August

Tupailila kuti banji bautambule mulumbe wakucenjezya akutusangana mubukombi busalala lino. Pele mbuti kujatikizya baabo ibatakubikkili maano kucenjezya mazuba aano? Kweelede kuti nkuyanda kwa Jehova kuyoobafwutula bantu ibayootalika kusyoma nguwe baakubona kunyonyoonwa kwa Babuloni Mupati. Kuti naa mboobo, nkokuti cilayandika kapati lino kuzumanana kubacenjezya. Nzyotubaambila lino balalangilwa kuyooziyeeya caakusika ciindi eeco. (Amweezyanisye Ezekieli 33:33.) Ambweni bayookuyeeya kucenjezya nkobakamvwa kuli ndiswe akukulwaizyigwa kutusangana mubukombi busalala kacitanamana ciindi. Mbubwenya mbuli mulindizi wantolongo ku Filipi iwakacinca nowakamana kucitika “muzuzumo wanyika mupati,” ambweni aabo bataswiilili lino bayoocinca baakubona kunyonyoonwa kuyoosya kwa Babuloni Mupati.—Mil. 16:​25-34. w24.05 17 ¶9-10

Kuli ciiyo ciyandika kapati ncotwiiya kumajwi mwaapostolo Paulo ngaakalembela Banakristo ba Hebrayo. Bamwi tiibakazumanana kukomena kumuuya; bakatalika ‘kupilukila musyule akuba bantu bayandika mukupa, ikutali cakulya [cakumuuya] ciyumu pe.’ (Heb. 5:12) Bakaalilwa kwiiya akuzumina zintu zipya Jehova nzyaakali kubayiisya kwiinda mumbungano. (Tus. 4:18) Mucikozyanyo, bunji bwaba Juda basyomi bakacili kusumpula Mulawo wa Musa nokuba kuti wakalilekede kale kubeleka myaka iibalilwa ku 30 ciindi Kristo naakaaba buumi bwakwe. (Tit. 1:10) Kufwumbwa muntu wakalubala kale lugwalo lwakasololelwa amuuya Paulo ndwaakalembela bana Hebrayo, ulakonzya kuzumina kuti bbuku eeli lijisi cakulya cakumuuya ciyumu. Lugwalo oolu lwakabagwasya kubona mboyakali mbotu nzila mpya yakukomba, Jehova njaakabikka kwiinda muli Jesu. Alimwi yakabapa busicamba bwakuzumanana kukambauka.—Heb. 10:​19-23. w24.04 6 ¶15

Bantu banji kapati bafwa kuzwa ciindi ba Adamu a Eva nobakasangana Saatani akuzangila Jehova Leza. Ino ncinzi ciyoocitika kubantu boonse aaba? Mweelwe uugaminide wabasikutobela Kristo basyomeka ibali 144,000, babusyilwa kubuumi bwakujulu butafwi. (Ciy. 14:1) Alimwi mweelwe mupati wabaalumi alimwi abamakaintu basyomeka balo ibamuyanda Jehova banooli akati kabantu bayoobusyilwa “kububuke . . . bwabaluleme,” alimwi bayoopona mane kukabe kutamani anyika, ikuti naa bakazumanane kuba bantu baluleme kusikila kumamanino aa Myaka Iili 1000 Yabulelo bwa Kristo alimwi aciindi camusunko wamamanino. (Dan. 12:13; Heb. 12:1) Alimwi aciindi camyaka iili 1000, “bataluleme,” kubikkilizya abaabo ibatakamubelekela Jehova naa aabo “ibakacita zintu zibyaabi,” bayoopegwa coolwe cakucinca bukkale bwabo alimwi akuba babelesi ba Jehova Leza basyomeka. (Joh. 5:29; Lk. 23:​42, 43) Nokuba boobo, Jehova wakasala kuti bantu bamwi ibakali kucita zintu zibyaabi kapati batakasoli kubusyigwa.—Lk. 12:​4, 5. w24.05 2 ¶3; 5 ¶15; 6 ¶17

Kufwumbwa uuyanda kukkomaninwa a Jehova weelede ‘kwaamba masimpe mumoyo wakwe.’ (Int. 15:2) Zinji zibikkilizyidwe mukucita boobo kunze buyo lyakubeja. Jehova uyanda kuti katusyomeka muzintu zyoonse nzyotwaamba alimwi akucita. (Heb. 13:18) Eeci cilayandika kapati, “nkaambo muntu mumpelenge ncisesemyo kuli Jehova, pele balulami mbabajisi cilongwe ciyumu anguwe. (Tus. 3:32) Aabo baamba zyamasimpe mumoyo wabo tabatondezyi kuti balamumvwida Leza ciindi nobali akati kabantu, mpoonya kabatyola milawo ya Leza ciindi nobali balikke. Tabaciti zintu cabumpelenge. Muntu mumpelenge ulakonzya kutalika kudooneka milawo ya Jehova akuyeeya kuti taibeleki. (Jak. 1:​5-8) Ulakonzya kucileka kusyoma zyeelelo zya Jehova akubona kuti taziyandiki kapati. Mpoonya, kuti naa wabona kuti kunyina cibi cacitika ciindi natyola milawo, ulakonzya kutalika kucita zintu ziinda kubija. Nokuba kuti inga kayeeya kuti ubelekela Leza, Jehova kunyina nayoobutambula bukombi bwakwe. (Muk. 8:11) Aboobo tuyanda kuti katusyomeka muzintu zyoonse.w24.06 10 ¶7-8

