Colosenses

1 Bʼa sparte ja Pablo, sjekabʼanum ja Kristo Jesús yuja jach wa skʼana ja Dyosi, sok bʼa sparte ja kermanotik Timoteo 2 sbʼaja matik tsaʼubʼalexa sbʼaja Dyos sok ja kermanotik bʼa toj aye teye bʼa Colosas bʼa lajan aye soka Kristo:

Ja jTatik Dyos ayawilex ja lekil skʼujol mi xbʼajintik sok ja slamanili.

3 Tolabida wa xkatikonyi tsʼakatal ja Dyosi, ja sTat ja Kajwaltik Jesukristo, ja yajni wa xkatikonyi orasyon yuj weʼnlex, 4 yujni kabʼunejtikon ja skʼuʼajela wiʼojex bʼa Kristo Jesús sok ja janekʼto waxa yajtayex ja matik tsaʼubʼalexa sbʼaja Dyosi 5 yuja smajlajel pilubʼalxawilex ja bʼa satkʼinali. Ja weʼnlexi awabʼyexta sbʼaja smajlajel it stsʼakatal yuja rason bʼa smeranili, ja lekil rasonik 6 kʼota abʼajexi. Jastalni wan satinel ja lekil rasonik sok wan spukjel sbʼaj bʼa yibʼanal ja luʼumkʼinali, cha jachni wan bʼa weʼnlex man skʼakʼujila wabʼyex sok anaʼawex stojolil lek jastal kʼotel meran ja lekil skʼujol mi xbʼajintik ja Dyosi. 7 Ja jaw ja jasa nebʼawex stsʼakatal ja Epafras, ja kala mojtik mosoʼil sok tojil yaʼtijum ja Kristo bʼa aʼtiji bʼa jpartetikon. 8 Ja yeʼn cha yalakabʼtikon sbʼaja syajala kʼujolex ja bʼa jastal wala taxyex soka Dyosi.*

9 Ja yujil, man kʼakʼu kabʼtikon sbʼaja jaw, mi kaʼunejtikonkan yajelyi orasyon yuj weʼnlex sok skʼanjel aʼajyukawujilex ja meran snajelil ja bʼa jas wa skʼana sok meran biboʼil sok ja yabʼjel stojolil wa xyaʼa ja yip ja Dyosi, 10 b’a jachuk oj ajyanik b’a jun modo oj yayi stoyjel ja Jyoba* sok jachuk oja wawex gustoʼaxuk b’a spetsanil malan wanex satinel bʼa yibʼanal ja jas lek waxa kʼulanexi sok wanex kʼiʼel ja bʼa meran snajelil bʼa Dyosi. 11 Cha wani xkʼanatikon ke ja weʼnlexi oj tsatsankʼujolajanik sok yibʼanal ja ipal wa xmakuni bʼa jachuk oj kuchukawujilex yibʼanal sok pasensya sok gustoʼil yuja yip mey stikʼanili, 12 malan wanex yajelyi tsʼakatal ja Tatali, bʼa xchapunejex oj ochanik kuenta ja bʼa sdoteʼe ja matik tsaʼubʼalexa sbʼaja Dyos teye bʼa ijlabʼi.

