titoliyaku jalidu la sankhu lenili? Kumbi tichita wuli asani munthu munyaki watitiseka chifukwa cha charu cho tituliya pamwenga wakamba vinthu viheni vakukwaskana ndi midawuku yidu? w16.10 1:7, 8