1 Juan

5 Yibʼanal ja maʼ wa skʼuʼan ke ja Jesús yeʼn ja Kristoʼi kʼotelni yunin Dyos. Sok spetsanil ja maʼ wa syajtay ja Tatal Dyosi cha wani syajtay ja yuntikil ja Dyosi. 2 Sok yuja it wa xnaʼatik ke wani xyajtaytik ja yuntikil ja Dyosi: jani ta wa xyajtaytik ja Dyos sok wa xkʼuʼantik ja smandariki. 3 Jani it ja jas wa stojolan ja syajal skʼujol ja Dyosi: la jkʼuʼuktik ja smandariki; sok jaxa smandariki mini jun kargaʼuk, 4 yujni yibʼanal ja maʼ kʼotel yuntikil ja Dyosi wani skʼulan ganar ja luʼumkʼinali. Sok jani jkʼulunejtik ganar ja luʼumkʼinal soka it: jani soka skʼuʼajel kiʼojtiki.

5 ¿Machun wa xbʼobʼ skʼul ganar ja luʼumkʼinali? ¿Mi maʼ jaʼuk ja maʼ wa skʼuʼan ke ja Jesús yeʼn ja Yunin ja Dyosi? 6 Yajni jak ja Jesús, ajyi chikʼ sok jaʼ. Sok mi kechanuk ajyi jaʼ, cha ajyini chikʼ. Jaxa yip ja Dyosi* wa xchiktes ja it yujni ja it wa xyala ja smeranili. 7 Yujni oxwane ja maʼ wa xcholo: 8 ja yip ja Dyosi,* ja jaʼi sok ja chikʼi, sok akuerdoni aye yoxwanile.

9 Ja keʼntiki wani xkisatik ja jas wa xcholowe ja winikeʼi, pe mastoni ekʼxel ja jas wa xcholo ja Dyosi. Yujni jaʼ it ja jas wa xcholo ja Dyosi: ja jas xcholo sbʼaja Yunini. 10 Ja maʼ wa skʼuʼan sbʼaja Yunin ja Dyosi tini ay bʼa skʼujol ja jas cholubʼal yabʼ yuja Dyosi. Ja maʼ mey yiʼoj skʼuʼajel bʼa Dyosi wan yajel och jastal jun leʼa abʼal, yujni mito skʼuʼan ja jas xcholo ja Dyos sbʼaja Yunini. 11 Sok jani it ja jas cholubʼali: ja Dyosi yakitik sakʼanil bʼa tolabida, sok wa x-ajikitik ja sakʼanil it yuj spabor ja Yunini. 12 Ja maʼ wa skʼulan aseptar ja Uninali ayiʼoj ja sakʼanil jaw; ja maʼ mi skʼulan aseptar ja Yunin ja Dyosi mey yiʼoj ja sakʼanil jaw.

13 Wa stsʼijbʼanawilex ja jastik it bʼa jachuk oja naʼex ke aya wiʼojex sakʼanil bʼa tolabida, ja weʼnlex matik waxa kʼuʼanex ja bʼa sbʼiʼil ja Yunin ja Dyosi. 14 Ja keʼntiki wani xjipa jkʼujoltiksok ja yeʼn,* ke wani xbʼobʼ jkʼantikyi chikan jasa bʼa akuerdo ay soka jas wa skʼana sok jaxa yeʼni wani smaklayotik. 15 Sok ta wa xnaʼatik ke ja yeʼn wa smaklayotik yajni wa xkʼanatikyi chikan jasa, wani xnaʼatik ojni ajukitik ja jas wa xkʼanatiki pes yujni yeʼn jkʼanunejtikyi.

16 Ta ay maʼ kʼot yil ja yermano wan slejel jun mulal bʼa mi x-ikʼwani bʼa chamelal, anto ja yeʼn tʼilani oj skʼan bʼa orasyon yuj yeʼna, sok jaxa Dyosi oj yayi sakʼanil. Pe ja it jani sbʼaja matik mi sleʼawe jun mulal bʼa mi x-ikʼwani bʼa chamelal. Ayni jun mulal bʼa wa x-ikʼwani bʼa chamelal. Sok ja keʼn wa xkala yabʼ mokni skʼan ja bʼa tikʼe mulal jaw. 17 Yibʼanal ja bʼa jas mi tojuki kʼotelni mulal, pe ayni jun mulal bʼa mi x-ikʼwani bʼa chamelal.

18 Ja keʼntiki wani xnaʼatik chikan maʼ kʼotel yunin Dyos mini sleʼa smul, pes jani wa xtalnaji* yuja Yunin ja Dyosi, sok jaxa Maʼ jel malo mini jas wa xbʼobʼ skʼulyi. 19 Wani xnaʼatik ke ja keʼntiki ti jakelotik bʼa Dyos, pe yibʼanal ja luʼumkʼinali tey bʼa skʼabʼ ja Maʼ jel malo. 20 Sok wani xnaʼatik ke jakni ja Yunin ja Dyosi, sok yaʼunejkitik biboʼil* bʼa oj kʼot jnatik sbʼaj ja maʼ kʼotel smeranili. Sok lajani aytik soka maʼ kʼotel smeranil stsʼakatal yuja Yunini, ja Jesukristo. Sok yeʼnani ja Dyos smeranili sok ja sakʼanil bʼa tolabida. 21 Kala kuntikil, talnabʼajik soka kʼulubʼal dyosiki.