2 Juan

1 Bʼa sparte ja ansyano* sbʼaja hermana tsaʼubʼali sok sbʼaja yuntikili, ja matik meran wa xyajtaye, sok mi kechan keʼnuk, cha jachni yibʼanal ja matik kʼotel snaʼe ja smeranili. 2 Ja keʼntikoni wa xyajtayextikon yuja smeranil tey jmoktiki sok tini oj ajyuk jmoktik bʼa tolabida. 3 Ja Tatal Dyos sok ja Yunin Jesukristo oj yawekitik ja meran sjejelik it sok ja yajalkʼujolali. Ja yeʼnleʼi oj yawekitik ja lekil skʼujole mi xbʼajintiki, ja syajulal skʼujole sok ja slamanile.

4 Jelni yaki gusto yajni kabʼ ke jujuntik jawa wuntikili me xyaʼawekan ajyel ja bʼa sbʼejlalil ja smeranili, jastalni ja mandar yakitik ja Tatali. 5 Ja yuj ja wego hermana wa xpata akʼujol bʼa oj jyajta jbʼajtik soka tuk. (Mi wa stsʼijbʼanawi jun yajkʼachil mandar, wanoni stsʼijbʼajelawi jun poko mandar bʼa ajyelkujtik man skʼeʼulabʼil). 6 Jani it ja jas wa stojolan ja yajalkʼujolali: ja keʼntiki mok katikan yijel ja jsakʼaniltik jastalni wa xyala ja smandariki. Jastalni awabʼunejex man skʼeʼulabʼil, jani it ja mandari: tʼilan moka waʼexkan sjejel yajalkʼujolal. 7 Yujni sjeʼata sbʼaj jitsan loʼlanum ja bʼa luʼumkʼinali, ja it matik wa xyalawe ke ja Jesukristo mi jak jastal kristyano.* Ja it yeʼnani ja loʼlanum sok ja skontra ja Kristo.*

8 Talnabʼajik bʼa mi oja chʼayex ja jastik junuk aʼtelotikyuji sok bʼa jachuk tsʼikan lek oj ajukawilex jawa tsʼakolexi. 9 Ja maʼ mi xyiʼaj ja jastik sjeʼunej ja Kristo sok wa xjelxisok mini lek wa x-ilji yuja Dyosi. Ja maʼ mi xyaʼakan yijel ja jastik sjeʼunej ja Kristo lekni wa x-ilji yuja Tatali sok yuja Uninali. 10 Ta ay maʼ wa xkʼot ja bʼayexi sok mey yiʼoj ja sjejelik it, moka wawex ochuk ja bʼa wa najexi sok moka wawexyi dyos. 11 Yujni ja maʼ wa xyayi dyosi wani ochel alkawetoʼil ja bʼa jastik mi lek wa skʼulani.

12 Ama jelto ja jas oj jtsʼijbʼukawilexi, mini xkʼana oj jkʼuluk bʼa jun juʼun sok tinta, pes wani xmajlay oj waj kilex sok oj loʼilanukona mokex bʼa stiʼ asatex, sok jachuk jelxani gusto oj ajyanik juntiro.

13 Ja yuntikil jawa wermana, ja maʼ tsaʼubʼali, wa sjekawe akoltanel.