1 Corintios

7 Pes sbʼaja jastika tsʼijbʼanexi, masni lek jun winik mok staʼ sbʼajsok jun ixuk. 2 Pe yuja jelxani wa xkoye mulalik sok ixuk winik,* ke kada winik aʼajyuk xcheʼum sok kada ixuk aʼajyuk statam. 3 Ke ja tatamali aya ekʼyi ja snesesida ja xcheʼumi sok jaxa cheʼumali aya ekʼyi ja snesesida ja statami. 4 Ja cheʼumali mini yeʼn wa skʼulan mandar ja skuerpo, jani ja statami. Cha jachni ja tatamali, mini yeʼn wa skʼulan mandar ja skuerpo, jani ja xcheʼumi. 5 Mok wa stekʼ jawa moji, kechani ta akuerdoʼayexa chawanilex sok awaʼunejex kujlajuk jun styempoʼil, bʼa jani oj wajuka kʼujolex yajelyi orasyon, sok mas tsaʼan ojxa ataʼabʼajex. Jachuk ja Satanás mi oj bʼobʼ ya ochanik probar yuja mi xbʼobʼa koma bʼajexi. 6 Ja jas kalawabʼyexi juni jasunuk wa xbʼobʼa kʼulukex, pe mini jun mandaruk. 7 Pe ama jachuk, wanike xkʼana yibʼanal ja winike akʼotuke jastal keʼna. Pe kada jujune wa x-ajiyi ja sdon yuja Dyosi, tuktukil ja jastal wa x-ajiyi kada jujune.

8 Ja matik mi nupanelukeʼi sok ja biuda jumasaʼ wani xkala yabʼye masni lek aʼajyuke jastal keʼna. 9 Pe ta mi xbʼobʼ skom sbʼaje, anupanuke, yujni mas lek oj nupanuke ke yuja lom kʼixin oj ajyukeʼi.

10 Ja matik nupanelexi wa xkawilex ja mandar it, pe mini keʼnuk jani ja Kajwaltiki, ke ja cheʼumali mokni yakan ja statami.* 11 Pe ta aʼwanikani,* mokni nupanuk, ma aya kulan soka statami. Jaxa tatamali mokni yakan ja xcheʼumi.

12 Pe ja tuki wa xkala yabʼye, keʼnani wa xkala sok mi jaʼuk ja Kajwaltiki, ta jun hermano mi kʼuʼumanuk* ja xcheʼumi pe ja xcheʼumi akuerdoni ay bʼa oj kansok ja yeʼn, mokni yakani. 13 Ta jun ixuk mi kʼuʼumanuk* ja statami pe ja statami akuerdoni ay bʼa oj kansok ja yeʼn, mokni yakan ja statami. 14 Yujni ja tatamal mi kʼuʼumanuki* wa xkʼot ajyuk sak yuja xcheʼumi sok jaxa cheʼumal mi kʼuʼumanuki* wa xkʼot ajyuk sak yuja hermano. Lekbʼi mi jachukuk, ja yuntikileʼi mini sak oj ajyuke, pe ja wego kʼotelexa sak. 15 Pe ta ja maʼ mi kʼuʼumanuki* yala oj wajuk,* awajuk. Ja hermano ma ja hermana mi obligado ayuk bʼa ti oj ajyuksok ja maʼ mi kʼuʼumanuki.* Ja Dyosi wani xyawilex lamanil. 16 Ja yuj cheʼumal, ¿jastal waxa naʼa ta mi oja koltay jawa tatam bʼa oj kʼot snochuman Kristo? Ma tatamal, ¿jastal waxa naʼa ta mi oja koltay jawa cheʼum bʼa oj kʼot snochuman Kristo?

17 Pe kada jujune aʼajyuk ja bʼa jastal yaʼunejex ja Jyoba* sok ja bʼa jastal wala taxyex ja yajni spayawex ja Dyosi. Jani it ja tojelal wa xkaʼa bʼa yibʼanal ja kongregasyoniki. 18 ¿Payji maʼ jun winik ja yajni akʼubʼalxayi senya ja swinkili? Mok kʼotuk jastal june maʼ mi akʼubʼalyi senya ja swinkili. ¿Payji maʼ jun winik yajni mito akʼubʼalukyi senya ja swinkili? Mok yayi senya ja swinkili. 19 Mini ay stʼilanil ja ay maʼ oj yayi senya ja swinkili ma miyuk. Ja jas ay stʼilanili jani skʼuʼajel ja smandarik ja Dyosi. 20 Kada jujune aʼajyuk ja jastal wa xtax ja yajni payjiʼi. 21 ¿Moso maʼ aya ja yajni payjiya? Mok chamuka kʼujol yuja jaw. Pe ta wa xbʼobʼ elan libre, kʼulan aprobechar bʼa oj elan. 22 Yujni ja maʼ moso ay ja yajni payji bʼa ajyel lajan soka Kajwaltiki ja wego ajita el libre sok sbʼajxani ja Kajwaltiki. Junxtani soka it, ja maʼ libre ay ja yajni payjiʼi ja wego kʼotelxani smoso ja Kristo. 23 Jelni karo tupjiyex ja yajni manjiyexi; mokxa ajyanik smoso ja winikeʼi. 24 Kermano jumasaʼ, kada jujune aʼajyuk ja bʼa stiʼ sat ja Dyos jastalni wa xtax ja yajni payjiʼi.

