Kulonga

28 “Weelede kundiitila mukulanaako Aroni abana bakwe aakati kama-Israyeli kuti andibelekele kali mupayizi—Aroni abana bakwe, Nadabbu, Abbihu, Eliyezari a-Itamara. 2 Weelede kupangila mukulanaako Aroni zigogo zibotu zisalala zyabulemu. 3 Weelede kubuzya bantu boonse balaaluzibo* mbindakazuzya muuya wabusongo kuti basumine Aroni zigogo zyakumusalazya, kuchitila kuti andibelekele kali mupayizi.

4 “Nzezi zigogo nzibeelede kusuma: kagogo kakukaango, kabaki kabupayizi, jansi litakwe maboko, chigogo chilamfu chilaatubbokesi-bbokesi, ngwaani amulembo wakulyaanga muchibuno. Bayoosumina Aroni mukulanaako abana bakwe zigogo eezi zisalala kuti andibelekele kali mupayizi. 5 Babelesi balaaluzibo beelede kubelesya ngolida, busumyo bwabbuluu, wulu yapepulu, busumyo busalala amulembo mubotu.

6 “Beelede kupanga kabaki kabupayizi kababelesya ngolida, busumyo bwabbuluu, wulu yapepulu, busumyo busalala amulembo mubotu alubo zyeelede kusumininwa aalinguwo. 7 Keelede kuba aazipanzi zibili ziswaanizidwe aamakwiko. 8 Bbanti lyakusunga kabaki kabupayizi lisuminidwe aalinkako lyeelede kupangwa aazintu zyakabelesegwa kupanga kabaki kabupayizi, nkukwaamba ngolida, busumyo bwabbuluu, wulu yapepulu, busumyo busalala amulembo mubotu.

9 “Weelede kubweza mabwe aabili aa-onikisi mpawo ulembe mazina aabana ba-Israyeli aalingawo, 10 waalembe kweendelana ambubatobelana. Aali limwi bbwe ulembe mazina aali musanu alimwi mpawo aali limwi ulembe aasyaala aali musanu alimwi. 11 Sikulemba weelede kulemba mazina aabana ba-Israyeli aamabwe aaya aabili mbuli mbuchilembwa chidindo, mpawo weelede kwaabikka mutubikkilo twangolida. 12 Weelede kubikka mabwe aaya aabili kumakwiko aakabaki kabupayizi kuti abe mabwe aachiyubulusyo kubana ba-Israyeli. Aroni weelede kunyampula mazina aabo kumakwiko aakabaki kakwe kabupayizi kunembo lyaJehova kuti abe chiyubulusyo. 13 Weelede kupanga tubikkilo twangolida 14 ancheni zibili zyangolida iisalalisya zyoosedwe mbuli ntambo mpawo uzyaangilile kutubikkilo.

15 “Sikusuma weelede kupanga kagogo kakukaango kakubeteka mbuli mbatachite kukabaki kabupayizi. Ulabelesya ngolida, busumyo bwabbuluu, wulu yapepulu, busumyo busalala amulembo mubotu. 16 Kuti kapetwa aakati, mabazu aako woonse ayelede kweelana. Bulamfu bwako bweelede kuba jaanza livungulwidwe* alubo busasa bwako bweelane aajanza livungulwidwe. 17 Weelede kukabikka minchali iine yakusekka mabwe. Munchali wakusaanguna weelede kuba aabbwe lyarubbi, lyatopazi alya-emarawudi. 18 Munchali wachibili weelede kuba aabbwe lyatekkoyisi, lyasafire alyajaspa. 19 Munchali wachitatu weelede kuba aabbwe lyaleshemu,* lya-agate alya-ametesiti. 20 Munchali wachine weelede kuba aabbwe lyakkrisoliti, lya-onikisi alyajedi. Ayelede kusekkwa muzibikkilo zyangolida. 21 Mabwe aaya ayelede kweendelana aamazina aali 12 aabana ba-Israyeli. Limwi alimwi lyeelede kulembwa mbuli mbuchilembwa chidindo, zina limwi alimwi lyiiminine umwi wamisyobo iili 12.

