Namba

11 Ol manmeri i komplein nogut tru long Jehova. Na Jehova i harim na em i belhat long ol na Jehova i salim paia i kam daun, na paia i kukim sampela manmeri long arere bilong kem. 2 Na ol manmeri i singaut long Moses i mas helpim ol, na Moses i beten strong long Jehova,+ na paia i dai. 3 Olsem na ol i kolim nem bilong dispela ples Tabera,* bikos Jehova i bin salim paia i kam kukim ol.+

4 Ol manmeri bilong ol arapela kantri+ i go wantaim ol Israel ol i komplein long kisim kaikai ol i laikim tumas,+ na ol Israel tu i wok long krai na tok olsem: “Husat bai givim mipela mit long kaikai?+ 5 Mipela i tingim taim mipela i bin stap long Isip, mipela i save kaikai pis em mipela i kisim nating. Na mipela i save kisim ol kukamba, ol melen, ol anian, na galik.+ 6 Tasol nau strong bilong mipela i pinis. I no gat narapela kaikai, em dispela mana tasol i stap.”+

7 Mana+ em i olsem sid bilong korienda,*+ na lukluk bilong en i olsem delium.* 8 Ol manmeri i save spred aut na kisim mana na ol i memeim long ston o paitim paitim insait long ston dis. Na ol i save boilim long sospen o ol i save kisim na wokim ol raunpela bret.+ Teis bilong en i olsem switpela bret ol i tanim wantaim oil. 9 Taim wara bilong nait i pundaun long kem long nait, mana i save kam daun wantaim.+

10 Olgeta wan wan man i sanap wantaim famili bilong ol long dua bilong haus sel bilong ol na ol i wok long krai i stap na Moses i harim. Na Jehova i belhat nogut tru+ long ol na Moses tu i no amamas long ol. 11 Orait Moses i tokim Jehova olsem: “Wai na yu givim hevi long mi wokman bilong yu? Mi mekim wanem na yu no amamas long mi na yu putim hevi bilong ol dispela manmeri long mi?+ 12 Olsem wanem? Mi kamapim olgeta dispela manmeri long bel bilong mi? Mi no mama na mi karim ol, olsem na wai na yu askim mi long wok olsem wasmama na karim ol long bros bilong mi i go long dispela graun em yu bin mekim tok tru antap long givim long ol tumbuna bilong ol?+ 13 Ol dispela manmeri i wok long krai na tokim mi olsem, ‘Givim mipela mit long kaikai!’ Tasol bai mi kisim mit we na givim ol? 14 Mi wanpela tasol i no inap lukautim olgeta dispela manmeri. Em bikpela wok tumas.+ 15 Sapos yu laik mekim olsem long mi, orait mobeta yu kilim mi i dai nau tasol.+ Sapos yu amamas long mi, orait no ken larim mi hatwok moa long karim hevi.”

16 Orait Jehova i bekim tok long Moses olsem: “Yu mas kisim 70 man namel long ol hetman bilong ol Israel. Yu mas kisim ol man em yu save olsem ol i stap hetman na lida bilong ol manmeri+ na bringim ol i kam long haus sel bilong bung, na ol i mas sanap wantaim yu. 17 Na bai mi kam daun+ na toktok wantaim yu.+ Na bai mi kisim sampela strong bilong spirit mi bin givim long yu+ na bai mi givim long ol. Na ol i ken helpim yu long karim hevi bilong ol dispela manmeri, na bai yu wanpela tasol i no ken karim hevi bilong ol.+ 18 Na yu mas tokim ol manmeri olsem, ‘Yupela i mas redi* bilong tumora,+ long wanem, yupela bai kaikai mit. Jehova i harim pinis krai bilong yupela.+ Yupela i bin tok: “Husat bai givim mipela mit long kaikai? Mipela i bin stap gut long Isip.”+ Orait harim, Jehova bai givim yupela mit na bai yupela i kaikai.+ 19 Bai yupela i kaikai mit, i no long 1-pela de o 2-pela de o 5-pela de o 10-pela de o 20 de, 20 nogat, bai yupela i kaikai mit inap wanpela mun olgeta. Bai yupela i kaikai i go inap yupela i les tru* na em bai kamap samting i nogut tru long yupela.+ Jehova i stap namel long yupela, tasol yupela i bin sakim em, na yupela i wok long krai long ai bilong em na tok olsem: “Watpo mipela i bin lusim Isip na i kam?”’”+

