Juan

3 Ajyi jun winik sbʼiʼil Nicodemo ja bʼa fariseoʼiki, jun smandaranume ja judíoʼiki. 2 Ja yeʼn akwal waj yil ja Jesusi sok yala yabʼi: «Maestro,* wa xnaʼatikon ja weʼn sjekunejakon ja Dyos jastal jun maestro, yujni ta ja Dyos mi teysok jun winik, ja winik jaw mini xbʼobʼ skʼuluk ja milagroʼik* waxa kʼulan ja weʼni». 3 Jaxa Jesús sjakʼayi: «Wa xkalawabʼ meran lek: ta june mi xpojki* yajkʼachil ekʼele,* mini xbʼobʼ yil ja sGobyerno ja Dyosi». 4 Ja Nicodemo yala yabʼi: «¿Jastal modo oj bʼobʼ pojkuk june yajni awelxa? Pes mini xbʼobʼ ochuk ja bʼa smatriz ja snani sok pojkel pilan ekʼele». 5 Jaxa Jesús sjakʼayi: «Wa xkalawabʼ meran lek: ta june mi xpojki ja bʼa jaʼi sok ja bʼa yip ja Dyosi,* mini xbʼobʼ ochuk ja bʼa sGobyerno ja Dyosi. 6 Ja jas pojkel ja bʼa kristyanoʼi* juni yunin kristyano,* sok ja jas pojkel ja bʼa yip ja Dyosi* yunini Dyosa. 7 Mok ochuka pensar yuja kalawabʼ ‹Ja weʼnlexi tʼilani oj pojkanik yajkʼachil ekʼele›. 8 Ja ikʼi wa sjuʼu chikan bʼaʼa, sok ama wa xbʼobʼa wabʼi, mini xa naʼa bʼa wa xjaka sok bʼa wa xwaja. Jachni wa x-ekʼsok yibʼanal ja maʼ pojkel ja bʼa yip ja Dyosi».*

9 Anto, ja Nicodemo sjobʼoyi: «¿Jastal oj bʼobʼ ekʼuk ja jastik jaw?». 10 Ja Jesús sjakʼayi: «Ja weʼn maestroʼa bʼa Israel, ¿jastal lek mixa naʼa ja jastik jaw? 11 Wa xkalawabʼ meran lek: wani xkalatikon ja jas wa xnaʼatikoni sok wa xcholotikon ja jas kilunejtikoni, pe ja weʼnlexi mixa kisawex ja jas wa xcholotikoni. 12 Ja keʼn kaluneja wabʼyex jastik bʼa luʼum sok ama jachuk mixa kʼuʼanex, ¿jastal oja kʼuʼukex ta kalawabʼyex jastik bʼa satkʼinali? 13 Chomajkil, mini jun winik kʼeʼel ja bʼa satkʼinali kechani ja maʼ koʼkon ja bʼa satkʼinali, ja Yunin ja Winiki.* 14 Sok jastalni ja Moisés ya kʼeʼuk bʼa poste ja bʼitsʼbʼichan yajni tey ja bʼa desierto, jachni oj cha ajuk kʼeʼuk ja Yunin ja Winiki 15 bʼa jachuk yibʼanal ja maʼ wa skʼuʼan bʼa yeʼna oj staʼ sakʼanil bʼa tolabida.

