Romanos

5 Ja yujil, yuja alubʼal kʼotelotikxa toj yuja skʼuʼajel kiʼojtiki, la kabʼtik stsamalil ajyel laman* soka Dyosi yuja Kajwaltik Jesukristo, 2 stsʼakatal yuja skʼuʼajel kiʼojtik bʼa yeʼni, jamjitakitik ja bʼeji bʼa jachuk ja keʼntiki wa xkʼulantik resibir ja lekil kʼujolal mi xbʼajintik bʼa wantik yabʼjel stsamalil ja wego. Sok la gustoʼaxukotik* yuja smajlajel kiʼojtik bʼa oj yakitik jun chaʼan cholal ja Dyosi. 3 Sok cha la gustoʼaxukotik* ja yajni wa x-ekʼ jbʼajtik wokoli, yujni wa xnaʼatik ke ja wokoliki wa skoltayotik bʼa oj kuchkujtik;* 4 jaxa yajni wa xkuchkujtiki wa skoltayotik bʼa lek ayilotik ja Dyosi; ja lek wa xyilawotik ja Dyosi wa skoltayotik bʼa oj ajyukujtik smajlajel, 5 sok jaxa smajlajeli mi xya jtekʼtik kʼixwel;* yujni ja Dyosi wa xya makunuk ja yipi* sok wa xyakitik bʼa sjejel wani syajtayotik.

6 Iday, yajni mulanumotikto,* ja Kristo cham yuj winike bʼa mi xiwyeyuj ja Dyosi ja bʼa tyempo tsaʼubʼali. 7 Jelni wokol oj yal jun kristyano ke oj cham yuj jun tojil winik, pe bʼobʼta ay maʼ puesto oj cham yuj jun lekil winik. 8 Pe ja Dyosi jach sjeʼunejkitik ja syajal skʼujoli: yajni mulanumotikto, ja Kristo cham yuj keʼntik. 9 Sok jaxa wego bʼa aljita kʼotelotik toj yuja xchikʼeli, mastoni ay rason bʼa oj jtaʼ jkoltajeltik ja bʼa stajkelal ja Dyos yuj yeʼna. 10 Pes yujkʼa soka xchamelal ja Yunini kaʼatik kulan soka Dyos ja yajni jkontratikto ajyi, mastoni ay rason bʼa oj jtaʼ jkoltajeltik ja wego yuja sakʼanil yaʼa ja Yunini yujni kaʼatikta kulan soka Dyosi. 11 Sok mi kechanuk ja jaw, cha wani la gustoʼaxitik yuja Dyosi stsʼakatal ja Kajwaltik Jesukristo, pes yuj yeʼna ja wego kaʼatikta kulan soka Dyosi.

12 Ja yuj tak, yuj kechanta jun winik, ja mulali och ja bʼa luʼumkʼinali sok jaxa mulali yiʼajan ja chamelali, sok jach spuku sbʼaj ja chamelal bʼa yibʼanal ja kristyanoʼi, yujni yibʼanale staʼunej smule... 13 Yujni ayxa ja mulal ja bʼa luʼumkʼinal bʼajtantoyuj oj ajyuk ja Leyi, pe mini maʼ wa xbʼobʼ lexukyi jun smul yajni mey ley. 14 Pes ja chamelali yeʼn kʼulwani mandar desde Adán man Moisés, asta kʼulajiye mandar ja matik mi sleʼunej smule jastal sleʼa smul ja Adán, ja maʼ ojni slajtik ja maʼ oj jakuki.

15 Pe ja majtanali* mini jachukuk jastal ja mulali. Pes ta jitsan chamye yuj smul kechanta jun winik, mastoni jitsanbʼi bʼa jitsan kristyano ja lekil kʼujolal mi xbʼajixi bʼa Dyosi sok ja majtanal yaʼa yuja lekil kʼujolal mi xbʼajixi bʼa jun ita winik, ja Jesukristo. 16 Chomajkil, mini junukxta wa x-ekʼ soka majtanal* yaʼa ja Dyos ke yuja jas ekʼ soka smul jun winik: pes yuj jun mulal ikʼwani och bʼa oj aljuk ay smul yibʼanal ja kristyano, pe ja majtanal aji yuja jitsan mulali wa x-ikʼwani och bʼa oj aljuk ke kʼotele toj jitsan kristyano. 17 Pes yuj smul jun winik ja chamelali kʼulwani mandar. Pe ja lekil kʼujolal mi xbʼajixi bʼa Dyosi sok ja majtanal* bʼa kʼotel toj mastoni ekʼxel sok jelni lek juntiro. Ja matik wa x-ajiyile ja jastik it ojni ajyuke sakʼan stsʼakatal ja Jesukristo, sok oj yaʼe mandar jastal rey.

18 Ja yuj tak, jastalni yuj jun mulal alji ke ayni smule ja tuktukil tikʼe kristyano, cha jachni ekʼ ja yajni kʼulaxi jun jasunuk bʼa toj, yujni ja tuktukil tikʼe kristyano cha bʼobʼ alxuk kʼotele toj sok oj ajyuke sakʼan. 19 Pes jastalni jitsan kʼotye mulanumik yuja mi kʼuʼabʼal ajyi jun winik, cha jachni jitsan oj kʼotuke toj yuja kʼuʼabʼal ajyi jun winik. 20 Iday, kʼotni ajuk ja Ley bʼa oj snaʼe kʼinal jelni jitsan ja smuleʼi. Pe ja bʼa jel ajyi ja mulali mastoni jitsanbʼi ja lekil kʼujolal mi xbʼajintiki. 21 ¿Sok jas xchol? Pes jachuk, jastalni ja mulal skʼulan mandar soka chamelali, cha jachni ja lekil kʼujolal mi xbʼajintiki oj skʼul mandar yuja jas toji. Sok ja it oj ikʼwanuk bʼa sakʼanil bʼa tolabida stsʼakatal yuja Kajwaltik Jesukristo.