21 Orait Moses i tok olsem: “Namba bilong ol soldia em inap olsem 600,000,+ na yu bin tok, ‘Bai mi givim mit long ol long kaikai inap wanpela mun olgeta’! 22 Sapos mipela i kilim i dai olgeta sipsip na bulmakau, ating dispela bai inap long ol, a? O sapos mipela i kisim olgeta pis bilong solwara, ating dispela bai inap long ol, a?”

23 Na Jehova i bekim tok long Moses olsem: “Yu ting han bilong Jehova i sot, a?+ Orait nau bai yu lukim samting mi tok long en, em bai kamap o nogat.”

24 Orait Moses i go na tokim ol manmeri long tok Jehova i mekim. Na em i kisim 70 man namel long ol hetman bilong ol manmeri na em i tokim ol long sanap raunim haus sel bilong bung.+ 25 Bihain Jehova i stap long klaut+ na i kam daun na toktok wantaim Moses.+ Na em i kisim sampela strong bilong spirit+ em i bin givim long Moses na em i givim long olgeta wan wan bilong ol dispela 70 hetman. Taim dispela spirit i kam stap long ol, inap sotpela taim tasol ol i mekim pasin wankain olsem ol profet.*+

26 Tasol tupela bilong ol dispela hetman, em Eldat na Medat, ol i no go long haus sel bilong bung. Nem bilong tupela i stap long lista bilong ol dispela hetman. Tupela i stap yet long kem na spirit bilong God i kam i stap long tupela. Na tupela i mekim pasin wankain olsem ol profet insait long kem. 27 Na wanpela yangpela man i ran i go tokim Moses olsem: “Eldat na Medat i mekim pasin wankain olsem ol profet insait long kem!” 28 Na Josua,+ pikinini man bilong Nun, em wokman bilong Moses kirap long taim em i yangpela yet, em i tokim Moses olsem: “Bikman bilong mi, Moses, yu mas stopim tupela!”+ 29 Tasol Moses i tokim em: “Yu wari olsem dispela bai givim hevi long mi? Maski wari, mi laik bai Jehova i givim spirit bilong em long olgeta manmeri bilong Jehova na bai ol tu i mekim wok profet!” 30 Orait bihain Moses wantaim ol hetman bilong Israel i go bek long kem.

31 Orait Jehova i mekim win i kamap na i bringim ol pisin kweil* long hap bilong solwara na mekim ol i pundaun long kem.+ Ol i karamapim graun long sait sait bilong kem i go olgeta inap long mak em man inap wokabaut long en insait long wanpela de. Ol i hip i stap long graun inap long mak bilong 2-pela kiubit.* 32 So kirap long dispela de long san na nait olgeta na i go inap long neks de olgeta, ol manmeri i wok long bungim ol pisin kweil. Olgeta wan wan i bungim planti tru winim 10-pela homa.* Na ol i lainim ol pisin long graun long olgeta hap bilong kem. 33 Tasol paslain long ol i pinisim mit, Jehova i belhat long ol, na Jehova i kilim i dai planti manmeri tru.+

34 Olsem na ol i kolim nem bilong dispela ples Kibrot-hateiava,*+ bikos long dispela hap ol i bin planim ol manmeri husat i bin komplein long kisim kaikai ol i laikim tumas.+ 35 Bihain ol manmeri i lusim Kibrot-hateiava na ol i wokabaut i go olsem long Haserot. Na ol i wokim kem long Haserot.+