Buk Song
Singsing bilong Devit.
144 Litimapim nem bilong Jehova, em i olsem Bikpela Ston bilong mi,+
Em i save skulim han bilong mi long pasin bilong pait,
Yes, em i save skulim ol pinga bilong mi long pasin bilong pait.+
2 Em i save soim gutpela pasin laikim* long mi na em i olsem strongpela banis bilong mi,
Na em i strongpela ples hait bilong mi na man bilong kisim bek mi,
Em i olsem hap plang bilong mi long pait na Man mi save go long en bilong hait,+
Em Man i putim ol manmeri i stap aninit long mi.+
3 O Jehova, man em i wanem samting na yu save tingim em?
Na pikinini bilong man em i wanem samting na yu save lukautim em?+
4 Man i olsem win i kamap long maus tasol;+
Em i save stap sotpela taim tasol olsem sedo i kamap na i go pinis.+
6 Mekim laitning i sut i go na rausim nabaut ol birua bilong mi;+
Sutim ol spia bilong yu i go na mekim ol i paul nabaut.+
7 Putim han bilong yu i kam daun;
Kisim bek mi long wara i dip,
Na kisim bek mi long han bilong ol man bilong narapela ples,+
8 Ol dispela man i save mekim tok giaman
Na ol i save giaman na apim rait han bilong ol na mekim tok tru antap.*
9 O God, mi bai singim nupela song long yu.+
Mi bai pilaim instramen i gat 10-pela string na singim ol song bilong preisim* yu,
10 Yu dispela Man i save helpim ol king long winim pait,+
Na yu dispela Man i bin lukautim Devit, wokman bilong yu, na bai ol manmeri i no ken kilim em i dai long bainat.+
11 Kisim bek mi long han bilong ol man bilong narapela ples,
Ol dispela man i save mekim tok giaman
Na ol i save giaman na apim rait han bilong ol na mekim tok tru antap.
12 Yu mekim olsem na ol pikinini man bilong mipela bai kamap olsem ol diwai i kamap bikpela pinis,
Na ol pikinini meri bilong mipela bai olsem ol pos i bilasim kona bilong haus bilong king.
13 Na ol haus bilong mipela em mipela i save putim ol kaikai, ol bai pulap long olkain kaikai;
Ol bulmakau na sipsip bilong mipela bai i kamap planti moa yet olsem planti planti tausen.
14 Na ol bulmakau bilong mipela i gat bel, ol bai karim gut pikinini na i no gat wanpela pikinini bai bagarap o lus long bel;
Long ol rot bilong mipela, bai i no gat wanpela man o meri i krai long pen na hevi.
15 Ol manmeri em ol dispela samting i kamap long ol, ol i ken amamas!
Na ol manmeri God bilong ol em Jehova, ol i ken amamas!+