Gálatas

5 Ja Kristo ya elkotik libre bʼa jachuk oj ajyukujtik ja libreʼil jawi. Ja yuj tak, ajyanik yij sok mokxa waʼabʼajex yajkʼachil ekʼele bʼa oj ajan ochanik bʼa jun yuko* bʼa mosoʼil.

2 Kʼelawik, keʼn mismo ja Pablo wa xkalawabʼyex: ta waxa wawexyi senya jawa winkilexi, mini jas slekilal oja wawex eluk ja jas skʼulan ja Kristo. 3 Wa xcha kala yabʼye yajkʼachil ekʼele chikan maʼ wa xyayi senya ja swinkili taregani oj skʼuʼuk yibʼanal ja Leyi. 4 Ja weʼnlexi, ja matik waxa leʼawex modo bʼa oj aljuk kʼotelex toj yuja leyi, pilani ayex sok ja Kristo. Apiluneja bʼajex ja bʼa lekil skʼujol mi xbʼajixi. 5 Pe ja keʼntiki, yuja yip ja Dyosi,* jelni xkʼanatik oj jtatik ja jas jel toj stsʼakatal yuja skʼuʼajeli sok ja yuj gustoxta wantik smajlajel. 6 Yujni ja ajyel lajan soka Kristo Jesús, mini jas xmakuni ja yajelyi senya ja swinkil june sok ja mi oj yayi senya. Ja jas wa xmakuniʼi jaʼa skʼuʼajel bʼa jani tojubʼal yuja yajalkʼujoli.

7 Ja weʼnlexi jelni lek wanex ajnel ajyi. ¿Maʼ stimawex bʼa oja waʼexkan skʼuʼajel ja smeranili? 8 Ja tikʼe pensarik jaw mini ti jakeluk bʼa Maʼ wa spayawex. 9 Tʼusan levadura wa xya pojxuk* yibʼanal ja wotsʼubʼal arina. 10 Wa xjipa jkʼujol ja weʼnlexi, ja matik lajan aye soka Kajwaltiki, mi oja pensaraʼukex bʼa tuk modo. Pe ja maʼ wa xya wokolananiki, chikan machʼa, ojni ajukyi ja kastigo wa sbʼajini. 11 Pe ja keʼn kermano jumasaʼ, ta jato wanon xcholjel sbʼaja yajelyi senya ja swinkil june, ¿anto jas yuj wanto ijel jpatiki? Lekbʼi jachto wanon skʼulajel, mixani kʼoteluk jun lok okil ja poste bʼa yijel wokoli.* 12 Wanukxtabʼi skʼulan sbʼaje kapar* ja matik wa sleʼawe modo oj sjoma wolomexi.

13 Ja weʼnlex kermano jumasaʼ, payjiyex bʼa oj ajyanik libre. Pe mok wa makunukex ja libreʼil jaw bʼa oja kʼulukex ja jastik wa xkʼankʼuniyuj ja bʼakʼtelali. Mas lek, a-snikex ja syajala kʼujolexi bʼa oja wilabʼajex jastala moso abʼajex. 14 Pes yibʼanal ja Leyi wa xkʼot kʼulaxuk* soka mandar it: «Yajtay jawa moji jastalni waxa yajtabʼaj ja weʼni». 15 Sok ama jachuk, wantokʼa xa yajbʼesa bʼajex sok wala kʼeyex tiro, talna abʼajik bʼa mi weʼnta oja chʼaka bʼajex.

16 Ja yuj tak, wa xkalawabʼyex ja it: iʼajik juna sakʼanilex jastalni wa xtojwani ja yip ja Dyosi* sok jachuk mi jas oja kʼulukex sbʼaja jas wa xkʼankʼuniyuj ja bʼakʼtelali. 17 Yujni ja bʼakʼtelali, yuja jas wa xkʼankʼuniyuji, wani skontraʼan ja yip ja Dyosi* sok jaxa yip ja Dyosi wani skontraʼan ja bʼakʼtelali. Pes yuja kontra ayeʼi, ja weʼnlexi mini xa kʼulanex ja jastik waxa kʼanawex oja kʼulukexi. 18 Mi kechanuka, ta jaʼ wa stojowex ja yip ja Dyosi,* mixani ibʼ kʼabʼal ayukex yuja leyi.

19 Pe jelni chikan ja jas wa skʼulan ja bʼakʼtelali, sok jani ja koʼel mulal sok ixuk winik,* jastik bʼa jel kux, kistal modoʼal jel kʼixwela sbʼaj,* 20 stoyjel kʼulubʼal dyosik,* aʼtel sok pukuj,* kontraʼanel, kʼeʼel kʼumal, snoljel tajkel,* koraja, tiroʼanel, mey akuerdo, spiljel sbʼaj kʼoleʼik, 21 imbidia, yakbʼelal, kʼinik bʼa jelxelxa sok tuk jastik junuk jastalik it. Wa xkalawabʼyex, jastalni kalunejxa wabʼyex, ja matik wa skʼulane ja jastik it mini oj sbʼajuke ja sGobyerno ja Dyosi.

22 Pe jaxa satinel wa xyaʼa ja yip ja Dyosi* jaʼa yajalkʼujol, gustoʼil, lamanil, pasensya,* lekil modoʼal, lekil kʼujolal, skʼuʼajel, 23 mansoʼil, skomjel sbʼaj. Mini ay ley bʼa kontra ay soka jastik jaw. 24 Sok chomajkil, ja matik sbʼajxa ja Kristo Jesús xchʼayaweta snajel* ja jastik wa xkʼankʼuniyuj sok ja jastik wa x-okʼ skʼujol ja bʼakʼtelali.

25 Ta kiʼonejtik jun jsakʼaniltik jastalni wa xtojwani ja yip ja Dyosi,* cha mokni la katikan stsajlajel ja stojelal ja yip ja Dyosi. 26 Mokni jtoy jbʼajtik, mok jniktik bʼa yajel jbʼajtik preba sok mok jkʼul jbʼajtik imbidiar.