Mateo

10 Anto tixa stsomo ja 12 snebʼumaniki sok yayi ja ipal bʼa oj yawe eluk ja pukujiki.* Sok chomajkil bʼa stojbʼesel tuktukil tikʼe chamel sok tuktukil tikʼe syajal.

2 Jaʼ it ja sbʼiʼile ja 12 sjekabʼanumi: bʼajtan, jaʼa Simón (ja maʼ wa x-aji sbʼiʼiluk Pedro) sok ja yermano Andrés; ja Santiago sok ja yermano Juan, ja yuntikil ja Zebedeo; 3 ja Felipe sok ja Bartolomé; ja Tomás sok ja Mateo ja tsoma kontribusyoni; ja Santiago ja yunin ja Alfeo; sok ja Tadeo; 4 ja Simón ja Cananita,* sok ja Judas Iscariote (ja maʼ xchʼaykʼujolan tsaʼan ja Jesús).

5 Ja Jesús sjeka ja 12 sjekabʼanumik soka tojelalik it: «Mok wajanik ja bʼa bʼej wa x-ikʼwani bʼa tuk chonabʼik sok mok ochanik bʼa mini jun chonabʼ ja bʼa Samaria. 6 Mas lek, kax leʼawik tikʼanxta ja yal chʼayel chejik ja bʼa chonabʼ Israel. 7 Cholowik jachuk ja yajni wajumexi ‹Mojxita ja Gobyerno bʼa satkʼinali›. 8 Tojbʼesik ja matik maloʼayi, awik sakʼwuk* ja chamwiniki, tojbʼesik ja matik ayiʼoj lepra,* awik eluk ja pukujiki. Kʼebʼubʼal ajiwilex, cha kʼebʼubʼal aʼawik. 9 Moka wiʼex och takʼin bʼa oro mini bʼa plata mini bʼa kobre ja bʼa wa sinchoʼexi, 10 cha moka wiʼex jun morral bʼa jastika bʼajex ja bʼa bʼeji, mini pilana* kʼuʼex, ma wa warachex ma wa bordonex; pes sbʼejni oj ajukyi swaʼel ja aʼtijumi.

11 Yajni la ochyex bʼa jun chonabʼ ma bʼa jun komon, leʼawik ekʼ man xa taʼawex ja maʼ wa sbʼajin ja rasoni, sok kananik tiw man la elyex ja bʼa lugar jawi. 12 Yajni wala ochyex bʼa jun naʼits, awikyi dyos ja matik tey tiwi. 13 Ta ya ochanik, aʼajyukyujile ja lamanil waxa kʼanawexi; pe ta mi ya ochanik, akumxuka bʼajex ja lamanil jawi. 14 Pe ta bʼa jun naʼits ma bʼa jun chonabʼ mi xya ochanik sok mi smaklaye ja jas waxa walawexi, yajni la elyex ja tiwi tsijunikan ja spolboʼil jawa wokexi. 15 Wani xkalawabʼyex meran lek: mastoni peor ja jas oj ekʼ sbʼaj ja chonabʼ jaw ja bʼa Kʼakʼu yajelyi kuenta ja Dyosi* yuja bʼa slujmal ja Sodoma sok ja Gomorra.

16 ¡Kʼelawik! Wa xjekawex jastal yal chejik bʼa yoj snalan ja loboʼik.* Ja yuj kʼelawik lek kʼinal jastal ja bʼitsʼbʼichani, pe cha ajyanik manso* jastal ja palomaʼiki. 17 Talnabʼajik soka kristyanoʼiki, yujni oj yaʼex bʼa skʼabʼ ja juesik bʼa lugari sok oj yawilex tsʼuʼum* ja bʼa naʼitsik wa stsomo sbʼajeʼi. 18 Sok yuja jnebʼumanexi, oj ijanik bʼa stiʼ sat ja mandaranumik sok ja reyiki. Jachuk oj makunuk bʼa oj kʼot snaʼe jbʼaj ja yeʼnle sok ja chonabʼiki. 19 Pe yajni la ajiyex bʼa skʼabʼeʼi, mok ochuka pensarex ja bʼa jas oja walexi ma jastal oja walex, pes yajni xkʼot ja styempoʼili ojni ajuka naʼex ja jas oja walexi. 20 Yujni mi kechan weʼnlex oj kʼumananik: ja yip* jawa Tatexi ojni ya jaka kʼujolex ja jas oja walexi. 21 Chomajkil, ja kristyano oj yaʼ ja yermano bʼa oj miljuk, cha jachni ja tatal soka skeremi, jaxa untiki oj skontraʼuke ja snantateʼi sok oj yaʼe miljel. 22 Spetsanil ja kristyano oj yilkʼujolukex yuja jbʼiʼili. Pe ja maʼ wa xkuchyuj* man xjak ja chʼakelali ojni staʼ skoltajel. 23 Yajni x-iji apatikex bʼa jun chonabʼ, pakawik ajnel bʼa pilan; yujni wa xkalawabʼyex meran lek: mini oj chʼaka bʼejtayex yibʼanal ja chonabʼik bʼa Israel bʼajtantoyuj oj juluk ja Yunin ja Winiki.*

