Mateo

5 Yajni ja Jesús yila jel ja kristyano, tixa kʼe ja bʼa sbʼalanil ja witsi. Sok yajni ochta kulani, ti mojxiyejan ja snebʼumaniki. 2 Tixa kʼe kʼumanuka sok och sjeyile. Ti yala yabʼyeʼa:

3 «Jel gusto wa x-ajyiye ja matik tʼabʼan skʼujole bʼa tʼilan oj snebʼ-e sbʼaja Dyosi,* yujni yeʼn sbʼaje ja Gobyerno bʼa satkʼinali.

4 Jel gusto wa x-ajyiye ja matik triste aye, yujni oj ajuk kulan skʼujole.

5 Jel gusto wa x-ajyiye ja matik manso, yujni oj sbʼajuke ja luʼumi.

6 Jel gusto wa x-ajyiye ja matik jel sganaʼe oj kʼulaxuk ja bʼa toji, yujni oj ajukyile tsʼikan lek ja bʼa toji.

7 Jel gusto wa x-ajyiye ja matik ay syajulal skʼujole, yujni oj jejukyile yajulal kʼujolal.*

8 Jel gusto wa x-ajyiye ja matik mi kuxuk ja skʼujole, yujni oj yil-e ja Dyosi.

9 Jel gusto wa x-ajyiye ja matik wa sleʼawe lamanili, yujni oj aljuk yabʼye yuntikil Dyos.

10 Jel gusto wa x-ajyiye ja matik ijita spatike yuj skʼulajel ja bʼa jas toji, yujni yeʼn sbʼaje ja Gobyerno bʼa satkʼinali.

11 Jel gusto la ajyiyex yajni ja kristyano wa xyutajex, wa xyiʼaja patikex sok wa sleʼawe abʼal yaljel jastik mi lekuk bʼa weʼnlex yuja jnebʼumanexi. 12 Ajyanik gusto, chananik yuja gustoʼili, yujni jel niwan jawa tsʼakolex ja bʼa satkʼinali, pes jachni cha iji spatike ja alumanik ajyiye sakʼan bʼajtanto yuja weʼnlexi.

13 Weʼnlex ja atsʼam ja bʼa luʼumi. Pe ta chʼay ja yip ja atsʼami, ¿jastal oj kumxuk ja xchiʼili? Mixani xmakuni, sbʼajxani sjipjel ele sok bʼa oj sbʼatalaʼuke ja kristyano.

14 Weʼnlex ja ijlabʼ ja bʼa luʼumkʼinali. Mini xbʼobʼ nakʼxuk jun chonabʼ yajni tey bʼa sniʼ ja witsi. 15 Mini maʼ wa stsana jun kandil sok wa snuju moʼoch,* pes tini wa xyaʼa bʼa steʼil ja kandili bʼa oj yijlabʼuk ja matik teye bʼa naʼitsi. 16 Junxta soka it, awik lijpuk jawa wijlabʼex bʼa stiʼ sat ja kristyano. Jachuk oj yil-e ja jastik lek waxa kʼulanexi sok oj stoy-e jawa Tatex tey bʼa satkʼinali.

17 Moka pensaraʼukex ta jakyon xchʼayjel ja Leyi ma ja jas yalawe ja Alumaniki. Ja keʼn jakyon bʼa oj ka kʼotuk, sok mi bʼa oj jchʼaye. 18 Ja keʼn wani xkalawabʼyex: bʼajtanto oj chʼayuk ja satkʼinal soka luʼumi, mini oj chʼay jun yal chʼin letra sok mini jun yal xen letra ja bʼa Leyi masan oj chʼak kʼulaxuk yibʼanal ja jastik it. 19 Ja yujil, ja maʼ wa skʼoko june ja bʼa smandarik mas chʼini sok wa sjeʼayi bʼa junxta oj skʼuluke ja tuki mini xbʼobʼ ochuk ja bʼa Gobyerno bʼa satkʼinali. Pe ja maʼ wa skʼuʼan sok wa sjeʼayi ja tuki ojni bʼobʼ ochuk ja bʼa Gobyerno bʼa satkʼinali. 20 Wa xkalawabʼyex: ta mi mas tojukex* yuja jeʼumanik bʼa leyi sok ja fariseoʼiki, mini nunka oj ochanik ja bʼa Gobyerno bʼa satkʼinali.

21 Awabʼyexta ja jas alji yabʼye ja matik ekʼpaxtawujilexi: ‹Mok milwanan, pe ja matik wa xmilwani ojni waj ya kuenta soka yal tsome juesiki›. 22 Pe ja keʼn wa xkalawabʼyex: spetsanil ja maʼ tajkel ay soka yermano ojni waj ya kuenta soka yal tsome juesiki.* Sok jaxa maʼ jel kistal xyutaj ja yermano ojni waj ya kuenta soka Niwan Tsome Juesiki.* Pe spetsanil ja maʼ wa xyala yabʼ ‹¡Mi la makuni sok jel sonsoʼa!› wani slejel oj wajuk ja bʼa skʼajkʼal ja Gehena.*

23 Ja yujil, ta wana yijel och jawa majtan ja bʼa altari sok ja tiw xjula kʼujol kʼeʼela kʼumal soka wa wermano, 24 aʼakan jawa majtan bʼa stiʼ ja altari, sok kaʼax. Aʼa kulan bʼajtan soka wa wermano, tixa la kumxiʼa sok aʼa jawa majtani.

