1 Corintios

11 Nochowik ja sjejel wa xkaʼa, jastalni wa xnocho ja sjejel yaʼa ja Kristo.

2 Wa xkʼulanex felicitar yuja waxa naʼawonex bʼa yibʼanal ja jastiki sok wanex skʼulajel yibʼanal ja jastiki jastalni jeʼawilex. 3 Pe wani xkʼana oja naʼex ke kada winik jani kʼotel yolom ja Kristo, jaxa yolom ja ixuki jani kʼotel ja winiki sok jaxa yolom ja Kristo jani kʼotel ja Dyosi. 4 Yibʼanal ja winik bʼa wa xyayi orasyon ma wa xyala ja srason ja Dyosi, pe ay jas yaʼunej ja bʼa yolomi, wani xya kʼixwuk ja maʼ kʼotel yolomi, 5 pe yibʼanal ja ixuk bʼa wa xyayi orasyon ma wa xyala ja srason ja Dyosi, pe mi smusunejuk ja yolomi, wani xya kʼixwuk ja maʼ kʼotel yolomi, pes ja ixuki lajansok joxubʼal ja yolomi. 6 Pes ta ja ixuk mi smusu ja yolomi, tʼilani kom lek oj skʼutse. Pe ta kʼixwela sbʼaj xyabʼ kom lek oj skʼuts ja stsoʼotsil yolomi ma oj sjoxe, anto tʼilani oj smuse.

7 Ja winiki mini oj smus ja yolomi, yujni kʼotel jastal splanta Dyos sok wa xchiktesyi ja stoyjelali, pe jaxa ixuki jani wa xchiktes ja stoyjelal ja winiki. 8 Yujni ja winiki mi ti el bʼa ixuk, pes ja ixuki ti el bʼa winik. 9 Chomajkil, ja winiki mi kʼulaji yuj spabor ja ixuki, pes ja ixuki kʼulaji yuj spabor ja winiki. 10 Yuja it sok yuja anjeliki, ja ixuki tʼilani oj yiʼ ja bʼa yolom jun senya bʼa sjejel ibʼ kʼabʼal ay.

11 Pe ja bʼa snochumane ja Kajwaltiki, ja ixuki mini xbʼobʼ ajyuk lekbʼi mi jaʼuk yuja winiki sok jaxa winiki mini xbʼobʼ ajyuk lekbʼi mi jaʼuk yuja ixuki. 12 Pes jastalni ja ixuk ti wa x-el bʼa winik, cha jachuk ja winiki ti wa xpojki* bʼa ixuk. Pe yibʼanal ja jastik junuki ti wa xjak bʼa Dyos. 13 Kʼulanik jusgar weʼnlex mismo: ¿sbʼej maʼ ja ixuk oj yayi orasyon ja Dyos jach mi musanuk ja yolomi? 14 Ja jastal kʼulaji ja kristyano wa sjeʼakitik kʼixwelani sbʼaj ta jun winik najat ja stsoʼotsil yolomi, 15 pe ja jastal najat ja stsoʼotsil yolom ja ixuki sbʼajni stoyjelal. Yujni ja ixuki akʼubʼalyi ja stsoʼotsil yolom bʼa oj smus sbʼaj. 16 Pe ta ay maʼ wa skʼana oj skoltay pilan kostumbre, a-snaʼ ke mini ay kiʼojtikon pilan kostumbre ja keʼntikoni sok mini ja skongregasyonik ja Dyosi.

17 Pe mi wa xkʼulanex felicitar soka tojelalik it, pes yajni waxa tsomobʼajexi, mini xa wawex el slekilal, kechani waxa jomobʼajex. 18 Pes bʼajtan, kabʼta yabʼalil ja yajni waxa tsomobʼajex jastal kongregasyon, wani xa piltalana bʼajex, sok wani xkʼuʼan tʼusan. 19 Pes seguro ojniʼa pilabʼajex jach kʼoleʼik, bʼa jachuk oj chijkajuk machtik ja bʼa weʼnlex lekni wa x-ilji yuja Dyosi.