22 “Kagogo kakukaango weelede kukapangila ncheni zyoosedwe zili mbuli ntambo zyangolida iisalalisya. 23 Weelede kupanga maring’i aabili aangolida mpawo uwabikke mumakkona aabili* aakagogo kakukaango. 24 Weelede kunjizya ntambo zibili zyangolida mumaring’i aayo aabili aali mumakkona aakagogo kakukaango. 25 Weelede kunjizya ntambo zibili nkuzili kumamanino mutubikkilo tubili mpawo uzisunge kumakwiko aakabaki kabupayizi. 26 Weelede kupanga maring’i aabili aangolida mpawo uwabikke mumakkona aabili aakagogo kakukaango mukali mukati, aajulu aakabaki kabupayizi. 27 Weelede kupanga amwi maring’i aabili aangolida waabikke kunembo lyakabaki kabupayizi, aajulu aabbanti lyakusunga kabaki kabupayizi. 28 Kagogo kakukaango keelede kwaangwa aantambo yabbuluu, yaange maring’i aako amaring’i aakabaki kabupayizi. Eezi zilapa kuti kagogo kakukaango katazwi pe aandawu yako aajulu aakabaki kabupayizi abbanti.

29 “Aroni weelede kunyampula mazina aabana ba-Israyeli aali aakagogo kakukaango kakubeteka aamoyo wakwe chiindi naanjila muNdawu Iisalala, kuchitila kuti bayeeyegwe kunembo lyaJehova chiindi choonse. 30 Ubikke Urimu aTumimu aakagogo kakukaango kabelesegwa kukubeteka. Zyeelede kuba aamoyo wa-Aroni chiindi naaza kunembo lyaJehova. Aroni weelede kunyampula zintu eezi zibelesegwa kukubeteka ma-Israyeli aamoyo wakwe kunembo lyaJehova chiindi choonse.

31 “Weelede kupanga jansi lyakabaki kabupayizi litakwe maboko kubelesya busumyo bwabbuluu kupela. 32 Weelede kusiya bbanga lyakunjizizya mutwe aakati kalyo. Bbanga eelyo lyeelede kubikkwa mupeto uulizyunguluka, asikupanga milembo. Lyeelede kuba mbuli bbanga lyakabaki kansimbi kakunkondo, kuchitila kuti litadeluki pe. 33 Weelede kupanga mapomegraneti kubelesya busumyo bwabbuluu, wulu yapepulu abusumyo busalala. Uwabikke kumupeto wakumawulu mpawo aakati kawo ubikke tulangu twangolida. 34 Weelede kutobelanisya kalangu kangolida apomegraneti, aawa uti kalangu kangolida mpawo kutobele pomegraneti zizyunguluke mupeto woonse wajansi litakwe maboko. 35 Aroni weelede kulizwaata nabeleka alubo musindo walyo weelede kumvwikka naanjila anaazwa mundawu iisalala kunembo lyaJehova, kuchitila kuti atafwi.

36 “Weelede kupanga kantu kapapalete kang’ayima kangolida iisalalisya mpawo ukalembe mbuli mbuchilembwa chidindo majwi aakuti: ‘Busalali mbubwaJehova.’ 37 Weelede kukaangilila aangwaani antambo yabbuluu, takeelede kuzwa pe aangwaani eeyo. 38 Keelede kuba aankumu ya-Aroni alubo Aroni uzooyiminina sikubisya kumakani aali atala azintu zisalala, ma-Israyeli nzibasalazya kuti bazipe kazili zipo zisalala. Takeelede kuzwa pe aankumu yakwe, kuchitila kuti bantu batambulike kuli Jehova.

39 “Weelede kupanga chigogo chilamfu chilaatubbokesi-bbokesi angwaani kubelesya mulembo mubotu alubo upange bbanti lyamulembo.

40 “Weelede kusumina bana ba-Aroni zigogo zilamfu, mabbanti aamulembo azyakuzwaata kumutwe zibotu zyabulemu. 41 Weelede kuzwaatika Aroni abana bakwe, ubananike akubabikka kuba bapayizi, ubasalazye mpawo balandibelekela kabali bapayizi. 42 Weelede kubasumina zibbudula* kuchitila kuti basise mibili yabo. Zyeelede kuzwa muchibuno kusika muzibelo. 43 Zibbudula eezyo zyeelede kuzwaatwa aa-Aroni abana bakwe nibaza kutente lyakuswaanganina naakuti nibasika kuzoobeleka aachipayililo mundawu iisalala, kuchitila kuti batabi aamulandu akuti batafwi. Ooyu mulawu ngwayelede kutobelezya abana bakwe kusikila kukabe kutamani.