Bantu ba Jehova balakayanda kasimpe kajanika mu Jwi lya Leza. Lusyomo lwesu luyeeme alinkako. (Rom. 10:17) Twakasinizya kuti Jehova wakapanga mbungano ya Bunakristo kuba “imusemu alimwi cisiko cakasimpe.” (1Tim. 3:15) Saatani uyanda kuti tuleke kusyoma Bbaibbele naa busolozi buzwa kumbunga ya Leza. (Ef. 4:14) Lino-lino, Diabolosi uyooyunga bantu banji kapati kwiinda mukubelesya makani aakubeja kutegwa bazangile bweendelezi bwa Jehova. (Ciy. 16:​13, 14) Alimwi tulizyi kuti Saatani uyoobeleka canguzu kapati kuyunga bantu ba Jehova. (Ciy. 12:9) Nkakaambo kaako, cilayandika kapati kuliyiisya akubona kwiindana kuliko akati kakasimpe abubeji, akuzumanana kukakatila kukasimpe. (Rom. 6:17; 1Pet. 1:22) Lyamapenzi mapati lufwutuko lwesu lunooyeme akucita boobo! w24.07 8 ¶1-3

Ciindi Jehova naakapa bana Israyeli milawo, bakamusyomezya kuti bakali kuyakwiitobela. Awalo Jehova wakabasyomezya kuti, ikuti naa baitobela milawo eeyo, wakali kuyoobakwabilila alimwi akubalongezya. Pele kuti naa tiibaitobela milawo yakwe naa kusala kukomba baleza bambi, tanaakali kuyoobakwabilila alimwi bakali kuyoopenga. Pele eeci tiicakali kwaamba kuti Jehova wakali kuyoobalekelezya cakumaninina. Bakali kukonzya ‘kupiluka kuli Jehova Leza wabo akuswiilila jwi lyakwe.’ (Dt. 30:​1-3, 17-20) Munzila imwi, bakali kukonzya kweempwa. Alimwi ikuti bacita oobo, Jehova wakali kukonzya kuba acilongwe ambabo akutalika kubalongezya alimwi. Bantu ba Jehova ibakasalidwe, cakwiinduluka-induluka bakali kumuzangila. Bakatalika kukomba mituni alimwi akucita zintu zibyaabi kapati. Akaambo kaceeci, bakapenga. Pele Jehova wakazumanana kubagwasya bantu bakwe kutegwa batalike kumubelekela alimwi. Mucikozyanyo, cakwiinduluka-induluka wakabatumina basinsimi kutegwa babagwasye kuti beempwe alimwi akupiluka kulinguwe.—2Bam. 17:​13, 14. w24.08 9 ¶4-5

Banakristo ba Hebrayo ibakali kukkala mu Jerusalemu alimwi amu Judaya bakajana mapenzi manji Jesu naakafwa. Nokwakainda buyo ciindi cisyoonto kuzwa noyakatalisyigwa mbungano ya Bunakristo, Banakristo bakatalika kupenzyegwa citaambiki. Mpoonya nokwakainda myaka iibalilwa ku 20, bakapenga akaambo kanzala alimwi abucete. (Mil. 11:​27-30) Nokuba boobo, cakuma 61 C.E., Banakristo tiibakali kupenzyegwa mbuli mbobakali kuyoopenzyegwa kumbele. Aciindi eeco, Jehova wakasololela mwaapostolo Paulo kubalembela lugwalo. Lulayo ilwakali mulugwalo oolu lwakali kuyandika kapati nkaambo lwakali kuyoobagwasya kulibambila zyakali kuyoocitika kumbele. Lugwalo ndobakalembelwa Banakristo ba Hebrayo lwakali kuyandika kapati akaambo kakuti luumuno lwabo lwakanyonganizyigwa. Paulo wakabapa lulayo ilwakali kuyoobagwasya kuliyumya kumapenzi aakali kulangilwa kubacitikila. w24.09 8 ¶1-2

Ciindi notwajana mapenzi, bakwesu alimwi abacizyi ncitondezyo caluyando lwa Jehova kulindiswe. Basyomima balakonzya kutuumbulizya ciindi nobaswiilila notwaamba kujatikizya mbotulimvwa. Balakonzya kutukulwaizya kwiinda mukutubalila kapango kamwi kamu Bbaibbele naa kupaila andiswe. (Rom. 15:4) Zimwi ziindi, mukwesu naa mucizyi ulakonzya kutuyeezya mbwayeeya Jehova calo cikonzya kutugwasya kuzumanana kuliyumya. Kunze lyaboobo, Banakristoma balakonzya kutupa lugwasyo luyandika, mbuli cakulya ciindi notuli mumapenzi. Kutegwa bamwi batugwasye, tweelede kubalomba buya. (Tus. 17:17) Tabakonzyi kuzyiba mbotulimvwa alimwi ancotuyandika. (Tus. 14:10) Aboobo mulakonzya kubandika abalongwe banu bali kabotu alimwi akubaambila mbomulimvwa. Amubaambile icikonzya kumugwasya. Mulakonzya kubandika amwaalu omwe naa bobilo balo mbomwaangulukide limwi. Bacizyi bamwi bajana kuti cilaumbulizya kubandika amucizyi uusimide kumuuya. w24.10 10 ¶15-16

