2 Corintios

8 Kermano jumasaʼ, ja wego wa xkʼana oja naʼex sbʼaja lekil skʼujol mi xbʼajintik ja Dyos bʼa jeʼubʼalyile ja kongregasyonik bʼa Macedonia. 2 Yajni wan ekʼel jun tsatsal prueba bʼa jelni yiʼaje wokol, ama jelni pobreʼe, gustoxtani yaʼawe ja jastik yiʼojeʼi. Ja it xchiktes jelni jaman skʼujole. 3 Pes keʼnani kʼotelon testigo ke yaʼawe ja janekʼ bʼobʼyujileʼi, sok mastoni yaʼawe ja bʼa janekʼ lajxiyujileʼi. 4 Ja yeʼnleʼi skʼapa sbʼaje, pes tarega spatawe jkʼujoltikon bʼa oj katikonyile ja cholal bʼa oj yaʼe sok spetsanil skʼujole sok jachuk oj koltanuke ja bʼa aʼtelik bʼa skoltajel ja matik tsaʼubʼalexa sbʼaja Dyosi. 5 Sok ja yeʼnleʼi mastoni yaʼawe ja bʼa janekʼ wa xmajlaytikon ajyi, pes skʼujolane sok spetsanil skʼujole bʼa yaʼteltajel ja Kajwaltiki, sok skoltayotikone jastalni wa skʼana ja Dyosi. 6 Ja yuj jkʼanatikonyi pabor ja Tito bʼa achʼak stsom ja donasyonik awaʼawex sok spetsanila kʼujolexi, yujni yeʼn stuluyi ja aʼtel it. 7 Ja yujil, ja weʼnlexi jel jitsana wiʼojex ja bʼa jastik it, jastalni jela wiʼojex skʼuʼajel, jel xa naʼawex kʼumal, jela wiʼojex snajel, jelxa kʼujolanex sok jela yajtaniyex jastalni wa xyajtayextikon ja keʼntikoni, cha jeʼawik jamana kʼujolex ja yajni xa waʼawex sok spetsanila kʼujolexi.

8 Sok ja it mi wanukon yajelawilex jun mandar, wanoni yaljela wabʼyex bʼa oja wilex ja jastal jel skʼujolane ja tuki sok yajel och probar ta meran wala yajtaniyex. 9 Yujni ja weʼnlexi waxa naʼawex ja lekil skʼujol mi xbʼajintik ja Kajwaltik Jesukristo: ama ja yeʼn jelni riko ajyi, pax pobreʼil yuj weʼnlex, bʼa jachuk oj kʼotanik riko stsʼakatal yuja spobreʼili.

10 Wani xkalawabʼyex ja jas wa xpensaraʼan sbʼaja it. Ja it sbʼajni wa lekilalex, pes ayxani jun jabʼil kʼeyex soka aʼtel it; asta ajeʼawex jel xa kʼana oja kʼulukex. 11 Ja yuj chʼakawik ja aʼtel kʼe atulexi, sok jachuk ja janekʼ oja waʼex ja bʼa janekʼ wa xlajxiwujilexi oj sjeʼ ja jastal jel puesto ayexi. 12 Yujni ta puesto ay bʼa yajel june, ja jas wa xyaʼa jelni lek xyila ja Dyosi, ja yajni wa xyaʼa ja bʼa jas yiʼoji sok mi jaʼuk ja bʼa jas mey yiʼoji. 13 Mi yuj wa xkʼana oj kawilex jun karga ja weʼnlexi sok jaxa tuki oj ka koyile. 14 Ja jas wa xkʼana jani junxta yabʼalil akanuk: ja jas wa xkanawujilex sobra ja wego oj stsʼiktes ja jas wa skʼanayujile ja yeʼnleʼi, sok jachuk ja jas wa xkanyujile sobra ja yeʼnleʼi cha oj stsʼiktes ja jas wa skʼanawujilexi, sok bʼa jachuk junxta yabʼalil oj ajyuk. 15 Jastalni tsʼijbʼunubʼal: «Ja maʼ jel jitsan yiʼoj ajyi mini kanyuj sobra, sok jaxa maʼ tʼusan yiʼoji mini skʼulanyuj palta».

16 Wa xkatikonyi tsʼakatal ja Dyos yuja yayi bʼa skʼujol ja Tito ja junxta meran chamkʼujolal jastalni wa xkabʼtikon ja keʼntikon bʼa weʼnlex. 17 Yujni skʼulunej ja jas kaltikon yabʼi, pe cha jelni skʼana skʼulajel ja jas jkʼanunejtikonyi pabori, ja yuj skʼapa sbʼaj oj waj yulatayex. 18 Sok jekatikonsok ja hermano maʼ jel xtoyji bʼa yibʼanal ja kongregasyoniki yuja jas wa skʼulan sbʼaja lekil rasoniki. 19 Sok mi kechanuka jaw; ja yeʼn cha tʼoji yuja kongregasyoniki bʼa oj smojtayotikon ja bʼa jbiajetikoni. Sok jachuk oj kiltikon ja donasyonik akʼubʼal sok spetsanil kʼujolal bʼa stoyjel ja Kajwaltiki sok bʼa sjejel jastal puesto aytikon bʼa koltanel. 20 Sok jachuk mi maʼ oj sloʼiltayotikon ja jastal wantikon yiljel ja koltanel it akʼubʼal sok spetsanil kʼujolal. 21 Yujni ‹wa xkʼujolantikon bʼa toj oj jkʼuluktikon yibʼanal* pe mi kechanuk ja bʼa stiʼ sat ja Jyoba,* cha jachni ja bʼa stiʼ sat ja kristyano›.

22 Chomajkil, cha wa xjekatikonsoke pilan kermanotik, ja maʼ tikʼanxta kaʼunejtikon och probari sok sjeʼunej jel skʼujolan bʼa tuktukil jasunuk. Pe ja wego mastoni oj skʼujoluk yujni wa sjipa lek skʼujola mokex. 23 Pes ta ay maʼ wa skʼulan dudar sbʼaja Tito, naʼawik yeʼnani ja jmoji sok jun koltanum wa x-aʼtiji bʼa wa lekilal weʼnlex. Ma yujkʼa ay maʼ wa skʼulan dudar sbʼaja kermanotik jumasaʼ, naʼawik kʼoteleni jekabʼanumik ja bʼa kongregasyoniki sok wa xyaweyi stoyjel ja Kristo. 24 Ja yujil, jeʼawik waxa yajtayex ja yeʼnleʼi sok jeʼawikyi ja kongregasyonik jas yuj wa xtoyowextikoni.