Lwakusaanguna kuBakkorinte

5 Kwaamba choonzyo, kulikwaambwa kuti kuli bwaamu* bulikuchitika aakati kanu, bwaamu* butajaniki pe nikuba aakati kazisi, kuti mwaalumi ukkede aamwanakazi* wawisi. 2 Zilikumubotezya na zintu eezi? Tamweelede kuusa na, kuchitila kuti muntu wakachita zintu eezi agwisigwe aakati kanu? 3 Nikuba kuti tandilaamwi andinywe kumubili, ndilaandinywe kumuuya alubo ndamubeteka kale muntu wachita zintu eezi mbuli kuti ndilaandinywe. 4 Chiindi nimubungenaamwi muzina lyaMwaami wesu Jesu, alubo kamuzi kuti ndilaandinywe mumuuya amumanguzu aaMwaami wesu Jesu, 5 mweelede kutola muntu uuli boobu kuli Saatani, kuchitila kuti maboneno aanyama anyonyoonwe, pesi buntu bubotu bufutulwe* mubuzuba bwaMwaami.

6 Kulidunda nkumulikuchita takuli kabotu pe. Tamuzi na kuti bumena buche bupa kuti fulawa yoonse iikandidwe ifufumuke? 7 Amugwisye bumena bwachiindi, kuchitila kuti mube fulawa mpya iikandidwe iitakwe bumena.* Nkaambo kwaamba choonzyo, Kkristu mwanaambelele wesu waPobwe lyaPasika, wapayizigwa. 8 Nkinkaako, atubambe pobwe eeli, kutali abumena bwachiindi naakuti bwabubi akutayoowa Leza, pesi achinkwa chitakwe bumena chakusyomeka achakasimpe.

9 Mulugwalo lwangu, ndakamulembela kuti muleke kuliswaanizya* aabasibwaamu,* 10 kutali kwaamba kuti mulekelaatu kuliswaanizya abasibwaamu* bamunyika eeyi, naakuti basikutangala, naakuti babbi, naakuti basikukomba zibumbwa. Nkaambo kaansinga mbukubede, kwali kunooyandikana kuti muzwe biya munyika eeyi. 11 Pesi lino ndilikumulembela kuti muleke kuliswaanizya* aamuntu woonse uutegwa mukombima pesi kali sibwaamu,* sikutangala, sikukomba chibumbwa, sikutukila, sikukolwa, mubbi alubo tamweelede kulya nikuba amuntu uuli boobo. 12 Nkambo ime ndileenzi akubeteka baabo bali kunze? Inywe tamubeteki bantu bali mukati na, 13 kakuli Leza ubeteka bali kunze? “Amumugwisye muntu mubi aakati kanu.”