Jop
12 Na Jop i bekim tok olsem:
2 “Tru tumas, ating yupela tripela tasol i gat olgeta save,
Na taim yupela i dai, bai yupela i karim olgeta savetingting i go wantaim yupela!
3 Tasol mi tu i gat save.*
Yupela i no winim mi liklik long wanpela samting.
Olgeta manmeri i save pinis long ol dispela samting yupela i bin toktok long en.
Ol i tok bilas long man i save bihainim stretpela pasin na i no gat asua.
5 Ol man i stap gut na i no gat hevi, ol i no laikim tru hevi,
Ol i ting i stret hevi i painim ol man i laik pundaun.
6 Haus sel bilong ol stilman i save stap gut,+
Na ol man i save mekim God i kros, sindaun bilong ol i gutpela,+
Em ol man i karim ol imis bilong ol long han bilong ol em ol i save lotuim.
7 Orait nau mi laik bai yu go askim ol animal na bai ol i skulim yu;
Na tu, askim ol pisin na ol bai tokim yu.
8 O yu skelim gut* graun na em bai skulim yu;
Na skelim gut ol pis i stap long solwara na ol bai tokaut long yu.
9 Olgeta dispela samting i save olsem
Jehova i wokim ol long han bilong em.
10 Laip bilong olgeta samting i gat laip i stap long han bilong em,
Na strong bilong laip bilong olgeta man tu.+
11 Tang bilong yumi i save teistim kaikai bilong painimaut sapos kaikai i gutpela o nogat.
Olsem tasol, yau bilong yumi i save harim ol toktok na skelim gut ol dispela tok.+
12 I tru, ol lapun i gat savetingting+
Na ol man i stap laip longpela taim ol i gat gutpela save.
13 Tasol God i gat savetingting na bikpela strong;+
Na samting em i tingting pinis long mekim, em i save mekim na em i kliagut long ol samting.+
14 Sapos em i brukim wanpela samting, orait i no gat man inap wokim gen;+
Na wanem samting em i pasim, i no gat man inap opim.
15 Sapos em i pasim ren, orait taim bilong biksan i kamap na graun i save drai olgeta;+
Na sapos em i salim ren i kam, orait ol wara i save tait moa yet na i karamapim graun.+
16 Em i gat bikpela strong na savetingting;+
Ol man i mekim sin na ol man i stiaim ol narapela long mekim sin, olgeta i stap long han bilong em;
17 Ol man i save givim tingting long ol narapela, em i save mekim ol i wokabaut lek nating,*
Na em i save mekim ol jas tu i kamap longlong.+
18 Em i save rausim ol king long wok bilong ol,+
Na em i save mekim ol i kamap wokboi nating.
19 Em i save mekim ol pris i wokabaut lek nating,+
Na ol man i gat namba, em i save rausim ol long wok bos bilong ol;+
20 Em i save pasim maus bilong ol edvisa em ol man i save trastim
Na em i save rausim gutpela tingting bilong ol lapun man;
21 Em i kapsaitim tok bilas antap long ol bikman,+
Na ol man i gat namba em i save pinisim strong bilong ol;*
22 Em i save kamapim long ples klia ol samting i stap long tudak,+
Na em i save mekim lait i kamap long ples i tudak tru;
23 Em i save mekim ol kantri i kamap strongpela kantri bai em i ken bagarapim ol;
Em i save mekim ol kantri i kamap bikpela bai em i ken bringim ol i go kalabus long arapela kantri.