Hebreos

6 Ja yujil, yuja jkʼuʼunejtikxa ja bʼajtanik sjejelik sbʼaja Kristo, laxa jkʼujoluktik bʼa yajel tsatsbʼuk ja skʼuʼajel kiʼojtiki.* Sok mokxa la katik ochuk yajkʼachil ekʼele ja skujlayubʼili, wa xkʼan kaltik, ja sutxel jkʼujoltik sbʼaja jastik mi xmakuni, ja skʼuʼajel bʼa Dyos, 2 ja sjejelik sbʼaja yijel jaʼi, ja yajel kajan ja jkʼabʼtiki, ja sakʼwelale ja chamwiniki sok ja kʼulwanel jusgar bʼa mi xtukbʼi.* 3 Jani it ja jas oj jkʼuluktik, ta jach skʼana ja Dyosi.

4 Pes ja matik jun ekʼele skʼulane resibir ja ijlabʼi, yabʼye ja majtanal* jakel bʼa satkʼinali, skʼulane resibir ja yip ja Dyosi* 5 sok yabʼye ja lekil yabʼal ja Dyos sok ja yipalil ja jastal wa xtax ja tyempo* jakumi 6 pe sjitsa sbʼaje ja bʼa skʼuʼajeli, ja yeʼnleʼi mini oj bʼobʼ ajuk kumxuke yajkʼachil ekʼele bʼa oj sutxuk skʼujole, pes yujni yeʼnle mismo wa stsʼapaweyi sklaboʼil yajkʼachil ekʼele bʼa poste ja Yunin ja Dyosi sok wa xyawe kʼixwuk bʼa stiʼ sat ja kristyano. 7 Yujni ja luʼumi wa x-aji koʼyi slekilal yuja Dyos yajni wa xyuʼaj ja jaʼ tikʼan wa xkoʼ sbʼaji sok tsaʼan wa xkʼi sbʼaʼal bʼa wa xyawe el slekilal ja matik wa stsʼunuweʼi. 8 Pe ta wa xyaʼa kʼiʼixaltik sok mal kʼulik, mini xkisji sok ojxta tajuk tiʼal malo,* sok tsaʼan oj tsikjuk.

9 Pe kala kermano jumasaʼ, ama jach wala kʼumanitikon, wani xkʼuʼantikon lek ke sbʼaja weʼnlexi ay jastik masto lek, jastik wa x-ikʼwani bʼa stajela koltajelex. 10 Pes tojni kʼotel ja Dyosi sok mini xchʼay skʼujol ja jastik waxa kʼulanexi sok mini ja syajala kʼujolex wa jeʼawex yuja sbʼiʼili ja yajni akoltunejex ja matik tsaʼubʼalexa sbʼaja Dyosi sok mixa waʼawexkan skoltajel. 11 Pe wa xkʼanatikon ke kada jujune ja weʼnlexi jeʼawik ja junxta jastal jaw waxa kʼujolanexi bʼa jachuk seguro lek oj bʼobʼa majlayex man xchʼakulabʼil ja jas wanex smajlajeli, 12 bʼa jachuk mi oj paxanik jaraganil, pes jani oja noch-ex ja matik wa sbʼajine ja jastik kʼapubʼal stsʼakatal yuja skʼuʼajel yiʼoje sok ja spasensyaʼe.

13 Pes yajni ja Dyos skʼapayi ja Abrahán, yeʼnxta ya och sbʼaj testigoʼil, pes mini maʼ wa xbʼobʼ ya och testigoʼil yujni mey pilan mas ekʼxel yuja yeʼn. 14 Yala yabʼi: «Meran lek ojni ka koʼuka lekilal sok jelni oj ka jitsanbʼanan». 15 Ja yujil, yajni ja Abrahán ajyitayuj spasensya, tixa aji kʼotyi ja skʼapjelal jaw. 16 Yujni ja winikeʼi wa xyawe och testigo june maʼ masto ekʼxel yuja yeʼnleʼi, jaxa yuja jas wa skʼapawe wa xya kʼot tikʼan ja kʼumali, pes yujni soka skʼapjelal it wa xchiktese ke merani lek ja jas wa xyalaweʼi. 17 Junxtani soka it, yajni ja Dyos yala oj xchiktesyile mas jaman lek ja matik oj sbʼajuke ja skʼapjelal it bʼa mini xtukbʼi ja jas wa skʼana,* ja yeʼn ya staʼ yip ja skʼapjelal jaw. 18 Ja yeʼn skʼulan bʼa jachuk stsʼakatal yuja chabʼ jasunuk mi xtukbʼiʼi sok sbʼaja jas mini nunka wa sleʼa abʼal ja Dyosi, ja matik jpakunejtik ajnel ja bʼa koltaneli la jtsatsankʼujoluk jbʼajtik bʼa mi oj katikan ja smajlajel tey bʼa stiʼ jsatiki. 19 Ja smajlajel kiʼojtik it bʼa tsʼunan ay lek sok yij ay lek jach jastal jun ancla* ja bʼa jsakʼaniltiki sok wa x-och ja bʼa lugar tey bʼa pilan lado ja bʼa kortina. 20 Ja Jesús och ja tiw bʼa jkoltajeltik, sjamakitik sok xchapakitik ja bʼeji. Ja yeʼn kʼotelni jun mero olomal sacerdote bʼa tolabida jastalni ja Melquisedec.