Bantu banji balabikkila maano kujatikizya zyakulya nzyobalya akunyanyaasya mubili kutegwa bazumanane kuba abuumi buli kabotu. Pele tabalangili kuti balakonzya kupona kukabe kutamani. Ambweni inga bayeeya kuti tacikonzyeki kupona mane kukabe kutamani. Nokuba boobo, Jesu wakaamba kuti bantu balakonzya kuba abuumi butamani kweelana ambokutondezyedwe kulugwalo lwa Johane 3:16 alimwi a 5:24. Bumwi buzuba, Jesu wakacita maleele kwiinda mukubelesya cinkwa alimwi atuswi kusanina nkamu yabantu. Eeci cakali kugambya, pele ncaakaamba buzuba bwakatobela calo cakali kugambya kapati. Nkamu yabantu yakamutobela ku Kapernauma, kufwaafwi ankomwe ya Galilaya, mpoonya okuya wakabaambila kuti bantu bakali kukonzya kubusyigwa akuba abuumi butamani. (Joh. 6:​39, 40) Majwi aa Jesu atondezya kuti, bantu banji ibakafwa balakonzya kubusyigwa alimwi akuti nywebo antoomwe abayandwa banu mulakonzya kupona kukabe kutamani. w24.12 8 ¶1-2

Lipooti imwi kuzwa kumbunga ya World Health Organization, yakaamba kuti balumi banji balabauma bamakaintu babo, kubafwubaazya alimwi akubatundulula munzila zimwi. Balumi bali boobo inga balitondezya kuti balabalemeka bamakaintu babo ciindi nobali abantu pele nobali kuŋanda inga balabatundulula. Nkaambo nzi balumi bamwi ncobatabeendelezyi kabotu bamakaintu babo? Akaambo kakuti bamwi bakakomezyegwa abausyi ibakali basilunya, balakonzya kuyeeya kuti cili buyo kabotu kutabeendelezya kabotu bamakaintu babo. Bamwi balakonzya kuti kabatabeendelezyi kabotu bamakaintu babo akaambo kakuti ncilengwa buya cakubusena ooko. Balumi aaba balakonzya kulimvwa kuti kweendelezya bamakaintu babo calunya cilakonzya kupa kuti bamakaintu babo bazyibe kuti oobu mbobusankwa. Kunze lyaboobo, balumi bamwi tiibakayiisyigwa kulyeendelezya, calo cibikkilizya kulyeendelezya kukunyema. Bamwi bajisi cilengwa cakweebelela zintu ziletela muzeezo wakoonana, calo cipa kuti kabatabalangi munzila iiluzi bamakaintu alimwi amakani aakoonana. Kuyungizya waawo, malipooti atondezya kuti akaambo kabulwazi bwa COVID-19, capa kuti mapenzi aaya aindile buya. Bwini mbwakuti, kunyina twaambo akati katootu itukonzya kupa kuti balumi kababeendelezya munzila iitali kabotu bamakaintu babo. w25.01 8 ¶2-3

“Weelede kuyanda Jehova Leza wako amoyo wako woonse, abuumi bwako boonse, anguzu zyako zyoonse alimwi amizeezo yako yoonse.” (Lk. 10:27) Jesu wakaamba kuti ooyu ngomulawo iwakali kuyandika kapati mu Mulawo wa Musa. Amubone kuti kuyanda Jehova kubikkilizya moyo wesu, nkokuti zintu nzyotulombozya ambotulimvwa. Alimwi kulabikkilizya akulyaaba camoyo woonse anguzu zyesu zyoonse. Kunze lyaboobo, kuyanda Jehova kulabikkilizya amizeezo yesu, nkokuti mbotuyeeya kujatikizya zintu. Tweelede kusola kuyeeya mbuli mbwayeeya Jehova. Pele bwini mbwakuti, kunyina notukonzya kukumvwisya cakumaninina kuyeeya kwakwe. Nokuba boobo, tulakonzya kucita oobo kwiinda mukwiiya “kuyeeya kwa Kristo” nkaambo walo ulizyi mbobayeeya Bausyi alimwi ulabaiya cakulondoka.—1Kor. 2:16. w25.03 8 ¶1

