Kumbi nkhani ya Chigumula wenga uchimi wo wamiyanga vinthu vinyaki? Awa. Chifukwa wuli? Chifukwa chakuti Bayibolu likambapu cha venivi. Mbuneneska kuti Yesu wanguyeruzgiya “mazuŵa ngaku Nowa” ndi kuŵapu kwaki. Kweni wangukambapu cha kuti chechosi cho chinguchitika mu nyengu yaku Nowa, nge kujala chisasa cha chombu vamiyanga vinthu vinyaki, mwakuti vinthu vo vazamufiskika kunthazi. (Mate. 24:​37-39) Kumbi Nowa wanguchita wuli wati wavwa uthenga wakutcheŵesa wakutuwa kwaku Yehova? Iyu wangulongo kuti we ndi chivwanu chifukwa wangukhoma chombu. (Ahe. 11:7; 1 Petu. 3:20) Mwakuyanana ŵaka, ŵanthu wo atuvwa uthenga wamampha wakukwaskana ndi Ufumu waku Chiuta, atenere kuchitapu kanthu chifukwa cha vo ŵavwa. (Machi. 3:​17-20) Peturo wangukamba kuti Nowa wenga “mupharazgi wa urunji.” Mazuŵa nganu, titesesa kupharazgiya ŵanthu pacharu chosi ndipu tichita phamphu kugwira ntchitu yeniyi. Kweni chinanga kuti tingayesesa wuli, tingafiska cha kupharazgiya weyosi pacharu umaliru wechendazi. w24.05 9-10 ¶3-5

Tisaniyengi nthowa zo tingangalongore ulemu kweniso lisungu mabwezi ngaku Yehova. (Aro. 12:10) Kumbi tingachita wuli venivi? Nthowa yimoza yikambika pa Salimo 15:4 kuti mulendu yo we muhema laku Yehova “asani walayizga, wasintha cha chinanga kuti vinthu vo vingaŵa viheni kwaku iyu.” Asani tafiska cha vo tingulayizga vingaguŵiska anyidu. (Mate. 5:37) Mwakuyeruzgiyapu, Yehova wakhaza kuti munthulumi ndi munthukazi wo akutorana asungi layizgu lawu lo angulayizgana pa nyengu yo atorananga. Iyu wakondwa so asani wawona apapi atesesa kufiska vo angulayizga ŵana ŵawu. Chifukwa chakuti titanja Chiuta kweniso ŵanthu anyaki tiyesesengi kuchita vosi vo tingachita kuti tifiski vo tingulayizga. Nthowa yinyaki yo tingatumbikiya mabwezi ngaku Chiuta nkhuja ndi mtima wakupaska kweniso kulonde alendu. (Aro. 12:13) Asani tisaniya nyengu yakucheze ndi abali kweniso azichi vititiwovya kuti tiyanjanengi ukongwa ndipuso tija pa ubwezi wakukho ndi Yehova. Kusazgiyapu yapa, asani tilonde alendu tiyezga Yehova. w24.06 12 ¶15-16

Yehova wavumbuwa uneneska wa mu Bayibolu ku ŵanthu akujiyuyuwa. (Mate. 11:25) Tingujiyuyuwa kuti ŵanthu anyaki atiwovyi kusambira uneneska wa mu Bayibolu. (Machi. 8:​30, 31) Kweni tikhumbika kuphwere kuti tileki kwamba kujikuzga. Kujikuzga kungachitiska kuti tiwonengi kuti maŵanaŵanu ngidu ngayanana ŵaka ndi fundu za mu Bayibolu kweniso ulongozgi wakutuliya ku gulu laku Yehova. Kuti tilutirizgi kuja akujiyuyuwa, tikhumbika kukumbuka kuti te kanthu cha pakuyeruzgiya ndi Yehova. (Sali. 8:​3, 4) Tingamupempha so Yehova kuti watiwovyi kuti tije akujiyuyuwa ukongwa kweniso akusambizika. Yehova watiwovyengi kuti tiwonengi kuti maŵanaŵanu ngaki ngo tisambira kutuliya mu Mazu ngaki kweniso ku gulu laki ngakuzirwa ukongwa kuphara maŵanaŵanu ngidu. Asani muŵerenga Bayibolu, wonani fundu zo zilongo kuti Yehova watanja ŵanthu akujiyuyuwa ndipu watinkha ŵanthu akujikuzga, akujiŵikamu kweniso akujiyanja. Kweniso mukhumbika kulutirizga kuja akujiyuyuwa asani mwalonde mwaŵi unyaki wa uteŵeti wo uchitiska kuti muje ndi mazaza pamwenga muwonekiyengi patali. w24.07 10 ¶8-9