25 Ta juna kontra xyiʼaja bʼa matik ay yaʼtel, leʼa modo stojbʼesel yajni bʼejto ayexi, bʼaxama lek jawa kontra xyaʼawa bʼa skʼabʼ ja juesi, jaxa juesi oj yaʼa bʼa skʼabʼ ja stalnanum ja matik ay yaʼteli sok jaxa weʼn oj chʼikjan preso. 26 Ja keʼn wani xkalawabʼi: mini oj elan ja tiwi masan xa tupukan ja último peso.*

27 Awabʼyex ja jas alji: ‹Moka chʼaykʼujoluk ja nupaneli›.* 28 Pe ja keʼn wa xkalawabʼyex: spetsanil ja maʼ mi xyaʼakan skʼeljel jun ixuk sok wa x-och kʼankʼunukyuj, kotanisok mulal* ja ixuk jaw ja bʼa skʼujoli. 29 Ja yujil, yujkʼa ja stojola sat wan slokjela wok,* bʼoyo ele sok jipa-el najat. Masni lek oja chʼay jun parte ja bʼa wa kuerpo yuj yibʼanal ti oj jipjuk bʼa yoj Gehena.* 30 Chomajkil, yujkʼa ja stojola kʼabʼ wan slokjela wok,* kʼutsu ele sok jipa-el najat. Masni lek oja chʼay jun parte ja bʼa wa kuerpo yuj yibʼanal ti oj wajuk bʼa Gehena.*

31 Chomajkil alxi: ‹Spetsanil ja maʼ wa skʼutsu ja snupanel soka xcheʼumi ayayi jun sjuʼunil* bʼa skʼutsjel nupanel›. 32 Pe ja keʼn wa xkalawabʼyex: spetsanil ja maʼ wa skʼutsu ja snupanel soka xcheʼumi, pe ja cheʼumali mi yuj koʼ mulalsok ixuk winik,* peligroni wa xya ajyuk ja xcheʼumi bʼa oj xchʼaykʼujoluk ja nupaneli. Jaxa maʼ wa xnupani soka ixuk jawi cha wani xchʼaykʼujolan ja nupaneli.

33 Cha awabʼyex ja jas alji yabʼye ja matik ekʼpaxtawujilexi: ‹Mok wa och testigoʼil ja Dyos ta mi oj wa kʼot merani; akʼotuk ja jas waxa kʼapayi ja Jyoba›.* 34 Pe ja keʼn wa xkalawabʼyex: mok wa ochukex testigoʼil ja Dyosi, mini bʼa satkʼinal, yujni jaʼa strono ja Dyosi; 35 mini bʼa luʼum, yujni jaʼa sbankoʼil bʼa wa xjijli ja yoki; mini bʼa Jerusalén, yujni jaʼa xchonabʼ ja niwan Reyi. 36 Cha mok wa och testigoʼil ja Dyos ja bʼa wa wolomi, yujni mi xbʼobʼ wa sakbʼuk ma yajel kʼikʼbʼuk jun stsoʼotsil awolom. 37 Ta kechanta awala ‹ojo›, yujni ojoʼa, sok ta awala ‹miyuk›, pes yujni miyuka. Yujni ja maʼ mi xya kʼotuk ja jas wa xyala tini wa xjak bʼa Maʼ jel malo.

38 Chomajkil awabʼyex ja jas alji: ‹Satal sok satal, ejal sok ejal›. 39 Pe ja keʼn wa xkalawabʼyex: moka lajabʼajsok ja maʼ malo. Ta yujkʼa ay maʼ spochowi ja bʼa stojola choji, cha sutuyi ja juni. 40 Ta ay maʼ wa skʼana oj yiʼa och bʼa juesik bʼa oj yikan ja yojola kʼuʼi, cha akanyi jawa pal kʼuʼi. 41 Ta june maʼ ay xchol stʼenawa oj aʼtijanansok jun kilometro,* kʼulan chabʼ kilometro. 42 Ja maʼ ay jas wa skʼanawi, ayi. Jaxa maʼ ay jas wa sjelawi,* moka komabʼaj bʼa oja wayi.

43 Awabʼyex ja jas alji: ‹Yajtay jawa moji sok ilkʼujolan jawa kontra›. 44 Pe ja keʼn wa xkalawabʼyex: moka waʼexkan syajtajel jawa kontraʼexi sok yajelyi orasyon sbʼaja matik wa xyiʼaja patikexi. 45 Jach oja jeʼex yuntikilex jawa Tatex tey bʼa satkʼinali, yujni ja yeʼn wa xya eluk ja kʼaʼuji sbʼaja matik leki sok sbʼaja matik malo, sok wa xya koʼyi jaʼ ja matik toji sok mi tojuki. 46 Yujni ta jaʼ waxa yajtayex ja matik wa syajtayexi, ¿jasa wa tsʼakolex waxa bʼajinexi? ¿Mi maʼ cha jach wa skʼulane ja tsoma kontribusyoni? 47 Sok ta kechan waxa wawexyi dyos jawa wermanoʼexi, ¿jel maʼ chaʼanyabʼalil ja it? ¿Mi maʼ cha jach wa skʼulane ja matik mi israʼelenyoʼuki? 48 Ja yujil, aʼajyuk tsʼikan ja syajala kʼujolexi jastalni tsʼikan ja smodo jawa Tatex bʼa satkʼinali».