Jesu wakalilondokede mbubwenya mbuli mbwaakabede Adamu katanabisya. (1Kor. 15:45) Akaambo kakuti Jesu wakatufwida, wakacikonzya kupa muulo weelene iwakali kuyandika kutegwa apilusye ceeco Adamu ncaakasweekelwa. (Rom. 5:19) Aboobo Jesu wakaba “Adamu wamamanino.” Alimwi buya takuciyandiki kuti muntu uumbi aboole kuzoobbadela ceeco Adamu ncaakasweekelwa. Nkaambo Jesu wakafwa “ciindi comwe buyo.” (Heb. 7:27; 10:12) Ino bubambe bwakumanya milandu alimwi acinunuzyo ziindene buti? Kumanya milandu kujatikizya ntaamu njaakabweza Leza yakubukulusya cilongwe cibotu akati kanguwe abantu. Mpoonya cinunuzyo muulo wakabbadelwa kupa kuti cikonzyeke kulekelelwa zibi. Muulo ooyu wiiminina bulowa bwa Jesu ibwakatika ciindi naakatufwida.—Heb. 9:14. w25.02 5 ¶12-13

Ciindi notwasunkwa, tweelede kubikkila maano kuzintu ziyandika kapati. Diabolosi waamba kuti, ikuti twasikilwa mapenzi inga twamukaka Jehova. Aboobo mbotucita ciindi notwasikilwa masunko cilamujatikizya Jehova. (Job. 1:​10, 11; Tus. 27:11) Pele ciindi notwaazunda masunko, tutondezya kuti tulamuyanda Jehova akuti Diabolosi mubeji. Sena mujisi penzi lyakukazyigwa amfwulumende, kubula ziyandika, kukazyigwa nomukambauka naa masunko aambi buyo? Kuti kacili boobo, amuzyibe kuti bukkale bwanu bumupa coolwe cakukkomanisya Jehova. Alimwi mutalubi kuti, kunyina nayoomulekela kuti musunkwe kwiinda mpozigolela nguzu zyanu. Uyoomupa nguzu zyakuliyumya. w24.06 22 ¶9

Sena mulizizyi zintu zikonzya kufwambaana kumusunka? Nkulibikka muntenda kutabikkila maano mumbazu motulezya naa kutalika kuyeeya kuti swebo tuli bayumu tatukonzyi kubisya. (1Joh. 1:8) Mutalubi kuti, Paulo wakaamba kuti nobaba baabo ‘bajisi zyeelelo zyakumuuya’ balakonzya kusunkwa ikuti tiibazumanana kulinda. (Gal. 6:1) Tatweelede kulisyoma, muciindi caboobo tweelede kuzyiba mbazu motulezya. (2Kor. 13:5) Ikuti twazizyiba zintu zikonzya kutusunka, ncinzi ncotweelede kucita? Amubeleke canguzu kutegwa muzizunde zintu eezyo! Mucikozyanyo, mumazuba aakaindi milyango cakali cibeela cabwaanda bwamunzi icatakali kukatazya kujaya. Nkakaambo kaako, bunji bwabalindizi bakali kujanika amulyango kutegwa bakwabilile munzi. Mbubwenya buyo, tweelede kubikkila kapati maano kujatikizya mbazu nzyotubona kuti tulalezya kutegwa tutanjili mumasunko.—1Kor. 9:27. w24.07 15 ¶5-7

Milimo mibotu iyaambidwe mulugwalo lwabuzuba bwasunu ibikkilizya kukambauka makani mabotu. Aboobo ciindi notubala Jwi lya Leza akuzinzibala kuyeeya nzyotubala, lusyomo lwesu muli Jehova lulayuma alimwi tulamvwisya kaambo ncociyandika kapati kukambauka mulumbe uujatikizya Bwami bwakwe. Kutegwa tugwasyigwe kapati a Jwi lya Leza, tatweelede kulibala cakubinda, kuliiya caatala-tala akubelesya ciindi cisyoonto cakuzinzibala kuyeeya. Aboobo, atubelesye ciindi cinji. Ikuti naa mwajana lugwalo ilwamukatazya kumvwisya, mutalusotoki pe. Muciindi caboobo, amubelesye Watch Tower Publications Index naa Bbuku Ligwasya Kuvwuntauzya lya Bakamboni ba Jehova, kutegwa mubumvwisye bupanduluzi bwalugwalo oolo. Kuti kamubelesya ciindi cinji kwiiya, muyoosinizya kuti Bbaibbele nzyolyaamba zyamasimpe. (1Tes. 5:21) Kusinizya kuyoomugwasya kukukkomanina kwaambila bamwi nzyomwakaiya. w24.04 15 ¶4-5

Davida wakaamba kuti: “Mubotu alimwi ulilibambilide kulekelela zibi.” (Int. 86:5) Mika wakalemba kuti: “Ino nguni Leza uuli mbuli nduwe, uujatila milandu akulekelela nsotoko?” (Mik. 7:18) Mpoonya Isaya wakaamba kuti: “Simucita zibi aileke nzila yakwe, awalo muntu mubi aileke mizeezo yakwe; aapiluke kuli Jehova, walo uutiimufwide luse, aapiluke kuli Leza wesu, nkaambo uyoomulekelela cakumaninina.” (Is. 55:7) Kutegwa mbungano yaku Korinto imwiiye Jehova, yakaambilwa kumutambula amaanza obilo mwaalumi ooyo sizibi iwakeempwa alimwi akumutondezya luyando. Kwiinda mukutobela malailile, mbungano yakatondezya kuti yakali ‘kumvwida muzintu zyoonse.’ Nokuba kuti kwakaindide myezi misyoonto kuzwa ciindi mwaalumi naakagusyigwa mumbungano, lulayo ndwaakapegwa lwakamugwasya kuti ayempwe. Aboobo taakwe kaambo kakali kukonzya kupa baalu kuti bamuke kumupilusya mumbungano. w24.08 17-18 ¶12-13

