Juan

10 «Wani xkalawabʼyex meran lek: ja maʼ mi ti wa x-och bʼa spuertaʼil ja skorral* ja chejiki, sok ti wa x-och bʼa pilan lado, ja jaw juni elkʼanum sok jun bandido. 2 Pe ja maʼ ti wa x-och bʼa puerta jani ja stalnanum ja chejiki. 3 Yeʼnani ja maʼ wa xjamjiyi yuja talna puerta, jaxa chejiki wa xyabʼye ja skʼumali. Jaxa talnacheji wa spaya sok sbʼiʼil ja xchejiki sok wa xya eluk bʼa juera. 4 Yajni chʼakta ya eluk ja xchejiki, tixa wa x-ekʼ bʼajtana. Jaxa chejiki wa snochowe yujni wa snaʼawe sbʼaj ja skʼumali. 5 Nunka oj snoch-e june maʼ mi snaʼawe sbʼaj, ojni spake ajnel bʼa yeʼna yujni mi snaʼawe sbʼaj ja skʼumal ja matik mi snaʼawe sbʼaji». 6 Ja Jesús yala yabʼye ja slajelal it, pe ja yeʼnleʼi mi yabʼye stojol ja jas wan aljelyabʼyeʼi.

7 Ja yuj ja Jesús cha yala yabʼye: «Wani xkalawabʼyex meran lek: keʼnani ja puerta bʼa chejiki. 8 Spetsanil ja matik jakele sok wa xyalawe keʼnbʼi ja yeʼnleʼi kʼoteleni elkʼanumik sok bandidoʼik, pe ja chejiki mini smaklunejuke. 9 Keʼnani ja puerta; ja maʼ ti wa x-och ja bʼa puerta jawi ojni staʼ skoltajel; oj bʼobʼ ochuk sok oj bʼobʼ eluk, sok oj staʼ ak. 10 Ja elkʼanumi kechan wa xjak bʼa oj elkʼanuk, bʼa oj milwanuk sok bʼa oj chʼakwanuk. Ja keʼn jakelon bʼa oja taʼ asakʼanilex sok tsʼikan lek oja taʼex. 11 Keʼn ja lekil talnacheji, sok ja lekil talnacheji wa xyaʼa ja sakʼanil yuja xchejiki. 12 Ja aʼtijumi, bʼa mi jun talnachejuk sok mi yeʼn swinkiluk ja chejiki, yajni wa xyila jakum ja lobo,* wa sjipakan ja chejiki sok wa spaka ajnel. Jaxa lobo wa syamtalan ja chejiki sok saktantan wa xya wajuk. 13 Ja aʼtijumi wa spaka ajnel yujni kechan wa x-aʼtiji yuja stsʼakoli sok mi xcham skʼujol ja chejiki. 14 Keʼn ja lekil talnacheji. Wani xnaʼa sbʼaj ja jchejiki jaxa jchejiki wani snaʼawe jbʼaj, 15 jastalni wa snaʼa jbʼaj ja Tatali sok ja keʼn wa xnaʼa sbʼaj ja Tatali; jaxa keʼn wa xkaʼa ja jsakʼanil yuja jchejiki.

16 Sok ay kiʼoj pilan chejik, bʼa mi ti sbʼajuke bʼa korral* it; ja yeʼnleʼi cha tʼilani oj kiʼejan, sok ojni yabʼye ja jkʼumali. Ja yeʼnleʼi oj kʼotuke jun ita nole sok jun ita stalnanume. 17 Ja Tatali wa syajtayon yuja it: yujni wa xkaʼa ja jsakʼanili sok cha jachuk oj ajuki pilan ekʼele. 18 Mini maʼ wa sjapaki, keʼnani wa xkala oj kaʼe. Ayni kiʼoj ja cholal bʼa oj kaʼe sok ay kiʼoj ja cholal bʼa oj ajuki pilan ekʼele. Jani jaw ja mandar yaki ja jTati».

19 Yuja jach yala, ja judíoʼiki cha mi slaja sbʼajyujile. 20 Jitsan ja bʼa yeʼnle wa xyalawe: «Ochel sbʼaj jun pukuj sok jomta yolom. ¿Jas yuj waxa maklayexi?». 21 Jaxa tuki wa xyalawe: «Mini jach wa xyala june maʼ ochel sbʼaj jun pukuj. Pes jun pukuj mini xbʼobʼ sjamyi ja sat june maʼ mi xyila kʼinal».

