Efesios

3 Ja yuj tak, ja keʼn ja Pablo, presoʼanum bʼa Kristo Jesús bʼa wa lekilalex, ja weʼnlex ja matik mi judíoʼukex. 2 Sen awabʼyexta ke ajiki ja cholal kʼotel jastal jun mayordomo sbʼaja lekil skʼujol mi xbʼajintik ja Dyosi bʼa alekilal weʼnlex, 3 bʼa aji jnaʼ ja jas jel chaʼanyabʼal wa xjak bʼa Dyosi,* jastalni jtsʼijbʼantawilex tʼusan. 4 Jachuk, yajni xa kʼumanex ja iti, oja waʼabʼajex kuenta ja janekʼ wa xkabʼ stojol ja jas jel chaʼanyabʼal wa xjak bʼa Dyos* sbʼaja Kristo. 5 Bʼa tuk lame kristyanoʼik, ja yuntikil ja kristyano mini aji snaʼe ja it jastalni ajita snaʼe ja wego yuja yip ja Dyos* ja matik tsaʼubʼale, ja jekabʼanumik sok ja alumanik: 6 ke ja matik mi judíoʼuki, yuja lajanxa aye soka Kristo Jesús sok stsʼakatal ja lekil rasoniki, junxta oj ajukyile ja sdoteʼe sok junxta kuerpo oj kʼotuke sok oj ajukyile ja junxta jastik junuk skʼapunejkitikon ja Dyosi. 7 Ja keʼn kʼotyon aʼtijum sbʼaja it jastalni ajiki ja majtanal* sbʼaja lekil skʼujol mi xbʼajintik ja Dyosi stsʼakatal ja jas wa skʼulan ja yipi.

8 Ja keʼn, bʼa mas skoʼelalon yuja maʼ ijtsʼinal bʼa yibʼanal ja matik tsaʼubʼalexa sbʼaja Dyosi, jejiki ja lekil skʼujol it mi xbʼajintik ja Dyosi bʼa oj cholyabʼ ja chonabʼik ja lekil rasonik sbʼaja jitsan srikesaʼil* sbʼaja Kristo 9 sok jachuk oj ka yil-e jastal ja Dyos, ja maʼ skʼulan yibʼanal ja jastik junuki, wan xchiktesel sok wan skʼulajel ja jas jel chaʼanyabʼal jakel bʼa yeʼn* bʼa ajyiyuj nakʼan jitsan tyempo. 10 Ja jaw ekʼi bʼa jachuk ja wego ja gobyernoʼik sok ja matik ay xchole ja bʼa lugarik bʼa satkʼinali oj snaʼe yuja kongregasyon ja sbiboʼil ja Dyos bʼa wa xchijkaji bʼa tuktukil modo. 11 Ja it akuerdoni ay soka jas wa skʼana oj skʼuluk bʼa mi xchʼaki bʼa tini chʼikan ja Kristo, ja Kajwaltik Jesusi. 12 Yuj yeʼna wala kʼumanitik jaman lek sok wani xbʼobʼ mojxukotik jaman lek soka Dyosi sok mini la xiwtik, pes wani xkʼuʼantik bʼa Kristo.* 13 Ja yuj wa xkʼanawilex mok eluka ganaʼex yuja wokolik wa xkiʼaj yuj weʼnlex, pes yuja jastik it wani xkʼot toyjanik.

14 Yuja jawi wala koʼyon mekʼan bʼa stiʼ sat ja Tatali, 15 stsʼakatal ja yeʼn sakʼan aye spetsanil pamilya ja bʼa satkʼinal sok ja bʼa luʼumi. 16 Wa xkayi orasyon, bʼa jachuk yuja niwan stoyjelal, ja yeʼn oj yakan ayijbʼuk ja jastalex ja b’a wa kʼujolexi yuja ipal wa xyaʼa ja yipi* 17 sok bʼa jachuk, yuja skʼuʼajela wiʼojexi, aʼajyuk bʼa wa kʼujolex ja Kristo sok yajalkʼujolal. Cha wani xkayi orasyon bʼa jachuk tsʼunan lek oj ajyanik sok yij lek oj ajyanik ja bʼa skujlayubʼili, 18 bʼa jachuk ja weʼnlexi lajan soka matik tsaʼubʼalexa sbʼaja Dyosi oja wabʼyex lek stojolil ja skʼatanili, ja snajtili, ja xchaʼanil bʼa kʼeʼeli sok ja xchaʼanil bʼa koʼeli, 19 sok bʼa oja naʼex sbʼaja syajal skʼujol ja Kristo bʼa mastoni wa x-ekʼxi yuja snajeli, bʼa jachuk oj yawilex ja Dyos yibʼanal ja lekil smodoʼiki.

20 Ja Dyos, jastalni wan aʼtel ja yip bʼa keʼntik, meran lek mastoni wa x-ekʼxi skʼulajel yuj yibʼanal ja jastik junuk wa xkʼanatik ma ja jas wa x-ekʼ bʼa jpensartiki. 21 Ja yuj ayiʼ stoyjelal bʼa tolabida yuja kongregasyon sok yuja Kristo Jesús yuj yibʼanal ja lame kristyano. Amén.