Tupona muciindi nokulangilwa kucitika kucinca kupati! Ino-ino, Jesu uyoobeteka muntu woonse uupona anyika. Jesu wakaamba ciyoosololela kulubeta oolu kwiinda mukwaambila basikwiiya bakwe “citondezyo” cabusinsimi bwakubako kwakwe alimwi “acamamanino aabweende bwazintu.” (Mt. 24:3) Businsimi oobu bujanika ku Matayo caandaano 24 alimwi a 25 mpoonya amuzibalo zili ku Marko caandaano 13 a Luka caandaano 21. Kutegwa tulibambile, Jesu wakabelesya zikozyanyo zyotatwe zyalo izili mbuli ncenjezyo kulindiswe. Zikozyanyo eezyi zyambelele ampongo, banakalindu bacenjede abafwubafwuba alimwi amatalenta. Cikozyanyo cimwi acimwi cilatugwasya kubona kuti Jesu uyoomubeteka muntu kweelana azintu zyacita. w24.09 20 ¶1-2

Amuyeeye kujatikizya cikozyanyo ciinda kubota ca Jesu. Zyoonse nzyaakali kucita wakali kuzicita akaambo kaluyando ndwaakajisi kuli Jehova akubantu. Luyando oolu lwakamugwasya kubeleka canguzu alimwi akucita milimo yaansi kutegwa agwasye bamwi. (Mt. 20:28; Joh. 13:​5, 14, 15) Bakwesu, ikuti luyando ndolumukulwaizya kusika azyeelelo, Jehova uyoomulongezya alimwi uyoomugwasya kutegwa mweelele kuba mukutausi. (1Pet. 5:5) Munyika, kanji-kanji bantu balabayanda kapati aabo ibalibona kuti balayandika kapati. Pele oobo tabusyi mbocibede mumbunga ya Jehova. Mukwesu uubayanda bamwi mbubwenya Jesu mbwaakali kucita, tayandi kudyaaminina bamwi naa kubonwa kuti ulayandika kapati kwiinda bamwi. Ikuti muntu uuyanda kubonwa kuti ulayandika kapati kwiinda bamwi wasalwa mumbungano, inga katayandi kubeleka milimo imwi iilibonya kuba yaansi pele iigwasya mbelele zya Jehova ziyandisi. Inga kabona milimo eeyi kuti tiimweeleli walo.—Joh. 10:12. w24.11 15 ¶6-7

Munyika yoonse, tuyandika bakwesu banji bakonzya kubeleka kabali “zipego mubantu.” (Ef. 4:8) Kuti kamuli mukwesu uubbapatizyidwe, sena ‘inga mwacikonzya kugwasya’? (Tus. 3:27) Sena mulilyaabide kubeleka kamujisi makanze aakuba mukutausi? Kuti naa kamuli mukutausi, sena mulilyaabide kubeleka kamujisi makanze aakuba mwaalu? Sena mulakonzya kubambulula bukkale bwanu kutegwa mulembele ku Cikolo Cabakambausi ba Bwami? Cikolo eeci, ciyoomugwasya kutegwa mubelesyegwe cakumaninina a Jesu. Kuti kamulitenga akulimvwa kuti tamweeleli, amupaile kuli Jehova. Amumulombe kuti amupe muuya wakwe uusalala kutegwa umugwasye kuzuzikizya mulimo uuli woonse ngomwapegwa. (Lk. 11:13) Bakwesu Jesu mbaakasala kabali “zipego mubantu” ncitondezyo cakuti ulimukutusololela mumazuba aano aamamanino. (Mt. 28:20) Tulamulumba Mwami wesu siluyando alimwi mwaabi uubikkila maano kuzintu nzyotuyandika alimwi iwakatupa bakwesu kutegwa kabatugwasya. w24.10 23 ¶16-17

Mbuti kujatikizya zintu zyoonse zipa bantu ba Leza kupenga? Kumbele, zintu zyoonse eezyi ‘ziyoolubwa alimwi ziyoosiswa kumeso aa [Leza].’ (Is. 65:16) Jehova uyakwaagusya mapenzi eesu alimwi aciindi cimwi tuyakwaaluba cakumaninina. Noliba lino tulaliiba kapati ciindi notuli kumiswaangano yesu ya Bunakristo akuleka kubikkila maano kumapenzi aali munyika eeyi mbyaabi. Alimwi tulabagwasya bakwesu abacizyi kuliiba ciindi notubatondezya luyando, lukkomano, luzyalo alimwi akubomba moyo zyalo zili ncibeela camuuya wa Leza. (Gal. 5:​22, 23) Eelo kaka tulaacoolwe cilibedelede kuba mumbunga ya Leza! Aabo ibazumanana kuba muparadaiso yakumuuya, bayoolibonena mbociyoozuzikizyigwa cakumaninina cisyomezyo ca Leza cijatikizya “majulu mapya anyika mpya.” w24.04 22 ¶9-10