13 Yeʼn ya elkotik libre ja bʼa yipalil ja kʼikʼinali sok ti yiʼajotik ja bʼa sgobyerno ja Yunin jel syajtayi, 14 stsʼakatal yuj yeʼna eltikta libre yuja stsʼakol stupu,* jani akʼubʼal perdon ja jmultiki. 15 Ja yeʼn jani splanta ja Dyos mi x-ilxi, ja bʼajtan uninal bʼa yibʼanal ja kʼulbʼeniki; 16 pes stsʼakatal yuj yeʼna yibʼanal ja jastiki kʼot kʼulaxuk ja bʼa satkʼinali sok ja bʼa luʼumi, ja jastik wa x-ilxi sok ja jastik mi x-ilxi, ama tronoʼik, mandarik, gobyernoʼik ma matik ay xchole. Yibʼanal ja tuk jastik junuki kʼulubʼal stsʼakatal yuj yeʼna sok sbʼa yeʼna. 17 Chomajkil, ja yeʼn tixani ay bʼajtantoyuj oj ajyuk yibʼanal ja tuk jastik junuki, sok yuj yeʼna bʼobʼ ajyuk yibʼanal ja tuk jastik junuki, 18 sok yeʼnani kʼotel olomal ja bʼa kuerpoʼali, bʼa jani ja kongregasyon. Yeʼnani ja skʼeʼulabʼili, yeʼnani kʼe bʼajtan ja bʼa chamwinikeʼi, bʼa jachuk yeʼn oj ajyuk bʼajtan bʼa yibʼanal; 19 yujni ja Dyosi lek yila oj ya ajyuk tsʼikan lek bʼa Kristo yibʼanal ja jastiki 20 sok yuj yeʼna oj yaʼ kulansok yibʼanal ja tuk jastiki, tanto soka jastik bʼa luʼum soka jastik bʼa satkʼinal, yajel kujlajuk ja lamanil yuja xchikʼel spekʼa ja bʼa poste bʼa yijel wokoli.*

21 Chomajkil, ajyi jun tyempo ja weʼnlexi mi lajan ajyiyex soka Dyosi sok skontraʼexni yujni ja’ wajela kʼujolex skʼulajel ja jastik malo, 22 pe ja wego yaʼatakan bʼa oja waʼex kulansok yuja skuerpo ja it maʼ chami, bʼa sak oj yaʼex ja bʼa stiʼ sati, meya paltaʼilex sok mi jas oj lejuka mulex. 23 Pe jaʼitani ta ti ajyiyex bʼa skʼuʼajeli, ajyel tsʼunan lek sok tsats lek ja bʼa skujlayubʼili, mi oja waʼexkan ay maʼ oj spilex sbʼaja smajlajel bʼa lekil rasonik awabʼyexi sok cholubʼal bʼa yibʼanal ja kʼulbʼenik tey bʼa yibʼel ja satkʼinali. Ja keʼn ja Pablo, kʼotyon aʼtijum ja bʼa lekil rasonik jaw.

24 Ja wego jel xyaki gusto yuja wanon yijel wokol yuj weʼnlex sok wanon yijel wokol jastal Kristo, pe mitoni stsʼikwikuj ja wokolik jaw yuja skuerpo ja Kristo, wa xkʼan alxuk, ja kongregasyoni. 25 Kʼotyon aʼtijum ja bʼa kongregasyon it jastalni ja cholal yaki ja Dyos bʼa wa lekilal weʼnlex bʼa xcholjel tsʼikan lek ja yabʼal ja Dyos, 26 b’a tini chʼikan ja jas jel chaʼanyabʼal jak bʼa Dyosi* bʼa ajyi nakʼan ja bʼa jastal tax ja tyempoʼik* ekʼtajani sok ja bʼa lame kristyano ekʼelxajani. Pe ja wego chiktesjitayi ja matik stsaʼunejxa, 27 ja Dyos skʼana oj yaʼ snaʼ ja matik stsaʼunejxa ja jas jel chaʼanyabʼal wa xjak bʼa yeʼni, ja it jas jel chaʼanyabʼalil ja bʼa chonabʼiki. Ja it jas jel chaʼanyabʼal jakel bʼa Dyosi* jani ja Kristo bʼa lajan aya mokex, ja smajlajel sbʼaja stoyjel ja yeʼn. 28 Yeʼnani ja maʼ wantik xcholjeli, yajelyi julskʼujol spetsanil ja luʼumkʼinal sok sjejelyi spetsanil ja luʼumkʼinal sok meran biboʼil, bʼa jachuk ja keʼntiki oj katik bʼa stiʼ sat ja Dyos yibʼanale ja kristyano jastal snochumanik Kristo bʼa takʼanexa. 29 Yuja it tsats lek wanon aʼtel, kongana wanon skʼulajel luchar soka skoltanel ja yip wa xyakiʼi.