Hebreos

11 Ja skʼuʼajeli jani ajyel seguro lek bʼa oj ekʼuk ja jas wan majlaxeli, ja preba bʼa wani xya jkʼuʼuktik lek* bʼa ayni meran jastik junuk bʼa mi x-ilxi. 2 Yuja jaw, ja winike bʼa tyempo najate* alji yabʼye bʼa lekni wa x-iljiye yuja Dyosi.

3 Yuja skʼuʼajeli, wa xkʼot jnatik ke ja jastal wa xtax ja tyempoʼiki* akʼubʼalkan xchojlal yuja yabʼal ja Dyosi, ja yuj ja jas wa x-ilxi kʼotelni ajyuk yuja jastik mi x-ilxi.

4 Yuja skʼuʼajeli, ja Abel skʼapayi ja Dyos jun majtanal bʼa masto chaʼanyabʼalil ke yuja bʼa Caín. Yuja skʼuʼajel jaw aljiyabʼ kʼotelni toj, pes ja Dyos lekni yila ja majtanalik yaʼa. Sok ama chami, wantoni xkʼumani yuja skʼuʼajel yiʼoji.

5 Yuja skʼuʼajeli, ja Enoc iji-el bʼa mi oj yil ja chamelali, sok mini maʼ bʼobʼ staʼ yujni iji-el yuja Dyosi. Sok bʼajtanto oj ijuk ele, aljiyabʼ ke lek wa x-ilji yuja Dyosi. 6 Chomajkil, ta june mey yiʼoj skʼuʼajel, mini xbʼobʼ ya gustoʼaxuk ja Dyosi, yujni ja maʼ wa xmojxi soka Dyosi tʼilani oj skʼuʼuk ke sakʼan ay sok wa xyayi stsʼakol ja matik kongana wa xlejiyuji.

7 Yuja skʼuʼajeli, ja Noé sjeʼa xiwyuj ja Dyos sok ya kʼe jun arka bʼa skoltajel ja spamilya yajni aljita yabʼ yuja Dyos bʼa jastik mito ilubʼaluk. Yuja skʼuʼajel jawi, ja yeʼn xchiktes wani sbʼajin oj chʼaysnajel ja luʼumkʼinali sok alji kʼotel toj stsʼakatal yuja skʼuʼajeli.

8 Yuja skʼuʼajeli, ja Abrahán skʼuʼan ja yajni kʼanjiyi oj eluki, sok jaxa yeʼn waj bʼa jun lugar bʼa oj ajukyi jastal sdote. Ja yeʼn eli ama mini snaʼa bʼa wajuma. 9 Yuja skʼuʼajeli ti ajyi jastal june maʼ bʼa pilan país ja bʼa luʼum kʼapubʼalyiʼi, bʼa lajansok majani luʼum ay ja bʼayi. Tini ajyiye bʼa naʼitsik bʼa karpa soka Isaac sok ja Jacob, bʼa cha wani sbʼajine ja dote kʼapjiyi ja yeʼni. 10 Yujni ja yeʼn jani wan smajlajel ja chonabʼ bʼa ayiʼoj meran skujlayubʼili ja it yeʼn xchapunej* ja Dyos sok yaʼunej kʼeʼuk.

11 Yuja skʼuʼajeli, ja Sara cha ajiyi ipal bʼa oj kan embarazada,* ama ekʼtani ja styempoʼil bʼa oj yil yuntikil, yujni yila kʼotel toj ja Maʼ kʼapjiyiyuji. 12 Ja yujil, bʼa jun winik bʼa lajansok chamelxa ajyi kʼot ajyuk jitsan yuntikil, jelni jitsan juntiro jastal ja kʼanalik bʼa satkʼinali sok mini xbʼobʼ axuk kuenta jastal ja arena ja bʼa stiʼ mari.

13 Yibʼanal ja yeʼnle chamye sok jun skʼuʼajel bʼa tsats lek, anima mi skʼulane resibir ja jastik kʼapjiyileʼi. Pe najatni yilawe sok gustoxta skʼulane aseptar, sok yalawe jaman lek tini sbʼaje bʼa pilan país sok ekʼum bʼej aye ja bʼa luʼumi. 14 Sok ja matik jach wa xkʼumaniyeʼi wani xchiktese lek kongana wane slejel jun slugare. 15 Sok lekbʼi mi yaʼawekan spensarajel ja bʼa lugar elyeʼi, sen ojni staʼe modo oj kumxuke ajyi. 16 Pe ja wego wani skʼujolane bʼa oj staʼe jun lugar bʼa masto lek, wa xkʼan alxuk, jun lugar yiʼoj ja satkʼinali. Ja yujil, ja Dyosi mini xkʼixwi yuj yeʼnle sok mini ja yajni wa xyalawe sDyose, pes xchapunejyile jun xchonabʼe.

17 Yuja skʼuʼajeli, yajni aji och probar ja Abrahán, lajansok skʼapani ja Isaac, jachukniʼa, ja winik maʼ gustoxta skʼulan resibir ja skʼapjelaliki sleʼa modo skʼapjel ja único yunini, 18 ama alubʼal yabʼi: «Tini oj eljan bʼa Isaac ja maʼ oj aljuka wintili». 19 Pe ja yeʼn kʼotni yabʼ stojol ke ja Dyos ojni bʼobʼ ya kʼejan asta ja bʼa chamwiniki, sok ja yeʼn skʼulani resibir ja bʼa chamwiniki pe jach kechanta jun senya.