Nokuba kuti kweebana kulakonzya kukkomanisya, nintaamu iiyandika kapati iikonzya kusololela kukukwatana. Mubuzuba bwamucado wabo, banabukwetene balakonka kuli Jehova kuti banooyandana alimwi akulemekana kufwumbwa buyo kuti boonse kabacipona. Katutanapanga cikonke cili coonse, tweelede kukkala aansi kuyeeya kujatikizya cikonke eeco. Oobo mbocibede akucikonke cacikwati. Kweebana kubapa coolwe cakuzyibana kabotu aabo ibayanda kukwatana alimwi kulabagwasya kupanga cakusala cibotu. Zimwi ziindi cakusala eeci cijatikizya kuzuminana kuti mukwatane, mpoonya zimwi ziindi cijatikizya kuleka kweebana. Ikuti naa baleka kweebana, eeci tacaambi kuti kuli cibi ncobakacita. Muciindi caboobo, kweebana kwabagwasya kusala camaano. Nkaambo nzi kweebana ncotweelede kukubona munzila iiluzi? Kuti bantu batanakwatana bakubona munzila iiluzi kweebana, tabakataliki kweebana amuntu ngobazyi buya kuti tabakakwatani limwi. w24.05 26-27 ¶3-4

Zimwi ziindi, bakubusi balakonzya kuyoowa kwaambila bamwi kujatizya nzyobasyoma. Mucikozyanyo, balakonzya kuyoowa kupandulula kaambo ncobatasyomi munjiisyo yakusanduka kwazintu. Nkaambo nzi? Nkaambo kakuti bamayi balakonzya kwaamba kuti njiisyo eeyi njamasimpe, tacili cintu cakuyeeyela buyo. Ikuti kamuli muzyali, mbuti mbomukonzya kubagwasya bana banu kusinizya kuti nzyobasyoma nzyamasimpe? Amubaambile kuti tabeelede kufwa nsoni akaambo kakusyoma kuti kuli Mulengi. Nkaambo nobaba basayaansi banji balasyoma kuti zintu tiizyakaile kusanduka buyo zilikke. Basayaansi aaba, balabubona bumboni bwakuti kuli muntu umwi musongo iwakalenga zintu eezyi zijisi bumpiyompiyo. Akaambo kaceeci, tabaisyomi njiisyo yakusanduka. Cintu cimwi cikonzya kugwasya bana banu kuba alusyomo luyumu abusicamba, nkuzyiba cakapa kuti bakwesu abacizyi bamwi basinizye kuti zintu zyakalengwa buya. w24.12 18 ¶14-15

Jesu wakazumanana kuubona munzila yeelede mulimo wakukambauka. Eeci cakamugwasya kuzumanana kuubeleka canguzu. Mucikozyanyo, kumamanino aamwaka wa 30 C.E, wakabona kuti bantu banji bakalilibambilide kuswiilila makani mabotu alimwi wakabakozyanisya kumuunda uuyanda kutebulwa. (Joh. 4:35) Kumane nokwakainda mwaka, wakaambila basikwiiya bakwe kuti: “Mulimo wakutebula mupati.” (Mt. 9:​37, 38) Kumbele alimwi wakaamba kuti: “Mulimo wakutebula mupati . . . Amulombe Simalelo wabutebuzi kuti atume babelesi mumulimo wakwe wakutebula.” (Lk. 10:2) Jesu wakazumanana kuba abulangizi bwakuti bantu bamwi bakali kuyakwaaswiilila makani mabotu alimwi wakakkomana nobakacita boobo. Jesu wakayiisya basikwiiya bakwe kuzumanana kuubona munzila yeelede mulumbe ngobakali kukambauka, calo icakali kuyoobakulwaizya kuba basungu. w25.03 18-19 ¶15-16

Jehova mayubilo. Mbubwenya muntu mbwakonzya kuyubila mubbwe pati ciindi nokuli guwo, Jehova ulatukwabilila ciindi notwalijana mubukkale bukatazya. Ulatugwasya kukwabilila cilongwe ncotujisi anguwe akutusyomezya kuti zintu izitupenzya lino tazikazumanani pe. Alimwi usyomezya kuti kumbele uyoozigusya zintu zyoonse zitupa kulibilika naa kupenga. (Ezk. 34:​25, 26) Nzila imwi Jehova mbwakonzya kuba Mayubilo eesu nkwiinda mukupaila kulinguwe. Ciindi notupaila, Jehova ulatupa “luumuno lwa Leza” lwalo ilukwabilila myoyo alimwi amizeezo yesu. (Flp. 4:​6, 7) Jehova lyoonse ulaandiswe. Tulakonzya kumusyoma nkaambo “ni Ndomba iiliko lyoonse alyoonse.”‏ (Is. 26:​3, 4) Lyoonse unooliko kutegwa azuzikizye zisyomezyo zyakwe, kuswiilila mipailo yesu alimwi akutupa lugwasyo ndotuyandika. Alimwi tulakonzya kumusyoma Jehova nkaambo ulasyomeka kuli baabo ibamubelekela. (2Sam. 22:26) Kunyina nayooziluba zintu nzyotucita alimwi unootupa bulumbu lyoonse.—Heb. 6:10; 11:6. w24.06 27 ¶4-6