22 Ja bʼa yajtabʼik jaw, ja bʼa Jerusalén wa xkʼulaxi ja Kʼin bʼa Yajel Sakbʼuk ja Templo.* Styempoʼilni invierno,* 23 jaxa Jesús tey bʼa templo, ti wan bʼejyel bʼa skorredor ja Salomón. 24 Anto ti joybʼaji yuja judíoʼiki sok och yal-e yabʼi: «¿Jasto ora oja walkabʼtikon ja smeranili? Ta weʼna ja Kristo, alakabʼtikon jaman lek». 25 Ja Jesús sjakʼayile: «Kalatawabʼyex, pe mixa kʼuʼanex. Ja jastik wa xkʼulan bʼa sbʼiʼil ja jTati wani xcholo sbʼaja keʼni. 26 Pe ja weʼnlexi mixa kʼuʼanex yujni mi jchejukex. 27 Ja jchejiki wa xyabʼye ja jkʼumali, sok wani xnaʼa sbʼaje, jaxa yeʼnleʼi wa snochowone. 28 Ja keʼn wa xkayile sakʼanil bʼa tolabida; nunka oj chʼayjuk snajele, sok mini maʼ oj sjapki ja bʼa jkʼabʼi. 29 Ja jas yaʼunejki ja jTati masni chaʼanyabʼalil yuj yibʼanal ja tuk jastik junuki, jaxa chejiki mini maʼ oj sjapyi ja bʼa skʼabʼ ja Tatali. 30 Ja keʼn soka Tatali lajan aytikon».*

31 Yajkʼachil ekʼele, ja judíoʼiki stuluwe ton bʼa oj xchʼoje ton. 32 Anto ja Jesús yala yabʼye: «Jeʼunejawilex jitsan jastik lek bʼa ti jakel bʼa Tatal. ¿Bʼay ja bʼa jastik jaw yuja waxa kʼanawex oja chʼojonex ton?». 33 Jaxa judíoʼiki sjakʼaweyi: «Mini oj jchʼojatikon ton yuj jun jasunuk lek waxa kʼulan, jani yuja wana kʼumanel kistal;* yujni ja weʼn, ama jun winikuka, waxa kʼulana bʼaj jun dyos». 34 Ja Jesús sjakʼayile: «¿Mi maʼ tsʼijbʼunubʼaluk ja bʼa wa Leyexi ‹Ja keʼn kala: «Ja weʼnlexi kʼotelex dyos»›? 35 Ta ja Dyos ya sbʼiʼiluk dyosik ja matik tojiye tsats lek yuja yabʼali (ja Yabʼal ja Dyosi mini xbʼobʼ chʼayuk), 36 jaxa keʼn, ja maʼ aji sakbʼuk yuja Tatali sok jekji ja bʼa luʼumkʼinali, ¿waxa walawexkabʼ ‹wana kʼumanel kistal› yuja wa xkala ‹kʼotelon Yunin ja Dyosi›? 37 Ta mi xkʼulan ja jastik wa skʼana ja jTati, moka kʼuʼukexki. 38 Pe ta wa xkʼulan, ama mixa kʼuʼanexki ja keʼn, kʼuʼanik yuja jastik wa xkʼulani. Jach oja naʼex sok mi oja waʼexkan snajel ke ja Tatali lajani ay jmok jaxa keʼn lajani ayon soka Tatali». 39 Sok yajkʼachil ekʼele sleʼawe modo syamjel, pe wajyujile.

40 Cha waj yajkʼachil ekʼele ja bʼa stiʼ jun lado ja Jordán, ja bʼa lugar kʼe ya yiʼ jaʼ ja kristyano ja Juani, sok ti kan tiwi. 41 Jitsan kristyano waj yil-e sok kʼe yal-e: «Ja Juani mini jun milagro* skʼulan, pe yibʼanal ja jas yala ja Juan sbʼaja winik it meraniʼa». 42 Jaxa tiwi jitsan skʼuʼane bʼa Jesús.