Namba
33 Dispela em ol ples ol manmeri bilong Israel i go long en taim ol i lusim Isip+ na i go olsem wanpela lain ami.+ Na Moses wantaim Aron+ i bosim ol. 2 Jehova i tok na Moses i raitim nem bilong olgeta wan wan ples em ol Israel i go long en. Na dispela em nem bilong ol ples ol i bin lusim na go long narapela ples.+ 3 Ol i lusim Rameses+ long namba 15 de bilong namba 1 mun,+ em de bihain long Pasova.+ Ol Israel i strongim bel na ol i go long ai bilong ol Isip. 4 Long dispela taim ol Isip i wok long planim olgeta fesbon pikinini bilong ol em Jehova i bin kilim i dai,+ long wanem, Jehova i bin mekim save long ol god bilong ol.+
5 So ol Israel i lusim Rameses na ol i go wokim kem long Sukot.+ 6 Na ol i lusim Sukot na ol i go kamap long Etem,+ we i stap long arere bilong ples nating, na ol i wokim kem. 7 Bihain ol i lusim Etem na ol i go bek long Pihahirot. Long dispela hap ol inap lukim Bal-sefon.+ Na ol i wokim kem klostu long Mikdol.+ 8 Na ol i lusim Pihahirot na ol i brukim solwara+ na i go long ples nating.+ Na ol i wokabaut inap 3-pela de long ples nating bilong Etem+ na ol i go kamap long Mara na wokim kem.+
9 Bihain ol i lusim Mara na ol i go kamap long Elim. Elim i gat 12-pela hulwara na 70 diwai pam. Olsem na ol i wokim kem long dispela hap.+ 10 Na ol i lusim Elim na ol i go kamap klostu long Solwara Retsi na wokim kem. 11 Bihain ol i lusim Solwara Retsi na ol i go kamap long ples nating bilong Sin+ na wokim kem. 12 Na ol i lusim ples nating bilong Sin na ol i go kamap long Dopka na wokim kem. 13 Bihain ol i lusim Dopka na ol i go kamap long Alus na wokim kem. 14 Na ol i lusim Alus na ol i go kamap long Refidim+ na wokim kem. Dispela hap i no gat wara bilong ol manmeri i ken dring. 15 Bihain ol i lusim Refidim na ol i go kamap long ples nating bilong Sainai+ na wokim kem.
16 Na ol i lusim ples nating bilong Sainai na ol i go kamap long Kibrot-hateiava+ na wokim kem. 17 Bihain ol i lusim Kibrot-hateiava na ol i go kamap long Haserot+ na wokim kem. 18 Na ol i lusim Haserot na ol i go kamap long Ritma na wokim kem. 19 Bihain ol i lusim Ritma na ol i go kamap long Rimon-peres na wokim kem. 20 Na ol i lusim Rimon-peres na ol i go kamap long Lipna na wokim kem. 21 Bihain ol i lusim Lipna na ol i go kamap long Risa na wokim kem. 22 Na ol i lusim Risa na ol i go kamap long Kehelata na wokim kem. 23 Bihain ol i lusim Kehelata na ol i go kamap long Maunten Sefer na wokim kem.
24 Na ol i lusim Maunten Sefer na ol i go kamap long Harada na wokim kem. 25 Bihain ol i lusim Harada na ol i go kamap long Makhelot na wokim kem. 26 Na ol i lusim+ Makhelot na ol i go kamap long Tahat na wokim kem. 27 Bihain ol i lusim Tahat na ol i go kamap long Tera na wokim kem. 28 Na ol i lusim Tera na ol i go kamap long Mitka na wokim kem. 29 Bihain ol i lusim Mitka na ol i go kamap long Hasmona na wokim kem. 30 Na ol i lusim Hasmona na ol i go kamap long Mosera na wokim kem. 31 Bihain ol i lusim Mosera na ol i go kamap long Bene-jakan+ na wokim kem. 32 Na ol i lusim Bene-jakan na ol i go kamap long Hor-hagitgat na wokim kem. 33 Bihain ol i lusim Hor-hagitgat na ol i go kamap long Jotbata+ na wokim kem. 34 Na ol i lusim Jotbata na ol i go kamap long Abrona na wokim kem. 35 Bihain ol i lusim Abrona na ol i go kamap long Esion-geber+ na wokim kem. 36 Na ol i lusim Esion-geber na ol i go kamap long Kades long ples nating bilong Sen,+ na ol i wokim kem.