Tweelede kucenjela kujatikizya zintu nzyotweebelela naa nzyotucita ciindi notulikondelezya. Alimwi tweelede kusala balongwe bali kabotu kutegwa tutataliki kuyeeya kuti kuba amali manji ncecintu ciyandika kapati mubuumi. Kuti twabona kuti cintu cimwi catalika kupa kuti lusyomo lwesu muli Jehova luceye, tweelede kufwambaana kucileka. (Mt. 5:​29, 30) Tatweelede kuba amyoyo yobilo. Tulakonzya kutalika kuyeeya kuti mbwaanga tujisi bubi kubelekela Jehova, tatukonzyi kuyungwa kucita zintu zibi. Mucikozyanyo, amweezeezye kuti musalazya muŋanda yanu. Ncinzi cikonzya kucitika kuti nomwamana kusalazya mwasiya mawindo alimwi amulyango kazijalukide? Cakutadooneka inga kwanjila dooti naa kasuko alimwi. Eeci tulakonzya kucikozyanisya kucilongwe cesu a Jehova. Kuli zinji nzyotweelede kucita kunze buyo lyakucita zintu zibotu iziyumya cilongwe cesu a Jehova. Mbubwenya mbotutayandi kuti dooti naa kasuko zinjile alimwi muŋanda motwali kusalazya, tweelede kweeleba kucita cintu cili coonse cikonzya kupa kuti luyando ndotujisi kuli Jehova luceye.—Ef. 2:2. w24.07 21 ¶6-7

Inga twayeeya mapenzi Jesu ngaakaliyumya kweendelezyegwa calunya alimwi wakaliyumya kukucisa kutaambiki. Nokuba boobo, Jesu wakazumanana kuba siluyando alimwi akusyomeka kuli Jehova nokuba kuti wakacitilwa cakutalulama. Muciindi cakulomba kuti basikalumamba ibakamugagaila acisamu basubulwe, Jesu wakapaila kuti: “Taata, kobalekelela nkaambo tabazyi ncobacita.” (Lk. 23:34) Ikuti katubapailila aabo batucitila cakutalulama, cilakonzya kupa kuti tuleke kubabikkilila akunyema, alimwi buya cilakonzya kupa kuti tucince mbotubabona. Kufwumbwa kuti katucili munyika eeyi mbyaabi, tuyoozumanana kucitilwa cakutalulama. Tacikwe makani abukkale motukonzya kulijana, tweelede kuzumanana kupaila kuli Jehova kutegwa atugwasye. Kuyungizya waawo, atumwiiye Jesu mbwaakacita ciindi naakacitilwa cakutalulama akuzumanana kubelesya njiisyo zyamu Bbaibbele kutegwa zitugwasye. Ikuti twacita oobo, tulakonzya kuba masimpe kuti Jehova uyootulongezya.—1Pet. 3:​8, 9. w24.11 6 ¶16; 7 ¶17, 19

Tabuli bukkale boonse mbwazumina Jehova, kayi ulicisulide cibi. (Int. 5:​4-6) Uyanda kuti katuzilemeka zyeelelo zyakwe zyabululami zyalo zilembedwe mu Bbaibbele. Nokuba boobo, Jehova ulizyi kuti tatulondokede aboobo tatukonzyi kumumvwida cakulondoka. (Int. 130:​3, 4) Pele alimwi, tabayandi ‘bantu bamusampaula ibasandula luzyalo lwakwe kuba cilitamizyo cakuba abukkale busesemya.’ (Jud. 4) Nkakaambo kaako, Bbaibbele lyaamba ‘zyalunyonyooko lwabantu basampaula Leza’ lyankondo ya Amagedoni. (2Pet. 3:7; Ciy. 16:16) Nokuba boobo, Jehova tayandi muntu uuli woonse kuti akanyonyoonwe. Cakusalazya Bbaibbele lyaamba kuti “uyanda kuti boonse bakonzye kweempwa.” (2Pet. 3:9) Aboobo, baalu Banakristo balamwiiya Jehova ciindi nobasoleka kugwasya muntu iwakacita cibi cakukkazika moyo kutegwa acince nzila zyakwe akutalika kukkomaninwa alimwi a Jehova. Nokuba boobo, tabali bantu boonse ibakacita cibi ibayanda kweempwa. w24.08 26 ¶1-2

