Romanos

15 Pe ja keʼntik ja matik tsats ayotiki, tʼilani la jtekʼtik ja matik mi tsats ayukeʼi bʼa oj kuchyujile ja jastik jelto al wa xyabʼyeʼi, sok mok jkʼuluktik ja jas wa xya gustoʼaxukotik ja keʼntiki. 2 Kada jujune ja keʼntiki la katik gustoʼaxuk ja jmojtiki sok la jkʼuluktik ja bʼa jas lek bʼa stsatsankʼujolajele. 3 Asta mini skʼulan ja Kristo ja jas wa x-aji gustoʼaxukyuji, pes jachni ekʼ jastal tsʼijbʼunubʼal: «Ja yutanel ja matik wa xyutaja keʼnani kʼotel jbʼaj». 4 Yujni yibʼanal ja jastik tsʼijbʼajikani tsʼijbʼajinikan bʼa oj sjekitik, bʼa jachuk yuja wa xkuchkujtiki* sok yuja wa xyaʼa kulan jkʼujoltik ja Yabʼal ja Dyosi ojni ajyukujtik smajlajel. 5 Ja Dyos maʼ wa skoltayotik bʼa oj kuchkujtik sok bʼa oj kaʼ kulan jkʼujoltik ayawilexa wibʼanalex ja junxta pensar ajyiyuj ja Kristo Jesús, 6 bʼa jachuk, junta lajan sok junta atiʼex, oja wawexyi stoyjel ja Dyos sok sTat ja Kajwaltik Jesukristo.

7 Ja yuj gustoxta kʼulanabʼajik resibir, jastalni gustoxta skʼulanex resibir ja Kristo ja weʼnlexi, bʼa jachuk oj yiʼ stoyjel ja Dyosi. 8 Pes wa xkalawabʼyex: ja Kristo kʼotni yaʼtijum sbʼaja matik yiʼoje senya ja swinkili bʼa sjejel ja smeranil bʼa Dyosi sok sjejel kʼotelni smeranil ja jastik kʼapjiyile yuja Dyos ja matik ekʼpaxtayujileʼi, 9 sok bʼa jachuk ja tuk chonabʼiki oj yaweyi stoyjel ja Dyos yuja syajulal skʼujoli. Jastalni tsʼijbʼunubʼal: «Ja yuj ojni jtoya jaman lek ja bʼa stiʼ sat ja tuk chonabʼiki sok ojni jtsʼebʼantay jawa bʼiʼili». 10 Jaxa yeʼn cha wa xyala: «Chonabʼ jumasaʼ, gustoʼaxanik soka xchonabʼ ja Dyosi». 11 Pilan parte ja bʼa jas tsʼijbʼunubʼali wa xyala: «Awibʼanalex chonabʼik, toyowik ja Jyoba.* Atoyjukyuj yibʼanal ja kristyano». 12 Ja Isaías cha wa xyala: «Ayni maʼ oj sjeʼ sbʼaj ja bʼa spamilya* ja Jesé sok oj yayi mandar jitsan chonabʼ; jaxa chonabʼiki gustoxta oj smajlaye bʼa oj skʼuluk jastik lek». 13 Ja Dyos maʼ wa xyaʼa smajlajeli ayawilex jitsan gustoʼil sok lamanil yuja waxa jipa akʼujolex bʼa yeʼn, bʼa jachuk oj ajyukawujilex jitsan smajlajel yuja yip ja Dyosi.*

14 Kala kermano jumasaʼ, ja keʼn jkʼuʼunej lek ke ja weʼnlexi cha jelni ja slekila kʼujolexi sok mini skʼulanawilex palta snajel, sok ja weʼnlexi wani xbʼobʼa waʼabʼajex rason.* 15 Pe jtsʼijbʼunejawilex jaman lek jujuntik jasunuk bʼa yajel juluka kʼujolex pilan ekʼele. Wani xkʼulan yuja lekil kʼujolal mi xbʼajixi sjeʼaki ja Dyos 16 bʼa oj kʼotkon jun yaʼtijum ja Kristo Jesús sbʼaja chonabʼiki. Wanon koltanel ja bʼa aʼtel yaʼunej ja Dyos bʼa xcholjel ja lekil srasoniki bʼa jachuk ja chonabʼik it oj bʼobʼ kʼotuke jun majtanal bʼa lek wa xyila ja Dyos, bʼa akʼubʼal sakbʼuk yuja yipi.*

