Yehova ndi “Chiuta walikondwa,” ndipu wakhumba kuti tikondwengi. (1 Timo. 1:11) Iyu wakutipaska mphasu zinandi kuti tikondwengi ndi umoyu. (Yako. 1:17) Yimoza mwa mphasu zenizi, ndi nthengwa. Asani munthulumi ndi munthukazi atorana, alayizga kuti ayanjanengi ndipuso kutumbikana. Asani yiwu alutirizga kwanjana, vitovya kuti akondwengi ukongwa. Kweni vakupaska chitima kuti ŵanthu anandi wo akutorana aluwa vo angulayizgana pa zowala zawu. Venivi vichitiska kuti alekengi kukondwa. Kumbi Yehova wakhumba kuti anthulumi achitengi wuli vinthu ndi awolu ŵawu? Yehova wakhumba kuti anthulumi aŵapaskengi ulemu awolu ŵawu. Munthulumi yo watimupaska ulemu muwolu waki wachita nayu vinthu mwalisungu ndipuso mwachanju.—1 Petu. 3:7. w25.01 8 ¶1-2; 9 ¶4-5

Tikayika cha kuti kalata yo wakutumika Paulo wangulembe Aheberi yinguwovya Akhristu a mu nyengu ya akutumika kuti anozgeke chisuzgu chikulu cho anguzikumana nachu. Paulo wanguchiska Akhristu anyaki kuti asambirengi mwakuphwere kweniso angavwisengi umampha Malemba. Kuchita venivi kwatingi kuŵawovyengi kuziŵa kweniso kukana nkhani zo zatingi zidewezengi chivwanu chawu. Iyu wanguŵachiska kuti akholesi chivwanu chawu kuti avwiyengi liŵi ulongozgi waku Yesu kweniso wakutuliya ku ŵanthu wo aŵalongozganga mu mpingu. Ndipu iyu wanguwovya Akhristu kukunthiyapu kuti awonengi mayeseru mu nthowa yakwenere kweniso kuti angawonengi kuti ndi mwaŵi wakuti asambiziki ndi Awusewu achanju. Nasi tikhumbika kugwiriskiya ntchitu ulongozgi wa mu Bayibolu wenuwu. Venivi vingatiwovya kuti tifiski kukunthiyapu mpaka pakumaliya.—Ahe. 3:14. w24.09 13 ¶17, 19

Mwakukoliyana ndi Bayibolu, sembi yakuwombole ndi mtengu wo ukuperekeka kuti maubudi ngabenekereki kweniso kuti tiyanjanisiki ndi Chiuta. Kwaku Yehova venivi vitovya kuti waweziyepu so vo vikutayika. Mu nthowa wuli? Kumbukani kuti Adamu ndi Heva angutaya mwaŵi wakuja ndi umoyu wakufikapu kweniso wamuyaya. Mwaviyo, pakhumbikanga sembi yakuwombole ya mtengu wakuyanana ndi vo vikutayika. (1 Timo. 2:6) Sembi yeniyi yakhumbikanga kuperekeka ndi munthulumi mura pe yo (1) wenga wakufikapu; (2) wakuti wangafiska kuja ndi umoyu kwamuyaya pacharu chapasi; kweniso (3) yo wakhumbisiskanga kufwa pamwenga kupereka sembi umoyu waki wakufikapu chifukwa chaku isi. Tiyeni tikambiskani vifukwa vitatu vo vingulongo kuti Yesu wenga wakwenere kupereka sembi yakuwombole. (1) Iyu wenga wakufikapu kung’anamuwa kuti “wanguchitapu ubudi wewosi cha.” (1 Petu. 2:22) (2) Chifukwa cha venivi, iyu wenga wakuti wangafiska kuja ndi umoyu wamuyaya pacharu chapasi. (3) Iyu wenga wakunozgeka kufwa kweniso kupereka umoyu waki wakufikapu chifukwa chaku isi.—Ahe. 10:9. w25.02 4-5 ¶11-12