Filipenses

2 Anto, ta wa xbʼobʼ tsatsankʼujolananik yuja lajan ayex soka Kristo, ta wa xbʼobʼa waʼex kulan skʼujol ja tuk sok yajalkʼujol, ta wa xbʼobʼ chamuka kʼujolabʼajex,* ta yajxta waxa wilabʼajex sok yajxta waxa naʼa yajalex, 2 awik gustoʼaxukon lek sjejel aya wiʼojex ja junxta pensar sok ja junxta yajalkʼujol, ke tsoman lek ayex sok junxta pensar ayex. 3 Mok jas snikex skʼulajel yuja kʼeʼel kʼumal ma yuja stoyjela bʼajex, mas lek aʼabʼajik chʼin spensarajel ke ja tuki mas ekʼxele yuja weʼnlexi, 4 yajni mi kechanuk waxa leʼawex ja jas waxa kʼanawex ja weʼnlexi, cha jachni ja jas wa skʼanawe ja tuki.

5 Aʼajyukawujilex ja junxta pensar it ajyiyuj ja Kristo Jesús, 6 ama kʼotel jastal Dyos ajyi ja yeʼn, mini tʼun ekʼ bʼa spensar bʼa oj yaʼ sbʼaj jastal Dyos. 7 Miniʼa, jaʼuktoma, ja yeʼn yaʼakan yibʼanal ja jas yiʼoji sok kʼot jastal jun moso sok pax jun kristyano.* 8 Chomajkil, yajni jak jastal winik,* chʼin yaʼa sbʼaj sok kʼuʼabʼal ajyi man chami, jachniʼa, tini cham bʼa jun poste bʼa yijel wokol.* 9 Yuja jaw, ja Dyos yaʼa bʼa jun cholal masto ekʼxel sok yayisok spetsanil skʼujol ja bʼiʼilal bʼa masto ekʼxel yuj yibʼanal ja tuk bʼiʼilali, 10 bʼa jachuk bʼa sbʼiʼil ja Jesús yibʼanale oj koʼuke mekʼan, ja matik teye bʼa satkʼinal, bʼa luʼum sok bʼa yibʼ luʼum, 11 bʼa jachuk yibʼanal oj snaʼe jaman lek ja Jesukristo kʼotel Ajwalal bʼa stoyjelal ja Tatal Dyosi.

12 Ja yujil, kala kermano jumasaʼ, jastalni tolabida akʼuʼunejex, mini kechanuk ja yajni ti ayoni, cha mastoni ja wego yuja mi teyukoni, moka waʼexkan skʼujolajel bʼa jachuk oja taʼex jawa koltajelex sok kʼulaniksok xiwelal sok skisjel lek. 13 Jastalni lek wa xyila ja Dyosi, yeʼnani ja maʼ wa sbʼutʼuwex ipal sok yeʼnani wa xyawilex ja kʼankʼunel sok ja ipal bʼa skʼulajel. 14 Jastalni mi la bʼulbʼuniyex sok mi la kʼeyex kʼumal, nochowik skʼulajel jachuk yibʼanal ja jastik junuki, 15 bʼa jachuk mini juna mulex oj tajuk, bʼa sak oj tajanik, yuntikil Dyos bʼa mey spaltaʼe ja bʼa yoj lame kristyanoʼik bʼa mi skʼulane ja bʼa jas toji sok jel maloʼe. Jaxa weʼnlexi tini wanex lijpel tiw jastal ijlabʼik xojobʼanixta ja bʼa luʼumkʼinali, 16 malan yamanawujilex tsats lek ja yaljel bʼa sakʼanili. Sok jachuk ojni ajyukuj rason bʼa oj gustoʼaxukon ja bʼa skʼakʼujil ja Kristo ja yajni oj kil mi lom ajniyon sok mi lom jel tsats aʼtijiyon. 17 Pe ama la pekʼjiyon jastal majtanal bʼa vino ja bʼa sat majtanal sok ja bʼa aʼtel bʼa Dyos ja it snikunejex skʼulajel ja skʼuʼajela wiʼojexi, wa xyaki gusto sok wani la gustoʼaxiyona mokex awibʼanalex. 18 Cha junxta ja weʼnlexi, tʼilani oj gustoʼaxanik sok oj gustoʼaxanik jmok.

19 Ja wego wa xmajlay ja bʼa Kajwaltik Jesús bʼa ojxta jekawilex ja Timoteo bʼa jachuk oj jtsatsankʼujoluk jbʼaj ja yajni xjul jbʼaj rason bʼa weʼnlex. 20 Yujni mey kiʼoj tuk bʼa jachuk jastal yeʼna, june maʼ meran wa xcham skʼujola mokex. 21 Yujni yibʼanal ja tuki jaʼ wa sleʼawe ja jas wa skʼanaweʼi sok mi jaʼuk ja bʼa Jesukristo. 22 Pe ja weʼnlexi wani xa naʼawex ke ja yeʼn sjeʼunej janekʼto chaʼanyabʼalil kʼotel, yujni aʼtiji jmok jastal jun moso ja bʼa spukjel ja lekil rasoniki, jastalni jun kerem soka stati. 23 Ja yujil, kechan pabor xkabʼ ja jas oj ekʼ jbʼaji, yeʼnani ja maʼ wa xkʼana oj jeki. 24 Sok wani xjipa jkʼujol ja bʼa Kajwaltik bʼa ojxtani cha ajyukona mokex.

25 Pe ja wego wa xkila stʼilanil oj jekawilex ja Epafrodito, ja kermano, ja koltanum sok jun soldado bʼa Kristo, ja it maʼ ajekawex bʼa oj skoltayon ja bʼa jas oj makunukuji. 26 Ja yeʼni jelni sgana oj yilexa wibʼanalex sok jelni triste ay xyabʼ yujni ja weʼnlexi awabʼyex ke maloʼaxi. 27 Ja smeranili jelni maloʼaxi sok kolxa chamuk. Jaxa Dyosi stalna syajulal;* pe mini kechanuk sok yeʼna, cha jachni sok keʼna, bʼa jachuk mixa oj ajyukuj mas tristeʼil. 28 Ja yuj wegoxta wa xjeka amokex, bʼa jachuk yajni xa wilawexi oj cha gustoʼaxanik yajkʼachil ekʼele sok mas kulanxa jkʼujol oj ajyukon. 29 Ja yuj gustoxta kʼulanik resibir jastalni waxa kʼulanex resibir ja snochumanik ja Kajwaltiki. Sok ilawik chaʼanyabʼalil ja winike jastal yeʼn, 30 yujni kolxa chamuk yuj yaʼteltajel ja Kristo,* pes bʼa oj skoltayon, xiwela sbʼaj ajyi ja sakʼanil yuja mi teyukex il bʼa oja koltayonex.