1 Pedro

4 Yuja yiʼaj wokol ja Kristo ja yajni kristyanoto, cha chapabʼajik ja weʼnlexi bʼa oja pensaraʼukex jastalni wa spensaraʼan ja Kristo; yujni chikan maʼ yiʼajta wokol wa sjeʼa yaʼatakan ja mulali 2 bʼa jachuk oj ajyuk sakʼan bʼa skʼulajel ja jas wa skʼana ja Dyosi bʼa snajtil ja sakʼanili, sok mixa ajyel sakʼan sbʼaja jas wa xkʼankʼuniyuj ja winikeʼi. 3 Yujni jitsanxa tyempo ekʼta bʼa wanex skʼulajel ajyi ja jas wa skʼana ja chonabʼiki, bʼa ti ajyiyex chʼikan skʼulajel kistal modoʼalik jel kʼixwela sbʼaj,* jelxelxa ja kʼankʼunelik bʼa mi lekuki, jelxelxa yujel, kʼinik bʼa jelxelxa, kʼinik bʼa yujel sok stoyjel kʼulubʼal dyosik* bʼa wa xyijnay ja Dyosi. 4 Ja yeʼnleʼi jel cham xyilawe yuja mixa xa mojtayex mas ja bʼa kistal sakʼanil yiʼojeʼi,* sok ja yuj mini tʼun lek wa staʼawex tiʼal. 5 Pe ja kristyanoʼik it ojni kʼanjukyile kuenta yuja maʼ chapan ay bʼa skʼulajel jusgar ja matik sakʼani sok ja matik chameleʼi. 6 Pes ja yuj cha cholji yabʼye ja lekil rasonik ja chamwinikeʼi,* bʼa jachuk ama ja bʼa stiʼ sat ja winikeʼi wa xkʼulajiye jusgar yuja splantaʼe, pe ja bʼa stiʼ sat ja Dyosi ja yeʼnleʼi ojni bʼobʼ yiʼe ja sakʼanile bʼa tojubʼale yuja yipi.*

7 Pe jelxa mojan ja xchʼakelal yibʼanal ja jastik junuki. Ja yujil, tsʼikan aʼajyuk jawa pensarexi sok ajyanik kʼelan jakan soka orasyoni. 8 Pe cha jelni tʼilan oja yajtabʼajex meran lek, yujni ja yajalkʼujoli wa smusu jitsan mulal. 9 Aʼajyuk jamana kʼujolex soka tuki sok moka waʼex parte.* 10 Chikan jastal ja don akʼubʼalawilex kada jujune, awik makunuk bʼa oja koltabʼajex jastal lekil mayordomoʼik sbʼaja lekil skʼujol mi xbʼajintik ja Dyosi bʼa wa x-ilxi bʼa tuktukil modo. 11 Ta ay maʼ wa xkʼumani, a-skʼuluk jastal maʼ wa xya ekʼuk ja rasonik jakel bʼa Dyosi. Sok ta ay maʼ wa skoltay ja tuki, a-skʼuluk jastal maʼ wa sjipa skʼujol ja bʼa ipal wa xyaʼa ja Dyosi, bʼa jachuk ja Dyosi oj toyjuk bʼa yibʼanal ja jastiki stsʼakatal yuja Jesukristo. Yeʼnani sbʼaj ja toyjelal sok ja ipal bʼa tolabida. Amén.

12 Kala kermano jumasaʼ, mok chama wilex ja pruebaʼik wan ekʼelabʼajex bʼa oj slaj jastal kʼakʼ, bʼa lajansok wan ekʼelabʼajex jun jasunuk bʼa mi xa naʼawex sbʼaj. 13 Jaʼuktoma, moka waʼexkan ajyel gusto yuja wanex yijel ja junxta wokol yiʼaj ja Kristo, bʼa jachuk oj cha ajyanik gusto sok jelni oj gustoʼaxanik juntiro ja yajni xchijkaji ja stoyjelali. 14 Ta wanex kʼakʼlajel* yuja sbʼiʼil ja Kristo, gustoni ayex, yujni ja yip ja Dyos* sok ja stoyjelali tini aya mokex.

15 Pe mini june ja bʼa weʼnlexi mok yiʼ wokol yuj milwanel, yuj elkʼanel, yuj slejel smul ma yuj xchʼikjel sbʼaj bʼa jastik mi xyochelan. 16 Pe ta ay june wa xyiʼaj wokol yuja kʼotel snochuman Kristo, mokni kʼixwuk; mas lek, mok yakan yajelyi stoyjel ja Dyos yuja yiʼoj ja bʼiʼilal it. 17 Yujni jaʼ it ja styempoʼil tsaʼubʼal bʼa oj kʼe kʼulwanuk jusgar ja Dyosi, sok jani wan stuljelyi soka snaji. Pe ta keʼn kʼe skʼulukotik jusgar bʼajtan, ¿jastal maʼ oj eluke kʼot ja matik mi kʼuʼabʼaluke soka lekil rasonik bʼa Dyosi? 18 «Sok ta wokolxta wa xkoltajikan ja maʼ toji, ¿jas maʼ oj ekʼ sbʼaj ja matik mi xiwyeyuj ja Dyosi sok ja mulanumi?». 19 Ja yuj tak, ja matik wane yijel wokol jastalni wa skʼana ja Dyosi aya sbʼaje bʼa skʼabʼ ja Kʼuluman maʼ jel toji malan wane skʼulajel ja bʼa jas leki.