16 Yujni ja Dyosi jel syajtay ja luʼumkʼinali ja yuj yaʼa ja único* Yunini bʼa jachuk spetsanil ja maʼ wa sjeʼa skʼuʼajel bʼa yeʼn mi oj chʼaysnajel, ojni staʼ sakʼanil b’a tolabida. 17 Yujni ja Dyosi mi sjekakon ja Yunin bʼa yeʼn oj skʼul jusgar ja luʼumkʼinali, sjekanikon bʼa jachuk oj staʼ skoltajel ja luʼumkʼinal yuj yeʼna. 18 Ja maʼ wa sjeʼa skʼuʼajel bʼa yeʼna mini oj kʼulajuk jusgar. Ja maʼ mi sjeʼa skʼuʼajeli kʼulajitani jusgar, yujni mi sjeʼunejuk skʼuʼajel* ja bʼa único Yunin ja Dyosi. 19 Jani it ja rason yuja oj kʼulajuke kastigari: ja ijlabʼi jak ja bʼa luʼumkʼinali, jaxa kristyano mini syajtaye ja ijlabʼi jani syajtaye ja kʼikʼinali, yujni mi lekuk ja jastik wa skʼulaneʼi. 20 Yujni ja maʼ wa skʼulan ja jastik mi lekuki wani xyilkʼujolan ja ijlabʼi sok mi xwaj ja bʼa ijlabʼi, bʼa jachuk mi oj kʼot chiktesjuk ja jastik wa skʼulani. 21 Pe ja maʼ wa skʼulan ja bʼa jas toji wani xwaj ja bʼa ijlabʼ, bʼa oj ilxuk jaman lek ja jastik wa skʼulani akuerdoni ay soka jas wa skʼana ja Dyosi».

22 Tsaʼan, ja Jesús tixa och soka snebʼumanik ja bʼa komonik bʼa Judea, sok ti kansok jun tyempo ja yeʼnleʼi sok wan yajel yiʼ jaʼ ja kristyano.* 23 Pe ja Juani cha wani yajel yiʼ jaʼ ja kristyano ja bʼa Enón, mojan bʼa Salim, yujni ja tiwi jel ja jaʼi, jaxa kristyano wa xjakye sok wa xyiʼaje jaʼ; 24 pes yujni ja Juani mito xlutji preso.

25 Anto ja snebʼumanik ja Juan kʼeye kʼumal sok jun judío sbʼaja ajyel saki. 26 Tixa wajyeʼa sok yalawe yabʼ ja Juani: «Maestro,* kʼela, ja winik teya mok ajyi ja bʼa stiʼ jun lado ja Jordán, sbʼaja it maʼ acholo, wan yajel yiʼ jaʼ ja kristyano, sok yibʼanale wane wajel soka yeʼn». 27 Jaxa Juan sjakʼa: «Mini jun winik wa xbʼobʼ ajyukyuj jun jasunuk ta mi ti akʼubʼalukyi bʼa satkʼinal. 28 Ja weʼnlexi wajyex testigoʼil ja yajni kala ‹Mi keʼnukon ja Kristo, pes keʼn jekubʼalon bʼajtan yuja yeʼni›. 29 Ja nobioʼali yeʼnani yiʼoj ja nobiaʼali. Pe ja yamigo ja nobioʼali, yajni teysok mojan sok wa xyabʼ ja skʼumal ja nobioʼali jelni xgustoʼaxi juntiro. Ja yuj ja wego jelxani gusto ayon juntiro. 30 Ja yeʼn ojni pojxuk-el ja yaʼteli, pe ojni tsʼuj-el ja jbʼaji».

31 Ja maʼ jakum bʼa nalanchaʼani masni ekʼxel yuj yibʼanal ja tuki. Ja maʼ ti sbʼaj bʼa luʼumi wa staʼa tiʼal jastik bʼa luʼum yujni ti sbʼaj bʼa luʼum. Ja maʼ jakum bʼa satkʼinali masni ekʼxel yuj yibʼanal ja tuki. 32 Sok wani xcholo ja bʼa jas yiluneji sok yabʼuneji, pe mini maʼ wa skʼuʼan ja jas wa xcholo. 33 Ja maʼ skʼuʼunej ja jas xcholunej ja Kristo wani skʼuʼan lek* ja Dyosi tojni lek ja bʼa smeranili. 34 Pes ja maʼ sjeka ja Dyosi wani xyala ja jas wa xyala ja Dyosi, yujni ja Dyosi mi bʼisubʼaluk wa xyaʼa ja yipi.* 35 Ja Tatali wani syajtay ja Uninali sok yaʼunejyi bʼa skʼabʼ yibʼanal ja jastik junuki. 36 Ja maʼ wa sjeʼa skʼuʼajel ja bʼa Uninali ojni staʼ sakʼanil bʼa tolabida, pe ja maʼ mi kʼuʼabʼal ayuk soka Uninali mini oj yil ja sakʼanali, pes ja stajkelal ja Dyosi tolabida ti oj ajyuk soka yeʼn.