17 Ja yuj ay kiʼoj rason bʼa oj kabʼ jitsan gustoʼil ja bʼa Kristo Jesús yuja jastik ti chʼikan soka Dyosi. 18 Pes mini oj yaki gana stajel tiʼal ta mi jaʼuk sbʼaja jas skʼulunej ja Kristo yuj keʼna bʼa jachuk ja chonabʼiki oj ajyuke kʼuʼabʼal. Ja yeʼn skʼulunej yuja jas wa xkala sok wa xkʼulani, 19 yuja milagroʼiki* sok ja jastik jel cham yiljeli sok yuja yip* ja Dyosi, ja yuj masan bʼa Jerusalén sok bʼa tuktukil parte man bʼa Ilírico jcholunej jaman lek ja lekil rasonik sbʼaja Kristo. 20 Sok ja yuj kala jbʼaj mixa oj jchol ja lekil rasonik ja bʼa alubʼalxa ja sbʼiʼil ja Kristo, bʼa jachuk mixa oj nochyi ja aʼtel bʼa kʼeta stul jun winik. 21 Jastalni tsʼijbʼunubʼal: «Ja matik mi yabʼye yabʼalil bʼa yeʼna ojni yil-e, sok ja matik mi yabʼunejukeʼi ojni yabʼye stojol».

22 Cha jani yuja jaw ja jitsan ekʼele wokol kabʼ bʼa oj kulatayex. 23 Pe chʼaktani jchol bʼa yibʼanal ja lugarik tey ili sok ayxa jitsan* jabʼil jel xkʼana oj waj kilex. 24 Ja yujil, yajni la wajyon ja bʼa España, wani xkʼana oj kilex. Sok yajni kabʼta stsamalil ajyel jun tyempo amokex, ojni amojtayonex jun makʼe ja bʼa bʼeji. 25 Pe ja wego ojxta wajkon bʼa Jerusalén bʼa skoltajel ja matik tsaʼubʼalexa sbʼaja Dyosi. 26 Yujni ja matik teye bʼa Macedonia sok bʼa Acaya gustoxta yaʼuneje ja jastik sbʼajeʼi. Pes skʼepunejeyi ja matik tsaʼubʼalexa sbʼaja Dyos bʼa teye bʼa Jerusalén sok pobreʼe. 27 Ja yeʼnleʼi gustoxta yaʼuneje; pes ja smeranili, ayxani sjelesoke, pes ta ja matik mi judíoʼuki yaʼuneje eluk slekilal ja jastik yiʼoje bʼa Dyos ja matik tsaʼubʼalexa sbʼaja Dyosi, cha tʼilani oj skoltaye soka jastik sbʼajeʼi. 28 Ja yuj, yajni xchʼak jkʼuluk ja aʼtel it sok kilata kanta bʼa skʼabʼe ja koltanel jaw, tixa oj wajkon ja bʼa España sok oj ekon ja bʼayexi. 29 Chomajkil, wani xnaʼa ja yajni xwaj kulatayexi oj kiʼochawilex jitsan slekilal jakel bʼa Kristo.

30 Kermano jumasaʼ, yuja Kajwaltik Jesukristo sok yuja yajalkʼujol wa xjak bʼa yip ja Dyosi,* wa xpata akʼujolex bʼa oja kʼujolukex, jastalni wa xkʼulan ja keʼn, bʼa yajelyi orasyon ja Dyos yuj keʼna, 31 bʼa oj elkon libre ja bʼa skʼabʼe ja matik mi kʼuʼumanuke bʼa Jesús ja bʼa Judea sok bʼa oj skʼuluke resibir gusto lek ja jkoltanel ja matik tsaʼubʼalexa sbʼaja Dyos ja bʼa Jerusalén. 32 Sok jachuk, ta jach wa skʼana ja Dyosi, gustoxta oj waj kulatayex sok oj jtsatsankʼujoluk jbʼajtik. 33 Aʼajyuka mokex ja Dyos maʼ wa xyaʼa lamanili. Amén.