20 Yuja skʼuʼajeli, ja Isaac cha ya koʼyi slekilal ja Jacob sok ja Esaú sbʼaja jastik ojtoni ekʼuki.

21 Yuja skʼuʼajeli, yajni ojxta chamuk ja Jacob, ya koʼyi slekilal kada jujune ja yuntikil ja José sok stoyo ja Dyos yajni yipunej sbʼaj soka yolom ja sbordoni.

22 Yuja skʼuʼajeli, yajni ojxta chamuki, ja José staʼa tiʼal sbʼaja yajni x-elye ja bʼa Egipto* ja yuntikil ja Israel sok yaʼa tojelalik* bʼa oj ijuk ja sbʼakeli.*

23 Yuja skʼuʼajeli, ja snantat ja Moisesi snakʼawe oxe ixaw ja yajni pojki,* yujni yilawe ke kʼotel jun yal tsamal kerem sok mi xiwyeyuj ja smandar ja reyi. 24 Yuja skʼuʼajeli, yajni niwanxa ja Moisés, mini skʼana oj aljukyabʼ skerem ja yakʼix ja faraón. 25 Jani stsaʼa oj ixtalajuk soka xchonabʼil ja Dyos sok mi jaʼuk yabʼjel stsamalil chabʼ oxe kʼakʼu ja mulali, 26 yujni yila ke ja kʼixwel yiʼaj jastal Maʼ tsaʼubʼal* kʼotelni jun rikesaʼil masto ekʼxel ke yuja jastik junuk jel chaʼanyabʼal yiʼoj ja Egipto, pes yujni jaʼ wajel sat ja bʼa stsʼakol oj ajukyiʼi. 27 Yuja skʼuʼajeli, sjipakan ja Egipto sok mini tʼun xiw yuja stajkelal ja reyi, pes yujni kuchyuj smajlajel sok pasensya bʼa lajansok wani yiljel ja Maʼ mi xbʼobʼ ilxuki. 28 Yuja skʼuʼajeli, skʼulan ja Pascua* sok stsijunyi chikʼ ja smarkoʼil ja puertaʼiki, bʼa jachuk ja chʼakwanumi mi jas oj skʼulyi ja maʼ bʼajtan alatsyujileʼi.

29 Yuja skʼuʼajeli, ja chonabʼi skʼutsu ja mar Rojo bʼa lajansok tini wane bʼejyel bʼa takin luʼum. Pe yajni ja egipcioʼik sleʼawe modo jach oj cha skʼuluke, musjiyekan yuja mari.

30 Yuja skʼuʼajeli, ja chonabʼi yaʼawe buelta juke kʼakʼu bʼa sjoyanal ja sbardaʼil ja Jericó sok chʼak jemuk. 31 Yuja skʼuʼajeli, ja Rahab ja maʼ wa xchono sbʼaji mini lajan cham soka matik mi kʼuʼabʼal ajyiyeʼi, yujni skʼulan resibir ja tsʼelsatinumik bʼa jun modo laman.

32 ¿Sok jasto mas oj kale? Pes yujni mixa oj yaki tyempo stajelawilex tiʼal sbʼaja Gedeón, sbʼaja Barac, sbʼaja Sansón, sbʼaja Jefté sok David, sok cha jachuk sbʼaja Samuel sok ja tuk alumaniki. 33 Stsʼakatal yuja skʼuʼajeli sjipawe luʼum gobyernoʼik, skʼulane ja bʼa stojolil, ajiyile skʼapjelalik, slutuweyi stiʼ ja choj jumasaʼ, 34 stupuwe ja yip ja kʼakʼi, elye libre bʼa mi oj miljuke sok espada, ajyini yipe ja yajni mixa ay yipeʼi, ajyi yipe ja bʼa guerra sok yawe spak ajnel ja skontraʼanume soldadoʼiki. 35 Ajyi ixuke bʼa aji kumxukyile ja spamilyaʼe bʼa chamelexa stsʼakatal yuja sakʼwelali, pe ajyi winike bʼa ixta iljiye yujni mi skʼanawe oj eluke libre ama kʼan ajukyile jun stsʼakole, bʼa jachuk oj staʼe jun sakʼwelal bʼa masto lek. 36 Jachukniʼa, tuk stekʼawe burlaʼik sok tsʼuʼum,* sok mi kechanuk ja jawi, cha mochjiye kadena sok chʼikjiye preso. 37 Chʼojiye ton, aji ochuke probar, kʼutsjiye bʼa chabʼ pedaso* sok miljiye sok espada, wajye bʼa tuktukil lado jach lapanyujile stsʼujmil chej sok stsʼujmil chibo, ekʼyujile nesesida, yiʼaje wokol sok ixtalajiye, 38 sok ja luʼumkʼinali mini sbʼajin oj ajyukyuj ja winike jaw. Ajyiye ekʼ bʼa desierto, bʼa witsik sok bʼa kʼeʼenik bʼa luʼum sok bʼa patakʼ tonik.

39 Sok ama yuja skʼuʼajeleʼi yibʼanale alji yabʼye bʼa lekni wa x-iljiye yuja Dyosi, mini yilawe ja jas kʼapjiyile, 40 yujni ja Dyosi spensaraʼunejxa oj yakitik jun jasunuk bʼa masto lek, ja yuj mini xbʼobʼ kʼotuke toj mokxta keʼntik.