20 Yajni waxa tsomobʼajex bʼa jun lugar, ja smeranili mini jaʼuk bʼa yabʼjel ja Cena ja Kajwaltiki. 21 Pes yajni waxa wabʼyexi, kada jujune bʼajtanxa waʼta ja bʼa och akwali. Ja yujil, yajni june waʼinto xyabʼi, ja juni yakbʼelxa. 22 ¿Yuj maʼ meyuka najex bʼa oj waʼanik sok oja wuʼex? Ma ¿waxa wijnayex ja skongregasyon ja Dyos sok waxa wawex kʼixwuk ja matik mi jas yiʼojeʼi? ¿Jasa oj bʼobʼ kalawabʼyexi? ¿Oj maʼ jkʼulukex felicitar? Mini xkʼulanex felicitar sbʼaja it.

23 Yujni ja jas ajiki bʼa Kajwaltiki jachni ka ekawilex: ke ja Kajwaltik Jesús, ja akwal oj chʼaykʼujolajuki, syama jun pan, 24 sok yajni yayi tsʼakatal ja Dyosi, xetʼa sok yala: «Ja iti jani wa senyaʼan ja jkuerpo, bʼa wa x-aji bʼa wa lekilal weʼnlex. Nochowik skʼulajel ja it bʼa oj juluka kʼujolex bʼa keʼna». 25 Yajni chʼak skʼuluke cenar,* cha junxta skʼulan soka copa sok yala: «Ja copa it jani wa senyaʼan ja yajkʼachil trato, bʼa oj kʼe stulyi ja yajni xpekʼ ja jchikʼeli. Nochowik skʼulajel ja it bʼa oj juluka kʼujolex bʼa keʼna kada ekʼele xa wuʼajex ja it». 26 Pes kada ekʼele xa weʼawex ja pan it sok xa wuʼajex ja bʼa copa it, jani wanex xcholjel sbʼaja xchamelal ja Kajwaltiki asta ke xjak ja yeʼni.

27 Ja yujil, chikan maʼ wa sweʼa ja pan ma wa xyuʼaj ja bʼa scopa ja Kajwaltiki, pe mi wa sbʼajin, ojni staʼ smul bʼa mi skisa ja skuerpo sok ja xchikʼel ja Kajwaltiki. 28 Bʼajtan a-spaklay sbʼaj sok ayil ta stojol ja jas wan skʼulajeli, sok kechan jachuk oj bʼobʼ sweʼ ja pani sok oj bʼobʼ yuʼ ja bʼa copa. 29 Ta ay maʼ mi xyaʼa sbʼaj kuenta ke ja jastik it jani wa senyaʼan ja skuerpo ja Kajwaltiki, yeʼnta mismo wan slejel ja jas oj ekʼ sbʼaj ta ti sweʼa sok yuʼaji. 30 Ja yuj jitsan bʼa weʼnlex meyuka wipex sok maloʼayex, sok jitsan wanexa jijlel ja bʼa chamelali.* 31 Pe lekbʼi wa xpaklay jbʼajtik keʼntik mismo ja jastal kʼotelotiki, mini oj kʼulajukotik jusgar. 32 Pe yajni wala kʼulajitik jusgari, ja Jyoba* wa stojowotik bʼa mi lajan oj aljuk ay jmultik soka luʼumkʼinali. 33 Ja yuj kermano jumasaʼ, yajni xa tsomobʼajex bʼa yabʼjel ja waʼelal jaw, majlabʼajik. 34 Ta ay june waʼin xyabʼ, awaʼuk bʼa snaj, bʼa jachuk mi oj kʼulajuk jusgar ja yajni xa tsomobʼajexi. Pe jaxa tuk jastik junuk wan ekʼeli, ti oj waj tojbʼes ja yajni la kʼotyoni.