24 Jun nebʼuman mi mas ekʼxel yuja smaestro, cha mini ja moso yuja yajwali. 25 Jun nebʼuman junxta oj iljuk* jastal ja smaestro sok junxtani oj iljuk ja mosoʼal jastal ja yajwali. Yujkʼa ja kristyano yawe sbʼiʼiluk Satanás* ja yajwalil ja naʼitsi, ¿jastalni mi jach oj cha ajuk sbʼiʼiluk ja matik tey bʼa snaji? 26 Ja yuj mokni xiwanikyujile, yujni mi jas nakʼan ay bʼa mi oj chijkajuk, cha mini jas chʼabʼan ay bʼa mi oj kʼot naxuk. 27 Ja jas nakʼul wa xkalawabʼyexi, alawik yabʼye ja tuki; sok ja jas chʼabʼanxta wa xkalawabʼyexi, cholowik masan bʼa yolom naʼits. 28 Sok mok xiwanikyuj ja maʼ wa smila ja kuerpoʼali pe mi xbʼobʼ smil ja sakʼanili.* Mas lek, xiwanikyuj ja maʼ wa xbʼobʼ xchʼaysnajel ja sakʼanil sok ja kuerpoʼal ja bʼa Gehena.* 29 ¿Anke wani xchonxi chabʼ yal chanik yuj jun yal sat takʼin?* Pe tikʼa koʼ luʼum june bʼa yeʼnle, jawa Tatexi wani snaʼa. 30 Pe ja weʼnlexi, asta kuenta ay yibʼanal ja stsoʼotsil jawa wolomexi. 31 Ja yuj mok xiwanik. Ja weʼnlexi masto baleʼex yuj jitsan yal chanik.

32 Chikan maʼ xyala bʼa stiʼ sat ja kristyano tey bʼa jparte, ja keʼni ojni cha kal teyon bʼa sparte ja bʼa stiʼ sat ja jTat tey bʼa satkʼinali. 33 Pe chikan maʼ wa xyala mi snaʼa jbʼaj ja bʼa stiʼ sat ja kristyano, ja keʼn ojni cha kal mi xnaʼa sbʼaj ja bʼa stiʼ sat ja jTat tey bʼa satkʼinali. 34 Moka pensaraʼukex ta jak kaʼ ajyuk lamanil ja bʼa luʼumi; mini jak kaʼ ajyuk lamanil, kechani kʼumal.* 35 Yujni jak pilwanukon: ja uninali oj skontraʼuk ja stati, ja akʼixi oj skontraʼuk ja snani jaxa alibʼali oj skontraʼuk ja yalibʼ ixuki. 36 Jachukniʼa, ja skontra jun kristyano tini oj ajyuk bʼa yoj snaj. 37 Ja maʼ mas jel yaj wa xyila ja stat ma ja snan yuja keʼni mini sbʼajin oj kʼot jnebʼuman; jaxa maʼ mas jel yaj wa xyila ja skerem ma ja yakʼix yuja keʼni mini sbʼajin oj kʼot jnebʼuman. 38 Ja maʼ mi xyiʼaj ja sposte bʼa yijel wokol* sok mi snochowon mini sbʼajin oj kʼot jnebʼuman. 39 Ja maʼ wa sleʼa modo skoltajel ja sakʼanili ojni xchʼaye, jaxa maʼ wa xchʼaya ja sakʼanil yuj keʼna ojni cha staʼe.*

40 Ja maʼ wa skʼulanex resibiri cha wani skʼulanon resibir, jaxa maʼ wa skʼulanon resibir ja keʼni cha wani skʼulan resibir ja Maʼ sjekawoni. 41 Ja maʼ wa skʼulan resibir jun aluman yuja kʼotel alumanili ojni yiʼ ja stsʼakol bʼa jun aluman; jaxa maʼ wa skʼulan resibir june maʼ toj yuja kʼotel jun winik toji ojni yiʼ ja stsʼakol bʼa jun winik toj. 42 Wa xkalawabʼyex ja smeranili: ja maʼ wa xyayi ama jun baso cheʼil jaʼ june ja bʼa yal nuxik it yuja jnebʼumani ja yeʼni ojni yiʼ ja stsʼakoli».