Marcos

3 Cha pilan ekʼele, ja Jesús och ja bʼa naʼits wa stsomo sbʼaje, jaxa tiw tey jun winik tsatsbʼel* ay june ja skʼabʼi. 2 Jaxa fariseoʼiki tojxta wa xkan skʼel-e ja Jesús bʼa oj yil-e ta oj ya tojbʼuk ja winik jaw yuja sábado sok jachuk oj sleʼeyi smul. 3 Jaxa Jesús yala yabʼ ja winik maʼ tsatsbʼel* ay ja skʼabʼi: «Kʼeʼan sok laʼ il bʼa snalan». 4 Jaxa Jesús tixa yala yabʼye: «¿Jasa wa xbʼobʼ kʼulaxuk ja bʼa sábado? ¿Skʼulajel bʼa lek, ma bʼa mi lekuk? ¿Skoltajel jun sakʼanil, ma smiljel?». Pe ja yeʼnleʼi kanye chʼabʼan. 5 Yajni ja Jesús tajkelxta chʼak skʼel ja matik tey bʼa sjoyanali sok och stristeʼil yajni yila jel chʼuʼuy ja skʼujoleʼi, tixa yala yabʼ ja winiki: «Xija jawa kʼabʼi». Yajni xija, tojbʼi ja skʼabʼi. 6 Anto tixa elye ja tiw ja fariseoʼiki sok wegoxta kʼe stsom sbʼaje soka snochumanik ja Herodes bʼa xchapjel yabʼalil smiljel ja Jesús.

7 Pe ja Jesusi tixa waj bʼa mar soka snebʼumaniki, sok nochjiyuj jun niwan nole kristyano bʼa Galilea sok bʼa Judea. 8 Sok kʼotye jun niwan nole kristyano ti sbʼaje bʼa Jerusalén, bʼa Idumea, bʼa este* bʼa Jordán sok bʼa sjoyanal ja Tiro sok ja Sidón, yujni yabʼyeta yibʼanal ja jas wa skʼulan ja Jesús. 9 Ja yuj skʼanayi ja snebʼumaniki axa yaʼe chapan jun yal chʼin barko bʼa jachuk mi oj tʼenjuk yuja kristyano jumasaʼ. 10 Yuja jelxa maʼ yaʼunej tojbʼuki, spetsanil ja matik ayiʼoje jun tsatsal chameli wa stʼentalaʼan sbʼaje ja bʼay ja Jesús bʼa oj staʼe yamjel. 11 Asta ja pukujiki* wa xkoye mekʼan bʼa stiʼ sat ja yajni wa xyilaweʼi, sok wa x-awaniye: «¡Weʼnani ja Yunin ja Dyosi!». 12 Pe jitsan ekʼele komjiye lek yuja Jesús bʼa mok maʼ yal-e yabʼ machunkiluk ja yeʼni.

13 Tixa kʼe bʼa jun wits sok sjeka spayjel ja matik stsaʼa, jaxa yeʼnleʼi stsomo sbʼajesok. 14 Anto tixa stsaʼa* jun tsome bʼa 12 winike, ja yeʼn ya sbʼiʼiluk jekabʼanumik. Ja yeʼnleʼi oj smojtaye ekʼe sok oj jekjuke bʼa oj wajuke xcholjel 15 sok oj ajukyile ja ipal bʼa oj yawe eluk ja pukujiki.

16 Ja bʼa 12 matik stsaʼa tey ja Simón (ja maʼ cha ya sbʼiʼiluk Pedro), 17 ja Santiago soka yermano Juan, ja yuntikil ja Zebedeo (ja yeʼnle cha aji sbʼiʼiluke Boanerges, wa stojolan «yuntikil chawuk»), 18 ja Andrés, ja Felipe, ja Bartolomé, ja Mateo, ja Tomás, ja Santiago ja yunin ja Alfeo, ja Tadeo, ja Simón ja Cananita* 19 sok ja Judas Iscariote (ja maʼ xchʼaykʼujolan tsaʼan ja Jesús).

Tsaʼan, ja Jesús tixa och bʼa jun naʼits, 20 sok pilan ekʼele cha stsomo sbʼaj jitsan kristyano, jaxa yeʼnle mixa x-ajiyile tyempo bʼa oj waʼuke. 21 Yajni ja spamilya yabʼye ja jas wan ekʼeli, ja yeʼnle waj sleʼe bʼa oj yiʼe oche, yujni wa xyalawe: «Kʼeta slokoʼil». 22 Jaxa jeʼumanik bʼa leyi bʼa ti elyekon bʼa Jerusalén wa xyalawe: «Ja yeʼn ochel sbʼaj ja Satanás.* Wani xya eluk ja pukujik yuj spabor ja yajwalil ja pukujiki». 23 Pe ja yeʼn yala amojxukejani sok ya makunuk slajelalik ja bʼa sloʼili. Yala: «¿Jastal modo ja Satanás yeʼnta wa xbʼobʼ ya eluk ja Satanás? 24 Yujkʼa jun gobyerno wa xkʼe tiro ja swinkili sok wa spila sbʼaj, mini oj bʼobʼ ajyuk tekʼan. 25 Sok yujkʼa jun pamilya wa xkʼe tiro ja swinkili sok wa spila sbʼaj, mini oj bʼobʼ ajyuk tekʼan. 26 Junxta soka it, ta ja Satanás yeʼnxta wa xtiroʼani smok sok wa spila sbʼaj, mini oj bʼobʼ ajyuk tekʼan sok ojni chʼayuk. 27 Chomajkil, ta ay ma’ wa x-och ja bʼa snaj jun winik jel ja yipi bʼa yelkʼajelyi ja jastik sbʼaji, bʼajtan tʼilani oj smoch ja winiki. Kechan jachuk oj bʼobʼ elkʼanuk ja bʼa snaji. 28 Ja keʼn wa xkalawabʼyex: ja winikeʼi ojni ajuke perdon yuj chikan jas tikʼe mulal xkoye sok chikan jas tikʼe kʼumanel kistal* xyalawe. 29 Pe chikan maʼ xkʼumani kistal sbʼaja yip ja Dyosi* mini nunka oj ajuk perdon. Ojni ajyuk smul bʼa tolabida». 30 Ja it yala yujni ja yeʼnle wa xyalawe: «Ja yeʼn ochel sbʼaj jun pukuj».*

31 Anto ti kʼotye ja snan sok ja yermanoʼik ja Jesús, pe ti kanye bʼa juera sok ay maʼ sjekawe bʼa oj spaye. 32 Jitsan kristyano ti kulane bʼa sjoyanal ja yeʼn. Ja yeʼnle yalawe yabʼi: «¡Kʼela! Jawa nan soka wa wermanoʼiki teye bʼa juera sok wa spayawa». 33 Pe ja yeʼn sjakʼayile: «¿Machunkiluk ja jnan sok ja kermanoʼiki?». 34 Ja yeʼn ti skʼela ja matik ti kulane bʼa sjoyanali sok ti yala’a: «¡Kʼelawik! ¡Yeʼnleni ja it ja jnan soka kermanoʼiki! 35 Yibʼanal ja maʼ wa skʼulan ja jas wa skʼana ja Dyosi yeʼnani ja kermano, ja kermana sok ja jnani».