Ezara
4 Lino basinkondonyina aba Juda abana Benjamini+ nobakamvwa kuti bantu ibakazwa mubuzike+ bakali kuyakila Jehova Leza wa Israyeli tempele, 2 mpoonya aawo bakaunka kuli Zerubabeli abasilutwe baziinga zyabamausyi akubaambila kuti: “Atubelekele antoomwe andinywe mukuyaka; nkaambo aswebo tukomba* Leza wanu+ mbubonya mbuli ndinywe, alimwi twalikumutuulila zipaizyo kuzwa kumazuba aa Mwami Esari-hadoni+ wa Asuri iwakatuleta okuno.”+ 3 Nokuba boobo Zerubabeli, Jeshua alimwi abasilutwe baziinga zyabamausyi zya Israyeli boonse bakati kulimbabo: “Tamujisi lubazu andiswe mukuyakila Leza wesu ŋanda,+ nkaambo swebo tolikke tulabelekela antoomwe mukuyakila Jehova Leza wa Israyeli iŋanda, mbubonya Mwami Koresi imwami wa Persia mbwaakatulailila.”+
4 Mpoonya bantu bamunyika bakazumanana kutyompya* ba Juda akubakonga kuti baleke kuyaka.+ 5 Bakapa mali kuli basikupa lulayo kutegwa baanyonganye makanze aabo+ mazuba oonse aa Mwami Koresi wa Persia kusikila mubulelo bwa Mwami Dariyo+ wa Persia. 6 Kumatalikilo aabulelo bwa Ahasuera, bakalemba lugwalo lwakutamikizya bantu ibakali kukkala mu Juda amu Jerusalemu. 7 Lino mumazuba aa Mwami Aritasasita wa Persia, Bisilamu, Miteridati, Tabeeli alimwi abeenzinyina boonse bakalemba lugwalo kuli Aritasasita mwami; lugwalo oolu bakalusandulula mu Chiaramu+ akululemba mumabala aa Chiaramu.*
8 * Rehumu, silutwe wabapati-pati bamfwulumende alimwi a Simisai mulembi bakalembela Mwami Aritasasita lugwalo lwakutamikizya Jerusalemu: 9 (Lwakazwa kuli Rehumu silutwe wabapati-pati bamfwulumende, Simisai mulembi abeenzinyina boonse, babetesi abeendelezi basyoonto, balembi, bana Ereki,+ bana Babuloni abantu bakali kukkala ku Susa,+ nkokuti bana Elamu,+ 10 amisyobo yoonse eeyo Asinapara imupati alimwi uulemekwa njaakatola kabali baange akubabikka muminzi ya Samariya+ abamwi boonse ibali Mutala aa Mulonga,* lino 11 ndoolu lugwalo ndobakamutumina.)
“Ku Mwami Aritasasita, kuzwa kubabelesi bako ibali Mutala aa Mulonga: Lino 12 kozyiba omwami kuti ba Juda ibakaboola okuno kuzwa kulinduwe bakasika ku Jerusalemu. Bayakulula munzi mubi wabuzangi, alimwi balaafwaafwi kumanizya kuyaka malambo+ akubambulula ntalisyo. 13 Lino omwami kozyiba kuti, ikuti munzi ooyu uyakululwe alimwi akuti malambo aanguwo amane kuyakwa, tabakateli mitelo, kupa zipego+ naa kubbadelesyegwa mumigwagwa, alimwi eeci ciyoopa kuti kubule lubono muziyobwedo zyabami. 14 Mbwaanga tulya munyo uuzwa kuŋanda yamwami,* tacili cibotu kuti tulangilile buyo mwami kasweekelwa lubono, twakutumina lugwalo oolu omwami kutegwa uzyibe, 15 kutegwa kube kuvwuntauzya mubbuku lyamakani aabasikale bako.+ Mubbuku eelyo uyoojana kuti munzi ooyu munzi wabuzangi, uupenzya bami azyooko alimwi mulinguwo mwali kujanika bantu bazangi kuzwa kaindi. Nkakaambo kaako munzi ooyu wakanyonyoonwa.+ 16 Aboobo omwami tukuzyibya kuti, ikuti munzi ooyu uyakululwe, alimwi akuti malambo amane kuyakwa, tokabi alubazu* mucooko cili Mutala aa Mulonga.”+
17 Lino mwami wakatumya mulomo kuli Rehumu silutwe wabapati-pati bamfwulumende a Simisai mulembi abeenzinyina ibakali kukkala mu Samariya abamwi boonse Mutala aa Mulonga:
“Ndamwaanzya! 18 Lugwalo ndomwakatutumina lwakabalwa* kabotu-kabotu kubusyu bwangu. 19 Ndakapa malailile kuti kuvwuntauzyigwe, eelyo kwakajanwa kuti kuzwa kaindi munzi ooyo wali kubukila mami alimwi mulinguwo mwali buzangi.+ 20 Kwakali bami basinguzu mu Jerusalemu ibakali kweendelezya moonse Mutala aa Mulonga alimwi mbabakali kupegwa mitelo, zipego akubbadelesya mumigwagwa. 21 Lino kamulailila kuti baalumi aaba baleke mulimo ooyu kutegwa munzi utayakululwi kusikila ndikaambe. 22 Amucenjele akutawayawaya kucita makani aaya kutegwa mwami ataindili kusweekelwa lubono.”+
23 Lino lugwalo oolo ilwakazwa ku Mwami Aritasasita nolwakamana kubalwa kubusyu bwa Rehumu a Simisai mulembi abeenzinyina, cakufwambaana bakaunka ku Jerusalemu kuba Juda akubalesya canguzu kubeleka mulimo. 24 Aciindi eeco mulimo wakuyaka ŋanda ya Leza iwakali kucitwa mu Jerusalemu wakaima; eelyo wakaima kusikila mumwaka wabili wabulelo bwa Mwami Dariyo wa Persia.+