1 Juan

4 Kala kermano jumasa’, moka kʼuʼukex chikan jas rason alubʼal,* mas lek awik och probar ja rasonik alubʼali bʼa yiljel ta ti jakel bʼa Dyos, yujni sjeʼata sbʼaj jitsan alumanik mi meranuk ja bʼa luʼumkʼinali.

2 Jach jastal it oj bʼobʼa naʼex ta ja rason alubʼali* ti jakel bʼa Dyos: spetsanil ja rason alubʼal bʼa wa xchiktes ke ja Jesukristo jak jastal kristyano* tini jakel bʼa Dyos. 3 Pe chikan jas rason alubʼal* bʼa mi xchiktesji ja Jesusi mini ti jakeluk bʼa Dyos. Ja rason jaw alubʼali tini jakel bʼa skontra ja Kristo* ja it awabʼyex oj jakuki sok tixa ay ja bʼa luʼumkʼinali.

4 Kala kuntikil, ja weʼnlexi ti jakelex bʼa Dyos sok akʼulunejex ganar ja yeʼnleʼi* yujni ja maʼ lajan aya mokexi masto niwan ke yuja maʼ lajan ay soka luʼumkʼinali. 5 Ja yeʼnleʼi tini jakele bʼa luʼumkʼinal; ja yuj wa xyalawe ja jastik ti wa xjak bʼa luʼumkʼinali sok wa xmaklajiye yuja luʼumkʼinali. 6 Ja keʼntiki tini jakelotik bʼa Dyos. Ja maʼ wa xkʼot snaʼ sbʼaj ja Dyosi wani smaklayotik; ja maʼ mi ti jakeluk bʼa Dyosi mini smaklayotik. Jach wa xkʼot jnatik ja stukil yiʼoj ja rason alubʼal* bʼa kʼotel smeranili sok ja bʼa mi smeraniluki.

7 Kala kermano jumasaʼ, mok katikan syajtajel jbʼajtik, yujni ti jakel bʼa Dyos ja yajalkʼujoli, sok spetsanil ja maʼ wa xyajtani kʼotelni yunin Dyos sok wa snaʼa sbʼaj ja Dyosi. 8 Ja maʼ mi xyajtani mitoni xkʼot snaʼ sbʼaj ja Dyosi, yujni ja Dyosi yajalkʼujolal. 9 Jach jastal it kʼot chiktesjuk ja syajal skʼujol ja Dyos sbʼaja keʼntiki: ja Dyosi sjekakon ja único Yunin ja bʼa luʼumkʼinali bʼa jachuk oj jtatik ja sakʼanil yuj yeʼna. 10 Jani it ja jas wa stojolan ja yajalkʼujolali: mi yuj keʼn jyajtunejtik ja Dyosi, pes yeʼnani syajtayotik sok sjekakon ja Yunin jastal jun majtanal yuja jmultiki bʼa yajel kulan soka yeʼn.

11 Kala kermano jumasaʼ, ta jach syajtayotik ja Dyosi, anto ja keʼntiki cha obligadoni aytik bʼa syajtajel jbʼajtik. 12 Mini june maʼ yilunej ja Dyosi. Ta mi xkaʼatikan syajtajel jbʼajtik, tini oj ajyuk jmoktik ja Dyosi sok jaxa syajal skʼujoli wani xkʼot ajyuk tsʼikan bʼa keʼntik. 13 Sok jani it yuja wa xnaʼatik lajan ayotik soka yeʼn sok jaxa yeʼn lajani ay jmoktik: yujni ja yeʼn yaʼunejkitik ja yipi.* 14 Chomajkil, keʼntik mismo kilunejtik ke ja Tatali sjekakon ja Yunin jastal koltanum ja bʼa luʼumkʼinali sok wa xcholotik sbʼaja jaw. 15 Ta ay maʼ wa xyala jaman lek ke ja Jesús yeʼn ja Yunin ja Dyosi, ja Dyosi wa x-ajyi lajan soka yeʼn sok jaxa yeʼn wa x-ajyi lajan soka Dyosi. 16 Sok ja keʼntiki kʼotel jnatik sbʼaj ja syajal skʼujol yiʼoj jmoktik ja Dyosi sok wani xkʼuʼantik ja bʼa yajalkʼujolal jaw.

Ja Dyosi yajalkʼujolal, sok ja maʼ wa x-ajyi ja bʼa yajalkʼujolali lajani ay soka Dyosi, jaxa Dyosi lajani wa x-ajyi soka yeʼni. 17 Jach jastal it kʼotel ajyel tsʼikan bʼa keʼntik ja yajalkʼujolali bʼa jachuk ja bʼa tyempo yajni xkʼulwani jusgar ja Dyosi oj bʼobʼ kʼumanukotik sok mini tʼun xiwel, pes yujni jastal kʼotel ja Jesukristo, cha jachni kʼotelotik ja keʼntik ja bʼa luʼumkʼinal it. 18 Ja maʼ wa syajtay ja Dyosi mini xiwi. Ja yajalkʼujol bʼa tsʼikan ayi mini xyaʼakan bʼa oj xiwkotik, pes yajni ay maʼ wa xiwi wani xtimji* yuja xiweli. Ja smeranili, ja maʼ wa xiwi mitoni tsʼikanuk ja syajal skʼujoli. 19 Ja keʼntiki wala yajtanitik yujni yeʼn syajtayotik bʼajtan.

20 Ta ay maʼ wa xyala «Ja keʼn wa xyajtay ja Dyosi» pe wa xyilkʼujolan ja yermano, juni leʼa abʼal. Pes yujni ja maʼ mi syajtay ja yermano, ja maʼ wa xyila, mini xbʼobʼ syajtay ja Dyosi, ja maʼ mi xyila. 21 Sok yaʼunejkitik ja mandar iti: ke ja maʼ wa syajtay ja Dyosi cha tʼilani oj syajtay ja yermano.