37 Bihain ol i lusim Kades na ol i go kamap long Maunten Hor,+ long boda bilong Idom, na ol i wokim kem. 38 Long de namba 1 bilong namba 5 mun, pris Aron i bihainim tok bilong Jehova na em i go antap long Maunten Hor na em i dai. Em i dai long namba 40 yia bihain long ol Israel i bin lusim Isip.+ 39 Aron i gat 123 krismas taim em i dai antap long Maunten Hor.
40 King bilong Arat,+ em man Kenan na em i save stap long Negev long graun bilong Kenan, em i harim tok long ol Israel i kam.
41 Bihain ol Israel i lusim Maunten Hor+ na ol i go kamap long Salmona na wokim kem. 42 Na ol i lusim Salmona na ol i go kamap long Punon na wokim kem. 43 Bihain ol i lusim Punon na ol i go kamap long Obot na wokim kem.+ 44 Na ol i lusim Obot na ol i go kamap long Aiya-abarim long boda bilong Moap+ na ol i wokim kem. 45 Bihain ol i lusim Aiyam* na ol i go kamap long Dibon-gat+ na wokim kem. 46 Na ol i lusim Dibon-gat na ol i go kamap long Almon-diplataim na wokim kem. 47 Bihain ol i lusim Almon-diplataim na ol i go kamap long ol ples maunten bilong Abarim+ klostu long Maunten Nebo+ na ol i wokim kem. 48 Na ol i lusim ol ples maunten bilong Abarim na ol i go wokim kem long ples nating bilong Moap long Wara Jordan klostu long Jeriko.+ 49 Na ol i stap yet long dispela hap na wokim kem klostu long Wara Jordan, kirap long Bet-jesimot i go inap long Abel-sitim+ long ples nating bilong Moap.
50 Jehova i toktok long Moses long ples nating bilong Moap long Wara Jordan klostu long Jeriko. Na em i tok: 51 “Yu mas tokim ol Israel olsem, ‘Taim yupela i brukim Wara Jordan na i go insait long graun bilong Kenan,+ 52 yupela i mas rausim olgeta manmeri bilong dispela ples na bagarapim olgeta ston kaving+ bilong ol na olgeta imis em ol i wokim long ain samting,+ na yupela i mas bagarapim olgeta ples lotu*+ bilong ol. 53 Na yupela bai kisim dispela graun na sindaun long en, long wanem, mi bai givim dispela graun long yupela na em bai kamap graun bilong yupela.+ 54 Yupela i mas pilai satu* bilong tilim graun+ bilong olgeta wan wan klen. Yupela i mas givim bikpela hap graun long lain i gat planti manmeri na givim liklik hap graun long lain i no gat planti manmeri.+ Wanem hap graun satu i makim bilong olgeta wan wan lain, orait em bai kamap graun bilong ol. Yupela bai kisim hap graun bilong yupela yet long ol traib bilong ol papa bilong yupela.+
55 “‘Tasol sapos yupela i no rausim ol manmeri bilong dispela graun i go,+ orait ol manmeri em yupela i larim i stap yet, ol bai stap olsem samting i sikirapim ai bilong yupela na olsem rop i gat nil i sutim sait bilong yupela. Na ol bai pait na givim hevi long yupela long dispela graun yupela bai stap long en.+ 56 Na bai mi mekim save long yupela olsem mi bin ting long mekim save long ol.’”+