Juan

17 Yajni chʼak yal ja jastik it, ja Jesús sjacha ja sat bʼa satkʼinal sok yala: «Tat, kʼota ja yoraʼili. Toyo jawa wunini bʼa jachuk oj stoya ja weʼn, 2 pes ja weʼn awaʼunejyi ja cholal bʼa yibʼanal ja kristyano.* Jaxa yeʼn oj yayile sakʼanil bʼa tolabida yibʼanal ja matika wayiʼi. 3 Ja it wa stojolan sakʼanil bʼa tolabida: akʼot snaʼe abʼaj ja weʼn,* ja único Dyos smeranili, sok ja maʼ ajekaʼi, ja Jesukristo. 4 Ja keʼn jtoyuneja ja bʼa luʼumi; jchʼakata ja aʼtel awakiʼi. 5 Ja yuj ja wego, Tat, aki ja chaʼan cholal ajyikuj ja bʼa wa tsʼeʼeli bʼajtanto oj kujlajuk ja luʼumkʼinali.

6 Ja ke’n kaʼunej snaʼe* jawa bʼiʼil ja matik awaki ja bʼa luʼumkʼinali. Weʼn abʼaje ajyi sok awaki, sok skʼuʼuneje jawa wabʼali. 7 Ja wego kʼota snaʼe yibʼanal ja jas awaʼunejki tini jakel b’a weʼna; 8 yujni kaʼunej ekʼyile ja rason awakiʼi jaxa yeʼnleʼi skisuneje sok kʼotani snaʼe meran lek jakyon bʼa wa parte, sok skʼuʼaneta weʼna jekawon. 9 Wa xkʼana yuj yeʼnle; mi jaʼuk wa xkʼana yuja luʼumkʼinali, jani yuja matika waʼunejki, yujni weʼna bʼaj; 10 sok yibʼanal ja jastik jbʼaji weʼnani abʼaj jaxa jastika bʼaji keʼnani jbʼaj, sok toyjiyonta yuj yeʼnle.

11 Ja keʼn ojxa kakan ja luʼumkʼinal it, pe ja yeʼnleʼi tini aye bʼa luʼumkʼinal, jaxa keʼn oj wajkona mok. Tatal jel sak, talnaye* yuja wa bʼiʼili, ja it weʼna wakiʼi, bʼa oj kʼotuke june ita* jastalni ja keʼntik kʼotelotik june ita.* 12 Yajni ti ajyiyon soka yeʼnleʼi, keʼnani wa xtalnaye yuja wa bʼiʼili, ja it weʼna wakiʼi; sok jtalnuneje, sok mini june bʼa yeʼnle chʼayel snajele, kechani ja yunin ja chʼakelali, bʼa jachuk oj kʼotuk ja jas tsʼijbʼunubʼali. 13 Pe ja wego wajumona mok, sok wa xkala ja jastik it ja yajni tito ayon ja bʼa luʼumkʼinali bʼa jachuk ja yeʼnleʼi oj yabʼye meran lek ja gustoʼil kiʼoji. 14 Kalunej yabʼye jawa wabʼali, pe ilkʼujolajele yuja luʼumkʼinali yujni mi sparteʼuke ja luʼumkʼinali, jastalni ja keʼn mi sparteʼukon ja luʼumkʼinali.

15 Mi wa xkʼanawi bʼa oj wa eluke ja bʼa luʼumkʼinali, kechan talnaye* sbʼaja Maʼ jel malo. 16 Ja yeʼnleʼi mi sparteʼuke ja luʼumkʼinali, jastalni ja keʼn mi sparteʼukon ja luʼumkʼinali. 17 Asakbʼuke* yuja smeranili; jawa wabʼali jani ja smeranili. 18 Jastalni ajekawon ja bʼa luʼumkʼinali, ja keʼn cha jekawe ja bʼa luʼumkʼinali. 19 Sok wala ajyiyon sak yuj yeʼnle bʼa jachuk ja yeʼnleʼi oj cha ajyuke sak yuja smeranili.

20 Mi kechan wa xkʼanawi yuj yeʼnle, cha jachni sbʼaja matik oj skʼuʼuke bʼa keʼn stsʼakatal yuja jas wa xyalawe ja yeʼnleʼi, 21 bʼa jachuk yibʼanale ja yeʼnleʼi june ita oj kʼotuke. Tat, jastalni ja weʼn lajan aya jmok sok ja keʼn lajan ayona mok, ja yeʼnleʼi cha aʼajyuke lajan jmoktik; jachuk ja luʼumkʼinali oj skʼuʼuk weʼnani ajekawon. 22 Ja keʼn jkisuneje jastalni akisunejon ja weʼni bʼa jachuk ja yeʼnleʼi akʼotuke june ita jastalni ja keʼntik kʼotelotik june ita: 23 ja keʼn lajan ayonsoke jaxa weʼn lajan aya jmok bʼa jachuk ja yeʼnleʼi lajan lek aʼajyuke. Sok jachuk ja luʼumkʼinal oj snaʼ weʼnani ajekawon sok ayajtaye ja yeʼnleʼi jastalni ayajtayon ja keʼni. 24 Tat, wa xkʼana ja matik awakiʼi aʼajyuke jmok ja bʼa oj ajyukon ja keʼn bʼa jachuk ayil-e ja chaʼan cholal awaʼunejkiʼi, yujni ayajtayon bʼajtantoyuj oj kujlajuk ja luʼumkʼinali. 25 Tatal jel toj, ja smeranili, ja luʼumkʼinali me xkʼot snaʼa bʼaj, pe ja keʼn wa xnaʼa bʼaj, jaxa yeʼnleʼi kʼota snaʼe weʼnani ajekawon. 26 Ja ke’n kaʼunej snaʼe jawa bʼiʼili, sok mini oj kakan yajel snaʼe, bʼa jachuk ja yajalkʼujol ayajtayonsoki ti oj ajyuksoke sok jaxa keʼn lajan oj ajyukonsoke».