Kisim Bek

25 Orait Jehova i tokim Moses: 2 “Tokim ol manmeri bilong Israel long bungim ol samting na givim olsem kontribiusen long mi; kisim ol dispela samting long olgeta man em bel bilong ol i kirapim ol long givim ol samting.+ 3 Dispela em ol kontribiusen yupela i mas kisim long ol: gol,+ silva,+ kopa,+ 4 blupela tret, pepol wul,* retpela tret,* gutpela linen, gras bilong meme, 5 ol skin bilong sipsip man em ol i daim long retpela kala, ol skin bilong animal sil,* diwai akas,+ 6 oil bilong ol lam,+ balsam* oil bilong wokim oil holi+ na bilong paura i gat gutpela smel,+ 7 na ol ston oniks* na ol arapela ston bilong putim long ifot*+ na liklik laplap bilong bros.+ 8 Yupela i mas wokim wanpela ples holi bilong mi na bai mi stap namel long yupela.+ 9 Yupela i mas wokim dispela haus lotu sel na olgeta samting bilong en, na bihainim stret plen* bilong en em mi bai soim yu.+

10 “Yupela i mas wokim wanpela bokis long diwai akas. Longpela bilong en i mas 2 na hap kiubit* na bikpela bilong en i mas 1 na hap kiubit, na em i mas go antap inap 1 na hap kiubit.+ 11 Na yupela i mas karamapim insait na ausait bilong dispela bokis long gutpela gol.+ Na yupela i mas raunim arere bilong maus bilong bokis wantaim bilas yupela i wokim long gol.+ 12 Na yupela i mas wokim 4-pela ring gol na pasim ol antap long 4-pela lek bilong bokis. Tupela ring i mas stap long wanpela sait bilong bokis na narapela 2-pela ring long narapela sait. 13 Na yupela i mas kisim diwai akas na sapim 2-pela longpela stik na karamapim long gol.+ 14 Na yupela i mas putim dispela 2-pela longpela stik i go insait long ol ring long 2-pela sait bilong Bokis Kontrak bilong karim Bokis Kontrak. 15 Oltaim dispela 2-pela longpela stik i mas stap wantaim ol ring bilong Bokis Kontrak; yupela i no ken kamautim ol.+ 16 Mi bai givim yu 2-pela fletpela ston em mi raitim ol tok bilong mi long en, na yu mas putim insait long dispela Bokis Kontrak.+

17 “Yupela i mas wokim ai bilong bokis long gutpela gol. Longpela bilong en i mas 2 na hap kiubit na bikpela bilong en i mas 1 na hap kiubit.+ 18 Yupela i mas kisim gol na yusim hama long wokim 2-pela serap* antap long ai bilong bokis long 2-pela sait.+ 19 Wokim 2-pela serap na putim ol long 2-pela sait. Wanpela serap bai stap long rait sait, na narapela bai stap long left sait. 20 Ol serap i mas opim 2-pela wing bilong ol i go antap na haitim ai bilong bokis.+ Tupela i mas feisim narapela narapela. Na 2-pela i mas brukim skru na daunim pes i go daun long ai bilong bokis. 21 Yu bai putim ai bilong Bokis Kontrak antap long bokis,+ na insait long Bokis Kontrak yu bai putim dispela 2-pela fletpela ston i gat ol tok bilong mi long en. 22 Bai mi kamap long yu antap long ai bilong bokis na toktok wantaim yu.+ Na namel long 2-pela serap i stap antap long Bokis Kontrak, bai mi tokim yu long olgeta tok em yu mas tokim ol Israel long en.

23 “Yupela i mas wokim tu wanpela tebol+ long diwai akas. Longpela bilong en i mas 2-pela kiubit na bikpela bilong en i mas 1-pela kiubit na em i mas go antap inap 1 na hap kiubit.+ 24 Yupela i mas karamapim dispela tebol long gutpela gol na raunim arere bilong en long bilas yupela i wokim long gol. 25 Yupela i mas wokim sait bilong tebol, bikpela bilong en inap olsem sais bilong 4-pela pinga* na yupela i mas raunim arere bilong en long bilas yupela i wokim long gol. 26 Na yupela i mas wokim 4-pela ring bilong dispela tebol long gol. Na pasim ol dispela ring long 4-pela kona long hap we 4-pela lek i join wantaim tebol. 27 Ol ring i mas stap klostu long sait bilong tebol na bai ol inap putim ol longpela stik i go insait long ol ring bilong karim tebol. 28 Na yupela i mas kisim diwai akas na sapim 2-pela longpela stik na karamapim long gol. Na yupela i mas yusim ol dispela stik long karim tebol.

29 “Yupela i mas wokim ol dis, ol kap, na ol jak na ol boul bilong tebol, em ol bai yusim bilong mekim ofa bilong kapsaitim wain. Yupela i mas wokim ol dispela samting long gutpela gol.+ 30 Na oltaim yupela i mas putim bret i save stap long ai bilong mi long dispela tebol.+

31 “Yupela i mas kisim gutpela gol na wokim wanpela lamsten.+ Yupela i mas paitim dispela gol long hama na wokim lamsten. Dispela lamsten i mas i gat as na bun bilong en. Na bun bilong en i mas i gat ol han. Na long ol han, i mas i gat ol liklik lip,* ol kru bilong plaua, na ol plaua.+ 32 Dispela lamsten i mas i gat 6-pela han i join long bun bilong en. Tripela han i mas stap long wanpela sait na 3-pela long narapela sait. 33 Na long ol han i stap long wanpela sait i mas i gat 3-pela liklik lip i luk olsem plaua bilong diwai almon, na kru na plaua, wanpela i mas i stap paslain long narapela. Na long narapela sait, yupela i mas wokim wankain samting long ol han bilong en. Ol dispela 6-pela han i mas join olsem long bun bilong lamsten. 34 Na bun bilong lamsten i mas i gat 4-pela liklik lip i luk olsem plaua bilong diwai almon wantaim ol kru na plaua, wanpela i mas i stap paslain long narapela. 35 Wanpela kru i mas i stap aninit long 2-pela han i join long bun, na narapela kru aninit long narapela 2-pela han, na narapela kru aninit long narapela 2-pela han. I mas i gat 6-pela han i join long bun bilong en. 36 Yupela i mas kisim wanpela hap gutpela gol na paitim long hama+ na wokim dispela lamsten olgeta wantaim ol kru na ol han bilong en. 37 Yupela i mas wokim 7-pela lam bilong putim long dispela lamsten. Na taim ol dispela lam i lait, lait bilong ol i mas sut i go long fran bilong lamsten.+ 38 Yupela i mas kisim gutpela gol na wokim ol tong bilong holim wik na ol plet bilong putim wik.+ 39 Yupela i mas kisim 1-pela talen* bilong gutpela gol na wokim dispela lamsten na ol samting bilong en. 40 Yu mas bihainim stret plen* bilong wokim ol dispela samting olsem mi bin soim yu antap long maunten.+