25 Pe sbʼaja matik soltero ayeʼi,* mini ay kiʼoj jun mandar bʼa sparte ja Kajwaltik. Pes ja keʼn wa xkalawabʼyex ja jpensari, jastalni june maʼ jeʼubʼalyi yajulal kʼujol yuja Kajwaltik bʼa oj ajyuk toj. 26 Ja yujil, yuja jel ja wokolik ja wego, wa xpensaraʼan masni lek aʼajyuk ja jastalni ay ja winiki. 27 ¿Ayxa maʼ wa cheʼum? Moka leʼ modo oj elan libre. ¿Mito maʼ ayuka cheʼum? Moka leʼ wa cheʼum. 28 Pe ta nupaniya, mini wanuka slejel amul. Ta june maʼ soltero* wa xnupani, mini wa sleʼa smul. Pe ja matik wa xnupaniyeʼi ojni ekʼ sbʼaje wokol ja bʼa sakʼanileʼi. Ja keʼn wani xleʼa modo bʼa mok ekabʼajex ja jawi.

29 Chomajkil, wa xkalawabʼyex kermano jumasaʼ, jelxani tʼusan tyempo wan kanel. Ja yuj man wego, ja matik ay xcheʼumi aʼajyuke jastal ja maʼ mey xcheʼumi, 30 jaxa ja matik wa x-okʼyeʼi aʼajyuke jastal ja matik mi x-okʼyeʼi; ja matik wa xgustoʼaxiyeʼi aʼajyuke jastal ja matik mi xgustoʼaxiyeʼi; ja matik wa smanawe jastik junuki aʼajyuke jastal ja matik mey yiʼojeʼi, 31 jaxa matik wa xyawe makunuk ja luʼumkʼinali aʼajyuke jastal ja matik mi xyawe makunuk tsʼikan leki. Yujni wan tukbʼel ja jastik wan ekʼel ja bʼa luʼumkʼinali. 32 Ja smeranili, wani xkʼana mokni jas chamuka kʼujolex. Ja winik mito nupaneluki jani wa xcham skʼujol ja jastik bʼa Kajwaltiki, bʼa jastal lek oj kʼot iljuk yuja Kajwaltiki. 33 Pe ja winik nupanelxa jani wa xcham skʼujol ja jastik bʼa luʼumkʼinali, bʼa jastal lek oj kʼot iljuk yuja xcheʼumi, 34 sok mini juneʼukta ja jas wa xwaj skʼujoli. Chomajkil, ja ixuk mi nupaneluki, sok cha jachukni ja maʼ solterato,* jani wa xcham skʼujol ja jastik bʼa Kajwaltiki, bʼa jachuk oj bʼobʼ ajyuk sak ja skuerpo sok ja spensari.* Pe ja ixuk nupanelxa jani wa xcham skʼujol ja jastik bʼa luʼumkʼinali, bʼa jastal lek oj kʼot iljuk yuja statami. 35 Pe ja it wani xkala bʼa wa lekilalex. Mi wa xkala bʼa oj jtimex,* sbʼajni oj nika kʼujolex bʼa oja kʼulukex ja bʼa jas leki sok yaʼteltajel kʼakʼu kʼakʼu ja Kajwaltiki sok mini jas pilan oj wajuka kʼujolex.

36 Pe ta jun soltero* wa xyabʼ mixa xbʼobʼ skom sbʼaj sok ta julta skʼujol, jani it ja jas tʼilan oj skʼuluki: a-skʼuluk ja jas wa skʼana, mini wa sleʼa smul. Anupanuk. 37 Pe ta june yalata ja bʼa skʼujol oj kan soltero* sok jani wa xyiʼaj ja jas yalunej ja skʼujoli, yujni wa xyabʼ mey yiʼoj nesesida oj nupanuk sok wa xbʼobʼ ajyuk soltero,* lekni ja jas oj skʼuluki. 38 Ja yuj ja maʼ wa xnupani lekni wa skʼulan, pe ja maʼ mi xnupani masto lek wa skʼulan.

39 Ja cheʼumali mochani ay soka statam ja yajni sakʼanto ay ja yeʼn. Pe ta ti cham ja statami, librexani ay bʼa oj nupanuksok chikan maʼ wa skʼana, pe kechansok jun snebʼuman ja Kajwaltiki. 40 Pe ja keʼn wa xpensaran, masni gusto oj ajyuk ta jach kani. Sok ja keʼn jkʼuʼunejni lek cha ayni kiʼoj ja yip ja Dyosi.*