Hibru

7 Dispela Melkisedek em i king bilong Salem, na em i pris bilong God Antap Tru. Taim Abraham i daunim ol king pinis na i kam bek, Melkisedek i bungim em na i givim blesing long em. 2 Na Abraham i tilim ol samting long 10-pela hap na wanpela hap em i givim long em. Yumi tanim nem bilong Melkisedek olsem “King Bilong Stretpela Pasin,” na tu, em i king bilong Salem, mining bilong en, “King Bilong Bel Isi.” 3 Em i no gat papa na mama na lain tumbuna. I no gat stori bilong de mama i karim em na de em i dai.* Na em i bin kamap olsem Pikinini bilong God, na em i stap pris oltaim oltaim.

 4 Yupela i mas tingim dispela Melkisedek, em i gat biknem tru. Tumbuna papa Abraham i bin givim em namba 10 hap* bilong ol nambawan gutpela samting em i bin kisim long pait. 5 Ol man long lain bilong Livai em ol i kisim wok pris, ol i mas kisim namba 10 hap bilong ol samting long ol manmeri, olsem Lo i makim. Ol i mas kisim dispela long ol brata bilong ol, maski ol i pikinini bilong Abraham. 6 Tasol dispela man husat i no bin kamap long lain bilong Livai, em i bin kisim namba 10 hap long Abraham. Na em i givim blesing long Abraham, em man i bin kisim ol promis. 7 Olgeta manmeri i wanbel olsem man i givim blesing i winim man i kisim blesing. 8 Ol Livai i kisim namba 10 hap bilong ol samting na ol i man bilong i dai, tasol narapela man i kisim namba 10 hap, Rait Holi i tok long em olsem em i stap laip. 9 Na yumi inap tok olsem, Livai husat i save kisim namba 10 hap bilong ol samting, em tu i bin givim namba 10 hap bilong ol samting long rot bilong Abraham. 10 Long wanem, taim Melkisedek i bungim Abraham, Livai i stap yet long bodi* bilong tumbuna bilong en.

 11 Olsem na sapos ol manmeri inap kamap gutpela olgeta long rot bilong wok pris bilong ol Livai (long wanem, dispela wok pris em wanpela samting bilong Lo em God i bin givim long ol manmeri), orait bilong wanem narapela pris i mas kamap bihain, em i wankain olsem Melkisedek na i no wankain olsem Aron? 12 Sapos wok pris i senis, orait i mas i gat senis tu long lo. 13 Man em dispela stori i makim, em i bilong wanpela lain em ol i no bin mekim wok pris long alta. 14 Em i klia olsem Bikpela bilong yumi i kamap long lain bilong Juda. Tasol Moses i no bin stori liklik olsem dispela lain bai kamap pris.

 15 Na dispela i kamap klia moa yet taim i gat narapela pris i kamap na em i wankain olsem Melkisedek. 16 Em i kamap pris long rot bilong strong bilong laip i no inap bagarap, na i no long rot bilong wanpela lo i makim olsem ol pris i mas kamap long wanpela lain. 17 Wanpela hap bilong Rait Holi i tok long em olsem: “Yu stap pris inap oltaim oltaim, wankain olsem Melkisedek.”

 18 God i rausim dispela lo i kamap pastaim, long wanem, dispela lo i no gat strong na i no inap mekim gut wok. 19 Lo i no bin mekim wanpela samting i kamap gutpela olgeta. Tasol samting God i bin kamapim i gutpela moa, em samting yumi bilip na wet long en, dispela i mekim ol samting i kamap gutpela olgeta. Na long rot bilong en, yumi go klostu long God. 20 Na tu, God i bin mekim tok tru antap 21 (tru tumas, i gat ol man i kamap pris na God i no bin mekim tok tru antap long ol, tasol i gat wanpela man em God i bin mekim tok tru antap long em, olsem: “Jehova i mekim tok tru antap na em i no inap senisim tingting bilong em, ‘Yu stap pris inap oltaim oltaim’ ”), 22 olsem na Jisas i kamap man i strongim dispela kontrak i gutpela moa. 23 Bipo planti i bin kamap pris, tasol ol i no inap stap pris longpela taim, long wanem, ol i save dai na narapela i mas kisim ples bilong ol. 24 Tasol Jisas i stap oltaim oltaim, olsem na i no gat wok long narapela i kisim ples bilong em na mekim wok pris. 25 Olsem na em inap tru long kisim bek ol manmeri i kam long God long rot bilong em, long wanem, oltaim em i stap laip bai em i ken beten bilong helpim ol.

 26 I stret yumi gat kain hetpris olsem. Em i save bihainim tok bilong God, em i no save mekim pasin nogut, em i klin olgeta, em i stap longwe long ol sinman, na em i stap antap moa winim skai. 27 Long olgeta de ol hetpris i save ofaim sakrifais bilong karamapim sin bilong ol yet na bihain ol i save ofaim sakrifais bilong karamapim sin bilong ol manmeri. Tasol Jisas i no gat wok long mekim olsem. Em i mekim ofa wanpela taim tasol, taim em i givim em yet olsem sakrifais. Na ofa bilong em i bilong helpim ol manmeri inap oltaim oltaim. 28 Lo i save makim ol man i gat sin long kamap hetpris. Tasol tok tru antap i kam bihain long Lo, em i makim Pikinini long kamap hetpris, dispela Pikinini em i kamap gutpela olgeta inap oltaim oltaim.