Kisim Bek
1 Taim Jekop, narapela nem bilong em Israel, i go long Isip, olgeta pikinini man bilong em na ol famili bilong ol+ tu i go wantaim em. Nem bilong ol pikinini man bilong Jekop i olsem: 2 Ruben, Simeon, Livai, Juda,+ 3 Isakar, Sebulun, Benjamin, 4 Dan, Naptali, Gat, na Aser.+ 5 Olgeta manmeri i kamap long Jekop stret, ol inap 70 manmeri. Tasol Josep i stap pinis long Isip.+ 6 Bihain Josep na ol brata bilong em ol i dai+ na ol lain pipol bilong dispela taim ol tu i dai. 7 Na ol Israel* i karim planti pikinini na ol i kamap planti tru. Na ol i wok long kamap planti hariap tru na ol i kamap strongpela lain moa. Na ol i pulap long dispela hap.+
8 Planti yia bihain wanpela nupela king i kamap na bosim Isip. Na em i no save long Josep. 9 Na king i tokim ol lain bilong em olsem: “Harim! Ol lain bilong Israel ol i planti tru na ol i strong moa winim yumi.+ 10 Yumi mas mekim sampela samting long ol na bai ol i no ken kamap planti moa. Sapos pait i kamap, ol bai bung wantaim ol birua bilong yumi na pait long yumi na ol bai lusim kantri bilong yumi.”
11 Olsem na ol i makim ol bosman bilong givim hatpela wok long ol Israel na bai ol hetman i mekim ol i wok hat tru.+ Na ol i wokim tupela taun bilong Fero,* nem bilong tupela, em Pitom na Rameses.+ Dispela tupela taun i bilong bungim ol kaikai. 12 Tasol taim ol i wok long mekim nogut moa long ol Israel, ol Israel i wok long kamap planti moa yet na i go sindaun long olgeta hap bilong Isip. Olsem na ol Isip i pret nogut tru long ol Israel.+ 13 Na ol Isip i mekim ol Israel i wok hat nogut tru.+ 14 Na ol i mekim sindaun bilong ol Israel i kamap nogut moa yet. Ol i tokim ol long wokim ol brik* na simen bilong simenim ol brik, na tu, ol i tokim ol long wok hat long gaden. Ol Isip i mekim nogut tru long ol na fosim ol long mekim olkain hatpela wok.+
15 Bihain king bilong Isip i toktok wantaim tupela meri Hibru husat i save helpim ol meri long karim pikinini. Nem bilong tupela em Sifra na Pua. 16 Em i tokim ol olsem: “Taim yutupela i helpim ol meri Hibru long karim pikinini,+ na yutupela i lukim olsem meri i karim pikinini man, orait yutupela i mas kilim pikinini i dai. Tasol sapos em i pikinini meri, orait yutupela i no ken kilim pikinini i dai.” 17 Tasol dispela tupela meri i pret long God tru na tupela i no bihainim tok bilong king bilong Isip, nogat. Tupela i larim ol pikinini man i stap na tupela i no kilim ol i dai.+ 18 Bihain king bilong Isip i singautim dispela tupela meri i kam na askim ol olsem: “Wai na yutupela i larim ol pikinini man i stap?” 19 Na tupela i tokim Fero olsem: “Ol meri Hibru i no olsem ol meri Isip. Ol i strongpela meri na ol i save karim pikinini kwiktaim. Olsem na taim ol meri bilong helpim ol long karim pikinini i no kamap yet, ol i karim pikinini pinis.”
20 Olsem na God i mekim gut long dispela tupela meri. Na ol Israel i wok yet long kamap planti na ol i kamap strongpela lain. 21 Dispela tupela meri i bin pret long God tru, olsem na bihain God i mekim na tupela i karim ol pikinini. 22 Orait bihain Fero i tokim olgeta manmeri bilong em olsem: “Yupela i mas kisim ol nupela bebi boi bilong ol Hibru na tromoi long Wara Nail. Tasol yupela i mas larim ol bebi gel i stap.”+