Mbubwenya mbuli Jehova, andiswe tulakonzya kupa bamwi zintu nzyobayandika kumubili akaambo kakuti tulabayanda. Mucikozyanyo, sena kuli mukwesu naa mucizyi ngomuzyi uuyandika zyakulya naa zyakusama? Jehova ulakonzya kumubelesya kumupa nzyayandika muntu ooyo. Bantu ba Jehova bazyibidwe kuti mbaabi akaambo kakuti balafwambaana kugwasya ciindi nokwacitika ntenda. Mucikozyanyo, lyabulwazi bwa COVID-19, bakwesu abacizyi bakali kwaabana zyakulya, zyakusama alimwi azintu zimwi ziyandika abaabo ibakabulide. Banji bakasanga cakulisungula kumulimo wanyika yoonse. Akaambo kaceeci, cakali kukonzyeka kugwasya bakwesu munyika yoonse ibakajatikizyigwa antenda. Bakwesu alimwi abacizyi aaba baabi, bakaatobela majwi aali kulugwalo lwa Bahebrayo 13:16 aakuti: “Mutalubi kucita zibotu akwaabana zintu nzyomujisi abamwi, nkaambo Leza ulabotelwa azipaizyo zili boobo.” w24.09 27 ¶6-7

Amweezeezye bukkale oobu. Muyandaula mulimo uukonzya kumugwasya kujana nzyouyandika mukwasyi. Mpoonya mwajana milimo yobilo. Mwalanga-langa twaambo toonse tujatikizyidwe, mbuli musyobo wamulimo, ciindi ncomunoobeleka ancomunakweenda kuya kumulimo azimwi buyo. Alimwi yoonse ili buyo kabotu ku Munakristo. Pele ambweni mwakkomanina umwi akaambo kamusyobo wamulimo naa akaambo kakuti uvwolwa mali manji. Nokuba boobo, kuli azintu zimwi nzyomweelede kulanga-langa kamutanapanga cakusala. Mucikozyanyo, sena umwi akati kamilimo eeyo unoomupa kuti kamutajaniki kumiswaangano yambungano imwi naa kumumanina ciindi ncomweelede kuba abanamukwasyi? Kulibuzya mubuzyo ooyu kulakonzya kumugwasya “kusinizya zintu ziyandika kapati,” nkokuti bukombi bwanu azintu nzyouyandika mukwasyi wanu muciindi cakubikkila maano kukuyanda kujana mali manji. Aboobo, mulakonzya kupanga cakusala cikonzya kupa kuti Jehova amulongezye. w25.01 17 ¶11-13

Nokuba kuti bantu bamwi bakamweendelezya calunya, mulakonzya kuba masimpe kuti Jehova ulamuyanda alimwi umubona kuti mulaampindu. Kuti naa mulimvwa kubula mpindu, amuyeeye kuti Jehova ulabubona bube bubotu mbomujisi alimwi wakamukwela kulinguwe. (Joh. 6:44) Lyoonse ulilibambilide kumugwasya nkaambo mulayandika kapati kulinguwe. Tulakonzya kwiiya mbwalimvwa Jehova kwiinda mukulanga-langa cikozyanyo ca Jesu. Ciindi Jesu naakali anyika, wakali kubeendelezya caluzyalo aabo ibakali kulimvwa kuti banyina mpindu akaambo kakuteendelezyegwa kabotu abamwi. (Mt. 9:​9-12) Ciindi mukaintu umwi iwakali kuciswa bulwazi bupati naakajata cisani ca Jesu kutegwa aponesyegwe, Jesu wakamuumbulizya alimwi akumulumbaizya akaambo kalusyomo lwakwe. (Mk. 5:​25-34) Akaambo kakuti Jesu ulabwiiya bube bwa Bausyi cakulondoka, mulakonzya kuba masimpe kuti Jehova uyoomweendelezya mbubwenya Jesu mbwaakamweendelezya mukaintu ooyu. (Joh. 14:9) Jehova ulabubona bube bubotu mbomujisi, mbuli lusyomo luyumu alimwi aluyando ndomujisi kulinguwe. w24.10 7 ¶4-5

Mubuumi bwakwe, Davida wakaliyumya kumapenzi aakatazya kapati alo aakali kumupa kulila. Mucikozyanyo, kuli bantu banji ibakamusulide. Nobaba balongwe bakwe bamwi abanamukwasyi tiibakali kusyomeka kulinguwe alimwi bakali kuyanda kumujaya. (1Sam. 19:​10, 11; 2Sam. 15:​10-14, 30) Aciindi cimwi wakalemba kuti: “Ndakatala akaambo kakutongela kwangu; busiku boonse nditesya bulo bwangu amisozi; ndipa kuti bulo bwangu bubombe akaambo kakulila.” (Int. 6:6) Nokuba kuti Davida wakajana mapenzi manji mubuumi, wakalisinizyide kuti Jehova wakali kumuyanda. Wakalemba kuti: “Jehova ulalimvwa jwi lyangu nendilila.” (Int. 6:8) Majwi aali mulugwalo lwabuzuba bwasunu alacisalazya kuti Jehova ulatuyanda kapati alimwi ulabikkila maano kujatikizya mbotulimvwa. Davida wakaamba kuti cakali mbuli kuti Jehova wakali kubikka misozi yakwe munkomo yacikutu naa kwiilemba mubbuku. Wakalisinizyide kuti Jehova wakakubona kupenga kwakwe alimwi wakali kukuyeeya. Wakali masimpe kuti Usyi wakujulu siluyando wakalaazyi mapenzi aakwe alimwi ambwaakali kumupa kulimvwa. w24.12 22 ¶11-12