Romanos

12 Ja yuj kermano jumasaʼ, wa xpata akʼujolex yuja jastal wa snaʼa jyajaltik ja Dyosi bʼa oja waʼex jawa kuerpoʼex jastal jun majtanal bʼa sakʼan ay, bʼa sak ay sok bʼa lek xyila ja Dyosi; sok jachuk oj wa makunukex tsʼikan lek jawa pensarex bʼa yaʼteltajel ja Dyosi. 2 Sok awikxakan ja jastal wa sjomowex ja luʼumkʼinal* it; mas lek tukbʼesa bʼajex yajel tojbʼuk jawa pensarexi, bʼa jachuk weʼn mismo oja wilex jasa lek wa skʼana ja Dyosi, jasa lek wa xyila sok jasa tsʼikan wa skʼana.

3 Yuja jastal jejiki ja lekil kʼujolal mi xbʼajixi, wa xkalawabʼyex moka pensaraʼukex jel chaʼana wabʼalilex kada jujune ja weʼnlexi, mas lek pensaraʼanik bʼa jun modo a-sjeʼ tsʼikan jawa pensarexi, pe jani ja janekʼ skʼuʼajel yaʼunejawilex* ja Dyosi. 4 Yujni jastal jun kuerpoʼal ayiʼoj jitsan parteʼik pe mi junukxta ja yaʼtele kada parte, 5 cha jachuk ja keʼntiki, ama jel jitsanotik, junta kuerpoʼal kʼotelotik soka Kristo, pe kada parte naka staʼunej sbʼaj. 6 Ja yuj ay kiʼojtik tuktukil jdontik pe jani soka janekʼ jeʼubʼalkitik ja lekil kʼujolal mi xbʼajintiki. Ta jaʼ bʼa kʼotel alumanil, la jcholtik pe jani ja janekʼ skʼuʼajel akʼubʼalkitiki; 7 ta jaʼ bʼa skoltajel ja tuki, la jkʼujoluktik lek ja bʼa aʼtel it; ta ay maʼ yiʼoj ja don bʼa sjejel, a-sjeʼe; 8 ja maʼ wa stsatsankʼujolani, atsatsankʼujolanuk; ja maʼ wa xyaʼa, aya sok spetsanil skʼujol;* ja maʼ wa xtojwani, a-skʼujoluk lek;* ja maʼ wa sjeʼa yajulal kʼujol, gusto lek a-sjeʼe.

9 Mok ajyuk chabʼ kara ja syajala kʼujolexi. Ijnayik ja jas malo; moka sijpukex ja bʼa jas leki. 10 Yajtabʼajik jastal wa syajta sbʼaj jun pamilya sok yajxta ilabʼajik. Weʼnto bʼajtan jeʼawik waxa kisa bʼajex. 11 Aʼtijananik,* mok paxanik jaraganil. Kongana ajyanik yuja yip ja Dyosi.* Kʼotanik smoso ja Jyoba.* 12 Ajyanik gusto yuja smajlajeli. Akuchuka wujilex* ja yajni x-ekʼa bʼajex wokoli. Moka waʼexkan yajelyi orasyon. 13 Kʼepawikyi ja jasa wiʼojex ja matik tsaʼubʼalexa sbʼaja Dyos jastalni ja snesesida kada jujune ja yeʼnleʼi. Tolabida aʼajyuk jamana kʼujolex.* 14 Tolabida kʼanawik akoʼ slekilale ja matik wa xyiʼaja patikexi sok moka taʼex tiʼal malo.* 15 Gusto ajyanik soka matik gusto ayeʼi; okʼanik soka matik wa x-okʼyeʼi. 16 Awajuka kʼujolex ja tuki jastalni wa xwaja kʼujolabʼajex; mok wajuka kʼujolex* bʼa jastik chaʼanyabʼalil, mas lek aʼawikan a-stojex ja jastik chʼin yabʼalili. Moka kʼulabʼajex jel xa naʼawex.

17 Moka wawex stup ja tuk ja jas mi lek wa skʼulanawilexi. Aʼa tʼabʼana kʼujolex ja jas lek wa xyila yibʼanal ja kristyano. 18 Ta wa xbʼobʼi, masan ja bʼa janekʼ wa xlajxiwujilexi, ajyanik laman sok yibʼanal ja kristyano. 19 Kala kermano jumasaʼ, moka wawex stup weʼnlex ja tuki, awikan yeʼn a-sjeʼ ja stajkelal ja Dyosi. Yujni tsʼijbʼunubʼal: «‹Keʼn oj ka stupe; keʼn oj kayile kastigo›, jach wa xyala ja Jyoba».* 20 Pes «ta jawa kontra waʼin xyabʼi, makʼlay; ta takin stiʼ, ayi jas oj yuʼ; yujni ta jach akʼulan ojni awayi monton chakal kʼakʼ ja bʼa yolomi».* 21 Moka wakan oj skʼula ganar ja bʼa malo, mas lek kʼulan bʼa jastik lek bʼa skʼulajel ganar ja bʼa malo.