Mateo

9 Jaxa Jesusi tixa kʼe ja bʼa chʼin barko, skʼutsu ja mari sok och ja bʼa xchonabʼi. 2 Sok jujuntik kristyano yiʼajejanyi jun winik mi xbʼobʼ snik sbʼaj sok ti bʼaʼan ekʼ bʼa swaynubʼ. Yajni yila ja skʼuʼajel yiʼojeʼi, ja Jesús yala yabʼ ja winik mi xbʼobʼ snik sbʼaji: «¡Tsatsankʼujolana bʼaj, kala kerem! Kaʼata perdon jawa muli». 3 Anto jujuntik jeʼumanik bʼa ley kʼe yal sbʼaje: «Ja it wan kʼumanel kistal sbʼaja Dyosi». 4 Jaxa Jesús, b’a wani snaʼa ja jas wane spensarajeli, yala yabʼye: «¿Jas yuj aya wiʼojex jastik mi lekuk ja bʼa wa kʼujolexi? 5 Alawikabʼi, ¿bʼaya mas pasili? ¿Yaljel ‹kaʼata perdon jawa muli›, ma yaljel ‹kʼeʼan sok bʼejyan›? 6 Pe bʼa oja wil-ex ja Yunin ja Winiki* ayni yiʼoj cholal ja bʼa luʼumi bʼa yajel perdon ja mulali...». Anto, tixa yala yabʼ ja winik mi xbʼobʼ snik sbʼaji: «Kʼeʼan, tulu jawa waynubʼi sok kaʼax bʼa wa naj». 7 Jaxa yeʼn stulu sbʼaj sok tixa waj bʼa snaj. 8 Yajni ja kristyanoʼik yilawe ja it, jelni ochkan spensare sok stoyowe ja Dyosi, ja maʼ yaʼunejyi ja cholal it ja kristyanoʼiki.

9 Yajni el ja tiwi, ja Jesús yila jun winik sbʼiʼil Mateo ti kulan ekʼ ja bʼa lugar wa stsomxi kontribusyon sok yala yabʼ: «Laʼ, nochowon». Jaxa Mateo wegoxta kʼeʼi sok snocho. 10 Mas tsaʼan, yajni ti wan waʼel* ja Jesús bʼa naʼits, ti julye jitsan tsoma kontribusyon sok mulanumik. Jaxa yeʼnleʼi och waʼuke soka Jesús sok ja snebʼumaniki. 11 Pe yajni yilawe ja it, ja fariseoʼiki tixa sjobʼoweyi ja snebʼumanik ja Jesús: «¿Jas yuj wa xwaʼ jawa maestroʼex soka tsoma kontribusyonik sok ja mulanumiki?». 12 Yuja yabʼ ja Jesusi, tixa yala yabʼyeʼa: «Ja matik lek ayi mi xmakuniyujile jun loktor, pe ja matik maloʼayi waniʼa. 13 Ja yuj kaʼaxik sok nebʼawik ja jas wa stojolan ja yaljelik it: ‹Wani xkʼana yajulal kʼujolal, sok mi majtanaluk›. Yujni ja keʼn mi jaʼuk jakyon yuja matik toji, jani yuja mulanumiki».

14 Anto tixa mojxiye soka Jesús ja snebʼumanik ja Juani sok sjobʼoweyi: «¿Jas yuj ja keʼntikon soka fariseoʼik ay kiʼojtikon ja kostumbre bʼa stekʼjel waʼin pe miyuk jawa nebʼumaniki?». 15 Jaxa Jesusi sjakʼayile: «Yajni ay jun boda, ja yamigoʼik ja nobioʼali mini yajnaluk triste oj ajyuke ja yajni tito ayesoki, ¿anke meran? Pe ojni kʼotuk ja kʼakʼu oj japjukyile ja nobioʼali, anto ojxani stekʼe waʼin. 16 Mini maʼ xya makunuk yajkʼachil kʼuʼuts bʼa smaktontajel jun poko kʼuʼuts. Pes yajni wa stsumu sbʼaj ja yajkʼachil kʼuʼutsi, wa stima ja poko kʼuʼutsi sok masto wa xchʼi ele. 17 Cha mini maʼ wa xya ochuk yajkʼachil vino bʼa poko yeʼtalik. Yujkʼa jach kʼulaxi, ojni chʼiʼuk ja tsʼuʼumi, jaxa vino ojni pekʼuk, sok mixa oj makunuk ja yeʼtaliki. Ja yuj ja kristyano ti wa xyawe ochuk ja vino bʼa yajkʼachil yeʼtalik, sok jachuk mini june wa xchʼayi».

