Jop
26 Na Jop i bekim tok olsem:
2 “Olaman, ating yu hapman tru bilong helpim man i no gat strong.
Na ating yu hapman tru bilong kisim bek man em strong bilong em i pinis.+
3 Na ating yu hapman bilong givim tingting long man i no gat savetingting.+
Olaman, ating yu hapman tru bilong autim savetingting.
4 Yu laik skulim husat?
Na husat i kirapim yu long kamapim kain tingting olsem?
5 Ol man i dai pinis i stap daunbilo tru winim solwara na ol samting i stap insait long en,
Ol man i dai, ol i no gat strong, ol i save pret na guria moa yet.
6 Ol man i stap long Matmat,* ol i no hait long ai bilong God,*+
Ol samting i stap long ples bilong bagarap* i stap ples klia long ai bilong God.
7 God i bin pulim na opim skai i go bikpela olsem laplap long spes nating+
Na em i mekim dispela graun i hangamap nating.
8 Em i putim wara long ol klaut bilong em na pasim wara i stap,+
Dispela wara i hevi tumas, tasol hevi bilong wara i no save brukim ol klaut.
9 Em i mekim klaut i kam na haitim sia king bilong em,
Em i karamapim sia king bilong em long ol klaut.+
10 Na em i putim mak* namel long skai na solwara.+
Na em i putim mak namel long tulait na tudak.
11 Taim em i kros, ol samting i sapotim skai i save seksek.
Na ol i save kirap nogut tru.
12 Long bikpela strong bilong em, em i save mekim biksi i kirap,+
Na long save bilong em yet, em i daunim traipela animal bilong solwara.*+
13 Em i save winim win bilong em na rausim ol klaut na skai i klia.
Na long han bilong em yet, em i bin sutim dispela snek i save muv isi tru.*
14 Harim! Ol dispela samting i liklik hap tasol bilong ol samting em i save mekim.+
Save yumi gat long em i liklik hap tasol.
Olsem na husat inap kliagut long hau em i save kamapim tanda.”+