Kisim Bek
6 Orait Jehova i tokim Moses olsem: “Nau bai yu lukim samting mi bai mekim long Fero.+ Long strong bilong mi, mi bai mekim em i larim ol manmeri bilong mi i go. Na long strong bilong mi, mi bai mekim em i rausim yupela long kantri bilong em.”+
2 Na God i tokim Moses olsem: “Mi Jehova. 3 Bipo mi save kamap long Abraham, Aisak, na Jekop na ol i save long mi olsem God i Gat Olgeta Strong.+ Tasol mi no kamapim klia nem bilong mi, Jehova,+ long ol.+ 4 Na mi bin wokim kontrak wantaim ol long givim graun bilong Kenan long ol. Ol i bin stap long dispela ples, tasol em i no graun bilong ol.+ 5 Mi harim krai bilong ol manmeri bilong Israel, em ol Isip i mekim ol i wok hat nogut tru, na mi tingim gen dispela kontrak bilong mi.+
6 “Olsem na yu mas tokim ol Israel olsem, ‘Mi Jehova, mi bai kisim yupela long han bilong ol Isip husat i mekim yupela i wok hat na mi bai kisim bek yupela na yupela bai i no inap wok kalabus moa.+ Na mi bai opim han bilong mi na kisim bek yupela na mekim save long ol Isip.+ 7 Na bai mi mekim yupela i kamap lain manmeri bilong mi, na mi bai stap God bilong yupela.+ Na bai yupela i save olsem mi Jehova, mi God bilong yupela. Mi bai bringim yupela i go na yupela i no inap wok kalabus moa long Isip. 8 Na mi bai bringim yupela i go long dispela graun mi bin mekim tok tru antap* long givim long Abraham, Aisak, na Jekop. Na mi bai givim dispela graun long yupela na em bai stap graun bilong yupela.+ Mi Jehova+ mi tok olsem.’”
9 Bihain Moses i go na givim dispela tok long ol Israel, tasol ol i no laik harim tok bilong Moses, bikos ol i bel hevi, na bikos ol i wok hat nogut tru olsem ol sleiv.+
10 Bihain Jehova i tokim Moses olsem: 11 “Yu go tokim Fero, king bilong ol Isip, long em i mas larim ol Israel i go na lusim dispela kantri bilong em.” 12 Tasol Moses i bekim tok long Jehova olsem: “Lukim! Ol Israel i no harim tok bilong mi,+ olsem na hau bai Fero i harim tok bilong mi? Mi no inap toktok gut.”*+ 13 Tasol Jehova i tokim gen Moses na Aron long tok ol i mas givim long ol Israel na long Fero, king bilong Isip, na bai tupela i ken bringim ol Israel i go lusim Isip.
14 Ol dispela man ol i stap het bilong lain bilong ol tumbuna papa bilong ol: Ol pikinini bilong Ruben, fesbon pikinini man bilong Israel+ em Hanok, Palu, Hesron, na Karmi.+ Ol lain tumbuna pikinini bilong Ruben i kamap long ol dispela lain.
15 Ol pikinini man bilong Simeon em Jemuel, Jamin, Ohat, Jakin, Sohar, na Saul. Mama bilong Saul em i wanpela meri Kenan.+ Ol lain tumbuna pikinini bilong Simeon i kamap long ol dispela lain.
16 Ol lain tumbuna pikinini bilong Livai+ i kamap long ol dispela pikinini man bilong em: Gerson, Kohat, na Merari.+ Livai i stap inap 137 yia.
17 Ol pikinini man bilong Gerson em Lipni na Simei. Ol tumbuna pikinini bilong Gerson i kamap long dispela 2-pela lain.+
18 Ol pikinini man bilong Kohat em Amram, Ishar, Hebron, na Usiel.+ Kohat i stap inap 133 yia.
19 Ol pikinini man bilong Merari em Mali na Musi.
Ol lain tumbuna pikinini bilong Livai i kamap long ol dispela lain.+
20 Amram i maritim Jokebet.+ Jokebet em i susa bilong papa bilong Amram. Bihain Jokebet i karim Aron na Moses.+ Amram i stap inap 137 yia.
21 Ol pikinini man bilong Ishar em Kora,+ Nefek, na Sikri.
22 Ol pikinini man bilong Usiel em Misael, Elsafan,+ na Sitri.
23 Aron i maritim Eliseba, pikinini bilong Aminadap. Eliseba em i susa bilong Nason.+ Eliseba i karim Nadap, Abihu, Eleasar, na Itamar.+
24 Ol pikinini man bilong Kora em Asir, Elkana, na Abiasap.+ Ol tumbuna pikinini bilong Kora i kamap long ol dispela lain.+
25 Eleasar,+ pikinini man bilong Aron, i maritim wanpela pikinini meri bilong Putiel. Bihain em i karim Finias.+
Dispela em ol hetman bilong ol lain tumbuna pikinini bilong Livai long wan wan klen bilong ol.+
26 Moses na Aron i kamap long dispela lain. Na Jehova i tokim tupela olsem: “Yutupela i mas kisim ol manmeri bilong Israel na bringim ol i go lusim Isip olsem wanpela bikpela lain ami long wan wan grup.”+ 27 Moses na Aron+ i bin toktok wantaim Fero, king bilong Isip, long larim ol Israel i go lusim Isip.
28 Long taim Jehova i toktok long Moses long Isip, 29 Jehova i tokim Moses olsem: “Mi Jehova. Olgeta tok mi givim yu, yu mas tokim Fero, king bilong Isip.” 30 Na Moses i tokim Jehova: “Lukim! Mi no inap toktok gut,* olsem na hau bai Fero i harim tok bilong mi?”+