18 Yajni wanto yaljel yabʼye ja jastik it, tixa mojxijan jun mandaranum, ti koʼ tinan sbʼaja Jesús sok yala yabʼi: «Sen chamtani ja kakʼix ja wego, pe laʼ sok aʼa kajan jawa kʼabʼ bʼa yeʼna, sok ojni sakʼwuk».

19 Anto tixa stulu sbʼaj ja Jesús sok wajsok, jaxa snebʼumaniki waj mojtanuke. 20 Sok tixa mojxijan jun ixuk ja bʼa spatiki. Ja ixuki ayxa yiʼoj 12 jabʼil mi xtejkʼaji ja xchameli sok ti syamayi ja stiʼ spal kʼuʼi, 21 yujni wa xyala sbʼaj: «Ta kechan jyamayi ja spal kʼuʼi, ojni tojbʼukona». 22 Ti sutu sbʼaj ja Jesusi, sok yajni yila, ti yala yabʼa: «¡Tsatsankʼujolana bʼaj, kala akʼix! Tojbʼiyata yuja waxa kʼuʼani». Jaxa bʼa jutsʼin jaw tojbʼikan ja ixuki.

23 Yajni ochkʼot ja bʼa snaj ja mandaranumi sok yila ja juʼumanik ajmayi sok jaxa kristyano xwoʼoljiye okʼel, 24 ja Jesusi ti yala yabʼyeʼa: «Elanik ja il, yujni mi chameluk ja yal akʼixi, wani wayel». Yajni yabʼye ja it, kʼe stseʼuke ja Jesusi. 25 Anto, yajni chʼak aji eluk ja kristyano, tixa waj ja bʼay ja yal akʼixi, syamayi ja skʼabʼi jaxa yeʼni kʼeʼi. 26 Sok pukxi ekʼ yabʼalil bʼa spetsanil ja lugarik joybʼanubʼalyuji.

27 Yajni elumxa ja tiw ja Jesusi, ti nochjiyuj chawane mi xyilawe kʼinal sok wane yawajel: «¡Naʼa jyajulaltikon, Yunin ja David!».* 28 Yajni och ja bʼa naʼits ja Jesús, ti mojxiyejan ja matik mi xyilawe kʼinali, jaxa yeʼn sjobʼoyile: «¿Wan maʼ xa kʼuʼanex oj bʼobʼ ka tojbʼanik?». Tixa sjakʼaweʼa: «Wan, Kajwal». 29 Anto tixa syamayi ja sateʼi sok yala yabʼye: «Ja jastala jeʼawex ja skʼuʼajeli, jach akʼotuk ja jas akʼanawexi». 30 Sok och yil-e kʼinal. Pe ti komjiye lek yuja Jesusi: «Kʼelawik, mok maʼ kʼot snaʼ ja iti». 31 Pe yajni elye ja tiwi, och yal-e ekʼ bʼa Jesús bʼa spetsanil ja lugar joybʼanubʼalyuji.

32 Yajni wajumexa, ja kristyano yiʼajejanyi ja Jesús jun winik mi xkʼumani. Ja winiki ochel sbʼaj jun pukuj. 33 Sok yajni ya eluk ja pukuji, ja winiki kʼumani. Jaxa kristyanoʼiki jel och ja spensare sok wa xyalawe: «Mini bʼa ilubʼal jachuk ja bʼa Israel». 34 Pe ja fariseoʼiki wa xyalawe: «Ja yeʼn wa xya eluk ja pukujiki, pe janiyuj spabor ja yajwalil ja pukujiki».

35 Jaxa Jesusi och sbʼejtay ekʼ yibʼanal ja chonabʼiki sok ja yal komoniki. Wan sjejel ekʼ ja bʼa naʼitsik wa stsomo sbʼajeʼi, wan xcholjel ekʼ ja lekil rasonik sbʼaja sGobyerno ja Dyosi sok wan stojbʼesel chikan jas tikʼe chamelal sok chikan jas tikʼe syajal. 36 Yajni wa xyila ja kristyano jumasaʼ, jelni wa snaʼa syajulale juntiro, yujni ixtanubʼale sok jipubʼalekan* jastal yal chejik bʼa mey stalnanume. 37 Anto tixa yala yabʼ ja snebʼumaniki: «Jelni jitsan ja sbʼaʼal ja alaji, pe jelni tʼusane ja aʼtijumiki. 38 Ja yujil, patawikyi skʼujol ja Yajwalil ja alaji bʼa oj sjek aʼtijumik ja bʼa yalaji».